هكذا كان قدري

هكذا كان قدري البارت الثاني

جريت بسرعة اوي لقيت عربيه بتجري عشان تخبطني فيها راجل شارب مش طبيعي سلمي شدتني وزقتني بعيد لانه كان هيموتني وفي النهايه العربيه اللي بتجري عملت حادثه كبيره واتقلبت والراجل الناس ودوه المستشفي وفي حاله خطيره جدا.

اكيد حماتي هي اللي ورا الموضوع ده اكيد هي اللي بعتاه عشان يموتني او يجرالي حاجه وتخلص مني ومن البيبي.اتكلمت مع سلمي بعد ماروحتني البيت وطبعا انا من الخضه كنت مش قادره امشي تعبانه جدا.قولتلها انا لازم اروح للست دي واعرفهم ان البيبي نزل ياسلمي .هقولهم ان عربيه خبطتني وخدوني عالمستشفي جالي نزيف جامد والبيبي نزل.وربنا يسامحني بقي عالكدبه دي بس انا خايفه علي نفسي وعلي البيبي اوي لحسن يعملولنا اي حاجه.ردت عليا سلمي وقالتلي روحي ياحبيبتي ربنا يعدي الايام دي علي خير.كلمت محمد فالتليفون بقوله

_ الو ازيك يامحمد .

= عايزه ايه بتكلميني ليه هو مش انتي هتمشي ورا دماغك خليكي عند امك بقي.

_محمد انا بموت عربيه خبطتني والبيبي نزل .

= ايه ده انتي بتقولي ايه بتتكلمي بجد .

_ انت فرحان يامحمد .

= لا انا مش فرحان ولا زعلان بس حاسس احساس مش طبيعي .

_ عالعموم يامحمد هي جت من عند ربنا وانا هرجع البيت عشان مخربش بيتي بس ابوس ايدك اتغير متمدش ايدك عليا انا راجعه وقلبي م**ور معرفش هعيش عندكم ازاي بالطريقة دي .

انا مش هعرف انضف دلوقتي ولا اعمل حاجه عشان الدكتوره قالتلي اني محتاجه ارتاح كام يوم.

= تعالي بس وانا هفهم امي انك ترتاحي شويه ومتطلبش منك حاجه دلوقتي خالص .

_ سلام يامحمد .

= سلام ياقلب محمد .

للدرجادي جوزي فرحان وبقي بيدلعني كمان .للدرجادي امه مسيطره علي تفكيره بالطريقة دي .ازاي انا اتخدعت فيه كده .ازاي انا هعرف انام جمبه وانا مبقتش حاسه معاه بالأمان انا تعبانه ومخنوقة اوي ياسلمي .

طبعا سلمي صبرتني وقالتلي معلش ربنا يصلح حالك يارب ويهديهولك المهم انتي لازم دلوقتي تفكري كويس قبل ماتروحي عندهم .تفكري هتعاملي أمه ازاي والناس اللي هناك حتي هو حاولي تتجنبيه عشان هو مجنون وانتي حامل وهما ميعرفوش يمكن ربنا يهديه ويحن اما يعرف ان البيبي منزلش.انا هسيبك بقي لمي حاجتك واركبي تا**ي وروحي متركبيش مواصلات عشان شكلك مرهق اوي.

وقامت سلمي روحي وباستني ومشيت.

طلعت برا لقيت ماما وبابا بيقولولي انتي مروحه ياسلمي.

آه ياماما هروح وانتو هتوحشوني اوي.قولتلهم هبقي اجيلكم تاني قريب معلش مش هينفع اسيب جوزي اكتر من كده وسلمت عليهم ومشيت . بابا ربنا يكرمه لقيته قبل ما امشي خدني علي جمب واداني ٥٠٠ ج قالي خدي ياحبيبتي خلي دول معاكي لو نفسك فحاجه جيبيها لنفسك قولتله ربنا يخليك ليا ياحبيبي انا مش محتاجه حاجه والله.قالي خليهم بس معاكي ياحبيبتي.ومشيت وقعدت ادعي لبابا. وماما بجد من غيرهم حياتي كانت هتبقي وحشه اوي.الغريبه بقي ان احلام اختي متصلتش تطمن عليا من ساعت مامشيت ولاقالتلي عملتي ايه ولا حتي سألت رحت للدكتوره ولا لا.ركبت تا**ي ووصلني لحد عندهم هما ساكنين فبلد فالأرياف طبعا المشوار طويل الراجل مني ٢٥٠ ج دفعتهم من فلوس بابا حبيبي .اصلا محمد مش بيسبلي فلوس والفلوس بتاعتي من نقطة الفرح مكنتش هتكفيني الحمد لله كإن بابا حاسس بيا .لسه هخبط عالباب سمعت حماتي بتكلم ابنها وبيقولها افرحي ياامي خلاص دي جاية زي الكلبه علي هنا شكل اهلها مستحملوهاش وجالها نزيف وعملت حادثه وسقطت .قالتله بجد يامحمد . قالها اه والله وزمانها جايه.وقفت برا البيت مصدومة ومش مصدقه وبقول لنفسي انا هقعد مع الافاعي دول ازاي دول عايزين يمرمطوني ويبهدلوني وانا مش وش بهدله خالص اعمل ايه يارب.

خبطت عالباب وكان باين اني معيطة اوي لقيت محمد بيقولي اتفضلي وممته سلمت عليا وحضنتني وقالتلي نورتي بيتك ياعروسه.كل ده وانا مش عارفه ارد كل اللي قولتهولهم معلش انا هطلع ارتاح شويه .

لقيته طلعلي فوق بيقولي ترتاحي ايه دانا عريس ومعرفتش افرح بيكي انتي وحشتيني اوي .قولتله محمد اطلع برا من فضلك انا عايزه انام.

قالي تصدقي انتي ست نكدية غوري .وسابني ومشي .ازاي هنام مع واحد كداب وغشاش زي ده.لقيت بعدها ممته بتخبط عليا هي وسلفتي ومعاهم صينيه اكل كبيره ليا كإنهم شمتانين فيا عاملينلي فراخ وبط ومحشي جميع الانواع واكل كتير جدا .انا كنت جعانه اوي بس خفت اكل لحسن يكونو حاطينلي سم فالاكل وعملت حسابي وكنت جايبة باتيه معايا فالشنطه لحسن اقع او اموت من الجوع.بالليل لقيت محمد جيه قولتله تاكل ممتك باعته اكل لقيته قعد كل لحد ما شبع.انا كده اتطمنت يبقي الاكل سليم وانا شكي مطلعش في محله .بعد مانام قعدت كلت كتير لان الباتيه مشبعنيش لان انا حامل ومحتاجه اتغذي كويس جدا.وبعدها نمت صحيت من النوم لقيته قاعد عالسرير بيقولي انا بحبك وعايزك وانتي مش عيزاني قولتله لا طبعا بس تعبانه شويه هرتاح واعملك اللي انت عايزه. طبعا انا بمثل عليه انا مش طايقه ابص فوشه حتي بس انا بتعامل زيهم عشان محدش يأذيني فيهم .بتقي شرهم .نزلت لمامته لقيتها كالعاده عماله تتودود مع سلفتي بس لاحظت حاجه غريبه اوي .الست اللي بتنضف عندهم وبتساعدهم فشغل البيت بتبصلي نظره اني صعبانه عليها .لقيتها جت جمبي واتمشينا برا البيت عندهم وقالتلي انا عارفه انك طيبه وغلبانه ومش بتاعت مشاكل بس حماتك دي انا لو مش بحبها كنت سبتها من زمان بسبب اللي بتعملو فعيالها وفالناس ده هيقعدلها فصحتها وفولادها كمان تدين تدان .قالتلي انا بنصحك لوجه الله تعالي عشان انتي زي بناتي وصعبانه عليا خلي بالك من نفسك ياايمان.سابتني ومشيت خافت حد يشوفها ويقولها انتي واقفه معاها ليه او يشكو فحاجه . انا دلوقتي مش عارفه هعمل ايه وخايفه بطني تكبر وتبان قدامهم وخايفه ادوخ او اقع يعرفو ان انا لسه حامل انا مرعوبه منهم ومرعوبه من محمد اللي لو عرف هتبقي كارثه بالنسبالي .روحت البيت ودخلت اوضتي كلمت سلمي فالموبايل بصوت واطي احكيلها عن اللي الست قالتهولي .استغربت جدا وقالتلي كده هتعملي ايه ياايمان انتي قاعده فوسط عصابه ولا ايه.قولتلها فكري معايا عشان منرحش فداهيه قالتلي هفكر واقولك.ودخلت اتوضيت وصليت العشاء ودعيت ربنا ان ربنا يسترها عليا ويسلمني منهم.فتحت شبابيك الاوضه عشان لقيت نفسي مخنوقه جدا عايزه اشم ريحة الهوا .لقيت حماتي بتقول لسلفتي انا القولون تاعبني هقول لايمان تيجي معايا عند الدكتوره وتونسني فالطريق.اول ماسمعت كده اترعبت منها خوفت تخليني اعمل سونار وتعرف اني لسه حامل خفت اوي.قفلت الشباك بسرعه وعملت نفسي نايمه عالسرير لقيتها بتخبط عالباب افتحي ياايمان انتي قافله بالمفتاح ليه! قولتلها حاضر ياماما معلش مخدتش بالي .قالتلي عادي ولايهمك تعالي معايا عند الدكتوره تعبانه وعايزه اكشف وكلمت جوزك قالي خدي ايمان معاكي تونسك يلا مستنياكي تلبسي وتجهزي.

معرفتش ارد اقولها ايه قولتلها حاضر ياماما هلبس وانزل لحضرتك .

نزلت لقيتها مستنياني ولقيت سلفتي بتبصلي وهي متضايقه اوي ونظرتها ليا غريبه.قولتلها ماتيجي معانا قالتلي اجي معاكو فين بس انا هشطب المطبخ مكان الغدا روحو انتو.

وصلنا عند الدكتوره وحجزنا رقم واستنينا ينادو عليا .وفعلا نادو علي اسم حماتي ودخلنا للدكتوره .الدكتوره اتكلمت معاها وقالتلها اتفضلي اطلعي عشان اعملك سونار اشوف بطنك مالها فيها ايه! لقت عندها مشاكل جامده فالقولون ولازم تاخد علاج بانتظام يااما هيقلب معاها بحاجه وحشه لا قدر الله. والدكتوره قالتلها ان كل اكلها يبقي مسلوق ومش مسبك .بعدها روحنا وجبنا العلاج واحنا ماشيين ولقيت حماتي زعلانه بقولها مالك ياماما انتي متضايقه ليه حسيت انها صعبانه عليا برغم اللي بتعملو فيا بس هي ست كبيره زي امي وانا مش وحشه زيهم .

قالتلي خايفه ياايمان يكون عندي حاجه وحشه والدكتوره مش راضيه تقولي .

_ متخافيش ياماما ان شاء الله خير احنا بس ناخد العلاج باانتظام ولازم تتحركي كتير وتتمشي زي ماالدكتوره قالتلك حتي لو ساعه بس فاليوم .

= ان شاء الله كل اللي يجيبو ربنا خير.

انا معرفش هي طيبه ولا خبيثه لحد دلوقتي ورغم كل ده لسه بتصعب عليا .وصلنا البيت لقيت محمد جيه من الشغل هو شغال محاسب فشركة وبيرجع بالليل .اول ما شافنا قال ازيك ياامي عامله ايه دلوقتي ياست الكل .

_ ازيك ياحبيبي .

= مالك ياأمي حد مزعلك تكونش الحرباية اللي جمبك دي زعلتك قولي وانا هتشوفي هعملك فيها ايه .

_ يابني مفيش حاجه مراتك كويسه هي البت نطقت ولا اتكلمت ربنا يهديها .

= ولا ياخدها مش فارقه دي بت نكديه .

خلاص بقي يامحمد اهدي مفيش حاجه لكل ده .

‏انا طبعا واقفه وسامعه كل ده وساكته خالص مبنطقش بيتكلم عليا انا كده قدام البيت كله .للدرجادي انا رخيصه بالنسباله .والله العظيم لأندمه عاليوم اللي فكر يضايقني فيه او يجرح قلبي .طلعت اوضتي لقيته بيقول لممته انا خارج اشم نفسي مع اصحابي مش قاعد فوشها النكدية دي .قالتله طيب روح ياحبيبي غير جو .فكرت اكلم مين لقيت نفسي بتصل بإبراهيم ابن عمي هو شاب اكبر مني فالسن ومهندس زيي ولسه مش ماحوز بس هو راجل بيفهم واكتر واحد هيفهمني كويس .

‏_الو ازيك ياابراهيم عامل ايه .

‏= ازيك ياايمان عامله ايه ياعروسة.

‏_ عروسه !

‏= مالك ياايمان حد زعلك قوليلي.

‏_ ابراهيم انا عايزه اتكلم معاك كتير انا تعبانه اوي ومحتجالك جمبي ضروري .

‏= طب اقابلك فين .

‏_ لا مش هينفع هحكيلك فالتليفون .

‏= لو جوزك سمعك هيعملك مشكله ولا عادي.

‏_ اه طبعا هيض*بني وممكن يموتني فيها لو جيه بسرعه هقفل السكه معلش ياابراهيم انا آسفه بس اعمل ايه.

‏= تمام اهم حاجه انتي ومصلحتك قلقتيني عليكي.

‏حكيتله اللي حصل كله قالي انتي عايشه كده ازاي مع البني آدم ده .انا هفكر معاكي وان شاء الله كل حاجه هتتحل متخافيش .

‏_ربنا يخليك يا ابراهيم انت بجد طمنتني مش عارفه اشكرك ازاي.

‏= تشكريني علي ايه انتي عارفه انتي ايه بالنسبالي.

‏_ مش عارفه اقولك ايه ياابراهيم والله ربنا يصلح الحال يارب محدش عارف بكره مخبيلنا ايه.المهم انت متحكيش لأي حد حاجه بالله عليك مش عايزه حد يشمت فيا .

= حاضر والله متقلقيش هو انتي اول مره تعرفيني ولا ايه متقلقيش خالص من حاجه زي كده .روحي انتي ارتاحي وكلميني بكره نفكر مع بعض علي حل كويس ان شاء الله.

_ حاضر سلام يا ابراهيم.

= مع الف سلامه .