NAPABILING ang ulo ni Brianne nang marinig niya ang malakas na putok ng baril.
"Elise!" hintakot na sigaw niya.
Iyon ang ikinagising niya. Nanaginip na naman siya. Sinapo niya ang kaniyang dibdib dahil sa masikip na paghinga.
Nanginginig ang kaniyang buong katawan, nadala niya sa paggising ang takot buhat sa masamang panaginip.
"Elise!" naiyak na anas niya sa pangalan ng kaibigan.
Ang eksena ng kamatayan nito ang paulit-ulit na bumabalik sa mga bawat panaginip niya. Impit siyang napaiyak habang niyayakap ng mahigpit ang malambot na unan sa kaniyang tabi.
'Elise, sorry!' mapait na bulong niya sa kaniyang isip.
Napatingala siya sa salaming bintana sa ulunan kung saan gumuguhit ang mga patak ng ulan. Nakahawi ang kurtina, dahil diyan ay natatanaw niya ang kadiliman sa labas na siya
