LALORAN MORIS

Kapitulu 20

“Feto nee ha’u nia fen…. “ Maun Nino dehan ho onestu. Hanesan rai na’in selok tiha ha’u fuan, ha’u la simu realidade nee. Realidade ida dehan maun Nino iha ona fen, no ninia fen mai buka nia.

Ohhh…. Entaun feto ida momentu atende telefone iha Sexta kalan nee ninia fen, no iha fatin iha Sabadu madrugada nee maun Nino telefone mai ha’u no koalia bis-bisu deit, tauk ninia fen atu rona. Ha’u nonok no imajina baut hirak nee, hamosu odiu iha ha’u nia kakutak.

“Noi…” maun Nino fihir ha’u nia oin no haree ha’u nia espresaun iha ha’u nia oin. Ha’u sei nafatin nonok no la hatan ninia ba ninia bolu.

“Deskulpa, Noi! antes nee ha’u dehan on aba Noi, too! Noi lakohi rona ha’u koalia maibe ha’u tenta hakerek ona karta nee no fó ba Noi. buat hotu ha’u esplika klaru iha ne’eba. Eseptu Noi la lee karta nee, entaun Noi la hatene see mak ha’u” maun Nino koalia ho haraik aan. “Espere Noi bele komprende ha’u nia posizaun”

Ha’u la hatene atu hirus ka oinsa? Ha’u hatene antes tiha ona hanesan nia foin koalia dadaun mai nee, maibe tanba saa ha’u nia fuan nee la simu bainhira hatene katak feto ida nee ninia fen no nia kansela ba hasoru ha’u nia mãe tanba nia fen?

Hufffttt…. Ha’u hateke ba mai, buka Alina, maibe ha’u la haree ona nia iha ne’eba. Alina ba tiha iha ne’ebé? Keta halo ba nia fila tiha ona, tanba antes nee nia dehan bebeik atu fó espasu ami nain rua maun Nino atu bele koalia.

Ha’u hateke ba kadeira ne’ebé ohin nia tuur ba nee, buka ninia pasta, maibe ninia pasta mos laiha tiha ona iha ne’eba, signifika nia ba tiha duni ona.

“Maun, Alina fila tiha ona karik” ha’u finze paniku atu hasees aan husi ami nia topiku prinsipal ne’ebé ami deskreve hela. Haree ha’u nia espresaun paniku, maun Nino mos hamriik no dehan “Koko telefone took nia”

“Okay” ha’u lamas ha’u nia telemovel husi ha’u nia pasta laran no halakan, buka lalais Alina ninia numeru no kontaktu nia.

‘Numeru mate hela no laiha liña, halo favor koko oras tan’ lian husi opradora Timor-Telecom ninian mak hatan, nee signifika ninia telemovel mate hela.

“Noi… halo nusa, nia la hatan ka” maun Nino husu.

“Laiha ida, ninia telemovel mate hela” ha’u hatan ho baruk.

“Okay, laiha buat ida. Ha’u sente Alina komprende. Nia hakarak fó espasu mai ita, atu ita bele esplora ita nia sentiment ho livre” maun Nino hatan ho relaxadu.

“Ita fila deit ona. Ha’u hakarak ba fali ona serbisu fatin. Iha relatoriu ida mak ha’u halo seidauk hotu” ha’u sujere tanba ha’u lakohi no la pronto atu koalia bebeik kona ba feto ida nee.

“Hmmmmm…. loos ona. lao ona ba” maun Nino aseita maibe ha’u haree hanesan nia la satisfas tanba seidauk rezolve halo klaru.

To’o iha serbisu fatin, ha’u lao lalais ba alina ninia kuartu. Iha ne’eba nia tuur halimar no haree hela filmi balun iha ninia telefone. Nia hakfodak haree ha’u nia espresaun hirus.

“Alina, ó para laran aat ida. Dehan atu ba hariis fatin ida mak halai uluk fila mai tiha ona nee! Ó la hanoin ha’u ka? “ ha’u karega nia no nia laiha liafuan atu simu hasoru.

Ha’u taka tiha ninia odamatan kuartu no lao ba besik ninia tuur fatin, dada kadeira ida hodi tuur besik nia. Laiha tan fatin diak ida ba ha’u atu fakar sai saida mak dadaun nee ha’u sente no atu rabenta deit ona iha ha’u nia fuan. Alina deit mak sai fatin seguru ba ha’u. ha’u nia mãe ida bai-bain sai ha’u nia fatin fahe susar no terus, agora nee sai tiha hanesan ema fuik leet, tanba ha’u tauk no la hatene atu hahu esplika ba mãe oinsa.

“Lin…” ha’u tenta regula ha’u iis. Alina hateke mai ha’u oin no hein saida mak atu sai husi ha’u nia ibun. Ho nakdedar ha’u hahu haktuir.

“ó hakarak hatene ka Lin, feto ida mai atu hasoru nia iha Sexta loraik nee ninia fen, no tanba ninia fen ida nee mai, entaun nia kansela atu ba hasoru ha’u nia mãe iha Sabadu” ha’u koalia ho tristi no kahur nervoza.

“Yea, nee Noi tenke komprende tooo, nia kazadu nee. Nee ninia fen, nia tenke tau prioridade ba ninia fen lai, saa tan ninia fen mai buka nia to’o iha nee” Alina apoiu maun Nino ninia asaun, halo ha’u la gosta.

“Lin, ó apoiu fali nia ka?” Alina hakfodak ho ha’u nia fraze.

“Hei, Noi…. konsiente ba. Husi inisiu kedas Noi laos atu buka oan deit no lakohi atu hola mane ka?” Alina koalia no hiit ninia matan fulun sae.

“Loos, maibe maun Nino mos tenke komprende”

“Nia tenke komprende oinsa? Durante nee nia tenta atu koalia ho Noi, maibe Noi nunka fó biban ba nia, ohin atu ba hasoru Noi nia mãe, maibe Noi rejeita. See mak sala?”

“Lin… ha’u la hatene atu koalia saida tan ba! Ha’u la komprende ha’u nia aan” ha’u halerik.

“Noi, see bainhira ó hakarak ema seluk atu komprende ó nia aan, ó rasik tenke komprende no koñese ó nia aan rasik didiak lai, atu bele esplika ba ema seluk. tanba ema nee laos Maromak. Ó deit la hatene saida ó mak halo, saida mak ó nia hakarak, depois ó ezizi ema seluk atu komprende ó oinsa?” Alina koalia nar-naruk no fó konsellu hanesan tiha ema expert boot ida.

“Alina oan nee agora matenek tan deit ona mak nee. Desde hodibainhira mak ó bele koalia matenek loos hanesan nee nee. Orgullu!” ha’u tenta goza nia.

“Desde ha’u gosta lee novela ida hakerek ho lian Tetun nee. Buat barak mak ha’u hetan husi ne’eba. Ninia autora mos gosta hakerek artigu motivasaun no reflesaun iha ninia f*******:” Alina konta ho kontente.

“Ahh nee ka? Enatun ha’u mos hakarak atu lee lai” ha’u hatan.

“Hisss, Noi la gosta lee boot nee. Nee mak ita ema nee, se bainhira utiliza media sosial nee, tenta halo kolega ho ema sira ne’ebé gosta fahe liafuan sira ne’ebé bele motiva ita. Lee buat sira hanesan nee atu ita bele refleta ita nia aan. See lae, ita nia hanoin nee kloot no ita hanoin ita deit mak terus iha mundu nee. Ita hanoin ita nia problema moris mak boot liu ona iha mundu nee, no ita hanoin laiha ona solusaun ba ita. Afinal iha liur ne’eba nee sei iha ema barak mak hasoru problema ne’ebé boot liu ita nian dala sanulu” Alina esplika ho sériu no fiar aan.

“Heisa, fó took ninia ID f*******: mai ba, nee para ha’u bele hus habelun nia iha f*******:. Espera nia bele simu ha’u” ha’u hatan ho esperansa boot.

“Bele. Tama ona ba ó nia f*******: para bele buka ninia profile. Add friend tiha deit ba. Ha’u fiar katak nia sei simu, tanba nia laos ema arogante”

“Okay. Ha’u husu ona. hein katak nia sei bele simu” Iha minutu balun nia laran, ha’u sente kmaan ituan, tanba bele hasees aan ituan husi naha todan ida latan metin hela iha ha’u nia kakutak nee.

To’o oras sai serbisu, hanesan bai-bain, ami nain rua Alina sai mai hamutuk, hapara taxi iha oin, atu fila ba uma hamutuk, mezmu maun Nino tenta bolu ami atu fila hamutuk ho nia, maibe ha’u rejeita. Ha’u seidauk hakarak atu besik demais nia, iha ha’u nia fuan no ha-u nia kakutak, ha’u sei hirus hela nia.

“Noi, tanba saa la fila hamutuk ho maun Nino deit ona?” Alina lamenta.

“Lin… see karik ó hakrak sae ninia kareta saa, ó ba ho nia ba. Ha’u lakohi. Ka ó hanoin ó nia osan ida atu selu taxi nee? Husik ha’u mak selu deit mos diak” ha’u responde ho nervoza.

“Laos hanesan nee, Noi. konsidera ituan ninia konvite nee ba, kuitadu” nia nafatin ezizi.

Ha’u lakohi debate tan ona, ha’u hapara taxi, loke odamatan no hakat tama ona ba taxi laran, halo nia mos tuir deit ona ha’u. tuur tiha iha taxi laran, ha’u sente rai manas demais, tanba taxi nee ninia AC laiha no ha’u uza hela jaket boot ida atu taka no subar ha’u nia kabun ne’ebé loron ba loron aumenta boot ba dadaun. Desde kedas maun Nino bandu ha’u atu labele uza estagen, ha’u mos kumpri no halo tuir ninia orden. To’o uma oin, selu tiha taxi, ha’u tuun no lalais ba uma laran.

“Noi, fila ona… “ mãe hasee ha’u halo ha’u hakfodak no hapara tiha ha’u nia hakat.

“Sin, mãe! Boa tarde” ha’u hatan ho hakfodak.

“Rai manas ida nunee mos gosta loos uza jaket nee?” mãe pergunta.

“Aahh, ha’u mak gosta deit mãe deit. Loos ona ha’u ba kuartu lai” ha’u hatan lalais no hasees aan husi mãe, hasees aan atu mãe labele labele husu buat barak tan.

“Eeehh, Noi, hein lai. Ohin doutora merry husi Suai mai. Nia fó kumprimentus ba Noi” ahhhh ha’u hakfodak liu tan deit. Saida? Doutora Merry husi Suai? Ha’u koi ha’u nia ulun ne’ebé la katar no tolan kabeen.

“Nia mai vizita liu deit ninia familia, nia dehan sira lori pasiente ida husi ospital referral Suai mai ospital Guido Valadares. Ne’ebé nia konsege gasta minutu hirak oan mai vizita liu ninia pai ho mãe. Nia liu husi uma oin nee mak tuun mai kumprimenta mãe no husu Noi ninia kondisaun” rona mãe haktuir nunee, ha’u nonok deit no laiha liafuan atu koalia hasoru, maibe sei nafatin kuriuzu atu rona tan saida mak doutora Merry dehan ba mãe.

“Depois?” tanba kuriuzu, liafuan ida nee nee deit mak obriga sai duni husi ha’u nia ibun.

“Doutora hameno dehan Noi kuidadu aan, deskansa barak no tenke ba konsulta bebeik fulan-fulan” ha’u aumenta hakfodak, ain liman mamar hotu, dala ida nee kala mãe hatene duni ona katak ha’u isin rua. Subar la metin ona.

“Maibe la komprende tanba saa doutora Merry hameno nunee. Mãe atu dada lia barak tan ho doutora mos labele tanba sira ansi loos, tenke fila ona ba Suai” Huffftttt… sente iis atu kotu deit. Sorte doutora nee seidauk dehan loloos ba mãe. Maibe haree mãe ninia oin nee hanesan mãe kuriuzu no deskonfia ituan ho ha’u nia jeitu.

“Noi, ó moras?” rona tan pergunta ida nee la hatene ha’u atu hatan saida.

“Lae, mãe! Ha’u ba laran lai” ha’u hatan lalais no la hein tan mãe atu koalia, ha’u hakat ho ansi tama ona ba ha’u nia kuartu., xave odamatan no hasai tiha jaket boot ida ne’ebé desde dader belit metin iha ha’u isin.

Seidauk rezolve problema ida, problema ida seluk mosu tan mai ona. maibe sorte diak, doutora Merry seidauk koalia sai ba mãe. Selae kala oras nee ha’u hela naran deit ona. hasai tiha jaket no roupa sira nee husi ha’u nia isin, ha’u tam aba hariss fatin no hariis tiha. Ha’u isin belit demais. Hariis hotu, komesa sente hamlaha. Parese bebe mos hamlaha loos ona, tanba ohin meiu-dia ha’u haan deit aifuan no ice-cream. Ha’u la konsege haan etu. Loloos nee laos tanba ha’u lakohi atu haan etu, maibe haree maun Nino ninia oin halo halo ha’u nia vontade atu haan nee lakon tiha.

Hatais tiha ruopa uma nian ne’ebé longra ituan no nafatin uza jaket bbot nee. Ha’u sai ba dapur buka hahan.

“Anita, mãe iha ne’ebé?” ha’u husu ba Anita ne’ebé tein hela iha dapur, tanba ha’u la haree mãe iha dapur laran ka sala vizita.

“Tia tuur hela ho tia Vero iha veranda. Sira mama malus hela” Anita hatan. Tia Vero nee ami nia viziñu ida besik liu. Ami haree malu hanesan tiha familia rasik, tanba sira mos hela iha bairu ida nee kleur loos ona.

“Hahan ruma iha karik. Ha’u hamlaha loos ona” ha’u husu ba Anita.

“Modo kalan nian foin mak atu tasak nee, abin. Maibe abin nia modo meiu-dia nian sei duku hela iha meja leten ne’eba. Tanba ohin meiu-dia abin la mai haan iha nee nee”

“Ahh diak, ha’u haan deit ne’eba ona para ha’u toba ona. ha’u kolen demais” dehan nunee no ha’u hakat dadaun ba meja hodi loke hahan meiu-dia nian iha meja leten. Ha’u tuur no haan lalais antes mãe tama mai no husu pergunta barak. Haan hotu hemu bee no la haluha hemu vitamina ne’ebé ha’u sosa rasik iha apotik tanba ha’u lakohi ba konsulta iha ospital.

Ha’u lao neneik ba sala vizita, loke kurtiña no hafuhu ba liur, mãe ho tia Vero dada lia diak loos. Ha’u kontente no hakat neneik tama liu ba kuartu laran, xave metin tiha, hasai jaket boot ida nee no sae ba kama leten, latan aan kedas. Loron ida ohin nee hanesan loos iha infernu laran. Foin mak latan aan tuun, telefone nakdedar iha pasta laran. La hatene see mak telefone fali mai ona nee.

“Hello, boa noite!” ha’u hatan telefone. Numeru kontaktu foun ida.

[“Heii… Noi! kontente rona ó nia lian”] lian husi ne’eba mai.

“Deskulpa, ita see? Numeru nee foun nee?”

[“Sin, numeru nee foun, maibe ema la foun ida]” nia hatan.

“Dehan mai, ita see?” ha’u ezizi.

[“Hatene hela saa, hehhe]” nia hatan ho hamnasa

*****

[Nafatin mantein yeeaa guys…..]