SA KALAGITNAAN ng party ay nakita ni Ninia ang kanyang hinahanap. Nasa table ng pinsan ni Anthony si Alexis na gwapong-gwapong tingnan sa fitted white long sleeve nito na nakatupi hanggang siko. Nakaupo ito kaya hanggang baywang lang nito ang nakikita niya. Anim na magkakatabi ang mga ito sa table. Tatlong babae at tatlong lalake na mukhang magkakapareha. Si Alexis ay nakita niyang may katabing babaeng noon lamang niya nakita. Hindi malinaw kung kasama talaga ito ng alkalde o dito lang nito nakilala. Pero isa lang ang tiyak niya. Sa klase ng kilos at ngiti ng babae kay Alexis ay mukhang type nito ang Mayor ng San Miguel. Mula sa di-kalayuan ay tanaw niyang malalagkit ang tingin nito at kulang na lang ay idikit na ang upuan sa kinauupuan ni Alexis. Parang gusto niyang mapangiwi dahil masyad
