عشق بطعم العلقم - علا فائق

19

" عشق بطعم العلقم " .

" بارت 19 " .

‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•

" في المستشفى "

‹•‹•‹•‹•‹•‹•‹•‹•‹•‹•‹•‹•‹

وصل رائد للـ مستشفى ، و نزلوا البنات ، و رائد راح يركن و رجعلهم على طول ، و طلعوا عشان يزوروا سيف ..

كان في حراسة عند غرفة سيف ، و اول لما شافوا رائد سمحوا له بـ الدخول ..

رائد دخل ، و بعده اسيا ، و بعدهم زهرة اللي كانت داخله لـ سيف بـ تردد و خجل ..

سيف كان قاعد نص قعدة على سريره ، و اتفاجأ بـ وجود اسيا ، و زهرة مع رائد في غرفته ..

وطى رائد ، و باس دماغ سيف و قال : الحمد لله على سلامتك يا صاحبي ..

سيف طبطب على كتفه و قال : الله يسلمك يا باشا ..

اسيا اتنحنحت بـ حرج و قالت : الحمد لله على سلامتك يا حضرت الظابط ..

سيف رد عليها بـ ابتسامة و قال : الله يسلمك يا اسيا هانم ، اتشرفت بـ زيارتك انتِ ، و الانسة زهرة ..

زهرة : الحمد لله على سلامتك يا سيف ..

سيف رد عليها بـ نفس النبرة الهادية و قال : الله يسلمك يا قمر ..

لاحظ رائد ان ريحة الحب و الا عجاب بـ تفوح من المكان فـ انتهز الفرصة و قال : القمر اتبرعتلك بـ كيس دم امبارح ..

سيف : ايه دا بجد ؟ ، انا مش عارف اقولك ايه ولله شكرا يا زهرة ، بجد شكرا عارف تعبتك معايا ..

زهرة : لا خالص ولله و لا يهمك ، اهم حاجه انك بخير ..

رائد : طيب هنزل انا و اسيا ، نجيبلكوا عصير و شوية حاجات كدا ، ماشي يا سيف مش هتأخر ..

سيف : ماشي يا باشا ، اتفضل ..

‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•

" في الاسفل "

‹•‹•‹•‹•‹•‹•‹•‹•‹•‹•‹•‹•‹

اسيا كانت قاعدة قصاد رائد على طرابيزة في الكافتيريا بتاعت المستشفى ، و كانت بـ تشرب عصير طلبه رائد ليها بعد اصرار شديد منه انها تشرب حاجة ..

بصلها رائد شوية ، و هو بـ يفكر في القرار اللي وصله بعد ليل طويل من التفكير في الخطر اللي بـ يحاوطه و بـ يحاوطها من كل اتجاه ، و اللي مزود عليه صعوبة الوضع اكتر بعدهم عن بعض ..

اتنحنح رائد و بدأ الكلام و قال : بقولك يا اسيا انا كنت عايزة اكلمك في موضوع كدا ، كنت عايز اخد رأيك في حاجه يعني ..

اسيا قالت بـ تركيز : ايه هي الحاجة اللي عايز تاخد رأيي فيها ؟

رائد بتوتر : الحاجة اللي عايز اخد رأيك فيها .. ، هو مجرد اقتراح تمام عشان متضايقيش و تاخدي في وشك بس ..

اسيا : طيب ما تقول يا رائد قلقتني !

رائد : ايه رأيك ...

قطع كلام رائد رنة موبايل اسيا اللي كان محطوط على الطرابيزة ، و اللي شاشته نورت بـ اسم " خليل " بـ اللغة الانجليزية ، فـ طفت اسيا الموبايل بسرعة ، و هي بـ تبص لـ رائد بـ خوف ....

رائد مخدش باله من الاسم اللي ظهر على شاشة التليفون ، لانه كان مقلوب ، فـ كان من الصعب انه يلقط اسم خليل في الثواني دي ..

بلعت اسيا ريقها ، و حاولت تتمالك اعصابها و قالت : هقوم اشوف مين ..

رائد : اتفضلي ..

قامت اسيا من على الطرابيزة ، و راحت ترن على خليل ، و قالت بحدة : عايز ايه ؟

خليل : تعالي الوقتي ..

اسيا : مش فاضية الوقتي ، هعدي عليك بليل ..

خليل : اسيا هـ تيجي الوقتي بـ الذوق ، و لا ابعت اجيبك من مكانك بـ العافية و الوقتي بردو !

اسيا : خلاص خلاص ، ساعة و هـ ابقى عندك ...

خليل بـ تهديد : نص ساعة ، لو مجتيش ، متزعليش من الطريقة اللي هـ اجيبك بيها ..

قبل ما اسيا ترد عليه ، قفل في وشها السكة ، فـ شتمته اسيا بـ صوت واطي و قالت : ربنا يخدك بقى ، يارب خده و ارحمني من ق*فه ..

بصت اسيا لـ رائد اللي واضح انه مركز معاها جدا ، فـ اخدت نفس عميق ، و رسمت ابتسامة مزيفة على وشها ، و رجعتله و قالت : معلش يا رائد ، لازم اروح الوقتي ..

رائد : خير في حاجة ..

اسيا : لا مفيش زهوة بس كانت بـ تكلمني عشان محتاجة زهرة في شوية حاجات ، و انا هروح اساعدهم بردو ..

رائد : طيب محتاجين مني حاجه ، اساعدكوا في حاجة يعني ..

اسيا : لا تسلم ، انا هطلع بس اخدها ، و نمشي على طول ..

رائد : طيب اطلعي ، و انا هستناكوا في العربية عشان اوصلك ..

اسيا : لا لا ، مش هـ ينفع ، خليك انتَ هنا جمب سيف ، يمكن عايز يتكلم معاك في حاجة كدا و لا كدا ، بخصوص الحادثة او شغلكوا ، يعني مينفعش تسيبه بردو ، خليك معاه و احنا هـ ناخد تا**ي ..

رائد بـ تفكير : بس ..

اسيا : متقلقش علينا ، يلا نطلع عشان مش عايزة اتاخر على زهوة ..

‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹

" بعد مرور نصف ساعة تقريبا "

‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹

وصلت اسيا بـ التا**ي قدام بيت خليل ، و قالت لـ زهرة : انا هنزل اشوفه عايز ايه ، انتِ كملي في التا**ي للـ بيت ، و خدي بالك من نفسك و من زهوة ..

زهرة : حاضر ، انتِ كمان خدي بالك من نفسك ..

اسيا : ان شاء الله ، يلا سلام ..

‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•

" في فيلا خليل "

‹•‹•‹•‹•‹•‹•‹•‹•‹•‹•‹•‹•‹

دخلت اسيا من بوابة الفيلا ، و وشها مقلوب ، و ماشية بـ خطوات واسعة ، و شكلها ميبشرش بـ الخير ..

دخلت من باب الفيلا ، و سألت عليه الشغالة ، و ردت عليها بـ أنه في المكتب ..

دخلت اسيا جوا الفيلا زي الاعصار ، و فتحت عليه باب المكتب من غير ما تخبط ، و وقفت قصاده و هو قاعد على المكتب ، و قالت : انتَ عايز ايه بالظبط ! ، عرفني كدا عشان ابقى معاك على الخط ..

خليل : اقعدي !

اسيا بـ صراخ : مش قاعدة انا قبل ما اعرف في ايه ، اي حكايتك ؟ !

خليل بـ زعيق : اسياااااا !

صوت خليل رج المكتب ، و هزها من قوته ، و دب الخوف جواها ..

قعدت اسيا على الكرسي قدامه رغما عنها ، و تجنبت تبصله ، بسبب بغضها ليه ، و خوفها منه ..

خليل : كنت قاعد مع نفسي بقالي كام يوم كدا ، كنت عايز احل قضية الظابط اللي مغلبني دا ، حكيتلك عنه قبل كدا .. ، و بصراحة حسيت بـ العجز قدام الصدف الغريبة اللي بـ تنقذه كل مرة من بين ايديا ، تخيلي رجالة خليل يخيبوا على اخر الزمان ، و مش قادرين على حتة ظابط ..

اسيا : و انا مالي بالكلام دا الوقتي !

خليل : اخرسي لحد ما اكمل كلامي ، و متفتحيش بوقك ..

فركت اسيا ايديها في بعض من كتر الغضب ، و الخوف اللي حساهم في نفس الوقت ، و بصت برا بـ تدور بـ عيونها على هارون ، عشان يجي ينجدها من بين ايديه ..

خليل : بس تعرفي ان قعدتي دي جت بـ فايدة ، وصلت لـ حاجة مهمة اوي . ، ان رائد هو نفسه الظابط اللي قلب عليكي الدنيا من 3 سنين لما ياسر اغتصبك ، هو اللي انقذك .. و انتِ رديتهاله على حسابي يا تربية * * * * ، عشان كدا لما هربتيه من هنا ، هارون مقتلوش عشان انتِ اللي منعتيه ، و لا يكون هارون كان متفق معاكي ، و بـ يساعدك طول الفترة اللي فاتت ..

اسيا قررت تبيع القضية ، و تكشف نفسها قدامه و قالت : هارون ملوش فيها ، انا اللي هربته ، و حميته طول الفترة اللي فاتت ..

خليل : انتِ عارفة يا اسيا ان اللي عملتيه دا ، ميكفنيش فيه رقبتك ، بس انا مش عايز رقبتك لسه دلوقتي ، بصي بقى و صحصحي كويس للـ كلام اللي هقوله دا ، عشان هي خربت على الكل خلاص ، و الظابط دا لو خدني هفضحك و هجرك معايا في كل حاجه ، فـ اسمعي الكلمتين اللي هقولهم دول ، و صحصحي و اعرفي انتِ هـ تختاري مين يا حلوة يا ام قلب حنين ...

بصتله اسيا بـ عيون حاقدة ، و هي بـ تسمعه و عيونها وسعت بـ صدمة لما سمعت عرضه ....

‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•

" بعد مرور اربع ساعات "

‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹

" في فيلا اسيا "

‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹

زهرة كانت راحة جاية في الصالة ، بـ قلق شديد قدام زهوة اللي كانت قلقانه ، زي زهرة بـ الظبط على اسيا ، بسبب تأخيرها الغريب عند خليل ..

حطت زهرة ايدها على رقبتها و قالت : حاسة ان في حاجة خنقاني ، اكيد خليل عمل فيها حاجه ..

زهوة : في اب يجدر يأذي ضناه يا زهرة ..

زهرة : خليل يعملها ، يارتني ما كنت سبتها لوحدها ..

زهوة : متجوليش اكده ، كفاية قلقنا عليها هـ يبجى انتِ كمان ..

رن موبايل زهرة ، و كان المتصل رائد ، فـ بصت زهرة لـ زهوة بـ تردد و قالت : الظابط بـ يرن تاني ..

زهوة : ردي عليه و عرفيه انها مختفية ، خليه يدور عليها ..

فتحت زهرة الخط ، و قررت تعرفه بـ غياب اسيا ، بغض النظر عن العواقب ، لكن اهم حاجه تنقذ حياة اسيا ..

اتجنن رائد لما عرف بـ غياب اسيا عن البيت من ساعة ما سابت المستشفى ، و اول حاجه عملها انه رن على موبايلها ، و لكن كان مغلق فـ زاد قلقه اكتر ، و خرج برا القسم ، عشان يدور عليها ..

‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•

" في فيلا اسيا "

‹•‹•‹•‹•‹•‹•‹•‹•‹•‹•‹•‹•‹

بعد ما خلصت زهرة المكالمة بـ كام دقيقة ، سمعت زهرة صوت عربية قدام الفيلا ، فـ خرجت زهرة بسرعة ، و قالت لـ زهوة تفضل في الفيلا ، و اول لما خرجت ، و شافت اسيا صرخت بـ خوف ، و جريت عليها ....

كانت اسيا نايمة على الارض في حديقة الفيلا ، و مغمى عليها ، و وشها مليان كدمات ، و بوقها و مناخيرها الدم بـ يسيل منهم ..

اول لما سمعت زهوة صرخة زهرة خرجت على طول ، و اتصدمت من منظر اسيا ، و حست بـ خنجر اتغرز في قلبها ، و ألمه كان لا يحتمل ، جريت زهوة ناحية اسيا ، و وطت على ركبتها ، و هي بـ تحاول تفوقها ، و دموعها بـ تسيل غصب عنها بـ غزارة ، و زهرة بدأت تشوف نبضها ، و نفسها ، و هي بـ تشهق من شدة البكاء ..

زهوة : شيليها معايا يا زهوة ، خلينا نروح بيها على اي مستشفى ..

زهرة : انا خايفة نروح بيها مستشفى ، هناك هـ يعملوا محضر ، و ليلة كبيرة اوي ، و خليل ممكن يموتنا احنا التلاتة فيها ..

زهوة : ايه خليل ، خليل ، هو خليل عايش في الدنيا لحاله ، ما في داهية ، بس اهم حاجه البت خايفة تروح منينا ..

زهرة : انا هـ اتصل بـ هارون اشوفه فين ، هو ممكن يجيب اي دكتور و يجي ..

رنت زهرة على موبايل هارون ، فـ لقته غير متاح فـ قالت : راح فين دا كمان ..

زهوة : مبيردش ..

زهرة : تليفونه مقفول ..

زهوة : طيب تعالي معايا نحاول نشيلها ، و نطلعها فوج بدل رميتها دي ..

زهرة : يلا ..

‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•

" عند رائد "

‹•‹•‹•‹•‹•‹•‹•‹•‹•‹•‹•‹•‹

رائد كان في عربيته ، و رن على زهرة عشان يتطمن على اسيا ، رجعت و لا لا ..

ردت عليه زهرة بـ صوت مخنوق من العياط ، لدرجة ان رائد لاحظه ، فـ قال : زهرة ! ، انتِ بـ تعيطي ليه ؟. ، اسيا رجعت ؟ ، اسيا كويسة و لا حصلها حاجة ! ..

زهرة : اسيا رجعت ..

رائد : و انتِ بـ تعيطي ليه لما هي رجعت ، اسيا كويسة ؟

زهرة بـ كدب : اه كويسة ..

شك رائد في زهرة و قال : طيب اديهالي عايز اكلمها ..

بصت زهرة لـ زهوة بـ ارتباك و قالت : هي ، هي نايمة ..

رائد : اسيا حصلها ايه يا زهرة ، اتكلمي !

زهرة : محصلش ، مفيش حاجة ..

رائد : انا جايلكوا ، و هشوف بـ نفسي في ايه ..

قبل ما ترد زهرة عليه ، قفل السكة و حاسس ان اعصابه باظت ، و قلبه بـ يدق بسرعة من خوفه على اسيا ، و زود سرعة العربية ، و غير الاتجاه لـ فيلا اسيا ..

‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•

" في فيلا اسيا "

‹•‹•‹•‹•‹•‹•‹•‹•‹•‹•‹•‹•‹

زهرة و زهوة مسحوا الدم اللي كان في وش اسيا ، و حاولوا يفوقوها ، بـ أنهم يرشوا مية على وشها ، و بـ الفعل بدأت اسيا تفوق شوية بـ شوية ..

فتحت اسيا عيونها بـ صعوبة ، و هي بـ تبص للـ سقف ، و بعد كدا نقلت نظرها لـ زهرة و زهوة اللي بـ يعيطوا جمبها ، و اتفاجأت انها في وسطهم ..

حاولت اسيا تتحرك ، بس جسمها كله كان بـ يوجعها ، و بدأت اسيا تأن بـ ألم ، و هي حاسة بـ وجع في كل حتة في جسمها ، و دموعها بدأت تسيل بـ غزراة ، و هي بـ تسترجع اللي حصل من ساعات ..

زهرة مسكتها من دراع ، و زهوة مسكتها من الدراع التاني ، و بدأوا يحركوها بـ رفق ، وهي بـ تأن تحت ايديهم ، لحد ما قعدوها ، و حطوا وراها مخدات تسند ضهرها ..

اسيا كانت حاطة ايدها اليمين على بطنها بـ وضعية غريبة ، و ايدها كانت زرقا ، و ساقعة جدًا بس محدش من البنات لاحظ دا ، بسبب انشغالهم مع اسيا ..

زهرة : اسيا بصيلي ، ايه اللي حصل ، خليل هو اللي عمل فيكي كدا ؟ ، يا اسيا ردي عليا ..

بصت اسيا لـ زهرة بـ عيون غرقانة بـ الدموع ، و افتكرت اللي حصل قبل اربع ساعات .. .

‹•‹•‹•‹•‹•‹•‹•‹•‹•‹•‹•‹•‹

_ فلاش باك _

‹•‹•‹•‹•‹•‹•‹•‹•‹•‹•‹•‹•‹

خليل : بس تعرفي ان قعدتي دي جت بـ فايدة ، وصلت لـ حاجة مهمة اوي . ، ان رائد هو نفسه الظابط اللي قلب عليكي الدنيا من 3 سنين لما ياسر اغتصبك ، هو اللي انقذك .. و انتِ رديتهاله على حسابي يا تربية * * * * ، عشان كدا لما هربتيه من هنا ، هارون مقتلوش عشان انتِ اللي منعتيه ، و لا يكون هارون كان متفق معاكي ، و بـ يساعدك طول الفترة اللي فاتت ..

اسيا قررت تبيع القضية ، و تكشف نفسها قدامه و قالت : هارون ملوش فيها ، انا اللي هربته ، و حميته طول الفترة اللي فاتت ..

خليل : انتِ عارفة يا اسيا ان اللي عملتيه دا ، ميكفنيش فيه رقبتك ، بس انا مش عايز رقبتك لسه دلوقتي ، بصي بقى و صحصحي كويس للـ كلام اللي هقوله دا ، عشان هي خربت على الكل خلاص ، و الظابط دا لو خدني هفضحك و هجرك معايا في كل حاجه ، فـ اسمعي الكلمتين اللي هقولهم دول ، و صحصحي و اعرفي انتِ هـ تختاري مين يا حلوة يا ام قلب حنين ... ، قدامك حاجة من اتنين ، يا تقتلي رائد بـ نفسك قدام عينيا ، يا تقتلي زهرة و قدام عينيا بردو ، وقتها انا ممكن اعفي عن الظابط .. ، ها تختاري ايه ؟ ..

‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•

يتبع ..

ارائكم .. ؟

توقعاتكم .. ؟

خليل عمل في اسيا ايه .. ؟

ليه خليل عمل مع اسيا كدا .. ؟

ايه اللي حصل لـ أيد اسيا .. ؟

اسيا هـ تعمل ايه مع خليل .. ؟

رائد هـ يعمل ايه لما يعرف .. ؟

هارون فين .. ؟

خليل قتل هارون .. ؟

اسيا ممكن تفكر تقتل خليل .. ؟

‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•