جراح القلب الجزء الاول

جراح القلب الحلقه الثانيه

الحلقه ٢

من جراح القلب

مؤمن راح يطمن على هنا ويستعجلها خبط على الباب كتير محدش رد استغرب خبط ونده على هنا برده محدش رد اتردد كتير انه يفتح الباب لكن قرر ف الاخر انه يفتحه وينادي وهو واقف بره. فتح مؤمن الباب

مؤمن.. هنا... هناااااا.... بت ياهنا انتي رحتي فين.... ماتت دي ولا اي ياهناااااااااا

فجأه مؤمن سمع هبده من أوضة هنا وجرى ناحية الاوضه وخبط على بابها لكن مفيش اي رد خبط كتير وخايف يدخل تكون هنا مش بحجابها قرر يروح يقول لمامتها بس خايف يعمل قلق هناك خصوصا في وجود ناس كتير عشان الفرح دعا ربنا تكون يحجابها وفتح الباب براحه وبص بطرف عينه عليها لقاها مرميه ف الارض باسدالها زي مهي حتى الطرحه مفكتهاش

مؤمن.. الحمد لله بحاجبها جري عليها وشالها نايمها ف السرير حاول يفوق فيها مفيش اي استجابه هناااا ردي عليا يهناااا لو تفهميني مالك بس.. هنااا فوقي ياهناااا بص فالاوضه يدور على اي حاجه تفوقها لحد ملقي برفيوم على التسريحه قام جري خده ورش على ايده رشه وحاول يفوقها وبالفعل فاقت

مؤمن.. حرام عليكي ياشيخه وقعتي قلبي اي اللي حصل يابنتي

هنا... مؤمن!!!! انت اي اللي جابك هنا واي اللي حصل

مؤمن... لا انتي مجنونه انتي بتسأليني ايه اللي حصل؟ انا اللي المفروض اسأل على فكره مش انتي

هنا....انا اخر حاجه فاكراها اني كنت نايمه على السرير وسمعت خبط على الباب قومت عشان افتح محستش بحاجه بعد كده

مؤمن... اهو انا بقه ياستي الرخم اللي كنت بخبط على الباب ممكن تفهميني مالك بقالك ساعتين راجعه الشقه وحتى مغيرتيش هدومك مالك ياهنا انتي بتحبي جديد يابت ولا اي صارحي اخوكي متخافيش سرك في بييييير

هنا.... بسرحان حب! لا طبعا انا عمري ماحب ابدا، الحب عذاب يامؤمن وانا مش عايزه اتعذب اكتر من كده

مؤمن... عذاب!! واكتر من كده.. ده انتي شكلك مجرباه ومتعذبه فيه كمان

هنا.. لا طبعا بس بشوف تجارب اصحابي مع الحب ومش عايزه اكررها

مؤمن.. مش كل التجارب زي بعضها ياهنا وزي مافيه عذاب ف الحب فيه برده فرح وسعاده زي أحمد مثلا حب ندى وأهم النهارده بيتوجوا الحب ده

هنا.. بدمووووع ربنا يسعده

مؤمن.. بدأ يفهم هنا مالها او هو كان فاهم ومكدب نفسه لكن دلوقتي اتأكد أن هنا بتحب احمد وبصلها وقال

.. ربنا يسعدك ياهنا ويرزقك بواحد يقدرك ويحافظ عليكي انتي تستاهلي كل خير ياهنون

هنا.. تسلم يامؤمن ربنا يخليك

مؤمن.. طيب يلا بسرعه بقه خدي دش يفوقك كده وغيري هدومك عايزك ملكه النهارده و، وحصليني على شقتنا لان ناديه قلقانه عليكي

هنا بضحك... هو مفيش القاب عندك خالص يامؤمن ناديه كده بس

مؤمن.. يعني هي جديده عليكو منا طول عمري بقولها وبعدين انا لسه هقول خالتي ولا غيره انا ب**ل يا اختي وحياتك كفايه عليها ناديه وتحمد ربنا على كده ??

هنا... لا فعلا عندك حق تحمد ربنا على كده وضحكوا

مؤمن يلا انا همشي عشان ناديه متقلقش اكتر وانتي تعالي ورايا ومتتأخريش ممكن

هنا.. ممكن طبعا وهنا فعلا دخلت خدت شاور وخرجت عشان تجهز الحفله

مؤمن راح علي شقته واول مدخل ناديه جريت عليه

ناديه.. اي يا مؤمن اتاخرت ليه قلقتيني هنا حصلها حاجه

مؤمن.. سلامتك من القلق يا دودي يا حبيبتي. ندى بخير متقلقيش

ناديه طب اتأخرت ليه كده انا كنت لسه هاجي وراك

مؤمن.. بنتك كانت نايمه ياستي سيباني اهبد على الباب لما ايدي وجعتني وهي ولا هي هنا

ناديه بضحك.. معلش أصلها منامتش بالليل كويس المهم انك صحتها عشان تلحق تجهز

مؤمن صحتها ياحبيبتي مهو انا المنبه بتاعكو هنا

ناديه.. بضحك ياواد انت مفيش فايده فيك كل حاجه عندك هزار

مؤمن.. يعني بذمتك يا دودي احنا عايشين ليه؟ ها عايشين عشان ننكد على بعض ولا عشان نروق على بعض

ناديه.. لا ياخفيف عشان نروق على بعض

مؤمن.. طب متروقي على ابنك حبيبك كده بكوباية قهوه تعدل دماغه من ايد*كي الحلوين

ناديه.. من عنيا ياحبيبي

مؤمن.. تسلم اد*كي وعنيكي يا احلى دودي

................

عند هنا ف شقتها

هنا خرجت من الحمام لبست فستان رقيق جدا لونه نبيتي وحطت ميكب اب خفيف ولفت حجابها بطريقه رقيقه وكانت فعلا ملكه هي مش جميله قوي لكن ملامحها بريئه جدا وروحها حلوه تشد اي حد ليها بسهوله

دخلت هنا شقة ام احمد وسلمت على كل الموجودين اللي انبهروا برقتها وجمالها وكان احمد ومؤمن بيجهزوا ف اوضهم ناديه خارجه من المطبخ شافت هنا وجمالها

ناديه... بسم الله ماشاء الله قمر ياحبيبتي ربنا يحميكي ويفرحني بيكي يارب

هنا... ربنا ميحرمني منك يا أمي

ام احمد... ما شاء الله تبارك الله عروسه زي القمر ربنا يسعدك ياحبيبتي

هنا... تسلمي ياخالتي ربنا يخليكي

احمد لبس بدلته وكان قمه ف الوسامه والشياكه وخرج يدور على هنا

احمد... هنا يهناااا

ناديه.. كلمي أحمد يا هناتقريبا بينادي عليكي

هنا.. راحت لأحمد عند الاوضه.. خير يا احمد محتاج حاجه

احمد بانبهار.. اي يابت القمر ده انتي مخبيه الجمال ده كله فين

هنا.. أنا زي ما انا طول عمري جميله انت بس اللي مبتشوفش

احمد ضحك بصوته كله وده دوب قلب هنا وقالها... عندك حق انا اللي كنت أعمى المهم ادخلي عايز اخد رايك ف حاجه

دخلت هنا أوضة احمد وطبعا الباب مفتوح عليهم

احمد طلع علبه قطيفه من درج المكتب وفتحها وقالها اي رايك

هنا انبهرت جدا بيها وهي كانت عباره عن كوليه رقيق ودبله وخاتم ودبلة احمد طبعا

هنا.. حلوه قوي يا احمد مب**ك عليك

احمد.. انتي اول واحده تشوفها عشان تعرفي غلاوتك عندي ومتزعليش مني

هنا.. مفيش زعل ولا حاجه يا احمد انت اخويا.. (قلب هنا بيتقطع) .. ببس شكلها غالي قوي

احمد.. بصي هي خلصت على تحويشة عمري بس كله فداها انا لو أطول اجيبلها حته من السما هعملها

هنا.. للدرجادي بتحبها

احمد.. ندى دي كانت حلم حياتي ياهنا كنت بشوفها ف الجامعه بنسى الدنيا كلها وبدخل ف عالم تاني عالم بيجمعني انا وهي وبس لحد م واحد صاحبي قالي شكلك معجب بيها قولتله جدا قالي طيب واللي يعرفك عليها قلتله هبقي مدين ليه طول عمري قالي ماشي ياعم تعالي وانا اعرفك عليها وبالفعل عرفني عليها ومن يومها وهي عشقها ف قلبي بيزيد يوم عن يوم

هنا.... بخنقه ودموع محبوسه وصوت مخنوق.. ربنا يسعدك ويكملك على خير يا احمد

.احمد.. . عقبالك يارب يا هنون

هنا... تسلم يارب

احمد.. المهم يابت نسيتني كنت عايز اقولك اي

هنا... خير في حاجه تاني

احمد... أنا عايزك تركبي معايا العربيه وانا رايح اجيب ندى ممكن ولا لا

هنا... ليه!! مش ممكن ندى تدايق

احمد.. ملكيش دعوه بندي. ندى معندهاش اخوات بنات

وعايزك تتعرفي عليها وتبقى اخت ليها انا هآمن عليها معاكي

هنا... حاضر يا احمد من عنيا اللي انت عايزه انا هعمله

احمد.. تسلملي احلى عيون ف الكون

هنا... ابتسمت بحزن شديد واستأذن ومشيت تستعجل مامتها

الكل جهز وبدأوا يتحركوا عشان يروحوا يجيبوا العروسه

مؤمن... هنون تعالي اركبي معايا انا اخدت عربية واحد صاحبي وهاخد ماما وناديه وعمتي ونروح

هنا.. لا يا مؤمن مش هينفع اصل احمد عايزني معاه ف العربيه

مؤمن.. اشمعني يعني

هنا... قالي ندى ملهاش اخوات وعايزيني ابقى معاها وابقى اخت ليها

مؤمن.. وانتي وافقتي!!

هنا... وهرفض ليه يا مؤمن وبعدين مش معقول اول طلب يطلبه مني يوم خطوبته وارفض ولا انت شايف اي

مؤمن.. لا عندك حق.. المهم انتي عايزه تروحي؟ لو مش عايزه انا ممكن اقول لأحمد واخدك معايا

هنا... لا ملوش لزوم يا مؤمن عشان أحمد ميزعلش

مؤمن.. ماشي ياهنا براحتك ربنا يفرحنا بيكي قريب يا هنون

هنا.. قول ان شاء الله وابتسمت

احمد ركب هنا العربيه ف الكرسي اللي قدام وكان قاعد فارس صاحبه هو اللي بيسوق اول هنا مدخلت

فاارس.... اي ده ماشاء الله انتي بقه هنا

هنا باستغراب.. ايوه انا بقه هنا هو حضرتك تعرفني

فارس.. احمد كلمني عنك النهارده وقالي انه بيعتبرك زي اخته وهتركبي معانا النهارده

هنا بتهكم.. هه اه انا زي اخته

فارس استغرب رد فعلها وقالها مكنتش متخيلك بالجمال ده

هنا.. وانت تتخيلني ليه اصلا بالجمال ده ولا بغيره اتفضل حضرتك بص قدامك وخلي الليله تعدي على خير

فارس.. حاضر حاضر براحه عليا مالك كده داخله شمال فيا اهدي بس شويه

هنا بغل.. هو انت شايفني بشد ف شعري عشان تقولي اهدي

احمد سمع صوت هنا راح ناحية العربيه

احمد.. مالك ياهنا في اي حد دايقك

هنا.. لا مفيش ممكن نتحرك بقه ولا هنقف كتير

احمد حاضر هنمشي اهو

فارس نزل من العربيه ولف ناحية احمد وقال

فارس.. اي يا عم انت جايب دراكولا معانا دي شويه وهتنزل تاكلني

احمد.. انت هببت اي

فارس.. هو انا لحقت اهبب دي داخلة فيا زي القطر دي دمها حامي قوي يا جدع

احمد ضحك... معلش حقك عليا انا وعدي الليله

هنا.. احنا هنقف نتكلم كتير ولا ايه مش يلا بقه

فارس واحمد بلبخه جريوا الاتنين وركبوا واتحركو ا ف **ت تام خوفا من المجنونه اللي ف العربيه

وصلوا البيوتي سنتر ومؤمن كان وراهم على طول ونزل احمد عشان يستقبل معشوقته الجميله نزلت هنا وحاطه ايدها على قلبها من انها تشوف احمد مع حبيبته لأول مره مؤمن راح لهنا ووقف جنبها وقالها عقبالك ياهنا

هنا.. عقبالك انت الاول يا مؤمن وابتسمو ا الاتنين

احمد دخل البيوتي سنتر وكانت ندى ف انتظاره

احمد.. بانبهار شديد اي يابنتي الجمال ده انا مش عارف هحبك اي اكتر من كده

ندى ب**وف.. ربنا ميحرمني منك ابدا ياحبيبي

احمد.. مسك وشها وباس جبينها وقالها مب**ك عليا انتي

ندى.. مب**ك عليا انت يا احمد

خرج احمد بيها بره وكل الشباب صفرت وهما خارجين والبنات بتزغرط وكانت الفرحه ماليه المكان الا قلب هنا اللي كان بيزف دم من الجرح اللي فيه

احمد اخد ندى وراح ناحيه هنا وقال

احمد.. دي هنا يا ندى جارتي واختي وتقدري تعتبرها من دلوقتي اخت ليكي بجد هتحبيها قوي

ندى... بصت على هنا من فوق لتحت وقالت.. غريبه بس انت عمرك محكتلي عنها قبل كده ولا جبت حتى سيرتها (وندى طبعا تقصد تغيظ هنا)

احمد اتحرج جدا من ردها وبصلها باستغراب بس هنا لحقته

هنا... معلش أصله دايما ناسي كده وبعدين هو اللي يشوف جمالك يفتكر حاجه اصلا

ندى.. بابتسامه.. شكرا ليكي وشكلنا هنبقى صحاب

هنا.. إن شاء الله والف مب**ك ليكو

ندى.. الله يبارك فيكي عقبالك

احمد بص لهنا نظرة فيها اعتذار وشكر لردها وزوقها مع ندى وهنا بادلته بنظرة لوم وعتاب لكن طبعا هو مغيب ومفهمش نظرتها خالص. (حمار بقه هنعمل اي)

اتحركو ا على بيت العروسه لانه فيه الحفله وهو كان بيت في حي شبه راقي وله جنينه صغيره ومجهزه لاستقبال العروسين

نزلوا طبعا وكان ف استقبالهم والدة ووالد العروسه

فايزه والدة العروسه... مب**ك ياحبايبي الف مب**ك ربنا يتمم بخير يارب ويسعد قلوبكو

مراد والد العروسه.. مب**ك ياحبايبي ربنا يسعدكوا يارب

ندى... حبيبي يابابا ربنا يخليك ليا انت وماما يارب

رحبوا طبعا بأهل العريس كلهم ودخلوا وبدأوا حفلتهم البسيطه

مؤمن طبعا مراقب هنا لانه شك ف حبها لأحمد وصعبت عليه جدا وقرر انه يقف جنبها ويساعدها تخرج من محنتها

مؤمن... واقف لوحدك ليه يا جميل

هنا.. معرفش حد هنا فقولت اتف*ج من بعيد.

مؤمن.. طيب مش بتقعدي ليه مع ناديه والست ام احمد

هنا.. عادي يا مؤمن فضلت اقعد بعيد براحتي

مؤمن بحزن... انسيه ياهنا وحاولي تعيشي حياتك عادي

هنا بصدمه.. إ.. إ.. أنت بتتكلم عن مين يا مؤمن

مؤمن.. انتي فاهماني كويس وعارفه انا اقصد مين

هنا... لا طبعا معرفش انت تقصد اي اصلا

مؤمن... ماشي ياهنا عموما ده لا وقته ولا مكانه واكيد هيجي وقت مناسب نتكلم فيه وبصراحه ها بصرااااااحه

هنا بصت بدموع.. وسكتت لكن قلبها اللي كان بيتكلم ومؤمن حس بيها لكن مش عارف يعملها اي

الدي جي اشتغل وكانت اول رقصه سلو على اغنية خليك معايا عمرو دياب

ولا اي كلمة حب اتقالت في يوم مابين اتنين

تسوي حلاوة كلمه منك قولتهالي

عيد قولت اي كده تاني وتالت انا قلبي كله حنين

ولا يطفي ناره حبيب غير ولو عدتهالو

عارف بتعمل فيا اي كلمة حبيبي. زي اللي اول مره بيحس بأماااااان

خليك معايا خليك معايا يا حبيبي مهما كان

خليك معايا يا حلم عمري اللي في خيالي من زمان

عارف انت اجمل حاجه تفرح الواحد هيا اي

ان اللي يا ما حلمت بيه تلاقيه حبيبك

وانا عشت بحلم باللحظه دي ده اللي بدور عليه

انا اسيب حياتي ودنيتي ولا يوم اسيبك

عارف بتعمل فيا اي كلمة حبيبي زي اللي اول مره بيحس بأماااااان

خليك معايا خليك معايا يا حبيبي مهما كان

خليك معايا يا حلم عمري اللي ف خيالي من زمااااان

احمد عاش كل كلمه مع حبيبته وكأنه هو اللي بيقولها وندى بادلته نفس الاحساس واحساسه كان واصل لكل اللي قاعدين حتى هنا اللي مش قادره تستحمل اكتر من كده وقربت على الانهيار فعلا، لكن فجأه سمعت هنا صوت بيناديها وبصت لقته.............

ونكمل بكره يابنات

تسلمولي يارب

بقلم شيمو الخطيب