LALORAN MORIS

Kapitulu 11

Hemu kafe hotu, ha’u fiska matan ba Alina, atu ami nain rua tama fali ba kuartu laran. Ha’u kuriuzu demais atu hatene kona ba ema misteriozu ida ohin dader telefone ha’u nee.

Alina komprende no ami nain rua tama fali ba kuartu laran.

“Tia, ami ba fali kuartu laran lai” Alina dehan ba māe. Māe komprende no ami mos hakat lalais ba kuartu.

“Alina, favor ida dehan lalais mai” Ha’u karega Alina atu nia bele tenik lalais.

“Noi, antes nee ha’u husu deskulpa. Ha’u dehan ba mos keta hirus eee….” Nia hateke ha’u no ibun tutun nakdedar.

“Ok, sure! Dehan mai ba. Ó halo ha’u atu mate tan kuriuzu nee deit ona”

“Dala ida tan deskulpa, ha’u atu dehan deit katak…” Ha’u korta lalais tiha.

“Dehan mai deit on aba. Ó mak deskulpa – deskulpa la para rai loos” Ha’u nervoza.

“Hehehe…. Ha’u mak hakarak halimar ho ó saa, Noi. ha’u uza numeru sim card seluk ida hodi koko ó nia mental deit” Alina hamnasa.

“What, Alina?? Ó demais… ó halo ha’u atu dezmaia tiha deit”. Ha’u kili nia knotak ho konsege ku’u nia kabun.

“Sorry, sorry… sorry” Nia halai tiha ba liur. Entaun ami nain rua duni malu iha laran hanesan labarik ki’ik. Māe hateke ami ho hamnasa. Māen kontente bainhira haree ha’u bele halimar no hamnasa fali ona.

“Aiiiyaa… obrigada eee, oan! Sorte ó mai vizita nia bee nia sai netik mai hodi halimar. Se lae saa loron tomak sulan aan iha kuartu laran deit “ Māe koalia ho hamnasa hateke mai ami.

“Tia, ami nain rua bele sai itaun ka lae? Ami rua la’o halimar tiha ba tasi ibun ba?” Alina husu ba māe.

“Konforme! Imi nain rua laos labarik labarik ki’ik oan. Naran katak la’o hatene aan deit. Tanba atu rai mos kalan dadaun ona” Māe sama atensaun.

“Diak māe, obrigada barak “ Ami nain rua hatan dala ida deit. Alina hein ha’u iha liur no ha’u ba troka tiha ha’u nia roupa uma nian no roupa pasear ninian ne’ebé luan ituan no uza tan jacket atu ema labele nota mudansa iha ha’u nia isin mezmu mudansa nee seidauk makaas no ema seidauk nota didiak.

Ami nain rua Alina sai ba iha Estrada boot no hapara taxi ne’ebé liu.

“Atu ba ne’ebé abin nain rua?” Taxista husu.

“Ba tasi ibun maun” Alina hatan.

“Ok, diak abin” Taxista nee dehan ho hamnasa hodi hateke mai ami nain rua. Liu tiha minutu balun, nia kontinua….

“Abin nain rua ba atu halo saida? Loraik ona nee”

“Lao halimar saa, maun mos kaan kepo hotu! “ Alina hatan ho oin naborut no dulas ibun.

Ha’u baruk atende tanba ha’u baruk hela.

“Para iha nee ona maun” Alina hapara taxi, selu tiha ami nain rua tuun no la’o ba tasi ibun.

“Noi…. “ Alina bolu tanba ha’u lao hakruuk deit no laiha vontade atu koalia.

“Hmmm…” Ha’u hatan.

“Fatin ne’eba mamuk. Ita ba tuur tiha iha ne’eba deit” Alina orienta no hatedu fati mamuk ida.

“Okay, lao ba” Ha’u hatan ho baruk no ami nain rua lao ba fatin ne’ebé Alina hatudu.

“Noi, sosa tiha saburaka ne’eba eee…” Alina dehan.

“Ha’u lakohi ida. Ha’u la gosta haan ida” Ha’u hatan ho molengga.

“Ihhh.… Noi nee, ó halo hanesan nee halo atu mos stress fali. Labele hanoin barak ba. Ha’u lori ó mai tiha iha nee para ó atu kontente laos halo jeitu beik fali hanesan nee”

“Lin, karik ó maki ha ha’u nia fatin, saida mak ó sei halo?” Ha’u husu no hateke ba Alina no hein nia reason.

Ha’u haree Alina koi ulun ne’ebé la katar no nia hanoin ituan antes nia loke ibin atu koallia.

“Ha’u la hatene atu halo saida, tanba ha’u mos laiha planu atu hamosu situasaun ida hanesan nee” Nia hatan nunee maibe ladun fiar aan tanba tauk ha’u atu hirus nia no la satisfas ho ninia resposta.

“Lin, rona lai. Ha’u kaan dehan karik ó maki ha ha’u nia fatin, laos haruka ó atu halo tuir ha’u” Ha’u repete ho nervoza no enfaze ha’u nia objetivu.

“Ha’u dehan saida eeee?” Nia hanoin ituan.

Bainhira ha’u atu hahu koalia fali, derepente…

“Heii Noi, Alina… imi nain rua iha nee?” Hmmm bautamak ida nee mos derepente deit mosu mai tiha iha ami nain rua nia oin.

“Hai… boa tarde dir… sim ami nain rua iha nee” Alina hatan ho lalais, maibe ha’u soe oin tiha. Jura nee, ha’u lakohi atu haree nia oin. Durante semana ida iha Suia halo ha’u sente hanesan tiha inha infernu. Ha’u foin sente rai nee luan tanba hasees aan tiha husi nia, agora nia envés mosu fali iha ha’u oin sein konvida.

“Imi nain rua halo saida iha nee?” Buatamak nee kontinua husu.

“Ami lao halimar. Noi isin baruk loos beee, ha’u ba foti nia iha uma ami lao halimar tiha” Alina ho fiar aan esplika ba mane ida nee.

Ha’u ku’u Alina nia liman no fó sinal atu ami lao sees tiha husi fatin nee. Alina komprende no ami nain rua hamriik tiha atu lao sees.

“Noi, hein lai!” Teki-teki ho lalais buatamak nee dada tiha ha’u liman no kaer metin tebes.

“Atu ba ne’ebé ona, Noi? Ha’u presiza atu koalia ho ita” Nia dehan.

Ha’u hakaas aan hisik nia liman. Maibe tanba ha’u mamar hela, ha’u nia forsa la to’o.

“Alina, durante nee ha’u haree imi nain rua besik loos. Imi nain rua kolega diak. Ha’u sente ha’u tenke fó hatene ba Alina kona ba ami nain rua Noi nia problema” Maun Nino dehan ba Alina.

Rona ida nee Alina halo finze konfujaun no hakfodak. Afinal Alina metan ida nee nee hatene hela tiha ona. Maibe nee diak, nee para maun Nino la diskonfia.

“Ouuhhhh, Dir ho Noi iha problema ka?” Nia finze husu.

“Sim, Alina” Nia hatan. “Maibe bele ka lae, agora imi nain rua tuir ha’u, sa’e kareta ita ba tiha restaurante, jantar iha ne’eba, pois mak ita koalia iha ne’eba. Iha nee ladun diak. Ema barak no kareta motor ba mai barullu demais” Koalia nunee mas ninia liman sei nafatin kaer no buti metin ha’u nia liman.

“Lae, lae, lae. Se imi nain rua atu koalia, entaun ba mesak ba. Ha’u fila agora ba uma” Ha’u tenta hasai ha’u nia liman ne’ebé maun Nino buti metin.

“See ita boot la husik ha’u nia liman, ha’u sei hakilar halo ema mai hobur ita mak nee” Ha’u ameasa. Rona ida nee nia mos husik ha’u nia liman.

“Noi, bele ka lae, ita ba” Alina bis-bisu iha ha’u nia tilun.

“Ha’u dehan tiha ona. Ha’u lakohi ba ida. Ha’u sente atu muta bainhira besik no haree nia oin bebeik” Ha’u hatan ba Alina ho lian

makaas.

Haree ida nee, Maun Nino mos la obriga tan.

“Okay, entaun diak. Alina, loron ruma ha’u sei fó hatene ba ó. Agora mai ha’u lori imi fila ba uma. Oras nee taxi menus ona. Pelu menus, lakohi ba jantar hamutuk ho ha’u ba mos, permiti ha’u lori fali imi nain rua ba uma” Nia koalia ho lian mamar no amigavel tebes.

Dala ida tan Alina fihir ha’u ho duvida, hein ha’u nia desizaun.

“Hmmmm. Loos ona, Alina. Ó tuir nia ba. Husik nia lori fali ó ba ó nia uma, nee para iha dalan imi nain rua bele koalia. Husik ha’u sa’e taxi mesak ba uma. Ha’u laos labarik ki’ik” Ha’u hatan ho nervoza.

“Iiihh, arbiru loos. Dir nee loloos nee atu tula hela Noi ba uma. Laos ha’u ida eeee…sorry…..” Alina hatan no hamnasa.

“Imi nain rua hotu saa, Noi, Alina! Tanba imi nain rua ha’u nia staff hotu. Nain Ida ha’u nia Sekretaria no ida seluk ha’u nia tezoreira. Ha’u sente la sala, see bainhira diretur hetan ninia staff sira manggame hela iha estrada laran no deiretur ajuda tula hela ba sira nia uma. Saa tan kalan ona hanesan nee nee… “ Buatamak nee koalia ho arogante no fiar aan loos. Nee komesa ninia hahalok aat nee atu mosu fali ona mak nee.

Rona tiha ida nee, Alina bis-bisu mai ha’u nia tilun.

“Lao deit ona ba. Do que to’o ba uma kalan boot, tia hirus fali ha’u ida lori Noi mai pasear nee… “ Alina obriga.

“Heisa, entaun lao ona ba” Ho laran nakali ha’u aseita.

Maun Nino loke odamatan oin, haruka ha’u atu tuur iha oin, hamutuk ho nia, maibe ha’u rejeita.

“Lae, husik ami nain rua Alina tuur iha kotuk hotu deit” Ha’u rejeita.

“Noi, nusa la iha oin deit ba” Alina nia ideia hanesan ho maun Nino.

“IIhhh…. Ó mos kaan inventa mak nee. Bele ka lae ó labele halo situasaun nee aat tan” Ha’u hatan ba nia oin naborut maibe hi lian neneik.

“Hmmmm…. Noi, hanesan loos ho labarik kiik nee” Maun Nino taka fali odamatan oin ho makaas no lao ba ninia fatin no loke odamatan hodi starter kareta.

Iha dalan ami la koalia buat ida. Idak-idak halimar ho ninia pensamentu rasik.

Kareta kurva fali ba uluk Alina ninia uma no hatun uluk Alina iha nee ba. Tanba hateke ba buatamak nee ninia oin hanesan taa la haan no la hamnasa, halo ami nain rua most auk atu protesta. Afinal Alina ohin promete ba māe atu lori hikas ha’u ba uma mak nia sei fila ba ninia uma.

To’o iha ha’u nia uma oin, ha’u loke odamatan atu tuun, nia dehan ho intonasaun makaas ituan, hanesan fó instrusaun no orden ba ninia funsionariu sira iha serbisu fatin.

“Aban tama sedu tanba ita tenke prepara relatoriu no relata ba ministeriu” Nia koalia sein haree ha’u nia oin.

“Diak, obrigada!” Ha’u mos hatan lalais no la hateke ba nia oin. Ha’u loke lalais odamatan kareta nia no tuun lalais tiha. Taka fali tiha oadamatn ha’u hakat lalais tiha ba uma. Ha’u nein sale tan ba nia dehan atu tuur hodi hemu bee manas ruma la I ka oinsa ka, ha’u nein hanoin to’o atu halo hanesan nee’

“Noi, ohin nee señor diretur ninia kareta too? Nia mak lori hela ó mai ka? Alina iha ne’ebé?” Māe ninia pergunta loloos deit ema halo investigasaun iha polisia ne’eba nee. Hanesan loos polisia sira investiga ema pekador sira.

“Iihhhh māe nee halo ha’u hakfodak deit”. Ha’u regula ha’u nia iis tanba hakfodak ho māe nia presenza ne’ebé derepenti no rega ha’u pergunta bar-barak boot nee.

“Oinsa mak Noi bele mai fali hamutuk ho nia?” Māe kontinua investiga.

“Ohin nee ami nain rua Alina tuur halimar iha tasi ibun. Nia mos kala lao halimar ba ne’eba hotu. Nia hetan ami nain rua Alina nee mak nia tula hela ami mai saa. Nia hatuun tiha Alina iha ninia uma tiha mak lori liu ha’u mai nee saa” Ha’u esplika ba māe. Hein katak māe sei la reta tan ha’u ho pergunta bar-barak.

Dehan nunee hotu, ha’u hiit ain sa’e ba varanda no atu tama lalais ona ba uma laran. Maibe māe hapara tiha ha’u no dehan;

“Nee mos ohin la dehan para seńor diretur nee mai hemu tiha kafe ida mak liu ba lae!” māe protesta.

“Heiii māe mos kaan sale kafe ba ema fuik leet mak nee. Husik nia ba tiha ba” Ha’u koalia ho emosaun halo māe konsege hakfodak.

“Noi, nee ó nia diretur nee. Diretur ida uluk nee ó konsidera no respeitu tebes. Tanba saa ida foun nee oin seluk fali nee?” Māe komesa diskonfia tanba fihir ha’u didiak tiha mak koalia.

“Uppsss. Sorry māe. Lae ida. Sira nee hanesan deit. Ha’u mak sei baruk hela. Sei kolen hela tan. Nee mak halo ha’u baruk no la konsege konvida nia atu tuur no hemu kafe” Ha’u arepende koalia arbiru no halo māe deskonfia ho ha’u nia jeitu.

Ha’u hakat lalais ba kuartu, hasai jacket, tam aba hariis fatin, fase tiha ain ho liman, kontinua latan aan ba kama leten.

To’o oras haan kalan nian, Angela maid ere odamatan no bolu ha’u sai ba haan. Ho matan moruk ha’u obriga aan ba haan netik ituan.

“Noi, loron ida rua nee Noi hahalok oin seluk loos. Konta ba māe agora” Māe hahu koalia bainhira ha’u para haan no hemu bee mak barak.

“Laiha ida saa māe. Noi di’ak hela. Noi baruk no kolen deit, māe. Kalma” Ha’u koalia no haruuk deit tanba la barani haree māe nia oin. Ha’u tauk māe nota karik ha’u bsosk. Tanba māe konese ha’u nia hahalok. Māe hatene ha’u. Māe ida ne’ebé kous ha’u, kuida ha’u desde ki’ik to’o ohin loron. Ha’u hein māe ho prima nain rua nee haan hotu, ha’u hamriik husu lisensa ba māe no tama liu ba kuartu. Hanoin kona vitamina ne’ebeé doutora Merry rekomenda momentu ba konsulta iha ospital Suia, halo ha’u duvidu.

Huff…. Ha’u tenke kontinua hemu ka oinsa?

Karik ha’u la hemu, tauk bebe nia kondisaun ladun diak. Karik ha’u sai fali ba no hemu vitamina mak māe hetan, bele aumenta māe ninia deskonfia. Ha’u tetu ba tetu no desidi madrugada mak hader sedu hodi hemu, antes māe ho prima nain rua nee hader.