LALORAN MORIS

Kapitulu 17

Durante semana balun buat hotu lao normal, tantu iha serbisu fatin ka iha uma. Ha’u tenta subar ha’u nia pregnansia husi mãe atu nia keta lai hatene.

Loron lao, fulan mos lao dadaun. Bebe iha ha’u nia knotak mos hahu dezelvolve dadaun. Ha’u seidauk prontu atu koalia ho mãe kona ba ida nee. Ha’u dezaraska uza estagen hodi aperta ha’u nia kabun atu ema labele nota katak ha’u isin rua hela.

To’o loron ida, maun Nino bolu ha’u tama ba ninia fatin.

“Bondia, señor!” Ha’u tama ba no kumprimenta nia.

“Bondia, Noi! Favor, taka lai odamatan ne’eba. Ha’u presiza koalia sériu ho Noi agora” Nia manda ha'u atu ha'u tenke taka lai odamatan antes hakat na ninia oin.

“Atu koalia kona saida mak presiza taka odamatan nee?” Ha’u komesa deskonfia ho ninia jeitu.

“Favor, ha’u sériu” Nia hatan ho sériu no hatudu ba odamatan atu ha’u tenke hakat fali ba odamatan atu taka odamatan hanesan ninia hakarak. Ho laran todan no nakonu ho pergunta, ha’u hakat duni ba odamatan nee hodi taka tiha odamatan, xave tiha husi laran no hakat fila fali ba ninia oin hodi tuur iha kadeira ida ninia meza oin.

Nia hamriik no dada ha’u liman.

“Noi, mai ita ba tuur iha sofa ne’eba deit mak ita koalia, tanba nee laos assuntu serbisu”

“Sekarik laos asuntu serbisu nian, entau atu koalia kona saida nee?” Ha’u duvidu no deskonfia. Mosu tauk iha nia ha’u kakutak.

“Noi, ha’u senti ó hatene hela, maibe sei halo finze la hatene no ignora buat boot ida hanesan nee nee? Nia hateke ha’u ho dezafia.

“Hmmmmm….” Ha’u dada iis makaas no huu husi ha’u nia ibun. Haree ida nee, nia tenta fihir ha’u nia matan laran atu halo ha’u fiar katak buat ne’ebé mak nia atu koalia nee sériu.

“Noi, hateke ha’u nia matan. Dala ida tan ha’u sériu hakarak koalia ho Noi katak aban, loron Sabadu nee ha’u hakarak ba hasoru Noi nia mãe kona ba ita nain rua nia relasaun” maun Nino haktuir ho lian neneik maibe serteza.

Ha’u hakfodak, hisik tiha ninia liman ne’ebé kaer hela ha’u nia liman no hamriik derepente.

Ha’u nunka imajina nia atu koalia nunee. Ha’u doko ha’u nia ulun lalais.

“Lae, lae,lae….. Maun bulak karik?” ha’u fihir nia ho espresaun nervoza.

“Noi, ha’u sériu. Agora kedas hasai tiha estagen ne’ebé ó uza hodi aperta ha’u nia oan nee. Ó hanoin ó halo nunee nia la terus ka?” nia halo ha’u hakfodak liu tan deit. Oinsa nia bele hatene karik ha’u uza estagen hodi aperta ha’u nia kabun? Alina deit ha’u la fó hatene… oinsa nia bele hatene?

“Dala ida tan Noi, hasai agora. Ha’u hakarak haree ha’u nia oan kontente. Labele haterus nia. Favor ida” koalia nunee nia hakbesik aan mai no tenta atu hasai estagen iha ha’u nia knotak, maibe ha’u tenta haksumik aan no sees dook husi nia. Haree ida nee, nia hakat lalais ba odamatan no hasai tiha xave liman husi odamatan atu ha’u labele sai.

“Huuffftt…. Maun, favor ida. Husik ha’u sai agora” ha’u nia matan been nakonu no ha’u hamonu ha’u nia aan ba sofa, tuur ho ain liman mamar.

“Noi, aprende sai ema ne’ebé iha responsabilidade ituan ba. Ó halo nunee nee see mak obriga ó atu iha oan, haa?” maun Nino komesa hasa’e nia lian no koalia ho siak.

“Agora kedas, hasai tiha sintu nee husi ó nia kabun” nia nafatin koalia ho lian makaas.

“See ó lakohi nain hasai, husik ha’u mak hasai fodik” espresaun ida nee halo ha’u aumenta trauma no tauk, bainhira hanoin to’o uluk pai baku mãe halo mãe sofre.

Ho nakdedar no mistura ho tauk, ha’u tenta hasai tiha estagen ne’ebé ha’u bobar iha ha’u nia kabun. Haree ida nee nia hamnasa ho kontente, tenta hakat mai besik hodi hamaus ha’u nia kabun.

“Apai nia oan, perdua mãe Noi eeee, tanba amãe Noi presiza tempu atu simu apai nia oan ninia presenza. Keta hirus nia, keta tauk. Apai sei iha para atu haree no kuidadu nafatin ó, to’o loron ó bele mai hamutuk ho ami iha mundu nee” nia koalia ho lian mamar hanesan aman ida ne’ebé hadomi teb-tebes ninia oan, halo ha’u hakfodak no koalia hotu ladiak.

Ha’u hakruuk no matan been komesa sai husi ha’u nia matan. Ha’u la aguenta ona ho buat ne’ebé akuntese mai ha’u dadaun nee. Ha’u la hatene ha’u tenke kontente ho situasaun ida nee ka oinsa? Ha’u nafatin hela ho nonok.

Ho lalais nia hamoos ha’u nia matan been. Ha’u tenta dudu sees ninia liman ho nervoza. Maibe dala ida nee, ha’u sente oin seluk, ha’u sente hanesan seguru ituan iha ha’u nia fuan. Entre ha’u nia kakutak no fuan hanesan funu makaas. Ha’u nia fuan kontente bainhira nia halo hanesan nee ba ha’u. maibe ha’u nia kakutak la simu.

“Noi, ó bele la simu ha’u mos la buat ida. Ha’u komprende. Maibe husik ha’u kuidadu ha’u nia oan. Favor ida labele tanis demais, tanba see Noi tanis bebeik, ha’u nia oan moos sei triste no tanis iha laran ne’eba” Nia esplika ho entuaziasmu.

“Maun, favor ida! Bele ka lae maun labele atrapalla ami nia moris? Bele ka lae maun haluha tiha katak nee maun nia oan?” ho espresaun la serteza, ha’u konsege hasai laifuan ida nee ba nia.

“Heiii… Noi, ó sei normal hela too? Ha’u iha direitu ba ha’u nia oan. Kleur tebes ona ha’u ho ha'u nia familia hakarak iha oan husi ha’u nia feen uluk, maibe to’o agora Nain seidauk fó hela deit” nia hatan ho matan lakan.

“Huuuffftt.. ha’u la hatene atu koalia tan oinsa atu halo maun komprende?” la sente matan been komesa suli no habokon ha’u nia hasan ne’ebé durante ha’u isin rua nee, ha’u la gosta atu uza pó ka make-up ruma, nein lipstick ruma. Ha’u la gosta atu hadi’a aan hanesan bai-bain. Baruk mak domina loos tiha ha’u nia aan, no halo ha’u hakribi hotu make-up sira nee, inklui ha’u nia perfume favouritu ne-ebé bai-bain ha’u sempre uza no tau iha pasta laran ba ne’ebé deit ha’u ba.

“Noi, agora hamoos matan been, prepara mentalidade halo diak no sai ba liur, kontinua serbisu. Tuku lima hein ha’u, ha’u tula hela ba uma” nia entrega tissue mai ha’u atu ha’u hamoos ha’u nia matan been.

Hamoos hotu matan been, ho oin buis ha’u tenta buka fali estagen no hakarak atu bobar fali iha ha’u nia knotak, tanba la senti ha’u nia kabun boot loos ona. fulan ida nee tan tama ona fulan lima. See ha’u la uza estagen, parese ema hotu bele hatene no nota ona, inklui mãe.

Maun Nino hateke ha’u ho espresaun duvidu.

“Buka saida?” nia husu.

“Ha’u nia estagen ohin iha ne’ebé ona?” ha’u husu fali ho nervoza. Ho doko ulun nia hatan.

“Bee ohin ha’u haruka hasai nee para atu uza fali ka? Ó hakarak atu oho ha’u nia oan ka?” Nia komesa nervoza, ninia uat iha rentoos nee haree sa’e malu didiak. Nia la simu atu ha'u nafatin uza estagen. Nunee nia foti tezoura iha ninia gaveta hodi tesi rahun tiha ha’u nia estagen nee. Ha’u hakfodak no ansi atu hadau, maibe ha’u tarde. Estagen nee rahun hotu ona.

Took……..tookkk…...tokkkk

Ema ruma dere odamatan husi liur halo ami nain rua hakfodak no hateke dala ida deit ba odamatan. Ho ansi ha’u hakat ba atu loke odamatan. Maibe to’o iha ne’eba ha’u hakfodak tanba xave laos iha ha’u. ha’u haluha tiha katak ohin maun Nino hasai tiha ona xave nee husi ne’eba.

Took……..tookkk…...tokkkk

Took……..tookkk…...tokkkk

Ema nee nafatin tenta dere odamatan.

“Noi, ba tuur tiha iha sofa ne’eba, hamoos matan been nee halo maran. Husik ha’u mak loke odamatan nee” nia fó instrusaun ba ha’u. sein koalia buat ruma ha’u halo tuir ninia instrusaun.

Kreeekkk…….. odamatan nakloke.

“Boa tarde señor, deskulpa ha’u atrapalla ituan” mane ida ninia lian, ha’u tenta foti ulun no hateke ba odamatan, maibe la hetan.

“Ohhh, maun Mario! Halo nusa? Atu dehan buat ruma?” maun Nino hamriik iha odamatan no la fó biban atu maun nee tama mai laran.

“Sin, señor! Iha señora ida mai hakarak atu hasoru ita” maun nee haktuir. Ha’u tenta atu rona didiak sira nia konversa.

“Ha’u sente ha’u laiha ajenda ida atu hasoru ema ruma ohin loron” maun Nino hatan ho konfujaun. “Maiz e menus ema nia aparensia oinsa?” Nia kontinua husu.

“Badak, bokur, morena no fuuk malatu” maun nee esklarese.

“Karik nia temi ninia naran?” maun Nino kuriuzu.

“Deskulpa, señor! Ha’u mos la konsege husu ninia naran”

“Okay, entaun maun Mario sai fali ba, husu ninia naran, nia husi ne’ebé no objetivu saida hakarak hasoru ho ha’u? “ Maun Nino manda maun Mario atu sai ba konfirma fali ema nee ninia identidade no objetivu atu hasoru maun Nino.

Kreeekkk………. Maun Nino taka fila odamatan no hakat lalais ba tan ha’u. Ho espresaun nakonu ho kuriuzu, ha’u husu “ see mak mai nee?”

“Guarda. Ita nia guarda Mario saa” nia hatan badak deit.

“Pois see mak atu mai hasoru maun nee?” ha’u nafatin kuruizu tenta atu hatene klean liu tan.

“Hmmm, ha’u mos seidauk hatene. Maun Mario dehan feto ida. Maibe tuir ha’u nia ajenda ohin loron, laiha ema ruma mak atu hasoru ha’u, loos ka lae?” nia hateke ba ha’u atu konfirma.

“Sin, karik atu hasoru mos ha’u tenke hatene” ha’u dehan ho duvidu. Iha momentu koalia asuntu serbisu nunee ha’u sempre bele domina situasaun ho profesionalizmu no tau ha’u nia aan hanesan sekretaria no vise diretora. Oin seluk bainhira hasoru maun Nino no nia koalia kona ba ami nain rua nia relasaun proibidu ida nee.

“Loos ona, ha’u sai ona ba ha’u nia fatin. Lisensa!” aproveita momentu ida maun Nino mos sei hela iha kuriuzu nia laran no hein guarda Mario atu mai hato’o hikas informasaun kona ba ema ida atu mai hasoru nia nee, ha’u hakat lalais sai ba ha’u nia fatin.

Ha’u tuur tiha iha ha’u nia fatin, ha’u nia matan ikun tenta buka maun Mario, no loos duni nia lao lalais fali ba maun Nino ninia fatin.

Took……..tookkk…...tokkkk

Maun Mario dere odamatan. La kleur odamatan mos nakloke. Maun Mario hakat tama liu ba laran. Nunee ha’u mos la rona tan ona saida mak sira koalia.

Hein iha kuriuzu nia laran, la kleur sira nain rua sai hamutuk mai, maibe maun Nino lori kedas ona ho ninia pasta, indika katak nia atu fila ona ba uma ka sai ba fatin ruma.

Ha’u hateke ho espresaun konfundi. Maun Nino komprende ha’u nia objetivu hateke nia. Nia lao besik mai ha’u nia meza no dehan “Noi, deskulpa! Loraik nee ha’u labele lori Noi ba uma. Noi bele fila ho Alina too? Ohin ha’u promete ona, maibe iha bainaka ida mai derepente no ha’u tenke ba hasoru nia” nia koalia ho nakdedar no la hanesan bain-bain.

Ha’u tata ha’u nia ibun kulit parte kraik. Ha’u la komprende tanba saida ha’u sente hanesan atu laran moras ituan tanba maun Nino la konsege realiza ninia promesa. Maibe, iha ha’u nia kakutak hateten oin seluk. Husik nia ba ba, diak liu tan, atu ha’u bele livre husi nia.

Haree ha’u nia espresaun, halo maun Nino mos duvidu atu hakat sai ba liur. Maibe tanba ha’u nia kakutak hateten dehan katak husik nia ba ba, entaun espontamente ha’u dehan:

“Diak hela. La presiza husu deskulpa” ha’u hatan badak deit, mezmu ha’u nia fuan la simu.

“Obrigadu ba komprensaun, Noi. Ate aban” dehan nunee maun Nino mos hakat sai lalais ba tan maun Mario ne’ebé hein hela nia atu lori nia ba hasoru feto ida ne’ebé halo maun Nino la kumpri ninia promesa atu tula ha’u fila ba uma bainhira sai serbisu.

Afinal hori ohin kedas Alina observa hela ha’u husi dook. Maun Nino hakat sai tiha ba liur, ho ansi Alina lao mai tan ha’u nia fatin. Oras hatudu dadaun ona ba tuku haat lorokraik. Nee signifika katak hela oras ida tan ami bele fila ona ba uma.

“Noi….” Alina bolu ha’u halo ha’u mos hakfodak tiha.

“Eiihhh… Alina nee halo ita hakfodak deit” Ha’u hatan ho espresaun hakfodak no ha’u la bele subar espresaun nee.

“Noi, kabun sai loos ona nee. Ha’u senti ohin dader to’o mai nee ó nia kabun seidauk boot to’o hanesan nee. Ohin meiu-dia mos seidauk. Mudansa lalais loos nee” nia Alina konfundi. tanba durante nee Alina la hatene no la nota katak ha'u uza hela estagen no estagen nee ohin maun Nino foin haruka hasai no nia tesi rahun tiha.

“Sssttttttt….koalia neneik ba” ha’u lori ha’u nia liman fuan hatudu hodi taka iha ha’u nia ibun tutun.

“Uppssss…. Sorry!” Alina bis-bisu.

“Alina, ha’u la hatene maun Nino atu ba hasoru see?” ha’u koalia ho espresaun la gosta.

“Heii… Noi, desde hodibainhira mak ó senti laran kanek no kuriuzu atu hatene maun Nino atu ba hasoru see? Bai-bain ó la preokupa ho ninia atividade ida too” Alina interompe.

Ha’u mos konsiente no moe tiha.

“Lae, Alina. Ó rona lai. Ohin nee maun Nino promete sai serbisu nia atu tula ita nain rua fila ba uma. La kleur guarda tama ba dehan iha bainaka feto ida mak atu mai hasoru nia, maibe iha ajenda ohin loron nian laiha. Ha’u kuriuzu hakarak hatene deit ema nee see? Pois tanba deit ema nee mai, promesa ne’ebè ohin nia promete nee falla. La konsege realiza. Nee laos signifika katak ha’u laran moras ka laran kanek ka saida ka, Alina…. Favor komprende ida nee…” Ha’u koalia ho intonasaun makaas ituan, halo staff sira seluk mos rona no hateke hotu mai.

“Ehemm… ehemm.. ehemmm” Alina finze mear halo sira mos la hateke ona mai ami nain rua.

Tanba preokupa liu ho maun Nino ne’ebé atu ba hasoru ema nee, halo ha’u mos la konsiente katak mana Mena lao besik mai dadaun ha’u nia fatin no hateke diretamente ba ha’u nia kabun ne’ebé boot ona no bele nota momoos loos ona katak ha’u isin rua hela. Ho oin siin nia hahu koalia.

“señora vise diretora, ita boot bokur loos nee. Maibe bokur ida nee iha kabun deit fali nee” nia koalia ho oin siin no la amigavel. Ferik nee gosta loos kepo ho ha’u nia kondisaun.

Ha’u hakruuk deit no laiha liafuan atu koalia. Maun Nino estraga ha’u ona. sekarik ohin nia la tesi estraga ha’u nia estagen nee, parese ferik nee sei la hamoe ha'u hanesan nee. Alina mos laiha tan ona liafuan ida atu koalia hasoru ferik Mena nee. Ami nain rua hateke malu nonok deit.

Iha problema rua mak agora nakonu no haksesuk malu hela iha ha’u nia kakutak nee. Oinsa karik ferik bibi ibun ida nee habelar kona ba ha’u ne'ebé agora isin rua hela, maibe laen laiha! No ida tan see mak feto ida halo maun Nino husik hela ha’u no la kumpri ninia promesa?

Tanba ferik nee haree baa mi nain rua Alina la liga nia, entaun nia lao tiha ba kotuk, foti aisar no hodi hamoos uma laran.

Teki - teki mosu idea iha ha’u nia kakutak atu telefone maun Nino. Hakarak atu hatene deit, ema ida atu hasoru nia nee see, iha ne’ebé no nia halo saida…..

Ha’u foti ha’u nia telefone, buka ninia numeru no ha’u dere ba…

[“Sin, boa tarde…] ha’u hakodak rona lian nee. Feto ida mak hatan. Laos maun Nino mak hatan. Ho nakdedar ha’u taka telefone.

‘Feto nee see?’ ha’u mesak mur-mura….