صف البنزين

#الصف_الأول بقلم: #fulla_Ali في عز صيف مايو الخريفي الحار جداً وطئت قدماي ارض ولايتي الحبيبة ! مع هجيج المارة وضجيجهم وزحمة مركبات السير...اضافت ضيقاً الي ضيق الطريق ومع صفوف السيارات بمختلف انواعها..منها المركبات العامه ومنها الملاكي وثم صف الركشات بمختلف الوانها كانت كل منهم تنتظر دورها في #صف_البنزين وقفت انا وزميلتي منى ونحن ممسكات بحقائب سفرنا التي تحوي الكثير والكثير من الملابس والطرح والاحذيه التي لطالما أبهرنا بها زملائنا وزميلاتنا في حرمنا الجامعي!! طويل شوية نادوني (جوري) م حأشكر نفسي لكن بقولو علي جميله بتعرفو الفنانه الاسمها : سيلينا قوميز حبيبة الود جاستن بيبر د*ك الزمان الاسي خلتو اظن يلا بس قالو انا بشبها والله اعلم ! طويله القامة بشرتي بيضاء بكل ما تحمله الكلمه من معني قوامي نحيل في جسم مفصل منسق بدرس صيدله الخرطوم السنه التانيه واجزو لينا قبل رمضان بي يوم وجيت ولايتي الحبيبه ( قضارف الخير ) عشان اصوم مع اهلي واحبابي واقفين انا و منى صحبتي وكنت متكممه بالطرحه وكل ما نوقف ركشة بقطع لينا سعر خرافي وفلكي ماف عقل بصدقو و دا كلو بي سبب ازمة البنزين والجاز الغزت البلد في الآونة الأخيرة وااقفين و واقفين كده في عربيه سنتافي حمرااااا انا شوفتها بي عيني دي طلعت من الصف وعشان لونها الاحمر العجيب وحركتها الغريبه بي انها خلت صف البنزين خلتني انتبه ليها اكتر منو الناصح البخلي دورو في الصف ويطلع؟ يعني حتى لو جاك امر طارئ مفترض تخليها قبلها وتمش بي اي مصيبة زمان لانو ده امر جنوني مرة واحدة ما علينا نرجع لشمسنا اقصد لموضوعنا لكن الشي الحصل والما فهمتو انو السنتافي جات وقفت قدامنا! سيدها نزل القزاز وكان راجل اربعيني كده او خمسيني زاتو ممكن تقولو عليهو ملامحو عاديه لكن مافيها كلمة وما باين عليهو زول خطر قال لينا اركبو اوصلكم لانكم بالطريقه دي حتبيتو في الشارع والشمس دي حارة عليكم انا ولا عاينته اتجاهو زاتو منى قرصتني وقالت بهمس : ورح يا جوري وحاتك انا فترت من الوقفه الحاره دي بعدين عادي كوننا نركب معاهو ومن شكلو زول كويس م مصاص دماء يا جوري قلت ليها بي تحت الطرحه : ي بت كيف نركب معاو؟؟!نحن م عارفين هو منو زاتو!! مني : انا غايتو حأركب بي طريقتك انتي خلي الشمس تهراك وتقطع كِلاك وطوالي منى المعفنة جرت شنطتها وهو م كضب نزل ركبها ليها بي ورا وعاين لي لزوم انتي فهمك شنو وماشه ولا لا كان لابس جلابيه بيضاء ناصع لونها ابيض من عيون الأطفال حديثي الولاده زاتو لونو قمحي نضيييييف وشعرو اسود مزين بأبيض بالزات بالأطرااف.يعني الوقآر والهيبه والكاريزما ابسين جلابيه وسايقين عربية عاين لي بود (ب**ر الواو).وقال لي منى صحبتي : صحبتك م ماشه ولا شنو ؟ مني:لالا ماشه وجرت لي شنطتي وهو شالها منها وركبها ورا ختوني امام الأمر الواقع وما لقيت طريقة اتخارج بيها من الموضوع ده فاضطريت اركب معاهم لاني يستحيل اخلي مني صحبتي براها اسي لو خطفها انا اعيش كيف من عذاب الضمير غايتولطفك يا رب من نزلت الطرحه الراجل يشيل ويعاين لي يشيل ويعاين لي لمن مني قرصتني وعاينت لي وغمزت وانا اتاحرجته م قدرت اعاين ليها تاني قصرتني كملت لحمي المفتريه قال لينا ساكنين وين !؟؟ مني قالت ليهو انا في حي... وصحبتي في.... وطوالي اتوجه لي حي ناس منى اول احييي ي قلبي معناها حيوصلها هي الاول وحافضل انا براي معاهو الآية اتقلبت وبقيت انا المخطوفة كر علي انا اسوي شنو اسي! طول الطريق كنا ساكتين وفي توتر رهيب جداً وقت قربنا على بيت ناس منى قلت ليها لمن يوصلك تنزلي شنطتك وترجعي معاي سامعه ضحكت وقالت لي هبله وفعلآ وصل منى بيتهم باستني وهمست لي في آضاني : طبقي رقمو لانو شكلو وقققققع بردلب في غرامك قمت قرصتها طوالي قالت ااي قالت ليهو : انزلو معاي اشربو موية قال ليها بنصل بنصل… قالت ليهو شكرآ ليك وربنا يكتر من امثالك..وجوري آمانة عندك وصلها بالسلامه قام ابتسم وم رده ليها وانا قلبي عمل ششششح غمزت لي ودخلت بيتهم المفترية دور العربيه وتاني رجع للمعاينه عينو بالقد ان شاء الله! بعد شويه قال لي آسف.. استغربت اتاسف لي وقبل ما اسالو ركن العربية قدام بقاله نزل وبعد شويه رجع اداني كيس فيهو بارد وموية وشوكلاتات عاينت ليهو قال لي يمكن تكوني عطشانه وانا اتكلمت بلسانك هو فعلا انا كنت عطشانه ودي بادرة كويسة منو بعد مسسافه قال لي : بتدرسي شنو انتي وصحبتك ووين؟ سكته مسسافه ورديت ليهو بطرف لساني : صيدله الخرطوم قال ماشاء الله ربنا يوفقكم وتاني ما اتكلم. اظن حسه اني ما عايزه اتكلم معاو من ردي واختصاري ليهو والله اعلم بعد شويه تلفونو ضرب م رده لغاية المكالمه انتهت م رده والتلفون تاني ضرب م رده وبقي كل م يضرب هو بصمتو لغاية انا زهجته جني وجن الحركة دي قلت ليهو : يمكن عاوزنك في موضوع مهم رد شوف الحاصل شنو قام رده آخيرآ وبعد شوية كده حكه فرامل وقال : لاحول ولا قوة الا بالله العلي العظيم وين انتو اسي!؟ طيب جاي عليكم اسي وطوالي غير مسار العربيه ورجع السوق قلت ليهو : في شنو ! ان شاء الله خير بس كان يدينو برجفن وعرقان قال لي بتي! بتي وقعت من السطوح كلمتني المربية حقتها واسي هي في حوادث الأطفال في غرفة العمليات لا حولا ولا قوة الا بالله ربنا يرفعها ان شاء الله !! عمرها كم سنه! قال لي 7سنه.. كان باين عليهو انو شويه وحيبكي بس كارزمتو مانعاهو من انو يبين مشاعر زي دي قدامي خصوصي انو مرت 34 دقيقه بس ما معرفتي بيهو قلت ليهو البت صغيرة شديد حالتها كيف اسي؟؟ قال لي م عارف والله.. ما عارف حاجة.. تاني واصل كأنو نسى حاجة واتذكرها قال لي آسف نسيتك والله حأشوف ليك ركشه توصلك البيت ما بقدر اوصلك قلت ليهو صلي علي النبي قال عليه الصلاة والسلام قلت ليهو خليني اطمن عليها اول بعدين حأمش البيت البيت ملحوق قال لي ماف داعي انتي جايه من سفر ومحتاجة ترتاحي قلت ليهو كلمة وقلتها حاطمن على البت اول بعدين بمش البيت كنا ساكتين طول الطريق لغاية وصلنا المستشفي وكان في راجل وبت باين عليها انها فلبينيه يعني الشغاله وكده قال ليها تنوير ! الحاصل شنو !وانتي كنتي وين وقت البت وقعت! انا ما نبهت عليك انها ما تغيب ولا لحظة عن عيونك! قالت ليهو وهي بتبكي : البت و وقع من البلكون..و و ا انا ك ك كنت في المتبخ ما قصد انها تقع والله ! الراجل وكان باين عليهو التثبت قال ليهو : ربنا يقومها بالسلامه يا سيد شاهين م تشيل هم هي وقعت في أيدي الملائكه زي م بقولو م رد ليهو ومشي قعد في أقرب كرسي وختي راسو بين يدينو وهو ما عارف يبكي ولا يقعد يدعي ولا يشاكل اما انا فما عرفت اتصرف كيف مشيت قعدت جمبو وبقيت ببحلق بي عيوني في الغاشي والماشي وما قدرت اتكلم لانو ماف موضوع اصلا اثناء ما نحن ساكتين قال لي لمن قالوا لي انها بت أشرقت الشمس في الليل.. فرحت كتير لاني فعلا أولى امنياتي تجيني بت اسميهل زينة على امي.. بتي حبيبتي هي الكانت بتشيل همي وكل مشاكلي بتنتهي بضحكتها وبهجتها دايماً بحكي في حجرها وهي تستمع ساكته وما عارف هل هي فاهمة الانا بقولو ولا بس بتسكت ساي.. كانت كأنها أمي كيف العالم ده يضرها كده؟؟؟ انا عايش في الدنيا دي عشانها أ وعشان احميها وبإذن الله طول ما انا عايش ما حاخليها تحتاج لحاجة ولا لزول . البت الربنا وهبني ليها بجمالها وعقلها بتنشر المحبة الناس من حولي انا ما بقدر على مكافئتها بالشي البليق بيها . خايف عليها لمن تكبر من كل رجال العالم، ولكن أتمنى اشوفها في الثوب الأبيض عروس كالقمر.. لمن تضع قبلة على جبيني بحس بأنو الكون يرزقني أمطار من السعادة. الرزق اللي ربنا حباني بيهو مع طلتها البهية أكد لي أنها وش السعد علي . قلت ليهو ربنا يبارك ليك فيها وجعلها من الصالحات الفالحات المستورات قال لي آمين. معليش بريتك بالكلام… قلت ليهو لمن كنت صغيرة كنت بشوف ابوي البطل الخارق لي كنت بشوفو وللحظة دي اقوى من سوبر مان وبات مان وغيرهم ، ما عرفت الخوف ابداً طالما كان ابوي معاي ماسك بيدي . كانت أسعد أوقاتي لمن كان بدللني أكثر من أخوي الكان بغير مني شديد واسي بقى بغير علي شديد عمرو ما كرهني، كنت بقعد في رجولو وهو بقول لي انتي اميرتي الصغيرة. وأتذكر لمن كنت بجري ليهو وانا ببكي و بشكو ليهو عمايل خالد اخوي بغضب وبشاكلو لي ، وبقول ليهو اوعك تاني تتعرض ليها او تغيظها بالكلام ولو تاني كررها حيضربو ضرب شديد. دايماً كان بقدم احتياجتنا انا واخوي على احتياجاتو هو وامي .بتمني اني اقول ليهو قدر شنو أنا فخورة بي انو هو أبوي، وأنا لو كنت حسنة الخلق ومحبوبة من الجميع فهو بسبب أني بتو وانو من ساهم في تربيتي بين كلّ تجعيده وتجعيده من وش أبوي قصة نعيم عشته أنا وأخوي . الأب هو نعمة لا ندركها ألّا عندما نفقدها. هو الأمان رب ثمّ أب قال لي ليي ابوك وين؟؟؟ قلت ليهو اتوفى ليهو تلاته سنه قال ربنا يرحمو ويتقبله قبول حسن… قلت ليهو امين . . اللهم عن كلّ قطرة عرق نزلت من أبي سعياً لرزقنا، فارفع بها درجته في الجنة، وحرم عليه حر الآخرة يا كريم، واسقه شرب الهناء من يد نبيك وحبيبك. قال لي اللهم آمين.. ما بعرف ابوك لكن من تربيتك ولطفك اكيد ابوك كان راجل عظيم في حياتو قلت ليهو فعلا.. وما عشان ابوي لكن هو كان زول طيب جداً وكريم وحنين لدرجة.. بعد شويه ونحن قاعدين بنتجاذب أطراف الحديث شفت آخر شخصيه ممكن انا اتوقعها.. فهي منو وحكايتها شنو وزينة حصل ليها شنو؟؟ وهم ديل زاتهم اصلآ ناس منو؟؟ وانا زاتي منو!! دي كلها اسئله جوابها في الحلقه الجايه..يلا أقيفو في صف البنزين عاينت (م كان لي غررض..دكتورة شهتني المررض) احمم عاينته لقيتو يمان ! عيوني رقرقو بدون ما اشعر وجاتني مشاعر متلخبطة ومتضاربة وهو كمان من وقت شافني قلع عيونو بس كعادتو عمل نفسو ولا بعرفني ولا كأني زول زاتو طول عمرو كان يمان بارد متبلد الاحاسيس وكونو يمسحني ولا كأنو بعرفني ما خلاني اتفاجأ نهائي وجاا راس للراجل القاعد جمبي قال ليهو سيد شاهين سلامتها البت ان شاء الله ربنا يرفعها ويقومها بالسلامة شاهين : الله يسلمك يمان يمان : وقعت كيف و اسي كيف؟؟ شاهين قال ليهو وهو بحمر لي تنوير : وقعت من السطوح و م طلعو لسع من غرفة العمل… قبل م يتم كلامو الباب اتفتح والدكتورة جات طالعه سيد شاهين جرا عليها ولسان حالو بسألها من بتو قالت ليهو الحمد لله عدت مرحله الخطر صاح الاطفال بقعو في إيدي الملائكه شويه كده وحنطلعها غرفة العنايه المكثفه لغاية تستعيد وعيها شاهين: شكرآ ليك دكتورة جزاك الله خير الجزاء ابتسمت :يديها ربنا العافية ومشت بعد شويه جو شايلنها بالنقاله ياخ لو قعدته اوصفها ليكم لي بكرة ما حتصدقو بت عسل عسل عسسسسل ينقط! ماشاء الله تبارك الرحمن ربنا يحفظها ويغطيها بشرتها لونها قمحي فااااتح كده وشعرها منكوش(بموت ف الاطفال الشعرهم منكوش انااا يارب عيالي كلهم يجو منكشين وشعرهم كيرلي) كان راسها ملفوف ويدها ملفوفة ورجلها كمان وكانت غايبه عن الوعي تمامآ مسكينه والله قطعت قلبي! وقت طلعوها ابوها عاوز يممممموت من خوفو عليها ودوها الغرفه وانا م قدرتة ادخل وقفته برة بس. بعد شويه يمان جا طالع عاين لي من فوق لتحت وقبل م يفتح خشمو سيد شاهين (زي م جبيل ناداهو ) جا طالع وقال لي معليش اعفي لي ي بتي انتي جايه من سفر وم ارتحتي زاتو جرجرناك معانا في المستشفى قلت ليهو العفو يا عمو كان لازم اطمن عليها عاين لي يمان وقال ليهو لو سمحته ممكن توصل الدكتورة بيتهم ؟؟ وعاين لي طوالي عشان يطمني يا حليلو ما عارف انو الغباء ده ماف زول بعرفو اكتر مني وماف زول بكرهو اكتر مني كمان قال لي : يمان يدي اليمين في الشغل وزولي شديد..ما تخافي حيوصلك للبيت قلت ليهو م تعذبو روحكم حأااخد لي ركشه . م رد لي وطلع مفتاح من جيبو مداهو لي يمان يمان :بس انا معاي عربيه؟ شاهين : عارف بس عشان شنطة الدكتورة جوة عشان ما تتاخرو بعدين وفر التنك وله شنو؟ يمان : هههههه اي والله فرصه اوفر التنك شال المفتاح منو وقبل ما يمشي تنوير جات جاريه قالت البت صحت.. فكلنا مشينا كلنا غرفة زينة ولقيناها وعت شويه بعد ابوها سلم عليها مشيت سلمت عليها وبوستها.. فرحت شديد بشوفتي ما عارفة ليي قعدنا معاهم حبة وطلعت مع يمان. كنت ماشه وراهو زي الهبله في شوارع المستشفي طبعآ غاظني غيظ اصلا من يومو ثقيل وغياظ وما بنهضم كلو كلو وقت طلعنا فعلآ الزمن فات والمغرب كان اذن والعشاء خلاااص في الطريق.. ** طول الطريق كنا ساكتين..لغاية فتح خشمو وقال: ممكن اعرف انتي و شاهين بتعرفو بعض من وين؟؟؟ سكتتته مسسافه بعد عاينته ليهو وهو كان عامل روحو منتبه ف الطريق..قلت ليهو :عفوآ؟ قال لي اظن سؤالي كان واضح بتعرفي انور شاهين من وين والجابك المستشفي شنو لمن قاعده بتطقي حنك كمان قلت ليهو اظن دي حاجه م بتخصك وله اذكرك استاذ انو انا الآن م خطيبتك ! عاين لي مسسسافه وتاني رجع عاين في الطريق قال لي جوري بطلي قلت ليهو :بطل انت يا استاذ وم تتدخل في حياتي تمام؟ قال لي بصوت عالي :اعملي اي شي بس ابعدي من شاهين لانو م قدرك! قمت ضحكته وم عقبته ع كلامو لانو كلامو ما بيستاهل انو يعقبو عليهو زاتو.. بالجد يمان ما بتغير كلو كلو.. مرت تلاته سنه من اخر مرة شفتو فيها فعلا كان في يوم من الايام خطيبي وكنت بحبو فوق الخيال بس اسي نحن باعتبارنا غرباء عن بعض وم المفترض انو يتدخل في حياتي ابداً اقلاها كان يسلم علي وخلاص لكن الغلاظة والثقالة يخليها لمنو مسح وشو بي يدو بغضب وقاال لي كلامي واضح فاهمه ابعدي عن انور شاهين وابعدي عن بتو لانها بتتعلق بالناس سريع ؟ قلت ليهو ابعد عن انور وبتو؟ دقيقه فهمني انت تطلع منو لمن بتامرني كمان؟ قال لي وهو بضغط ع اسنانو:جوووري! قلت ليهو يمان لو سمحت نزلني هنا ! م رده لي وزاد السرعه كاني م بتكلم معاو : يمان وقف الزفت دي ونزلني! برضو كاني م بتكلم طوالي ضغطه ع البوري وما زحيت يدي منو وقلت ليهو بصوت عاااالي : يمان! نزلني هنا ! حكه فرامل طوالي ووقف وانا فتحته الباب نزلته ورزعتو ليهو بكل قوتي و مشيت ع اتجاه الكبوت عشان اطلع الشنطه بتاعتي لقيتو لمن سبقني و فتح الكبوت بكل قوتو لغاية ضربني في يدي وما اشتغل بصرختي ولا كلف نفسو يشوف يدي الضربهل وبدل ده طلع لي الشنطه وزقلا لي بعيد وركب العربيه ودورها!! م تستغربو من تصرفو معاي..يمان برهان كان خاطبني 3سنه واهل مكه ادري بشعابها ع قول المثل تصرف يمان كان همجي جداً نسي كل حاجة بيناتنا وعدم سؤالو لي عن حالي اثبت لي اني بخسارتو كنت **بانه اكيد البينا ابداً ما كان خصام لو كنت فى خاطرو كان يقول لي حبة سلام لكن الظاهر عليهو انو نسى لكن الما بيرجع بالوفا ما اظن يرجع بالكلام. مليانه بي ريدو شديد و حاميني من النوم هواهو وحتي احلامى بيهو ما بقدر اوصفها. ملامحو ملامح زول رقيق و حساس وكان زول برتاحو ليهو كل الناس كلامو درر و الماس كفاية اقول انو زول بكل الناس يمان.. كيف اقول مشتاقه ليهو وانا العلمتو وصل الشوق؟ مشتاقة ليهو والله و للمسة إيدو مشتاقة والله أكحل عيني بشوف عيونو هو كان حبيبي وكنت بخاف عليهو من النسمة وبعمري كله بفديهو وبدعي ربي دوماً يحميهو أحبك وأحب كل شيء فيك. لو الحياة بقت بلا امل ولو القلوب بقت من غير وجل ولو كتبوا على كرامتي الزلل انا مستحيل منك ازعل الانك وحتي بعد تصرفك معاي ده يستحيل ازعل منك يا يمان يجي صوتك معاه الحظ وطيب الفال يخلي كل مواعيد الحزن في ص*ري تمش. انت نقطة ضعفي التي دائما لا استطيع الانتصار عليها. العشق لا يعني القرب فها انا اعشقك برغم خذلانك لي وبرغم المسافه بيناتنا انت اعمق من احبك وارقى من كل المرافي وبرضي عاجز لو ازيدك ديمة من عشقي. كل ما افكر في ريدك القى ريدي عليك مدسوس ما بقول عشقتك ملكني والعيون فيها اعترافي. قالوا اصلو الدنيا معبر فيها جد ما بتلقى راحة وتكون راحتك بس قرب حبيبك مرات بحس انك براك دون البشر صمتك حزنك غضبك كل الحاجات دي برغم من انها سيئة لكن بتميزك… بالرغم من انك خليت خطيبتك السابقه في نص الشارع بالليل لكن برضو بحبك وقفته ركشه وانا عيوني ملانه دموع وببكي زاتو سيد الركشه قال لي بي80 المشوار قلت ليهو ان شاء الله 100 بس وديني البيت عليك الله طبعآ قلع عيونو وبقي يبحلق فيني ساي يقول دي مالا اسي طول الطريق كنت ببكي وما شايفه قدامي وسيد الركشة الشمار قاتلو بس خايف يسألني اقوم افضي فيهو زهجي وفعلا لو كان سالني كنت فضيت فيهو زهجتي كلها *** وصلت البيت والقروش اللفي يدي كانت50بس قلت ليهو دقيقه بس اسي بجيك جريت البقاله الجمبنا سلمته علي محمد سيدها طوالي قعد يشاغل قلت ليهو انا ما فاضية ليك اسي وما ناقصاك موقفه الركشه وعايزه 30ج بجيبها ليك بكرة الصباح ان شاء الله قال لي شفتي ديل !؟؟ (آشر علي عيونو..) لو قلتي دايراهن بد*ك ليهن انتي بس قولي انا عندي كم جوري وبعدين جيتك دي زاتها براها بالدنيا كلها قلت ليهو خليهن قبلهن بتحتاج ليهن حتديني ولا ﻷ ! مداها لي وقبل م يفتح خشمو اتخارجته من البقاله لانو مستعد يتكلم لبكرة الصباح بدون توقف وما عندو مشكله نهائي.. غايتو ربنا يكون في عون مرتو جيت اديتهم لسيد الركشه قال لي م قلتي 100 وفي وشو ابتسامه بلاهيه غياظة خلاص حمرت ليهو طوالي دور الركشه حقتو وفحط! اصلا ما بمشو الا بالعين الحمرا دخلته البيت و من دخلت جاني جود (13سنه) ولد اخوي جااري وحضني طوالي : عمتووو بالجد اشتقته ليهو كتييير سنه كامله ما شفتو ياخ!! ما كنت بحب اجي طوالي لانو لاحظته لمرت اخوي بتضايق مع انو ده بيتنا يعني لكن الله غالب وعدم وجود الام والاب معاي اداني شعور بالضعف برغم من انو خالد اخوي ما مقصر مني والله لكن هو ما قاعد في البيت وما شايف البحصل لي سلمت علي جود وكملتو بوسات قال لي جبتي لي شنووو اتذكرت اني م جبت ليهو حاجة واتحرجته شديد لكن اتذكرت الكيس الجابو لي سيد شاهين كان فيهو شوكلاتات فقمت اديتهم ليهو فرح شديد وقال لي شكراً قلت ليهو ماما وبابا وين¿ قال لي ماما جوة وبابا لسه م جا من الشغل تاني قلع عيونو وشهق قال لي : عمتوو إيدك مجروحه فيها دم! عاينت لي يدي لقيتها كلها دم! اجي ي اخواني ما انتبهت ليها والله ولا حسيت بيها بتنزف قلت ليهو اسي بعقمها م تخاف ابتسم وجرا مشي التلفزيون وهو مبسوط بالشكولاته.. مشيت لي صبا مرت اخوي في غرفتها كانت قاعده وبتتكلم بالتلفون وجمبها نايمه جمانه (3سنوات) من شافتني ارتبكت وقفلت الخط وما معروف بتتكلم مع منو وهل هو اخوي ولا ناس بيتهم م معروف لكن هي ومصداقيتها واخوي الله يعوضو بس لكن دي ما مرا والله سلمت علي سلام بارد ما زي حق انك سنه كامله م تقابل الزول وغايتو بس الحمد لله ما اشتقلته بيها نهائي ومشيت غرفتي اخدته حمام وعقمت يدي وربطتها بشاشة كانت ضربة ما كبيرة لكن نزفت كتير وغريقه عشان كده.. اتوضيت وصليت صلواتي ومشيت المطبخ عملت لي اكل ولمن اتذكرت يمان اتغظت شديد من تصرفو لكن بديت اسأل نفسي هل هو بغير علي؟ هل بحبني لي اسي؟؟ ياربي عرس ولا خطب ولا عمل شنو في حياتو اسأله كتيرة م لقيت ليها اجابه عشان كده اكلت اكلي وشربت عصيري ولمن الساعة عملت10:34م كنت في سابع نومة. .... يارب تكونو كده فهمتو 34%من قصتي...