وحيدة في أرض الغيلان

الفصل الثالث

داخل المستشفى

ندى كانت قاعدة مصدومه وبتعيط والولد مع الدكتور بيخيط الجرح اللي في راسه وهى اتصلت علي والدته وحكت لها اللي حصل اتفاجأت برد فعل والدته المحترم جدا اطمنت علي حاله الولد وشكرتها علي الاهتمام وبلغتها انها جايه المستشفى في الحال .

لكن ندى كانت لسه بتعيط ومنظر الولد كان صعبان عليها جدا

ندى في نفسها: يعنى انا كنت ناقصنى كمان موضوع الولد ده دا انا فيا اللي مكفينى رحمتك يا رب

رشا" معتقده إنها والدة الطفل": اهدى يامدام الحمدلله جت سليمه واحمدى ربنا انها جت علي قد كده

قدر ولطف شايفه الشاب اللي واقف بيعيط ده بناته الاتنين ومراته ماتوا في حادثه عربيه امبارح وابنه بين الحياة والموت احمدى ربنا

ندى: الحمد لله والتفتت ناحيه الشاب ولما شافته جالها ذهووول من الصدمه معقول !!!! استاذ نادر مش ممكن…

★★

مديحه: مالك ياخديجه ياحببتي إيه اللي زعلك كده

خديجه حاولت تتماسك: مفيش ده سعد اخويا بعت لى مصروفى أصل نسى يدهونى امبارح ولما افتكر رجع واداه للبواب

مديحه: ربنا يخليكوا لبعض يا حبيبتي ويبعد عنكوا كل شيطان

خديجه بحسره: أمين يارب

مديحه: تعالي يا حبيبتي كملي أكلك مالحقتيش تتغدى

خديجه: انا شبعت الحمدلله هشيل الاكل وما تنسيش تاخدى علاجك في معاده

مديحه: كويس انك فكرتينى كنت نسياه

هروح أخد الدواء وأدخل انام ساعه وانتى كمان ياخديجه ادخلي نامى شويه يا حبيبتي انتى صاحيه معايا من الفجر

خديجه: حاضر يا ماما

حاولت خديجه تنام لكن ماقدرتش دخلت المطبخ غسلت الاطباق ونضفت المطبخ بعنايه وكأنها بتشغل نفسها عن التفكير

بعد ماخلصت دخلت أوضتها وخرجت الظرف وفتحته

وقرأت تانى الكلام المكتوب جواه"معلش ياخديجه نسيت اد*كى الفلوس قبل ماتطلعى فوق وكل شهر هبعتلك زيهم.المبلغ مائتين جنيه"

جرت الدموع مره تانيه في عيون خديجة

بقي كده ياسعد ربنا عاطيك المال واخدت منى ورثى وعملت مشروع وبت**ب منه ياااما وفي الاخر باعت لى مائتين جنيه؟!!!

طيب اتصرف ازاي ياربى المبلغ ده يعمل إيه؟! مصاريف وأكل وشرب

مش معقول اخلي ماما مديحه تصرف عليا؟!!

دبر أمرى من عندك يارب!!!

★★

نرجس: عملت زى ماقولتلك ياسعد؟!

سعد: أيوة ياحببتي كل حاجه مشت زى ما انتى عايزه

بس بينى وبينك كانت صعبانه عليا عشان هتعيش في بلد بعيده بس مارضتش أبين لها

نرجس بعصبيه: ليه هي عيله صغيره!! خايف عليها لتوه ولا كنت عايز تجيبها تعيش معانا وتسود عيشتنا زى زمان

اسمع ياسعد انت عارف انى بحب اخد راحتى في بيتى من غير ماحد يخنقنى وأظن ده حقى ولا ايه؟!!

سعد: طبعا ياحببتي محدش قال حاجه

وانا أصلا من غير ماتقولي استحاله كنت اجيبها هنا تانى

كفايه المشاكل اللي ماكنتش بتخلص بينا بسبب قعدتها هنا

نرجس: داهيه لا ترجعها أيام ،ها واديتها المبلغ اللي اتفقنا عليه؟!

سعد: طبعا بس انا شايف انه قليل مش هيكفيها بس مارضتش أزعلك

نرجس: ماانا قاصده يكون قليل

سعد باستغراب: ليه مش فاهم

نرجس: ده عشان مصلحتها والله يمكن تنزل تشوف شغل حد يشوفها يتقدم ويتجوزها لكن لو اديتها بزياده هتفضل قاعدة في البيت ومش هتتحرك واحنا عايزنها تتجوز وينزاح همها من علي اكتافنا

وبعدين أى قرش عيالنا أولى بيه اد*ك شايف الغلاء اللي احنا فيه ومصاريف مدارسهم الخاصة كتير ازاى مفيش فيها حاجه اما تشتغل وتصرف على نفسها!!

سعد: عندك حق الدنيا بقت غاليه أوى ويادوب كل واحد يشيل مسؤولياته

نرجس: غير بقي السيره الزفت دى وتعالي أما اف*جك علي الهدوم اللي اشترتها ليا وللولاد.

سعد: ماشي يا ستى ف*جينى اشتريتوا ايه؟....

★★★

جرت ندى بلهفه ناحيه نادر

استاذ نادر؟ مش كده

نادر وكأنه في عالم تانى: ايوه...مين

انا معلمه في حضانه الإيمان حضرتك والد زياد مش كده؟؟ كنت بشوف حضرتك بتيجى تاخده كل يوم

نادر باكيا: أيوه أنا

ندى بحزن: اخبار زياد إيه؟!!

نادر: ادعى له يااستاذه ربنا ينجيه معدش ليا حد في الدنيا من بعده

ندى: ربنا يشفيه ويعافيه والبقاء لله استأذن حضرتك

وبعد ساعه راح نادر جنازه زوجته وبناته وهو في حالة صعبه جدا وبعد كده رجع تانى المستشفي

ولما وصل الدكتور بشره ان ابنه فاق من الغيبوبه واسترد وعيه بالكامل ،وان شاء الله خلال الساعات الجايه الحاله تستقر

برغم كل الحزن اللي جواه الا انه فرح جدا وفضل يحمد ربنا كتير انه نجى ابنه

وماسابوش وحده في الدنيا

نادر:أقدر أطمن عليه يادكتور وادخل له؟

الدكتور: اه طبعا بس هما خمس دقايق بس

دخل نادر لزياد ومسح الدموع من عيونه و حاول يبان متماسك

نادر بابتسامة مصطنعة: حمد الله على السلامه يا زياد

زياد بصوت ضعيف: فين ماما ؟ انا عايز ماما ومريم وأسماء هما فين؟!

نادر: هما تعبانين شويه مش قادرين يجوا بس باعتين لك السلام

زياد ببكاء: رجلي بتوجعنى أوى يابابا

نادر: إن شاء الله الدكتور هيكتبلك علي دواء كويس وان شاء الله تخف بسرعه ادعى بس وقول يارب اشفينى

زياد: يارب اشفينى

نادر: أنا هخرج دلوقتي لان الدكتور بيقول لازم تنام و ترتاح عشان تخف بسرعه وتخرج من هنا .سلام ياحبيبي

زياد: مع السلامه يا بابا

★★

مديحه صحيت من النوم لقت خديجه قاعده سرحانه وشكلها متضايق

مديحه: مالك يا حبيبتي في حاجه ضايقتك انا حاسه ان في حاجه مضيقاكى من ساعه ما خدتى الظرف من عمك عطيه.. بصى هنصلي العصر دلوقتي وبعدين نقعد سوا نشرب القهوه وتحكي لى ايه اللي حصل ماشي؟!

مديحه: حاضر يا ماما هعمل انا القهوه عما تصلي أنا سبقتك صليت العصر

خلصت مديحه الصلاة لقت خديجه عملت القهوه وقاعده تستناها

مديحه: انتى مانمتيش مش كده؟!

خديجه: لا ياماما ماجاليش نوم

لاحظت خديجه دموع فى عيون مديحه

خديجه باستغراب: مالك ياماما في حاجه مضيقاكى

مديحه: لا بس كلمه ماما منك حلوه اوي كل اما اسمعها منك بحس پقلبي بيتهز من جوه

خديجه: وانا كمان يا ماما كانت وحشانى اوى الكلمه دى ومش بس الكلمه انا شايفه فيكى حنيه أمى الله يرحمها ربنا يطول عمرك

مديحه: انا بقي شايفه في عنيكى حنيه ماشوفتهاش من ولادى مستغربه قلبي اتفتح لك واحنا لسه أول يوم نقعد مع بعض ها يلا افتحى لى قلبك واحكي لى ايه اللي مزعلك؟!

خرجت خديجه الظرف من جيبها وحطيته في إيد الحاجه مديحه

مديحه بعد ماقرأت كلام سعد: لا حول ولا قوه الا بالله

معلش حبيبتي بس انا اعرف ان سعد مرتاح ماديا ليه يعمل كده؟!!

خديجه: مش بس اللي مزعلنى سعد مش بخيل معايا في الفلوس وبس بخيل في مشاعره فى حبه وحنيته ماافتكرش مره طبطب عليا وطيب خاطرى لما كنت صغيره و افتكر ماما واقعد اعيط كان يتخانق معايا ويقولي منكده عليا حياتى الله يسامحه بقي

مديحه: خلاص يا حبيبتي انسى بقي وعيشى حياتك وان كان على المصاريف ياستى انا ببقبض معاش كويس من عمك طه الله يرحمه وهتدبر ماتقلقيش

خديجه: أنا بفكر أنزل اشوف شغل بس المشكله انى ماكملتش الكليه بتاعتى سعد جوزنى وكنت لسه مخلصه سنه تانيه في الكليه وفؤاد رفض يخلينى أكمل

مديحه: كنتى في كليه إيه؟!!

خديجه: تجاره

مديحه: أنا كمان عايزاكى تشتغلي بس مش عشان الفلوس عايزاكى تخرجى وتشوفى الدنيا يابنتى ماتحبسيش نفسك كده

سيبى موضوع الشغل عليا وان شاءالله تدبر

خديجه: ونعم بالله

رن جرس الباب

خديجه قربت من الباب: مين !!

عواطف: انا عواطف يامديحه افتحى

مديحه: افتحى ياخديجه دى الحاجه عواطف جارتى العمر كله

فتحت خديجه الباب

عواطف: السلام عليكم الحاجه مديحه موجوده؟!!

خديجه: وعليكم السلام أيوه موجوده اتفضلي

دخلت عواطف واسرعت مديحه تستقبلها واخدتها في احضانها بحراره

عواطف: وحشتينى يامديحه نورتى بيتك ومطرحك ياحببتي

مديحه: وانتى كمان وحشتيني اوى ياعواطف انتى رجعتى امتى من دمنهور

عواطف: بقالي شهر ماارتحتش مع جوز بنتى ماانتى عارفانى ل**نى في حته زياده مابسكتش قلت امشى بكرامتى ههههه

مديحه: عارفه يااختى حته واحده قولي حتتين تلاثه انتى تلات ارباعك ل**ن اصلا هههههه

عواطف: مين البت الحلوه اللي فتحت لي الباب واختفت دى هى عليها تار ولا مش بتتكشف علي ستات ههههه

مديحه: ياساتر على ل**نك دى خديجه بنت ابن عمى وفي مقام بنتى تمام

تعالي ياخديجه سلمى علي طنطك عواطف

دخلت خديجه وسلمت عليها: اهلا ازيك يا طنط اتشرفت بمعرفة حضرتك

عواطف مبتسمه: الشرف ليا ياقمر بس عايزه أقولك علي حاجه انا عندى حساسية وروحت للدكتور قالي دى بتجيلك لما حد يقولك ياطنط ههههه

خديجه ضاحكه: أمال اقول لحضرتك ايه؟!!

عواطف: قوليلى خالتو عمتو اللي تحبيه أصل المخفى جوز بنتى كرهنى يااختى في كلمه طنط هههههه

مديحه: استغفرى ربنا الجدع محترم وبيحب بنتك انتى اللي مايعجبكيش العجب

عواطف: الله يصلح حالنا وحاله بقي

وانتى ياخديجه هتفضلى هنا مع مديحه ولا زياره يومين وماشية ؟!

سبقتها مديحه: خديجه ياحببتي اعملي لنا عصير من ايدك الحلوه دى

خديجه: حاضر ياماما

دخلت خديجه المطبخ

مديحه بصوت منخفض: حاسبى علي كلامك مع البنت انا عارفاكى بترمى دبش البنت هتقعد معايا لان جوزها طلقها عشان ماخلفتش وياريت تقفلي كلام في الموضوع ده خالص

عواطف:ياقلبي شكلها بنت حلال وغلبانه ربنا يعوضها.. ماتيجى يامديحه اجوزها محمد ابنى

مديحه: هو محمد طلق مراته؟!!

عواطف: لا لسه نقوله يطلقها هى اصلا مابتنزليش من زور ونجوزوا البنت العسل دى هههه

مديحه: صبرنى يارب انتى ياعواطف مش هتعقلي ابدا انا عايزاكى في موضوع تانى؟؛؛

عواطف: خير يااختى قولي

مديحه: عايزاكى تشوفى لها شغلانه حلوه اهى تغير جو بدل حبسه البيت

عواطف: من عنيا ماانتى عارفانى عارفه طوب الارض ومش هسكت الا اما اشغلها هى خريجه ايه

مديحه: هى كانت في كليه تجاره بس اتجوزت قبل ماتخلصها

عواطف: سبيها علي الله ثم عليا

دخلت خديجه بالعصير

خديجه: اتفضلوا العصير

مديحه: تسلم ايدك يا حبيبتى

★★★

مر أسبوع وبدأ زياد يتحسن ونادر كان مبسوط جدا ومش بيفارق ابنه

نادر: عندى ليك خبر حلو يازياد

زياد في براءة: ايه يابابا ماما واخواتى هيجوا يشوفونى

نادر بألم: لا ياحبيبي مش قولتلك هما سافروا يتعالجوا بره مش ده الخبر اللي أقصده

زياد: امممم مش عارف قول انت يابابا

نادر: الدكتور كتب لك على خروج بكره وهنروح بكره البيت

زياد: هيييييي الحمدلله

سمعوا خبط علي الباب

نادر: ادخل...

الحاجه هدى" زوجه عم نادر": ازيك يانادر ياابنى عامل ايه النهارده واخبار زياد إيه؟!!

نادر: الحمدلله مااتحرمش منك تعبناكى معانا الأيام اللي فاتت

هدى: ماتقولش كده ياابنى ،دا انا

عندى ليك حته مفاجأة يانادر مش هتصدقها.......

يتبع...

يتبع