HANNA’s POV
"Bakit ang tagal mo?” bungad sa ‘kin ni mama pagdating ko. Nakahain na at mukhang balak na nilang magsimulang kumain. “Suka lang pinabili ko sa’yo, pero ‘yung oras na ginugol mo ro’n daig mo pa ang namalengke.”
Naupo na muna ako sa upuan ko bago sumagot. “Eh, pa’no nagkwento pa si Ate Maan. Hindi ako makaalis, ang daldal.”
Si papa ang tumayo para magtimpla ng suka na sawsawan. Nag-request kasi ako ng suka na may timpla dahil ayoko ng sauce ng kare-kare. Sabi ko kanina kay mama, ‘yung seafood lang kakainin ko at gusto ko ay isasawsaw iyon sa suk—
Napatitig ako sa plato ko nang magsimulang gumalaw ang kamay ni Gino. Nilalagyan niya ng hipon ang gilid ng plato ko. Pinipili niya ‘yon mula sa ulam naming nakalagay sa malaking bowl.
“Oh, akala ko ba hindi ka na kumakain ng hipon
