لعنة سمكة

الجزء الحادي عشر

ولاء اتصدمت

ازاى مامتها اللي اتوفيت من ١٠ سنين واقفة قدامها..وازاي هى ام الطفل اللي لقيته

دى صدفة ولا هي بتحلم ولا بيتهيألها بقيت واقفة مذهولة ومصدومة

وفجأة الباب يتقفل في وشها وتبص حواليها متلاقيش الولد ومتلاقيش بنتها معاها تفضل تلتفت حواليها وهى بتخبط ع الباب لكن محدش بيفتح ولا حتى حد بيظهر والنور اللي كان طالع من البيت يختفى ويظهر قدامها البيت كأنه مهجور متعرفش لحد دلوقتى هى خرجت من هناك ازاي ولا ايه اللي حصل بعد كده كل اللي فاكراه انها فاقت على طريق العربيات والناس ملمومة حواليها بتفوقها ولما حكيتلهم اللي حصل وناس تطوعت انها تروح معاها عند البيت ده ملاقوش اي اثر له ولا حتى لقوا حد هناك يسألوه ومن اليوم ده وبنتها مختفية وده اللي خلاها تلجأ لشيوخ ودجالين وملقيتش حل معاهم وابتديت تدور هى بنفسها وتقرا في عالم الغيبيات والسحر والتحضير والتسخير ومن خلال معرفتها اللي اكتسبتها من الكتب والقرأة دى قدرت توصل للعالم بتاعهم اللي عرفت عن طريقه ان بنتها برغم صغر سنها الا ان عشقها امير من امراء الجن وهو اللي اخدها ووصلها ان بنتها مفيش رجوع ليها تانى لعالم الأنس لكن تقدر تشوفها في احلامها وكأنها موجودة معاها فعلا عن طريق تعاويذ وقراءات معينة ومن الوقت ده ولاء مبتعرفش تلاقي حد ممكن يتأذى عن طريق الغيبيات وعالم السحر والجن من غير ماتساعده وبتشوف بنتها في اي حالة من الحالات دى وكانت الوحيدة اللي وقفت جنب ولاء وساندتها وقدرت تهون عليها مصيبتها بعد ربنا كانت سامية اللي متخليتش يوم عنها ولا بتسيبها لوحدها يوم وبتأمنها على بناتها وتطمن عليهم مع ولاء اكتر مابتطمن عليهم وهما معاها .

فاقت ولاء من شرودها وتفكيرها في كل اللي حصلها على صوت في ودنها

امى كفاية تفكير في اللي فات انا جنبك ومعاكى في كل وقت وهساعدك تخلصي جهاد من ا****ة

هنا نزلت دموع ولاء واطمنت ان بنتها معاها وحاسة بيها وبتطمنها دايما حتى لو بهمسات صوتها

مسحت ولاء دموعها وقامت دخلت تنام وراحت في النوم

وطلع النهار وعند يوسف صحوا كلهم وفطروا سوا وطلعوا البحر

وعند سامية وولاء كمان نفس الوضع

اتقابلو ع الشاطئ وقعدت ولاء وسامية وسميرة سوا ونزل يوسف البحر والبنات نزلوا مع بعض

تناسوا البنات كل اللي حصل قبلها بيوم وهزروا و***بوا كورة الماء مع بعض وفي اثناء اللعب بعدت الكورة وهاجر بترميها وطبعا لأن جهاد بتعوم كويس دخلت هى تجيب الكورة

وهى داخله للكورة ظهر قدامها شخص على بعد منها وكأنه بيغرق عمال يطلع وينزل فضلت جهاد مركزة معاه وتقرب ناحيته ببطئ ومستغربة ازاي محدش واخد باله ان فيه حد بيغرق

ابتديت جهاد تدخل لأبعد من الكورة علشان تحاول تساعد الشخص ده وكل ماتقرب عليه يبعد اكتر لكن هى مش ملاحظة ده مش ملاحظة هى اد ايه بعدت عن البنات ولا عن الشاطئ لكن بمجرد ماظهر الشخص قدامها بوضوح ابتديت تخاف وتبص حواليها علشان تلاقي نفسها لوحدها وبعيدة جدا عن الشاطئ وعن الناس لدرجة انها مش قادرة تشوف البنات واقفين فين بالظبط بسبب البعد

سبب خوفها ان الشخص اللي بالنسبالها كان بيغرق بظهور وشه بوضوح قدام جهاد كان من غير ملامح مفيش عيون مفيش انف ولا شفايف ولا شعر ولا اي حاجة خالص تدل على ان ده وش بنى ادم او اي ملامح تدل على نوعه

ابتديت تصرخ جامد لكن مقتنعه ان محدش هيسمعها وابتدا يظهر قدامها بوضوح اكتر علشان تلاقي الكائن ده جسمه جسم انسان لكن طوله مخيف وبرغم بعدهم عن الشاطئ مسافة كبيرة جدا الا انه طويل لدرجة انها للحظة تخيلته واقف برة الشط على الرملة وكل ماتركز معاه اكتر بتكتشف ان طوله بيزيد وشايف كل البحر بالشاطئ بوضوح لكن هو مفيش في وشه عيون تشوف

ابتديت جهاد تتكلم بخوف: مين انت انا فكرتك حد بيغرق

الكائن: انا خادم من خدام ملك البحر وانتي مش مسموح ليكي بالوجود هنا

اتفاجأت جهاد بالرد برغم انه مفيش حاجة في وشه يخرج منها صوت

جهاد: يعني ايه خادم البحر ويعني ايه مش مسموح ليا

الكائن : خادم..يعنى انا بخدم ملك البحر ..ومش مسموح ليكي انك تكونى هنا

جهاد: هو البحر له ملك ..اول مرة اسمع كده

وفين ملامح وشك..وهو فين الملك..وليه انا مش مسموح ليا..اشمعنى انا اللي مش مسموح ليا

البحر مليان ناس تانية كتير..ليه انا لاء

الخادم:طبعا البحر له ملك ..وملامح وش الخادم تظهر فوق البحر من بعد المغرب ..لكن ملامحى ظاهرة طول الوقت تحت البحر ..وانتي بالذات مش مسموح ليكي بالتواجد هنا ..وده امر الملك واكيد هو عنده السبب اللي يخليني اطلع ابلغك ب اللي قولتهولك ..وده تحذير

جهاد: انا جاية البلد دى علشان البحر ..وفاضل ليا ايام قليلة وامشي ..ممكن اعرف من الملك ليه مش مسموح ليا

الكائن: هستأذنه اعرف السبب..ولو سمح ليا اقولك هبلغك..لكن لو مسمحش انصحك متنزليش البحر تانى ..وده تحذير اتمنى متستخفيش بيه

تقدرى تخرجي للشاطئ علشان لو حد دخل المسافة دى كلها مش هيعرف يخرج تانى

جهاد: طيب وهخرج ازاي

الكائن: هتعرفي تخرجي هساعدك ..لكن مش هساعد حد غيرك يدخل لحد هنا

جهاد ابتديت تعوم فعلا وتخرج للشاطئ وبرغم انها خايفة وقلقانة وزعلانه من كل اللي بيحصلها لكن احساسها ب انها هتعيش حاجات مستحيل حد يعيشها غيرها كانت مخلياها شايفة نفسها مختلفة وبرغم انها كانت بعيدة جدا عن هاجر وسهاد وشيماء لكن الغريب انهم ملاحظوش ده ولا انها اتأخرت ولا انها بعدت المسافة دى كلها وصلتلهم وهى مبتسمة ابتسامة محدش فيهم فهمها وقالتهم اهى الكورة انا جوعت هطلع اكل

جهاد مكانتش عارفة هى ليه سمعت الكلام وليه خرجت من البحر برغم انها حابة تجاذف علشان تعرف ايه اللي هيحصلها لو مسمعتش كلام الخادم

غير ان فضولها كان قوى جدا في انها تعرف شكل المملكة بتاعت ملك البحر وتعرف ايه شكل الخادم اللي من غير ملامح وتعرف ايه العالم الغريب اللي سمعت عنه لأول مرة في حياتها

لكن برغم ده كله خرجت من البحر وهي شايفة ان ده الاصح

سميرة: ايه ياحبيبتي سيبتي البنات ليه وطلعتي

في حاجة حصلت انتى كويسة طمنيني

سامية: ايييه ياسميرة كل دى اسئلة ما خرجت البنت عادى يمكن تعبت من البحر او جاعت

ابتسمت ولاء وجهاد وسميرة

سميرة: قلقت ياسامية الله مش عايزة استهون ب اي تصرف

جهاد: خلاص ياماما متقلقيش مفيش حاجة انا بس جوعت اوى وعايزة اكل في حاجة اكلها ولا اروح الشاليه اعمل ساندوتشات

ولاء: تعالى جنبي ياجوجو معايه ساندوتشات سيبك من ماما دى خوافة وكمان تلاقيها نسيت تجيبلكم اكل

ضحكو كلهم وقامت جهاد قعدت جنب ولاء اللي طبطت عليها وباستها على خدها وطلعتلها ال**ندوتشات

ولاء بصوت واطى: شكلك مبسوطة النهاردة احسن من امبارح .