هكذا كان قدري

صحيت من النوم فجأه وانا مش متعوده اصحي في عز نومي لقيت جوزي مش نايم جنبي خرجت بره براحه اشوفه راح فين سمعته بيتكلم فالتليفون . اتسمرت مكاني كان بيكلم حد ويقوله . _ انا مش قولتلك متتصليش بيا بعد الساعه ٦. موضوع خطير ايه الي عوزاني فيه دلوقتي . إهدي بس عشان افهمك . انا جايلك حالا . جريت عالسرير عملت نفسي نايمه عشان اراقبه هيعمل ايه. لقيته بص عليا يشوفني نايمه ولاصحيت خايف اكون صحيت وسمعته بيقولها ايه. انا ايمان عندي ٣٥ سنه اتجوزت محمد عن حب ٥ سنين حبينا بعض واتخطبنا كان بيحبني اوي كان دايما شايفني قمر ومفيش حد شبهي ولافجمالي ولا فرقتي .انا صحيح الحمد لله جميلة بس هو كان دايما بيحسسني اني اجمل بنت فالكون عمره ما في واحده لفتت انتباهه ابدآ من كتر حبه فيا مكنش شايف اي حد غيري لدرجة ان اخواته البنات كانو بيغيرو مني مش مصدقين ازاي راجل يحب واحده كده لدرجة الجنون.اتخطبنا واهلي مكنوش موافقين عليه لاني انا كنت فكلية هندسة وهو كان خريج كلية تجاره وشايفين ان انا مستوايا العلمي اعلي منه واني هحس بالفرق ده بعد الجواز .انا طبعا وقفت قصادهم وقولتلهم انا بحبه وهو بيحبني متحطمونيش انا لو سبته هموت هما طبعا خافو عليا جدا وقالولي خلاص هتتجوزيه يبقي مترجعيش تشتكي ولا تقولي حاجه عليه احنا شايفيه مش مناسب وعلي اده لكن انا كنت شايفاه الدنيا باللي فيها .لافرق معايا منصب ولاجاه ولامال كل اللي فارق معايا ان الاقي حد يتقي الله فيا ويحبني من كل قلبه ويقدرني وميجرحنيش لكن مبصتش ابدا علي الفلوس ولا انو هيقعدني فشقة ايجار كل ده وافقت عليه عشانه هو.واما جيت اتخطبت عملت خطوبة عالضيق كده الصراحة اهلي كان هيعملولي فرح كبير علي حسابهم بس انا حبيت اعمل حاجه بسيطه فالبيت عشان ميحسش انو قليل ولا انو مش قادر علي التكلفه دي .حتي وانا بجيب الشبكه جبت دبله بس عشان عارفه ظروفه واتفقت معاه هنبيعها بعد الخطوبه وخد فلوسها تاني بس محدش يعرف .قولتله انا فارق معايا انت يامحمد ولا فارق معايا حد ولا عايزاك تصرف ولا تشيل الهم عايزاك تبقي مبسوط دايما .دايما كنت بحفزه بالكلام الحنين الطيب زي ماهو كان بيقولي احلي كلام وبيخليني اسعد واحده فالدنيا.بعد الخطوبه فرح جدا وقالي انتي فعلا اصيله بنت اصول بتحسي بيا ومصغرتنيش قدام حد وعملتي الخطوبه فبيتك عشان متضغطيش عليا انا بحبك اوي وفعلا اختارت صح اتخطبنا سنتين عشت اجمل ايام حياتي فيهم كان بيعمل كل حاجه عشان يخليني سعيده ومحستش ابدا ان ناقصني حاجه . بعد سنتين كان فرحنا اجمل يوم في حياتي مرضتش اعمل فرح عشان مضغطش عليه لأنه كان عليه ديون كتير وكان ممكن اهلي يعملولي اكبر فرح لكن انا الي رفضت عشان مصغرهوش قدامهم . سكنت في بيت عيله مع اهله مامته واخواته و من اول يوم حصل الي مكنتش متوقعاه . محمد اتغير وبقي واحد تاني وكأن اهلي كانوا حاسيين . اتغير معايا و اهله كمان اتغيروا مامته كانت بتعاملني زي الكلبه عوزاني انزل اخدمها هي واخواته البنات. تاني يوم الفرح لقيتها بتخبط عالباب . اتخضيت وقومت افتح اشوف مين . _ صباح الخير يا عروسه . = صباح الخير يا ماما خير فيه حاجه حصلت . _ مش شايفة الساعه كام انزلي يلا ساعدي اخوات جوزك فالفطار . =اساعد اخوات جوزي.هو مش انا لسه عروسه برضه ولازم افرح زي اي عروسه فالدنيا. _تفرحي ايه قومي بلاش دلع ده النظام عندنا انتي عايزه تغيري فنظام البيت ولا ايه .يلا مستنياكي ممته قالتلي كده وسابتني ومشيت. وقفت مزهوله من اللي بسمعه ودخلت اتكلم مع محمد واحكيله اللي حصل واللي ممته بتقوله لقيته بيقولي بقولك ايه البيت ده ليه نظام لازم تمشي عليه. بتكلم معاه براحه وبقوله انا لسه عروسه ولازم اتدلع زي اي ست .راح ض*بني بالقلم جامد وقال زي ماسمعتي تنزلي تساعدي اخواتي واي كلمة هنا امي تقولك عليها تعمليها مفهوم بدل ما ايامك هنا تبقي سوده. طبعا انا اول ماعمل كده معايا انهارت من العياط وكنت هموت واروح لاهلي بأي طريقة. لكن خوفت منه اوي وفكرت اني مخربش بيتي انا لسه عروسه مكملتش يومين. غيرت هدومي وغسلت وشي ولبست ونزلتلهم اول مانزلت لقيت سلفتي واقفه بتتودود مع حماتي وسمعاها عماله تسخنها عليا. مرضتش اتكلم واعمل مشكله . _قولتلها اساعد حضرتك فإيه ياماما محتجاني اعملكم ايه. =قالتلي قومي اقلعي العباية اللي انتي لبساها دي. _ قولتلها دي عباية جديده عشان لو حد جيه يباركلنا من عندكم يلاقيني جميله .مش هلحق اطلع البس عشان انا هعمل هنا معاكم. = لقيتها بتزعقلي وبتقولي اطلعي يابت غيري هدومك دي والبسيلك حاجه قديمة او مقطعه. _قولتلها مقطعه ازاي يعني. = قالتلي زي ماسمعتي واقعدي يلا عشان تزغطي البط وتنضفيلي ال١٠ فرخات دول تشيلي الريش بإيدك وتسلخي الفراخ وانا هعلمك تعملي الحاجات دي ازاي. زيك زي كل اللي موجودين هنا انتي مش علي ايد*كي نقش الحنة يختي فزي اتحركي. انا سمعت كلامها وطلعت اغير هدومي وانا بموت من العياط مش مصدقة اللي بسمعه.كل اللي بقوله جوايا طلع عندك حق ياامي انا مكنش ليا الجوازه دي كان قلبها حاسس وطلع احساس امي صح . انا مش هقدر اكلم اهلي واحكيلهم اي حاجه امي ست كبيره وغلبانه وطيبه اوي.وابويا راجل مريض ولو سمعو حاجه زي دي ممكن يتعبو اكتر او يجرالهم حاجه انا هخاف عليهم .هفضل ساكته وراضيه بالهم اما نشوف اخرتها ايه معاهم . غيرت هدومي ولبست جلابيه قطن هي جديده طبعا انا معنديش حاجه قديمة. محمد شافني وانا بغير واستغربته جدا لقيته حتي زي مايكون عارف انا هيجرالي ايه بصتله ونزلت كل اللي بقوله فسري كلمه واحده حسبي الله هو نعم الوكيل. معقول ده محمد اللي كنت ممكن ابيع روحي عشانه يسيبني كده ويمد ايده عليا واهله يعاملوني المعامله دي الرحمه من عندك يارب. نزلتلهم برضه لقيتهم بيتكلمو بصوت واطي واول مادخلت سكتو خالص . _قولت لحماتي انضف دول ياماما. = قالتلي اه اقعدي يا سنيوره ورينا شطارتك. انا كنت هرجع من ريحة الزفاره والفراخ استغفر الله العظيم انا اهلي مش معودني علي كده انا كنت متدلعه خالص والله.قعدت كتير انضف ففرخه واحده لقيت حماتي قربت عليا وبتزعقلي بتقولي . =هو انتي هتعمليلنا نفسك فيها ميتة ماتخلصي يابت. _ قولتلها مش ميته والله بس انا اول مره انضف فراخ احنا كنا بنوديها للراجل ينضفها . =قالتلي لاياحبيبتي انا هنا بنعمل كل حاجه بإيدينا مبنشتريش حاجه من حد حتي العيش بنخبزه هنا .لازم تعرفي حاجه زي دي عشان متقوليش حاجه زي كده هنا تاني سامعة يختي. _ قولتلها هو انا عملت لحضرتك حاجه . ليه بتعامليني بالطريقة دي. =قالتلي عشان انتي عايزة تدلعي وانا مبحبش الدلع ده. سكتت ومرضتش عليها فضلت انضف فالفراخ لحد ما ايدي وجعتني اوي وخلصت معاهم وجهزنا الغدا واتغدينا طبعا انا مكلتش مكنش ليا نفس خالص بعد الغدا قولت اطلع ارتاح لقيتها بتقولي رايحه فين ياسنيورة مفيش طلوع فوق الا بإذني _ قولتلها ازاي ياماما انا عايزه اخد شاور واريح شويه ضهري واجعني = ردت قالتلي تريحي من ايه هو انتي عملتي ايه يعني. شافت ابنها محمد جاي علينا لقيتها بتقوله. _ شايف يامحمد مراتك بتكلم معاها بالذوق بترد عليا بقلة أدب. = لسه هرد عشان اقوله والله لا ممتك بتقول كلام محصلش لقيته ض*بني قلم جامد اوي مش قادره انساه .وقالي امي دي خط احمر تحترمي نفسك معاها بدل ماتغوري من البيت ده . جريت عالحمام الطم علي وشي وادلق ميا علي وشي وعلي دماغي من الصدمة اللي انا فيها . هي دي العيشه اللي هعيشها . هي دي الجوازه اللي انا اتجوزتها قعدت ادعي علي نفسي وبعدين هديت شويه ودخلت اتوضيت وصليت الحاجه الوحيده اللي بتخليني كويسه هي الصلاة وبعدها هديت وفضلت قاعده فأوضتي. لقيتها طلعت وبتبصلي وتضحك وعنيها كلها غل عشان ابنها ض*بني. بتقولي لو مسمعتيش كلامي ابني هيروقك اصل انا يابت مخلفه راجل وسابتني وخرجت كل ده وانا مبرودش عليها خالص . نمت ساعه بالظبط وبعدها لقيت ابنها بيصحيني قومي ياايمان بصتله كده قولتله نعم في ايه. _قالي هو انا مش عريس والمفروض تدلعيني . = قولتله ابعد متلمسنيش . انت متستاهلنيش. _ قالي نعم ياروح امك ماهو لو مش بالذوق هيبقي بالعافية. وقعد معايا غصب بالعافيه مكنتش طيقاه ولاطايقه ريحته حتي .بس اعمل ايه نصيبي وقعني فعيلة زباله بالشكل ده .وبعد ماخلص ض*بني علي دراعي وقالي انتي ست نكدية وانا مبحبش الستات النكدية لو مااتعدلتيش معايا هوريكي ايام سوده فاهمه ولا مش فاهمه واللي اقولك عليه تقولي حاضر ونعم وتجيلي جري. انا الصراحة كنت خايفه منو اوي مرضتش اتكلم قولتله حاضر يامحمد عشان خفت يض*بني تاني قعدت افكر مع نفسي قولت ان انا لازم اروح ازور امي هي ست مريضه قولت اكلمها واقولها ياماما انا جايه اقعد عندك كام يوم اغير جو. _ الو ايوه ياماما وحشتيني اوي ياحبيبتي. = وانتي كمان يانور عيني عامله ايه ياايمان. _انا كويسه الحمد لله ياماما وبابا حبيبي عامل ايه.سلميلي عليه كتير لحد ماجي اشوفكم النهارده. _تيجي؟! تيجي فين انتي لسه عروسه يابنتي عيب مينفعش انتي عايزه الناس تاكل وشنا. = ياماما انا زهقانه انا مالي بالناس . _عيب يابنتي مش عايزين حد يتكلم علينا. = حاضر ياماما ان شاء الله.سلميلي علي بابا كتير _ يوصل ياحبيبتي خلي بالك من نفسك ومن جوزك. = حاضر.سلام ياست الكل. قفلت معاها وانا الدموع ماليه عينيا مش عارفه اتكلم ولا انطق .وعماله افكر اعمل ايه ياربي امي بتقولي عيب عشان انا عروسه امشي واسيب بيت جوزي دلوقتي.بس انا بقي هلم هدومي وامشي انا مش هقعدلهم هنا ممته تتحكم فيا وهو يمد ايده عليا انا لازم اروح بيت اهلي عشان متجننش. دخلت لميت نص هدومي فشنطة سفر واتسحبت من غير ماحد يشوفني وجيت امشي .لقيت حماتي بتقولي ايمااااااااااان. _ نعم ياماما. = انتي رايحه فين وواخده الشنطة دي. _رايحه اغير جو واقعد عند اهلي يومين. = انتي متعرفيش ان كده عيب وانك لسه عروسه جديده مينفعش تروحي لحد قبل السبوع بتاعك. _ لا مش عيب ولا حاجه انا مخنوقه وزهقانه. = مخنوقه من ايه .تعالي يامحمد شوف مراتك الحلوه الجميله .انت بقولها عيب تخرجي برا بيتك وهي برضه عايزه تمشي كلامها. _ لقيت محمد بيقولي هو انتي برضه مفيش فايده فيكي يابنتي احترمي نفسك شويه انا ق*فت منك.كل شويه امي تشتكي منك.قولتله انا هروح بيت أهلي لما تعرف قيمتي تعالي رجعني غير كده انا مش راجعه البيت ده.لقيت ممته بتبصله جامد.راح قايلي لو مشيتي من هنا مش هتعتبي هنا تاني وهتبقي عامله زي البيت الوقف لا منك متجوزه ولا منك متطلقه هرميكي زي الكلبه. طبعا وانا بلف ضهري وماشيه خفت جدا من كلامه لانه مجنون وممكن يض*بني او يعملي اي حاجه .وخايفه يجيلي عند اهلي يض*بني واهلي يشوفوه يجرالهم حاجه دول ناس كبيره مش حمل بهدله.وانا قولت مش هقولهم حاجه.قولتله انا هريح اعصابي يومين .قالي وانا قولت اللي عندي رحت مشيت وسبته. رحت لامي لقيتها بتقولي برضه ياايمان كده يابنتي تخلي الناس تغلطنا وتاكل وشنا اهو حماتك لسه قافله معايا وبتقولي لو بنتك مرجعتش عن اللي فدماغها خليها عندك بقي.يابنتي احنا مش بتوع مشاكل ومش اد العيله دي.لا ياماما هي تلاقيني بس هوحشها عشان كده مكنتش عيزاني امشي من هناك. انا طبعا بقول كده اي كلام وخلاص عشان ماما متحسش ان في مشاكل من اولها وتحكي لبابا ويقعدو شايلين الهم اكتر.قولت لماما ماتكلمي احلام اختي وحشتني اوي خليها تيجي تقعد معايا يومين انا زهقانه ياماما.قالتلي حاضر ياحبيبتي هقولها تجيلك. ماما كلمت احلام لقيت احلام جت بعدها بساعتين بعد ماخلصت اللي وراها فبيتها.هي برضه وراها مسئوليات ولازم كانت تغدي جوزها وولادها قبل ماتيجي.جوزها ده بجد محترم جدا واخلاق وبيصلي مش بيسيب فرض ماشاء الله عليه ومؤدب عمره ماهانها ولاغلط فيها قدام حد ربنا يحفظهولها يارب.اول ما شاف*ني حضنتني اوي وقالتلي عامله ايه ياعروسه.وحشتيني اوي.احكيلي عامله ايه فالجواز طبعا ماما كانت قاعده قولت لاختي انا مبسوطه اوي الجواز ده طلع حاجه جميله يارتني اتجوزت بدري عن كده. قولتلها ماتيجي نقعد فالاوضه يااحلام عشان انا عايزه اريح جسمي عالسرير شويه.قالتلي يلا بينا. دخلنا الاوضه انا وهي ولسه بتتكلم معايا لقتني انهارت من العياط. _ ايمان انتي كويسه مالك ياحبيبتي في ايه. = قولتلها انا هموت يااحلام بحسرتي. _ طب احكيلي بس واهدي .استني هعملك كوبايه ليمون بسرعه واجيلك. _ لا مليش نفس لاي حاجه = استني بس. _ خدي ياحبيبتي اشربي واحكيلي بهدوء. = شفتي ياأحلام الجوازه اللي كنت مستنياها شفتي اختك جرالها ايه .انا اتبهدلت واتمرمطت .محمد اللي كنت بموت فيه وكنت ممكن اديله عينيا فاي وقت ض*بني.. وممته خربالي حياتي ونزلتني فالصباحية عشان اساعدهم هي وسلفتي وانضف فراخ تخيلي! تخيلي يااحلام تاني يوم فرحي اقعد وهدومي تبقي زفره كلها من ريحة الفراخ كنت هموت وارجع مش طايقة نفسي ولا طايقه ريحتي. = وهو الحيوان ده يمد ايده عليكي ليه انا هكلمهولك هو فاكر ان عشان اهلك كبار فالسن هيركب ويدلدل ولا ايه لا ياحبيبتي اختك موجوده ماماتتش. _لا والنبي يااحلام ماتكلميهوش ولا تقوليله اي حاجه انا مش ناقصه بدل ماييجي يض*بني هنا ده مجنون مش زي جوزك خالص. = قالتلي الصراحه ياايمان كل راجل في ميزة وفي عيب اهو جوزي اللي الناس بتحبه وبتحسدني عليه ده انا مبحبوش وحساه راجل روتيني اهم حاجه ياكل ويقعد فوسط عياله وينام بس لا بيسألني مالك ولا ايه اللي مضايقك .انا بحب الراجل القوي اللي احس انه ضهر وسند. _ طيب يااختي عايزه راجل قوي مش شايفه بيحصل ايه لاختك اتقي الله شويه جوزك محترم وبيحبك متفتريش عليه عشان هو نعمه وممكن ربنا بعد الشر ياخد النعمه دي منك. قعدنا نتكلم انا وهي مع بعض لحد ماهديت شويه وقالتلي هسيبك تنامي وترتاحي وهجيلك الصبح. قولتلها ماشي ياحبيبتي. نمت وصحيت من النوم لقيت بطني بتتقطع من الوجع آه _الحقيني ياماما مغص فظيع اوي. = مالك يابنتي مالك. _ معرفش بطني وجعاني اوي. = ممكن يكون من قلة الاكل مانتي مش راضيه تاكلي. _ هقوم اعملك الفطار بسرعه قولتلها لا مش عايزه والله. قامت ماما جريت عالمطبخ عملتلي فطار وجبتلي كوبايه مياه ودوا مسكن عشان يهديني.فطرت وخدت الدوا ونمت شويه.فضلت عالحال ده اسبوع عند ماما وهي تتحايل عليا اروح وانا مش راضيه وهو مهنش عليه يتصل يراضيني.كإنه ماصدق اني اغور من البيت وطبعا ال*قربه امه مسخناه عليا ربنا ينتقم منها يارب عشان هو مكنش كده .طول ماهو معاها بيبقي وحش وواحنا لوحدينا بيبقي كويس .يعني هي السبب فكل اللي انا فيه ده والله انا عمري مهسامحها ابدا .قعدت افكر فكلام اختي ازاي جوزها بالاخلاق دي والاحترام ده وهي مبتحبهوش سبحان الله فعلا الواحد مش بيحس بقيمة الحاجه غير لما تروح منه تيجي تشوف جوزي بيعمل ايه وبقي يعاملني ازاي عشان تعرف انها فنعمة والله.وفضلت طول الاسبوع اصحي من النوم مفزوعه من المغص اللي بيجيلي وفي يوم صحيت ودخلت الحمام وحصل اللي مكنتش متوقعاه ....... عملت اختبار حمل ولقيت نفسي حامل قعدت اعيط واقول يارب ازي حامل من شخص بالوقاحه دي ده هييجي يوم عليه ويض*بني قدام بنتي او ابني اعمل ايه انا دلوقتي. طبعا هو مبيكلمنيش من ساعة من رحت لأمي.فكرت اكلمه ولا لا وفالاخر قررت اكلمه قولت يمكن يفرح ويعاملني كويس بعد كده وييجي ياخدني لكن فوجئت من رد فعله بكلمه بقوله _ الو ازيك يامحمد . = لقيته بيقولي عايزه ايه. _ قولتله ليه يامحمد المعامله دي انا مراتك حبيبتك. = قالي حبيبتي يبقي تيجي البيت تنفذي كل اللي امي هتقولك عليه وانتي ساكته غير كده معنديش حبايب فاهمه! _ انا قعدت اعيط واقوله محمد انا حامل. = نعم ياختي حامل هو انا ناقص عيال وق*ف وزن من دلوقتي احنا مش متفقين نستني شويه علي موضوع العيال ده. _ قولتله وربنا اراد هنعترض علي امر الله يعني قول الحمد لله غيرنا مش لاقي. = قالي انتي مبتحسيش انتي عيزاني اخلف واخويا بقاله 8 سنين متجوز ولسه ربنا مرزقهوش بعيال انتي عيزاني اقاطع اخويا. _ قولتله لا والله انا ماعايزه كده انا عايزه افرح بابننا او بنتنا كنت فكراك هتفرح زيي بس للأسف. = قولتي اللي عندك خلاص يلا اقفلي. _ سلام يامحمد. قفلت معاه وقعدت اعيط علي حالي حسيت احساس مش طبيعي خالص كنت حاسه اني هيغم عليا كلمت صاحبتي تيجي تلحقني وفعلا جت بسرعه عشان هي ساكنه جمب ماما علي طول قالتلي اهدي ياحبيبتي ونيمتني عالسرير وحطت ايديها علي دماغي وقعدت تقرالي قرآن لحد مانمت وصحيت لقيتها جمبي ماسكه ايدي وجهزتلي الغدا مع امي .لقيت ماما بتقولها والنبي ياسلمي شوفيها مالها انتي اقرب واحده ليها معرفش بنتي مالها.فيها حاجه ومش راضيه تتكلم. رديت قولتلها مفيش حاجه ياماما متقلقيش عليا ياحبيبتي انا كويسه الحمد لله. اكلت شويه عشان كان لازم اكل انا دلوقتي حامل ومينفعش ماأكلش لان البيبي ملهوش ذنب ورحت للدكتوره مع صاحبتي وكتبتلي علي دواء نزلت اشتريته من الصيدلية وانا فالطريق للبيت قعدت مع سلمي فمكان هادي وحكيتلها كل اللي حصل بعد ماخلصت معاها قالتلي معلش استحملي بكره يتغير انا مش عيزاكي تخربي بيتك متشمتيش حد فيكي.وفعز مانا بتكلم معاها موبايلي رن . بقول الو لقيتها حماتي بتكلمني من رقم غريب وبتقولي اللي فدماغك مش هيحصل والحمل ده ياتنزليه يااما انا هخليكي تنزليه بطريقتي انتي عايزه تولدي عشان تستولي علي كل حاجه . لسه بقولها ايه اللي حضرتك بتقوليه ده قفلت السكه فوشي. قولت لصاحبتي شوفتي ياسلمي انا بيحصل فيا ايه .ممته بتهددني دي ممكن يموتولي البيبي او يعملو اي حاجه عشان انزله .انا امي لسه معرفتش لحد دلوقتي اني حامل.قوليلي اعمل ايه ياسلمي.قالتلي اهدي انتي النهارده ونفكر مع بعض بكره .انا هجيلك الصبح بدري نفطر مع بعض وان شاء الله كل حاجه هتتحل متقلقيش ياحبيبتي .وخدتني سلمي روحتني لحد البيت وممشيتش غير لما نمت.انا بحبها اوي اكتر صديقه بتحبني وبتخاف عليا حتي بتعتبرني اكتر من اختها.قعدت ادعيلها قبل ماانام ان ربنا يصلح حالها ويرزقها بالزوج الصالح. صحيت من النوم لقيت تليفوني بيرن بقول الو... لقيت حد غريب بيكلمني بيقولي ايمان معايا قولتلو انت مين قالي انا فاعل خير مش هقولك انا مين كل اللي هقولهولك خلي بالك من نفسك العيلة اللي انتي وقعتي فيها دي مش سهله وحماتك دي خرابة بيوت وممكن تموتك فيها لو حست انك مش بتسمعي كلامها اللهم قد بلغت اللهم فاشهد.رديت قولتله انت ليه بتقولي كده انت مين اصلا.قالي بكره تعرفي انا مين خلي بالك من نفسك. قفل معايا والشك كان هيموتني ياتري ده مين ياتري ده حد بينصحني فعلا ولا واحد حماتي بعتاه يكلمني يهددني استر يارب. انا حسيت اني متوتره جدا وعلي طول قاعده مرعوبه منهم خايفه يأذوني ولايعملولي حاجه اسقط بيها البيبي.بقيت اخاف انزل من عند ماما بعد المكالمه اللي جتلي دي.لقيت سلمي بتخبط عالباب وجايه وجيبالي فطار معاها .قولتلها والله ماليش نفس قالتلي والله العظيم هزعل منك كلي عشان خاطري وعشان خاطر البيبي ملهوش ذنب فحاجه.خلصنا اكل وماما عملتلنا عصير وشربناه وحكيتلها عن اللي حصل والمكالمه اللي جتلي لقيتها بتقولي انا عندي فكره حلوه اوي.قولتلها قولي قالتلي انتي تمثلي عليهم ان البيبي نزل بعد الشر.لغاية مايصدقو وفالشهر الخامس يتفاجئو يكون الجنين ثبت فالرحم يمكن يصعب عليهم وميأذوكيش عشان خاطر الطفل ده هيبقي لحمهم ودمهم .قولتلها تفتكري هو ده الحل قالتلي ايوه طبعا هو اسمعي كلامي انتي بس. قولتلها حاضر انا اسبوع كده وهكلم محمد اقوله انا وقعت اتزحلقت والبيبي نزل هشوفه هيقولي ايه! لقيت سلمي بتقولي متنسيش ميعاد الدكتوره بكره قولتلها متخافيش هفتكر ان شاء الله .انا تعباكي معايا اوي ياسلمي.قالتلي متقوليش كده انتي اكتر من اختي .قولتلها ربنا مايحرمني منك ابدا.وتاني يوم نزلت انا وسلمي للدكتوره وماشين بنعدي الطريق لقيت عربيه جايه بسرعه اوي قومت صوتت الحقيني ياسلمي . . . هكذا كان قدري. . . . بقلم هدير سعيد. . . .