LALORAN MORIS

Kapitulu 6

Dadersan iha Maliana.

Matabixu hotu ami aranka ba Suai. Iha dalan besik ba Bobonaro, ema faan aifuan ho hahan kiik (snack local) barak. Maun Nino hapara kareta no ba kompra buat hirak nee ba ha’u.

“Noi, haan ba. Aifuan nee sei fresku. Di’ak ba ó nia saude”. Nia ko’alia ho fiar aan.

“Hmmm, haan mesak ba, ha’u lakohi ida. Ha’u sei bosu hela” Ha’u hatan ho barul, tanba dalan sa’e ba foho nee mos araska ituan halo ha’u nia laran sa’e no sente atu muta.

Derepenti ha’u senti laran beik no la aguenta atu muta. Maun Nino hateke ha’u nia oin ho husu ho kuruizu.

“Noi, ó di’ak hela?” Nia husu.

“Haree dadaun ha’u la diak mos sei husu nee? Hapara tiha kareta iha ninin ne’eba! Ha’u atu muta, lalais!” Ha’u tenik ho hakilar de’it tanba la aguenta ona atu muta.

“Di’ak-di’ak, kalma” Hapara derepenti no trabaun lian makaas.

Oaakkk-oakkkk -oaaakkk

Hahan ne’ebé ohin dader ha’u konsege konsumu sai halo hotu. Viajen husi kapital mai Maliana horseik nee di’ak hela. La hatene dader nee sai husi Maliana villa sae mai Bobonaro oan nee ha’u labele ona kontrola ha’u nia aan.

“Huffff…. La’o laran be’ik loos nunee nee Noi? Bai-nain ó la’o nee nunee ka?” Maun Nino husu ho oin naborut.

“Ihh lae karik diak. Foin primeira-vez ha’umuta hanesan nee saa. Bai-bain la’o nee diak hela. La hatene agora nee tanba sa?” Ha’u hatan ho nervoza.

“Okay, loos ona, haree hemu tiha bee nee… hakmumu tuha ibun dois nee hahahaha…” Nia komesa goza ho hamnasa ha’u.

Nunee ha’u hadau de’it bee iha nia liman hodi hakmumu tiha ha’u nia ibun no tolan tiha balu hodi ha’u bele sente fresku ituan.

‘Loos ona, it abele kontinua la’o” Ha’u afirma.

“Di’ak ona ka?” Maun Nino husu.

“Yeaa, di’ak mak ha’u dehan la’o ona nee too…. Nee parese reza atu halo ha’u ladiak no mate iha daln karik?” Ha’u hatan ho nervoza.

“Hai.. Noi, ha’u la hanoin hanesan nee ida. Ha’u husu ho didiak ó sempre hatan ho nervoza nee tanba saida? Ha’u salah nee iha ne’ebé?”

“Se maun ko’alia barak, ha’u fila agora ba Dili mak nee” Ha’u ameasa.

Hmmmm…. Maduru ituan ba. Deskulpa karik ha’u salah. Ok, agora ita kontinua viajen ba Suai. Sebele Noi dukur de’it atu nunee labele laran be’ik tan no ita bele too lalais ba Suia. Ema hein ona tu abertura formasaun nee” Nia ko’alia nar-naruk no la hateke ba ha’u nia oin.

“Loos ona, la’o ona….” Ha’u mos hatan no nervoza.

“Hmm…. Ok! Diak. Dukur ona ba haahaha… “ Nafatin sei la hateke ha’u nia oin, nia ko’alia ho hamnasa.

Ha’u mos baruk ona atu debate ho maun Nino. Ha’u hahu dukur ha’u nia matan mezmu la dukur tebes. Iha ha’u nia kakutak mosu buat barak. Durante iha dalan ha’u nia kakutak nee hanoin bebeik mak problem aida agora dadaun nee hau enfrenta hela. Problema ida ne’ebé ha’u rasik mak hakarak kria no ha;u rasik la hatene atu solusiona oinsa.

‘Tanba saa, tanba saa, tanba saa no tanba saa??? Oinsa se karik ha’u isin rua tebes duni? Saida māe atu halo ba ha’u? Loos duni, nee ha’u nia hakarak no ha’u nia planu, maibe ha’u hakarak hetan fini nee husi mane dook, mane fuik leet ida ne’ebé depois de ha’u hetan ninia fini ha’u la konsege haree ninia oin no ha’u lakohi atu koñese nia totalmente. Maibe realidade akuntese oin seluk! Nia mane ida ne’ebé sai ha’u nia diretur. Loron-loron tenke hasoru nia. Ohhh…. Na’i saida mak ha’u tenke halo agora’ Ha’u tetu no mesak mur-mura iha laran. Ha’u la barani ko’alia sai. Tanba desde sai husi kapital mai to’o agora mos maun Nino seidauk ko’alia fali asuntu nee. So, ha’u sente agradese tanba nia seidauk husu kona ba ha’u nia siklu menstruasaun nee. Hein katak nia haluha ona no sei la husu tan kona ba ida nee. Husik hau mesak rai de’it iha ha’u nia laran.

Drrrttt…drrrttttt….

Derepenti ha’u nia telemovel lian iha pasta laran. Ho obriga aan no kuriuzu ha’u tenta loke matan no loke pasta atu hasai telemovel nee.

“Husik ba, lalika atende telefone nee lai. Haree ba toba nonok de’it. Selae orsida bele muta fali” Maun Nino ko’alia sein haree ha’u nia oin.

“Hmmm…. Husik ha’u foti lai. Keta halo ba importante” Ha’u hatan ho laran nakali maibe ha’u nia matan mos loke araska tebes.

“Hodibainhira ona mak ó iha ema importante iha ó nia moris laran? Se la sala ó nia māe ohin antes ita atu sai nee telefone tiha ona. See tan mak importante? Assuntu serbisu nian laiha. Diretur mak agora sai hela ó nia xofer nee hahahha….” Nia ko’alia ho hamnasa mezmu nafatin la hateke mai ha’u.

“Okay… okay di’ak señor diretur” Hatan nunee tanba ha’u la aguenta ho ninia fraze ikus ida dehan ha’u nia diretur mak agora sai hela ha’u xofer nee….

Nunka imajina nia atu hasai liafuan nunee…

Durante tinan lima ha’u serbisu iha instituisaun nee, ami halao bebeik viajen ba munisipiu no ema ne’ebé lori kareta ne’e xofer ka motorista husi instituisaun ne’e rasik. Nunee ha’u ami sempre la’o ho ekipa, dalaruma bele na’in haat ba leten. Maibe ohin loron ne’e depois de troka diretur foun, nia mai manggame fali, hakarak la’o ho ha’u mesak de’it. Hein katak ida nee akuntese la’os tanba ami konsege toba hamutuk ona no ha’u konsege hetan ona ninia sperma atu ha’u bele iha oan sein kaben ka hola mane. Buat ida ne’ebé ha’u odiu iha ha’u nia moris tomak.

Hanoin hikas buat ne’ebé dadaun nee akuntese hela mai ha’u halo ha’u labele dukur no taka matan. Ha’u foti ha’u nia slayer no taka metin ha’u nia matan, tanba hateke ba liur sente atu muta tiha de’it. Huffff….. dilemma boot loos durante viajen husi Malian aba to’o Suai.

“Noi, se sente la agunta loos ona saa, ita para ituan lai. Hola anin lai iha foho leten ne’eba. Fatin nee fresku loos. Sente kamaan ba maki ta kontinua” Maun Nino afirma. Nia kala hateke ba ha’u oin kamutis hotu, ohin muta to’o kabun laran mamuk hotu. Hemu de’it bee mos araska ona.

Nunee ami para ituan no la’o sae ba laletek oan ida hodi sente anin foho nia fresku. Nia dada ha’u liman ho pasensia no kalma tebes. Konsege ha’u senti hanesan prinseza ida.

‘Eeithh…. Lae, lae, lae, Noi! Hanoin māe nia terus. Mane hotu-hotu hanesan de’it. Labele koko apaisodu ka laran monu ba mane sira hanesan ne’e. keta halo ba aban bainrua ó nia laran moras hanesan ó nia inan’. Ha’u mur-mura iha laran no derepenti hisik tiha maun Nino nia liman ne’ebé dada hela ha’u hodi sa’e ba foho laletek oan nee.

“Noi….!!!” Maun Nino hakfodak ho ha’u nia asaun.

“Deskulpa maun, ha’u labele…..” Ha’u hatan ho halerik

“Labele saida? Ha’u la komprende” Dehan maun Nino.

“Ko’alia halo kalru mai ba. Labele saida nee? Labele halo nee Noi? Labele ba Suai ona ka oinsa” Maun Nino duni ha’u ho pergunta barak-barak tanba ha’u nein hatan ituan.

Ha’u hahu tanis no monu tuun ba rai. Liu tiha ida ne’e ha’u mos la hateneno la hanoin tan buat ida ona. Afinal ha’u dezmaia tiha. Ha’u sente mak maun Nino lolo liman hakuak ha’u no foti ha’u lori fali ba kareta laran. Ho ansi nia hamoris kareta no ami aselera lalais ba Suai, tanba ami to’o on aida Estrada di’ak.

“Noi…. aguenta eeee Noi, favor ida aguenta ba…Ita besik tama ona Suai. To’o bai ta ba liu ospital de’it para bele konsulta. Bele oinsa ba mos ó nia saude nee importante liu…” Nia ko’alia mes-mesak. Ha’u konsege rona maibe sente dook loos no ha’u sente hanesan mehi. Sente ruin sira atu tohar hotu de’it.