LALORAN MORIS

Kapitulu 8

Loron tuir mai.

Tuku neen dader rona sinu Igreja lian, misa Trindade. Tanba otel ne’ebé ami hela ba ninia distansia ladun dook husi Igreja. Rona sinu nia lian halo ha’u hakfodak, neon taridu. Koko loke matan no hasa’e orasaun ba Maromak, ba grasa no terus ne’ebé ha’u hetan dala ida de’it, hetan iha momentu ne’ebé hanesan.

Ha’u hader no la’o ba hariis fatin. Ohin loron ha’u tenke ba serbisu. Ha’u tenke hala’o ha’u nia knaar hanesan señor antoninho ninia sekretaria. Ha’u tenke funu hasoru ha’u nia sentimentu egoismu, ha’u tenke bele. Ho neon forte ha’u hakat ba hariss fatin. Hafoin ha’u foti eskova no pastadente hodi atu eskova nehan, derepente ha’u laran sa’e no atu muta.

‘Ahhhh…. ‘ Ha’u halai sai fali husi hariis fatin no la konsege eskova nehan.

“Oaakk… oaakk…” Komesa muta sai.

Afinal maun Nino iha kuartu sorin rona hela ha’u muta. Nia dere odamatan.

Noi, loke odamatan! Loke odamatan nee, favor ida. Ha’u hatene ó ladia”. Nia hakilar husi liur.

“Ha’u diak hela maun, favor labele atraplla bebeik ha’u”. Ha’u hatan

“Hmm….... okay! Loos ona” Nia hakat tama fali ba ninia kuartu laran ho hirus.

Ha’u tenta nafatin tama ba hariss fatin hodi hariis. Hariis hotu ha’u sai ba liur no buka matabixu. Maibe nein hahan ida mak ha’u gosta atu haan. Afinal estomogu mos komesa moras dadaun.

Ha’u foin hanoin to’o, uluk ha’u nia kolega ida iha momentu ami sei eskola hamutuk iha universidade ne’eba mos nune’e. Nia doben halo isin rua tiha, lakohi atu responsabliliza. Kolega ne’e isin rua tiha ninia doben halai tiha ba rai liur. Husik hela ninia doben isin rua ne’e nee. Dader-dader tenke ba kampus mesak, dalaruma to’o tiha iha ne’eba nia muta no la gosta atu haan buat ruma. Too ikus ninia estomagu grave tiha. Hein katak ha’u labele sai hanesan kolega ne’e.

Maun Nino sai mai husi ninia kuartu. Ha’u hafuhu nia husi dook deit. Ha’u la nega katak nia bonito duni. Ain aas, mutin, inus kain tuda…. Aahhhh, espera karik ha’u nia oan nee mane oan ida, entaun nia sei bonitu loloos kedas hanesan ema ida ha’u na’ok ninia sperma nee dadaun ou karik nia feto oan ida entaun nia mos bonita tebes.

Huuufffff…….. hanoin nunee la konseinte ha’u kaer ha’u nia kabun, hamaus neneik tiha. Hain tan fulan 8, tanba agora fulan ida liu ona.

Afinal maun Nino mos hateke hela mai ha’u bainhira ha’u hamaus ha’u nia kabun. Nia la’o besik mai ha’u no dehan:

“Bondia Noi, ita nia oan di’ak hela ka?” Nia husu.

“Ha’u nia oan. La’os ita nia oan” Ha’u hatan ho oin buis.

“Noi…” Nia bolu ha’u no doko ulun.

“Nee ha’u nia oan, okay! Ha’u hatene nee mak nia oan. Dala ida tan nee ha’u nia oan. Tanba ha’u toba ho ó nee ó sei virjen. Ha’u buka ona informasaun, ó nein iha doben ida, ó nein gosta mane ida. Ne’ebé ha’u fiar katak nee ha’u nia oan….. “ Maun Nino ko’alia ho fiar aan tomak.

Ha’u lakohi tan atu rona nia ko’alia no lakohi atu debate ho nia. Ha’u hakat fali ba ha’u kuartu laran, taka odamatan ho nervoza no latan aan fali ba kama leten. Mane ida nee halo ha’u nia vontade atu ba serbisu lakon kedas. Rona de’it nia ko’alia barak halo ha’u mal sae kedas no desidi atu sulan ha’u aan iha kuartu laran deit. Husik nia mesak ba serbisu ba. Do que ha’u ba hotu, ami bele istori malu no haksesuk malu iha ne’eba.

Tok..tok..tokkk…

Derepente nia mai dere odamatan ho bolu. “Noi, favor maduru ituan. Sai mai matabixu, it aba serbisu. Okay!”

Ho ta’uk kahur nervoza ha’u loke odamatan no sai mai…

“Okay-okay, maibe labele labele dehan buat ruma tan kona ba ha’u nia privasidade. Favor ida” Ha’u enfaze ho lian makaas.

“Ha’u komprende. Hein katak loron ruma Noi bele esplika ba ha’u tanba sa Noi sai hanesan nee” Nia ko’alia ho lian mamar no hateke ba ha’u matan laran kedas.

Sein ko’alia tan liafuan ruma,ha’u haka tba meza atu foti matabixu. Maibe nafatin ha’u haan ladiak no laiha apeteti atu haan.

Nia hakat mai kaer ha’u nia liman no tenik ba ha’u;

“Noi, hakarak haan saida? Haree ó nia jestu nee hanesan ó la gosta atu haan paun nee. Bele dehan mai, hakarak saida? Ha’u pronto ba buka!” Nia tenta hamaus ha’u.

“Deskulpa, ha’u lakohi halo señor atu preokupa ho ha’u” Ha’u hatan ho arogante.

“Okay, karik ida nee ó nia hakarak. Ha’u labele obriga. Oras ida obriga bebeik ó mos ladun diak. Loos ona” Nia kontinua. Ha’u haree hanesan ninia pasensia mos menus ona.

Matabixu hotu nia husu…

“Bele ba serbisu ka lae? “ Nia husu ho sériu sein hateke mai ha’u nia oin.

“Se labele ba, toba de’it ba. Haan mos lakohi hotu ona, ita atu halo oinsa tan!” Nia kontinua afirma.

Rona nia fraze afirmasaun nee halo ha’u bila’an iha fatin.

‘Ba, la ba, ba, la ba, ba, la ba…..

Aahhh todan atu desidi. Atu ba, baruk….. tanba ain liman mamar, matan dukur, hakarak toba fali deit.

La ba, tauk, tanba nee orden serbisu. Atu ko’alia didiak ho nia, most auk no baruk atu ko’alia ho nia…… Huuuufffff !’ Ha’u mesak tetu no konfundi tebes.

Tanba hein kleur ha’u laiha reasaun, entaun mane bonito la hotu rai ida nee foti ninia pasta, la’o ba kareta, hamoris kareta ho ba dadaun ona fatin formasaun.

Nia liu tiha ha’u tam aba kuartu, foti ha’u nia telemovel, buka Alina nia numeru no kontaktu ba Alina.

[“Haii doben, dader diak!”] Alina nia lian mai husi sorin ne’eba.

“Yea, Alina!” Ha’u hatan ho baruk.

[“Heiii… abin oan baruk loos nee.. la serbisu ka?”] Alina husu nunee tanba haree ha’u latan aan hela iha kama leten. Ami nain rua video call.

“Ha’u barul loos, Lina!. Haan mos ladiak. Ha’u la hatene atu hakarak haan saida. Haree de’it nia oin mos ha’u baruk hotu” Ha’u lamenta ho maña ba Alina, tanba ha’u nia kolega ida nee ha’u konsidera hanesan ha’u nia biin alin rasik deit ona.

[“Uhhh…. Kuitadu! Haree see nia oin mak baruk nee?”] Alina husu.

“Señor Antoninho saa, see fali? Ha’u hatan no nervoza, baruk temi ninia naran.

[“Hmmmm…. Pois?”] Nia kuruizu.

“Iiiihhh, pois-pois fali! Fó solusaun mai mos lae…. “ Ha’u lamenta ho nervoza.

[“Ahhhh ha’u nia murak bonita oan ida nee- nee…. Entaun fila mai deit ona ba. Mai ha’u kous tiha ba hehehe… “ ]Alina ko’alia, goja ho hamnasa.

“Hissss Alina metan ida nee-nee, ko’alia loos ituan ba, ha’u sériu! Fó solusaun mai ba. Bai-bain nee hanesan nee ó mak matenek liu ona. Hamosu ideia barak”

[“Yea, nee loos. Maibe ida agora ó hasoru dadaun nee ha’u mos konfuzaun hotu. Ha’u la hatene atu dehan saida ba”.] Alina mos hatan ho konfuzaun no koi ulun.

“Oh yea …. Alina, rona lai!”

[“Yea, dehan mai ba, Noi. Ha’u ron hela nee saa…”] Alina hatan.

“Ha’u foin hanoin kona formulariu banku dada osan nian ne’ebé maun Nino fó hela mai ha’u haruka ha’u atu uza nee. Iha nee nia hakerek US$10.000. To’o agora nia nunka ko’alia fali kona ba osan ida nee. Ha’u mos foin mak hanoin kona fali” Ha’u esplika ba Alina.

[“Ouhhh… ha’u hanoin ó uza tiha ona, Noi..”] Alina hatan ho hamnasa.

“Hei… ó arbiru loos. Hanoin ha’u feto saida?” Ha’u satan.

[“ahahhaaaha… sorry..sorry.. doben ]. Alina husu deskulpa. [“Pois halo nusa deit osan nee, maibe ó seidauk ba dada husi banku ida too?”] Nia kuriuzu.

“Sim, seidauk ida. To’o agora formulariu nee ha’u sei rai rela iha uma ne’eba. Ha’u moss ai haluha tan tiha, tanba nia rasik mos nunka husu no nunka ko’alia fali kona ba ida nee oinsa?”

[“Entaun semana oin fila mai, ita nain rua ba dada osan nee haree ba pasiar tiha ba rai liur… wkwkwkkww ”]

“Alina, ó sei normal hela too? Nee ema nia osan nee, ó bulak karik, depois mak nia foti tiha ha’u oan nee oinsa? Haiii…. Ha’u lakohi ida” Ha’u hahu tristi no ta’uk imajina buat hitak nee.

“Hmmm… araska!. Ehh ko’alia – ko’alia mos sorrys, ohin ha’u ko’lia halimar deit. Loos duni, nee ema nia osan. Osan barak loos tan. La hatene signifika saida nia fó osan ida nee?]

“Ha’u mos la hatene. Ha’u konsege husu nia dehan karik hakarak uza saa uza de’it ba. Maibe ha’u ta’uk. Ha’u la barani ida. By the way, loos ona, Alina. Haree serbisu lai ba. Ó mos iha serbisu fatin hela tan. Orsida vise diretur oan nee bele duni ó sai mak nee.. hahha” Ha’u dehan ba nia ho hamnasa ituan atu nunee bele hamenus ha’u nia laran baruk.

[“ooooohhh, Nono ka? Heisa. Ha’u mos ta’uk hela nia nee. Ohh yea, nia husu ó, hahaha. Nia dehan nia saudades…] Alina hamnasa.

“Hei, arbiru deit. Loos ona, byeeee……

[“Byeee doben, kuidadu aan didiak iha ne’eba. ]

Trekkk…. Trekkk…. Trekkk… Ha’u hakotu konesaun video call iha Whatapps.

Liu tiha minute hirak nune’e, notifikasaun ida mosu iha Whatapps. Ha’u foti ho haree…

‘Haii…. Haan ona ka? Diak hela? See presiza buat ruma dehan mai, ha’u hola hodi ba. Agora formasaun la’o diak hela. Ha’u bele sai hodi lalais ba’

Uhhhh…… buat la furak kedas mak bainhira simu mensajen husi ema nia aman ida nee….

Nusa la fokus ba formasaun nee deit?