LALORAN MORIS

KAPITULU 9

Durante semana ida iha Suia, maun Nino la hatan hau ba tuir formasaun nee. Nia haruka hau deskansa totalmente iha otel hanesan doutora Merry ninia rekomendasaun. To’o loron ikus iha formasaun nee, depois de ensera formasaun nee, maun Nino fila sedu mai otel.

Nia para tiha kareta iha otel oin, hau rona nia hakat liu mai iha hau nia kuartu oin hodi dere hau nia odamatan.

“Noi…. Noi, loke odamatan sai mai lai” Nia bolu.

“Hmmmm, hein ituan”. Hau hatan, hader no hadia hau nia vestidu no fuuk ne’ebé nakrakat tanba desde dader hau seidauk sui fuuk.

“Lalais ituan bele ka?” Nia obriga.

Ho ansi hau lao lalais mai iha odamatan no loke odamatn. Mezmu dalabarak liu hau gosta nia, hau odiu nia, hau lakohi atu haree ninia oin maibe iha parte seluk nia nuudar hau nia diretur hau tenke hakruuk ba ninia orden.

“Seidauk haris too agora nee Naiii…. La dois ka?” Koalia tiha nunee nia finzi taka nia inus.

“Eeeeiii… nar-naran deit. La dois karik diak. Se lakohi atu horon lalika mai bolu hau ida. Husik hau mesak toba iha nee mos diak hela saa” Hau mos hatan no lakhi lakon.

“Hmmmm… loos ona, agora ba haris, prepara aan, pois ita lao halimar buka diak ruma tuur halimar, tanba hau atu koalia buat ida ho ó antes ita fila ba Dili aban” Nia manda.

“Hau lakohi. Hau atu toba” Hau rejeita.

“Noi… favor ida! Hau sériu” Koalia ho lian makaas no fihir siak mai hau.

Ho tauk hau hatan; “Okay, diak señor diretur! Hein ituan” hau hatan lalais.

Liu tiha minutu balun, iha kareta laran maun Nino hahu koalia.

“Hakarak ba fatin ida ne’ebé mak diak?”

“Hau la hatene.konforme maun. Hau mos ladun hatene fatin ida ne’ebé mak diak iha nee”.

“Hmmm okay, entaun ita fali ita nia fatin deit. Iha otel oin nee tuut fatin kapas iha hela. Fatin ne’eba mos hakmatek. Ita ba tur iha ne’eba deit”. Hau doko ulun deit. Laiha argumentu ruma tan atu hatoo.

Nia fila kareta no volta hikas ba otel. Iha ne’eba iha jardin ida kapas no merese atu uza hodi tuur halimar. Too iha ne’eba nia hapara kareta, ami tuun no lao tama fali ba jardin nee.

“Noi, agradese tebes tanba formasaun durante semana ida nee lao ho diak, mezmu hau nia sekretaria moras no la marka presenza. Hau mos sei foun hela tan. Hau la imajina, hau bele handle formasaun ida nee mes-mesak ho susesu. Hau agradese tebes” nia haktuir hodi fihir mai hau matan.

“Señor, deskulpa tanba haul abele halao hau nia knaar hanesan ita boot nia sekretaria. Hau senti hau halo ona pekadu no hau ema ida laiha resposabilidade” Hau konfesa.

“Lae noi, kalma! La presiza husu deskilpa. Noi moras, laos Noi mak lakohi ba too” Nia koalia ho lian mamar halo hau mos bilaan tiha.

Rai nain keta selok nia ona karik. Bain-bain nee nia sempre koalia ho lian makaas no oin la midar hanesan nee took ida. Loraik ida nee parese haan masimidar barak karik, nee mak hamnasa midar loos no koalia mos hateke loos mai hau nia oin no matan laran nee.

Tanba nia hateke bebeik hau halo hau la fiar aan no soe oin tiha. Hau la aguenta karik nia hateke mai hau nunee. Saa tan husimatan nee hanesan subar no rai hela buat ida iha ne’eba.

‘ahhhh… matan neee, huufff’ Hau dada iis makaas no koalia iha laran deit.

La sente katak nia mos komesa nakdedar ituan bainhira hateke hau nia oin.

“Noi, bele ka ita koalia ho didiak ba malu?sekarik ita hanesan nee bebeik ita nia problema sei la hotu”

“Hau la komprende. Atu koalia kona ba saida nee?” hau duni nia ho pergunta.

Nia tolan kabeen ho antes hatan hau nia pergunta.

“Noi, hau senti ó hatene hela. Lalika finzi ida bele too” Nia heteke hau nia oin no oin naborut.

Hau foti hau nia kabaas no doko ulun.

“Tebes! Atu koalia kona bas aida nee?” Hau repete hau nia pergunta.

“Okay, agora rona hau koalia”. Nia hatan.

“Noi, hau hakarak onestu ba Noi katak, hau nee kaben nain”

“Bee see mak husu mak?” Hau korta.

Stttt…. Nia taka nia liman iha ibun, signifika haul abele koalia lai.

“Sorry… “ Hau husu deskulpa.

“Noi, favor ida rona lai mak diak. Se nunee hela deit, hau mos la hatene atu koalia oinsa. Hau fiar katak Noi bele komprende ida nee. No hau hatene katak Noi ema matenek, iha kompresaun klean, bele rezolve problema no seluk-seluk tan.. durante fulan ida ita hamutuk, hau sempre observa direita no dalaruma mos hau husu tuir iha kolega balun ne’ebé serbisu hamutuk ho Noi kleur ona iha Dili. So, hau koñese ona Noi nia attitude mak da hanesan ne’ebe!” hanesan loos hatoo ninia diskursu iha palasiu prezidensial ne’eba nee. Koalia nar-naruk loos, halo hau mal sa’e tiha. Sorte hau bele kontrola hau nia emosaun.

“Hmmmm…. Loos ona, koalia mai ba. Lalais ituan. Tanba hau senti atu muta fali banihira tuur kleur iha maun nia oin nee”

“Noi, hau senti ita presiza koalia husi fuan ba fuan” Nia koalia ho nakdedar ituan.

“Hau iha ona fen mezmu seidauk simu sakramentu kazamentu iha Igreza, maibe ami konsege moris hamutuk ona durante kuaze tinan nee” Nia kontinua.

Iha hau nia laran hau atu hamnasa tanba hau senti nee la importante mai hau atu hatene, hau sei la ezizi nia atu kaben ho hau. Atu hamnasa sai mos tauk nia hakilar fali hau. Hau hateke deit ba nia oin no nia mos kontinua haktuir;

“Buat ida mak halo hau sei la prontu atu simu sakramentu kazamentu iha Igreja nee tanba too agora ami seidauk iha oan. No prosesu ida ami nain rua hola malu nee laos tanba ami nain rua mak hakarak ka gosta malu, maibe inan aman mak obriga deit” Nia kontinua ho oin muron.

“Hmmmmmm…… pois relasaun ho hau saida? Tanba saa tenke konta ba hau?” Hau korta lalais.

“Noi hakarak hatene, relasaun nee boot teb-tebes. Hau la hadomi nia. Hau la gosta nia. Hau senti hanesan moris iha infernu laran kuandu hamutuk hau nia”. Nia haktuir.

“Hahaha…. Mane hotu-hotu hanesan deit” Hau hamnasa no dulas ibun.

“Noi, rona lai, favor ida!” Nia halerik. “See hau la fiar ó hau sei la konta sai hau nia segredu uma laran nee ba ó. Fiar hau, ó ema dahuluk no uniku ne’ebé hau fahe hau nia realidade moris nee. Hau nunka koalia sai ida nee ba ema ida. Nein hau nia kolega diak sira”

“Pois tanba saa bele aguenta no dura too kuaze tinan neen?” Hau tenta fihir nia matan atu haree karik iha sinal bosok ruma husi nia liafuan sira nee.

“Yea, ida nee mak realidade. Tanba hau nia pai ho māe hafolin hotu ona nia, hakarak ka lakohi nia tenke mai hela iha ami nia uma laran, nia labele fila on aba sira nia uma. Ninia inan aman mo tauk kultura, sekarik nia fila ba fali ho sira nia uma, nia vida sei la naruk. Ami nia kultura nee sei forti loos” Maun Nino esplika no dada iis makaas.

“Pois hau tenke dehan saida rona ita boot nia realidade moris nee?” Hau lamenta.

“Hau senti ó komprende ona atu halo saida!” Nia afirma.

“Deskulpa maun, hau la hatene! Sekarik koalia hotu ona hau bele husu lisensa tam aba kuartu ona ka? Hau la aguenta ona”

“Hmmm, tuur lai. Hau koalia seidauk hotu, Noi”

“Lae maun, pois mak kontinua. Hau nia ulun moras loos. Hau tenke ba deskansa agora” sein hein ninia orden, hau hamriik no halai lalais ba hau nia kuartu laran.

Hau taka odamatan ho makaas no ansi. Ahhhh… signifika saida nia hakarak konta ninia realidade moris nee mai hau? Tanba saida nia dehan ida nee iha relasaun boot teb-tebes ho hau? Mosu pergunta barak-barak iha hau nia kakutak. Hau hanoin la hotu. Mane ida nee ninia hakarak nee saida? Nia keta hanoin hau mos kaan loos atu rona nia istoria karik? Deskulpa deit! Se karik ita boot nee laos hau nia diretur parese hau foti bee foer fase bikan nian nee rega on aba ó nia oin….

Tap … tap …. Tap…

Hau rona nia mos hakat no loke ninia odamatan kuartu nian ona.

Praakk… nia taka ho nervoza.

Drrrtttt…. Drrtttt. Hau nia telefone lian. Hau foti lalais no haree see mak dere mai nee.

“Māe, boa tarde! Māe hau saudades loos māe saa!” Hau hatan.

[“Noi, aban imi fila ona too?”] Māe husu.

“Loos māe, aban dader ami sai sedu”

[“Ahh diak, lao kuidadu aan eee, Noi. Māe la pasensia ona atu hatoo informasaun importante id aba Noi saa”] Māe koalia ho kontenti.

“Saida nee māe? Dehan mai ona ba” hau kuriuzu.

“Tia Zulmira tia ho ninia kaben ohin mai uma. Sira koalia ona ho māe no māe aseita ona” Rona husi māe ninia lian no intonasaun nee nia hanesan kontente loos.

“Ahhh māe nee halo hau kuriuzu tan deit. Aseita saida nee?” Hau konfundi.

“Loos ona Noi. aban too mai mak fó hatene direitamente deit ona. Ladiak koalia iha telefone. Adeus…. Beijiñus” Māe hakotu ligasaun telefone sein hein hau hatan.

‘Hmmmm, agradese māe kontente hanesan nee’ hau hanoin.

Hau koko latan tuun ba kama leten no hakarak atu dukur tiha deit, tanba ulun moras demais. Imajina maun Nino ninia esplikasaun sira ohin.

Keta halo ba nia hakarak hau nia oan? Ahhh lae, lae, lae…… Hau mos hakarak deit oan ida mak hau pronto entrega hau nia virjen ba nia atu hetan oan nee. Depois nia hanoin atu foti tiha hau nia? Hau sei la fó. Hau sei defende atu kuida no iha direitu tomak ba hau nia oan. Nia laiha direitu. Nia labele koñese hau nia oan no hau lakohi aban bainrua hau nia oan atu koñese nia.

Kolen ho hanoin no imajinasaun aat sira nee, halo hau nia kolen no dukur tiha.

Kalan nee hau la konsege haan kalan nian, tanba bainhira maun Nino mai dere odamatan bolu hau atu sai ba haan nee hau la rona tiha ona. Kolen demais ho imajinasaun. Kolen demais ho realidade moris ida nee.

Dadersan hader mai, ho oin lanu, matan moruk no ain liman kolen, hau obriga aan haris no prepara aan atu aranka sedu fali ba Dili. Prepara aan hotu, hau foti hau nia pasta no sasan sira seluk atu hodi bat ula iha kareta.

“Bondia, Noi! fó mai hau tula fodik”. Derepenti maun Nino halai mai no hadau hau nia pasta atu ajuda tula ba kareta.

“Obrigada maun, maibe hau sei bele mesak tula. La presiza ajuda hau. Haree prepara mak maun nian ba”. Hau la gosta ninia jestu.

“Noi, ó halo hau kalan tomak toba la dukur no dader deit ó provoka on ahau nia tensaun!” Nia fihir hau kroat, halo hau hakfodak no tauk.

Imajina ba, ida nee mak nia lakohi tula hau no husik hela hau mesak iha nee mos aat loos. Nee mak hau fila tenke sa’e fali bus Suai-Dili mosh au araska boot. Saa tan hau nia kondisaun ida agora hanesan nee hela nee. Horon buat hotu ladiak, tuur besik ema barak mos araska hotu. Kala ida nee mak ema dehan dezeju bebe nian ne’ebé foin mak forma iha hau nia knotak nee.

Ho pasensia hau husik nia foti hau nia pasta no tula ba kareta laran. Depois nia mos lakohi koalia barak tan ona, maibe hakat nonok ba meja haan nian, tuur iha ne’eba no komesa matabixu. Hein nia la konvida hau ba haan, entaun hau ho moe laiha hau naran ba tuur hotu iha ne’eba hodi matabixu no kontinua hemu vitamina no aimoruk Antimo atu labele muta iha dalan. Imajina fali semana kotuk husi Maliana mai Suia, halo hau trauma no disidi tenke hemu netik antimo musan ida mezmu ema dehan feto isin rua labele hemu antimo tanba sei fo impaktu ladiak ba bebe.

Matabixu hotu mos nia nein koalia liafuan ruma ba hau. Nia bolu mak mana otel na’in, entrega osan durante semana ida nian ami hela iha nee inklui ho haan. Hau la hatene nia selu hira no hau lakohi atu hatene.

Hotu tiha hau mos tenta ba kaer liman ho mana ne no husu lisensa hodi sae ba kareta.

Durante iha dalan nia la koalia ho hau, halo hau tauk teb-tebes. Nia la hola diresaun Maliana ona, maibe liu fali husi Ainaro. Tanba tauk haree ninia jestu nonok deit nee halo hau mos la komplain. Hau tuur nonok no tuir deit.

‘Huff… Nai akompaña ami atu ami bele to’o Dili ho seguru’ Hau reza iha laran deit.

Durante viajen hau dukur tanba influensia aimoruk ne’ebé hau konsumu antes atu aranka. Agradese tebes tanba la muta no toba diak. Agradese mos tanba hau la rona nia koalia barak. Ami to’o iha kapital Dili ho seguru no nia lori hau ba hatuun iha uma.

“Boa noite, tia!” Nia kumprimenta hau nia māe.

“Boa noite, señor diretur. Obrigada barak kuida ona Noi durante semana ida iha ne’eba” Māe kontente haree hau fila.

“Nada barak mos, tia! Ahh.. tia, hau atu hameno deit, karik bele tia kuida didiak Noi eee, tanba nia kondiasaun ladun diak. Nia tenke deskansa barak. Labele halo nia hanoin barak. Loos ona, hau lisensa lai” dehan nunee nia mos starter kareta no ba ona ninia uma.

“Anje, mai ajuda foti bin Noi ninia pasta lai” Māe bolu hau nia prima Anjela ne’ebé hela ho ami iha nee.

“Diak, tia! Aiiihhh bin Noi mai fali ona. Boa noite abin” Anjela kontente no kumprimenta hau. Hau hatan ho hamnasa mihis deit.

Hau lao liu ba hau nia kuartu laran, tuur ituan iha kama leten. Dada iis ituan no foti toalla tam aba haris fatin hodi tenta haris.

Haris hotu, hau hamriik iha espellu oin, fihir hau nia aan iha ne’eba.

Aiihhh …. Hau nia oin kamutis loos, matan kuak, no ida tan, mudansa iha hau nia susun matan. Susun matan haree hansan metan no bokar ituan tan ona.. Ahhh…. hau konfujaun loos ona. Oinsa hau atu dehan ba māe?

Tanba saa mane ida nee mos ohin atu fila ba ninia uma nee nia sei hameno ba māe atu kuida didiak hau no haruka hau tenke deskansa barak?

Oinsa karik nia hatete ba māe?

Ihhh… imajina buat hirak nee halo hau hanoin hotu la hetan.

Hau hatais roupa, xave tiha odamatan no kontinua toba to’o dader.

***

[Nafatin tuir istoria nee yea guys, tanba autora sei update lor-loron……….]