LALORAN MORIS

Kapitulu I “Ahhh…ouhhhh, moras demais” ha’u halerik ho tanis iha laran de’it tanba ta’uk maun ne’e atu hatene. Yea…. Kalan ida ne’e mak kalan dahuluk ba ha’u senti oinsa mundu ne’e nia furak!!! Kalan ida ne’ebé ha’u lakon ha’u nia virjen iha minutu balu nia laran deit. Maske ha’u tenke hala’o ho maneira ida sala teb-tebes hanesan ne’e. Kalan ida ne’e (11 de Janeiro) kalan dahituk ha’u hare maun ne’e iha diskoteka. Ha’u senti nia bele sai aman ba ha’u oan. Ha’u ba besik nia husu ho haraik aan i halo ha’u nia aan hanesan feto ne’ebé haknaar aan iha prostituisaun. Durante ne’e ha’u hare nia mai bebeik iha diskoteka ne’e, maibe ha’u observa nia nunka husu feto lori ba kuartu laran. Nia bonitu, mutin, altura i nia matan furak tebes. Mezmu nune’e ha’u nia laran la monu ba nia. Ha’u nein senti apaixonadu ituan. Ha’u so presiza de’it fini husi nia, atu nune ha’u bele iha oan. Huff…… ha’u hanoin ne’e todan maibe ha’u tenke hala’o. Laiha opsaun seluk atu hili. Ha’u konsege hanoin atu adota ka hakiak ema nia oan, maibe ha’u ta’uk loron ruma karik ha’u nia domin la too ba nia ka liafuan ruma naksalak nia sei halai fila ba nia inan aman. “Ollá, kalan di'ak, maun!” Ha’u kumprimenta nia ho barani mezmu fuan tuku-tuku tanba ta’uk nia la simu. “Ollá, kalan d'ak mos bonita” Nia responde i hahu se liman ba hau. “Deskulpa, ha’u bele hatene maun nia naran” ha’u habarani aan husu uluk nia naran. “Ahh… ha’u nia naran Nino! Alin fali?” “Obrigada maun Nino, Ha’u Noi! Kontente hasoru no bele koñese maun” Ha’u senti kontenti ituan tanba nia bele responde ho di’ak. Ami nain rua hahu konversa ituan antes ha’u hato’o ha’unia objetivu hakarak toba ho nia. Nia hakfodak maibe kontenti i prontu atu halo ho ha’u. Yea……… Nune’e ami tama ba kuartu laran, hala’o buat ne’ebé ha’u hakarak. Nia hakfodak tanba hare ha’u ta’uk. Buat hirak ne’e foun ba hau. Onestu, durante ne’e seidauk iha mane ida mak book ka kaer ha’u nia isin. Nia hanoin ha’u feto ne’ebé haknaar aan iha prostituisaun hodi hetan osan. “Ahhhhh….. Noi, ha’u la espera Noi sei virjen. Tanba sa Noi hakarak entrega Noi nia virjen mai hau?” Maun Nino husu ho kuriuju. "Maun, kalma........ rileks deit. Labele ta’uk, kontinua" Ha’u dehan nune'e tanba ha’u hakarak atu hetan nia sperma hodi bele fo oan ba ha’u, afinal ha’u mos iha laran ta’uk loos tanba barani ona halo hahalok adulteiru nee. Ami kontinua hala’o to’o dala 4, mezmu buat hotu foun ba ha’u no ha’u foin senti ida nee ba dahuluk iha ha’u nia moris tomak. Depois nia mos kolen no dukur. Antes rai hun mutin, ha’u hatais lalais ha’unia roupa no halai sai husi diskoteka ne’e ba uma. Ha’u kontenti no fiar katak fini ne’ebé ha’u na’ok husi maun Nino, sei sai isin iha ha’u nia knotak, tanba ha’u iha hela faze ida buras. Hein katak ha’u bele iha oan mane ida ne’ebé bonitu hanesan maun Nino ka oan feto ida bonita hanesan hau. Ahhh... ha’u bele sai ona Mama fulan sia oin mai. Dader tuir mai iha serbisu fatin.                                                             “Alina, Favor ajuda ha’u lai. Lalais…. Ajuda lori o nia laptop mai lai” Ho lian makas ituan ha’u dehan ba Alina, ha’u nia kolega metan Morena, fuk nakrakat (Fuk Maromak kastigu), komik ten, maibe laran diak tebes. “Be O nusa fali, ansi aan los ne’e? Nusa la prepara desde hodikalan kedas?” Nia husu ho oin naborut. “Aiii… O fo mai de’it ona ba saa…. Ha’u presiza los. Ha’u nia relatoriu seidauk hotu ne’e. Ha’u tenke edit agora”. Ha’u esplika ho ansi. “Ok, diak kolega bonita” Alina entrega ona ninia laptop mai ha’u. Alina, kolega feto ida ne’ebé laran di’ak tebes, la halo aan, la foti aan. Ami nain rua koñese malu desde iha ensinu Sekundaria kedas. Depois de remata eskola Sekundaria ami nain rua kontinua ba universidade ida de’it no foti fakuldade no departamentu ida deit. Sorti di’ak, remata universidade, ami nain rua bele servisu hamutuk iha dirasaun ida de’it too loron. “Ahhh…. hotu ona, hein atu imprimi de’it ona” ha’u dehan ba Alina ho haksolok. Depois de imprimi ha’u nia relatoriu ne’ebé kuaze tahan 20, ami nain rua sa’e ba andar leten hodi prepara tan buat balun iha ne’eba. Ohin loron, diretur ezekutivu Nasional mai halo promosaun ba kargu foun hanesan diretur iha dirasaun ida ne’e. ha’u hanesan sekretaria tenke prepara relatoriu hotu no Alina hanesan Tezoreira tenke prepara mos ninia servisu hotu antes hahu sorumutu nee’ “Ehhhh, Noi…. Ha’u hare ohin loron ne’e, O oin seluk ituan mak nee” Alina deskonfia ituan hare ha’u nia oin tanba la hanesan bai-bain. “IIhhh laiha ida sa Alina doben, bai-bain de’it sa” Ha’u tenta atu subar buat ne’ebé ha’u senti husi Alina. “Hmmmmm…. Ok ok, diak! La dehan ha’u ba sa” Tenik Alina ho lian neneik. “Heisa, Alina metan! Orsida enkontru ne’e hotu mak ha’u konta sa” Ho haksolok ha’u promote ba Alina. “Dader di’ak ba hotu-hotu” Diretur Ezekutivu Nasional hahu tama ba sala sorumutu. “Dader di’ak mos señor diretur!” Ami hotu hatan dala ida deit. “Ahh, di’ak! Maria ho Molina, oinsa imi nain rua nia preparasaun?” Señor Diretur Ezekutivu Nasional konfirma relatoriu ne’ebé ami nain rua Alina prepara ona. Iha ne’e Señor Diretur Ezekutivu Nasional bolu ami nain rua Alina nia naran lolos. “Sim, Señor Diretur, preparadu”. Ami nain rua Alina hatan hamutuk dala ida. Staff hotu-hotu tama ona ba salaun boot edifisiu ida ne’e nian. Liu minutu lima sorumutu mos hahu. Señor Diretur José (Diretur atual) mak sai hanesan orador ka MC iha sorumutu ida ne’e. “Di’ak, antes hahu sorumutu ne’e, mai ita hasa’e lai orasaun ba Na’i atu nune’e sorumutu ne’e bele la’o ho susesu” Señor Diretur José (Diretur atual) loke ho orasaun. Reza hotu, Señor Diretur José (Diretur atual) fo biban mai ha’u ho Alina atu hato’o relatoriu durante tinan 3 nian ba partisipante hotu. “Obrigadu barak Maria ho Molina. Imi nain rua nia serbisu kapas tebes”. Dehan Señor Diretur José (Diretur atual) depois de ami nain rua Alina relata relatoriu jeral ho finansas nian. “Agora ha’u entrega oportunidade ida ne’e ba Señor Diretur Ezekutivu Nasional” Señor Diretur José (Diretur atual) fo tempu ba Señor Diretur Ezekutivu Nasional. “Obrigadu ba oportunidade! Di’ak, iha ne’e ha’u hare buat hotu la’o di’ak no susesu tebes. Maibe buat hotu tempu mak lori. Entaun iha biban ida ne’e ha’umos hakarak atu afirma katak Señor Diretur José (Diretur atual) tenke muda fali ba munisipiu seluk, tanba kargu xefia hotu ona” Señor Diretur Ezekutivu Nasional hahu ninia diskursu. Ami hotu kuriuzu tebes atu hatene se mak atu troka Señor Diretur José (Diretur atual) nia fatin. Dehan nune’e, Señor Diretur Ezekutivu Nasional bolu Señor ida ho naran Antoninho tama mai iha salaun. “Loron di’ak ba ita hotu” Señor Antoninho kumprimenta ami hotu. “Loron di’ak mos Señor” Ami hotu hatan ho kuriuzu. “Señor Antoninho mak sei troka Señor Diretur José (Diretur atual) nia fatin” Señor Diretur Ezekutivu Nasional afirma. Ema hotu basa liman. Maibe ha’u lae; Ha’u hakfodak tebes! 'Señor Antoninho! Oin ida ne’e hanesan los ho oin ida ne’ebé ha’u hasoru no toba hamutuk ona ho nia iha diskoteka hodi kalan'  Ha’u nakdedar tebes…….. Nia komesa hateke ba ha’u. Espara nia la koñese ha’u. Ha’u reza iha laran. 'Aiiii Nai… tanba sa mundu ne’e klot tebes' Ha’u la imajina, ema ne’ebé ha’u naok ona nia sperma ne’e afinal ha’u nia diretur foun. “Maria, halo favor lori señor Antoninho ba hatudu nia fatin” Señor Diretur Ezekutivu Nasional haruka hau. ‘Oh Nai, ha’u ba los ne’ebé?'  ha’u murmura mesak iha laran no la barani foti oin hateke ba Señor Antoninho. “Sim, Sim Señor Antoninho, halo favor” mezmu ho nakdedar no ta’uk ha’u konsege ko’alia sai no konvida Señor Antoninho atu la’o tuir ha’u. Sorti di’ak durante la’o iha korridor, Señor Antoninho la ko’alia buat ruma. To’o iha nia fatin, depois de ha’u hatudu ba nia, ha’u mos komesa fila kotuk no hakarak halai sai lalais husi kuartu ne’e. Maibe, derepenti Nia bolu hau…. “Noi, atu ba ne’ebé ona? Hein ha’u lai” Ohhh…. Jesus, Nia hatene ha’u. Nia bolu ha’u ho ha’u nia naran bolu. Ha’u la hatene atu ko’alia tan saida.  “Ahh…... di’ak, di’ak Señor Antoninho. Ha’u hein!” Bele imajina oinsa ha’u nia nerves. Maibe ha’u tenke dezaraska taka ha’u nia sentimentu. Ha’u tenke forsa, tanba ne’e ha’u nia hakarak rasik. Ha’u tenke koko para simu realidade. Ami nain rua mos la’o fila fali ba fatin enkontru. Oras hatudu ona ba tuku 12.00 meiudia. Enkontru remata no ami hotu fila ba uma.                                                             Ha’u desidi la fila ba uma. Ha’u dehan ba Alina atu ba almosu de’it iha mini restorante ida besik ami nia servisu fatin. Iha Dalan, Alina hare ha’u kasian tebes. Tanba nia hare ha’u hanesan ema ne’ebé moras todan. Kamutis no ain liman nakdader hotu. “Noi, O moras! Ha’u lori O ba ospital agora!” Alina koalia ho ta’uk. “Lae Alina, ha’u di’ak hela” Ha’u hatan ho lian mamar no laiha vontade. To'o iha restorante laran ami hola fatin tur, Alina hahu ko’alia. “Oh iya…. Diretur foun ne wow loos be !!! Bonitu demaziadu tiha deit. Mutin, altura, inus tuda, ahhhhh…. Ha’u labele deskreve tan ona" Alina koalia hanesan tiha ema possuida. "Huffff.....Alina, favor para tiha o nia lian aat sira ne'e. Ha’u lakoi rona tan ó ko’alia kona ba buatamak ne'e, pleaseee...." Ha’u halikar Alina halo Alina mos hakfodak tebes. "O la isin manas ida too, doben?" Alina hateke ha’u ho oin naborut no nia kaer ha’u nia rentoos. "Lae, ha’u diak hela, Alina!" Ko’alia nune'e halo ha’u komesa hanoin atu konta ba Alina saida mak akontese hodi kalan ho maun Nino ka Señor Antoninho. "Entaun, buat ne’ebé mak ohin dader ó promete ne’e tenke dehan ba ha’u agora” Alina ezizi. "Alina, ó sei hanoin ka lae, ha’u nia hakarak ida ha’u konsege konta ona ba ó semana hirak liu ba ne'e?" Ha’u husu ba Alina. "Ida ne’ebé ne'e?" Alina husu ho antuziasmu tebes. "Hisss... ó finzi haluha karik?" "Juru ne'e sa, Noi... dehan loos de’it mai ona ba!" Alina la pasensia loos ona. "Ok ok, Alina Metan... momentu ne'eba ha’u konsege dehan ba ó katak ha’u hakarak iha oan ona, maibe ha’u lakoi hola mane ka kaben". Ha’u dehan ba Alina ho oin naborut. "Ahh sim, sim! Ha’u foin hanoin kona. Ne'e mak?" Alina duni ha’uho pergunta. "Yaa... hodikalan ha’u konsege realiza. Ha’u konsege toba hamutuk ho maun ida no ha’u konsege hetan nia sperma. Ha’u fiar katak fulan 9 tan ha’u iha ona oan ida" Ha’u koalia ho halerik. Ha’u rasik la komprende ha’u nia aan, tanba ne'e ha’u nia hakarak rasik, maibe tanba sa depois de hetan fini ne'e ha’u hanesan ta’uk no tristi ituan fali. "Saida? Noi koalia los itaun ba!" Alina la fiar. "Juru ne'e sa, Lin! Hodi kalan akuntese ona". Ha’u hakruk de’it. "Huffff, mane ne se? Durante ne'e ha’u hatene ó nia doben laiha, tanba ó lakohi mane besik ó. ó barani ka toba ho mane ne’ebé estranhu no ó la koñese nia ka la hatene nia antesendentes! Noi, ó hatene ka lae, agora ne'e moras barak. Moras oi-oin deit. ó la ta’uk ka karik moras at daet ba ó?" Alina husu ha’u ho pergunta bar-barak halo ha’u laiha biban atu hatan. "Noi, ha’u nunka imajina, ha’unia kolega ida bonita no matenek ida hanesan ó bele halo buat ida hanesan ne'e! Ahhhh......... Ha’u hanoin ó koalia bosok deit, Noi!" Alina la fiar nafatin ha’u. "Alina, agora ita tenke han lai. Depois ita kontinua" Ha’u finji destrai tiha. "Ok, diak-diak, haan ona" Ami nain rua hahu han mezmu ha’u rasik tolan la ba tanba imajina mane ida toba ho ha’u no ha’u na'ok ona nia fini ne'e afinal agora sai ha’unia diretur foun no ha’u tenke hasoru nia lor-loron iha servisu fatin.  "Haan ba ka, Noy!" Alina obriga. "Deskupa, ha’u laiha apetite atu han. ó han de’it ba sa, ha’u diak hela". Ha’u hateke Alina ho todan. "Agora ita nain rua tenke buka fatin seguru ida, tanba iha buat balun mak ha’u hakarak atu fahe ba ó. Iha ne'e ema barak. Ha’u lakoi ema ruma sei tilun no rona saida mak ita koalia". Ha’u dada Alina nia liman ho ansi hodi ba selu tiha hahan ne’ebé ami han, depois sai lalais tiha husi fatin ne'e. "Taxi, taxi! Maun, favor lori ami ba tasi ibun lai" Ha’u hapara taxi no manda lori ami ba tasi ibun. Durante Iha taxi laran, ha’u laiha liafuan atu koalia. Tanba ha’u antisipa taxista ne'e rona no hatene ha’u nia problema. Ha’u nia prinsipiu ha’u lakoi ema seluk hatene, eseptu Alina. "Obrigada barak, maun!" Ami tun husi taxi depois de Alina selu tiha taxi ne'e ho $3. Ami buka fatin mahon ida hodi tur. "Noi..... koalia mai, ha’u prontu rona. Ba O ha’u prontu". Alina hateke ha’u ho kasian. Ha’u la barani hateke Alina nia oin. Ho nune'e ho hakruk ha’u hahu haktuir; "Alina, Ha’u nia mãe ne'e faluk desde ha’u foin tinan 10. Pai kurti ho feto barak. Pai hola fen ki'ik no hetan oan 2 tiha ona. Sira moris kontente. Maibe ha’u ho mãe terus teb-tebes. Uluk ha’u sei ki'ik, Pai baku bebeik mãe, la fo osan ba mãe. Mãe tenke buka rasik osan ba han hemu no hodi selu ha’u nia eskola. Grasa de Deus, momentu ne’eba atu hetan bolsa Estudu hodi ba kontinua iha Universidade ne’ebé hanesan ho ó. Deskulpa, durante ne'e ha’u subar metin segredu ne'e no nunka konta ba ó. Ho esperensia moris ne’ebé moruk teb-tebes, halo ha’u la gosta mane no nunka senti simpatia ituan ba kriatura Maromak nian ida naran mane ne'e. Ha’u promete ba ha’u nia aan katak ha’u sei la hola mane. Ha’u lakoi kaben, tanba ha’u la fiar mane iha mundu ne'e. Maibe ha’u hakarak iha oan, para oan ne'e bele kuida fali ha’u wainhira ha’u nia idade boot". Ha’u tanis tanba la aguenta ho istoria no esperensia ne’ebé moruk demais. Hanesan loke fila fali kanek tuan iha ha’u nia fuan. Alina hakuak ha’u, hamos ha’u nia matan ben. Nia enkoraja ha’u atu hateke moris ne'e ba oin. "Noi.... buat sira liu ona. Ne'e hanesan esperensia moris. Agora ita servisu ona. Fulan-fulan iha salariu, mezmu natoon de’it ba han hemu" Alina kontinua haforsa ha’u. "Fulan 9 oin mai mos Noi sei sai Mama" Nia dehan nune'e ho hamnasa, goza ha’u no kili ha’u nia kabun, tenta halo ha’u hamnasa. Pela kontraria, ha’u la hamnasa maibe tanis lelir liu tan. Tanba imajina 'ha’u nia oan nia aman ne'e mak ha’u nia diretur ida agora ne'e. Oh Nai........' "Alina, ó hakarak hatene, mane ida ne’ebé toba ho ha’u hodi kalan ne'e mak señor Antoninho, ita nia diretur foun agora ne'e!" Ha’u klarifika no onestu ba Alina. Ha’u la aguenta atu rai mesak segredu ida ne'e tan. Todan demais........... "Hahhh..... Saida?" Alina konsege hamrik sae ho haksoit tanba la fiar. "Sim, Lin! Tan ida ne'e mak ha’u dehan todan demais. Cruz ida ne'e ha’u leba labele ona, Alina....... Ha’u hanoin Nia ema fuik leet ida ne’ebé bastante ha’u hetan nia sperma depois ha’u haluha tiha nia tanba ha’u promete sei la ba tan iha diskoteka ne’eba" huuuhh.... ha’u tanis liu tan deit. "Hello, Noi... too ona. Labele tanis! ó tenke kontenti tanba Maromak hatudu ona ema ne’ebée ezata ba  ó mezmu liu husi dalan ida ne'e" Ho haksolok Alina tenik. "Halo nusa? Nusa mak ó dehan fali hanesan ne'e" Ha’u la komprende signifika husi Alina nia liafuan. "Noi, ó tenke kontenti no agradese, tanba ó hasoru ona ó nia parseira. Labele husik nia" Alina enkoraja hau. "Lae, lae, lae, Alina" ha’u doko ulun no la aseita ho Allina nia ideia. "Hmmmmm......" Alina dada iis makaas. "Lin, ohin de’it nia fihir ha’u husi ain to’o ulun no nia hatene ha’u nia naran bolu ida hodikalan ha’u dehan ba nia ne'e. Maibe nia la dehan buat ida sobre akontesementu hodi kalan ne'e. Ha’u la hatene saida mak iha nia kakutak agora" Podia ha’u haksolok depois de hetan sperma ne'e, maibe reaalidade akontese oin seluk! Ema ne'e ha’u tenke hasoru loron-loron, mane ida ne’ebé mak ha’u nia diretur agora ................. Ohhhhhh....... ........... Derepenti ha’u nia telefone lian. Ahh, ha’u nia mãe mak telefone tanba oras hatudu ona ba tuku 5 loraik. "Hello, Ma!" Ha’u hatan telefone. "Hello, Noi... sai ona ka seidauk? Ohin meiu-dia la mai han iha uma ne'e? Serbisu barak los ka? Hodikalan mos la toba, fila dader ba liu serbisu" Mãe hadomi tebes ha’u, nia sempre senti atrapalla sekarik ha’u fila atraza no la ba almosu iha uma. "Ahh sim, sim, amãe, ituan tan ami fila ona. Deskupa, ohin ami almosu iha ne'e. Ha’u haluha fo hatene ba amãe" ha’u bosok ona mãe tanba ta’uk nia hirus. Horseik loraik ha’u bosok Mãe dehan ha’u ba kolega nia festa no fila dader, afinal ha’u ba diskoteka. "Hmmm, kiudadu an. Orsida fila liu merkadu sosa ho amãe nia bua malus eeee..... amãe nia mama hotu ona" Mãe koalia ho lian mamar. "Di'ak Ma, los ona. Ate orsida" ha’u taka telefone. "Ate orsida, Noi..." Mãe hatan. "Alina, ita fila ona eee... ha’u kolen loos. Ha’u hakarak deskansa lalais ona." Ha’u ezizi ba Alina para ami nain rua fila ona ba uma. "Ok, let's go home" Alina istilus koalia Ingles itaun, afinal nia ladun hatene Ingles took ida. Ahahahaha.... ha’u hamnasa iha laran. Too uma ha’u entrega tiha Mãe nia bua malus, ha’u tama liu kuartu laran riba aan ba kama. Mezmu kosar dois hela, maibe ha’u laiha vontade atu haris. "Noi.... Noi, haris tiha hotu sai mai lai" Mãe mai dere ha’u nia odamatan. "Mãe atu koalia lai buat ruma ho Noi, lais ituan eee....." Mãe obriga. "Ahhh... Mãe! Ha’u kole los, mãe atu koalia saida?" Ha’u hatan ho baruk.  "Noi..... loke odamatan lai!" Mãe ezizi. "Di'ak Mãe, hein ituan". Ha’u hader ho baruk husi kama leten lao obriga an ba loke odamatan. "Aiii... amãe nia oan bonita kamutis los ne'.... O moras?" Mãe preokupa ho ha’unia kondisaun. "Lae, Mãe... ha’u la moras ida, ha’u kolen deit. Ha’u presiza deskansa agora. Mãe atu koalia saida ho hau?" Ha’u la barani hateke Mãe nia oin, tanba ha’u senti ha’u halo ona pekadu. No ha’u labele imajina oinsa Mãe nia sentimentu wainhira nia hatene ha’u isin rua maibe aban bainrua inkognitu? "Ahhhh, Noi sei kolen ne'e deskansa lai ba. Depois deit. Maibe hadeer ba haris lai, pois haan tia lai mak toba" Mãe dada ha’u nia liman hamrik, no ha’u halo tuir Mãe nia hakarak. Haris hotu tiha, ha’u ba toba liu tanba laiha apeteti atu jantar ho Mãe. Mãe mos la konsege atu obriga tan ha’u. Iha uma ne'e iha ema nain 4 deit. Ha’u ho mãe, ho tan mãe nia prima nia oan feto nain rua husi foho mai hela hamutuk ho ami tanba sira tenke kontinua sira nia estudu iha universidade. Agradese sira nain rua (Anita ho Angéla) mai hela tan ho ami. Dalaruma ha’u sai ba hala’o serbisu iha munisipiu, sira nain rua mak hamaluk mãe iha uma. "Tia, abin Noi la sai mai haan ka?" Anita husu ba Mãe. "Nia kolen hela, husik nia deskansa ba, tanba aban mos nia tenke tama sedu serbisu" Mãe esplika ba sira. "Ohhh, di'ak tia, entaun ita haan lai.....” ***