لعنة سمكة

الجزء الثاني عشر

جهاد: تقريبا كده ياطنط ولاء هو حصل معاية حاجة غريبة لكن انا مش عارفة هي حقيقة ولا تهيؤات كالعادة

ولاء:طيب تحبي تحكيلي

جهاد: اه طبعا بس ممكن مش قدامهم مش عايزة حد يخاف مني ومش عايزة اخلى ماما تقلق عليا اكتر

ولاء: طيب ياسميرة هاخد جهاد ونقوم نتمشى شواية

سميرة: براحتكم ياحبيبتي بس متطولوش

اتحركت جهاد وولاء وابتديت جهاد تحكى كل اللي حصل كله ل ولاء وكانت بتسمعها ب اهتمام واستغراب هى اه تعرف كتير عن المواضيع دى لكن مقابلتش حد حصل معاه موقف زى كده في الواقع

ولاء بعد جهاد ماخلصت كلامها:بصراحة انا متفاجأة جدا من اللي بتحكيه اكيد سمعت كتير على قصص البحر وقصص عرش ابليس اللي مكانه البحر لكن متخيلتش انه حقيقي

جهاد:ايه ده ياطنط هو فعلا في حاجة اسمها كده بجد انا مش بيتهيألي

ولاء: انا مش عارفة ياجهاد بيتهيألك ولا لاء لكن اه سمعت كتير عن حكايات غريبه عن البحر

بصي قريت قبل كده ان ابليس لما اطرد لف كل مكان ع الارض لكن ملقاش لنفسه ولعشيرته مكان ينفع يسكنه غير البحر وعلشان كده اختار البحر يكون مكان للعرش بتاعه ويضم عشيرته وجنوده

حكاية سمعتها لكن اذا كانت حقيقة او لاء معرفش

حتى وانا طفلة كانت امى علطول تقولي البحر بليل مش بتاعنا مينفعش ننزل البحر بليل وكانت تحكيلي ان البحر ده ملك معرفش كانت بتحكيلي كده علشان تخوفنى ومنزلش البحر لأنها كانت بتخاف عليا ولا ده فعلا حقيقي لأن امى كانت دارسة تاريخ فكانت بتتكلم بثقة

كانت تقولي ان ايام الاغريق كان الاله الاكبر زيوس لما يغضب من الكائنات الاسطورية الخارقة

او حد منهم ينفذ امر من اوامره كان زيوس يقرر انه ينفيه في اعماق البحر ومعنى اعماق البحر انه بيكون بعيد عن الشُعب المرجانية والاسماك والكائنات البحرية اللي كان سهل نشوفها في البحر او على الشواطئ

كانت تحكيلي انهم كانو مقتنعين ان فيه سكان تانيه مش بتتشاف ولا ممكن انسان يحس بيهم او يقدر يتتبعهم غير لو امن بوجودهم وكانت الاساطير الاغريقية بتقول ان فيه سكان منتشرين في قاع البحر والمحيطات وان البحر نفسه اله اسمه بوسيدون وده حاكم عالم البحار ب كل حاجة تحتويها

وكان بوسيدون يعتبر من اقدم الالهة وده كان سبب من اسباب عظمته

وان البحر كان ملجأ للكائنات الاسطورية الخارقة بعد الحكم عليهم بالنفى

وموقفتش اساطير البحر ع الاغريق وبس لا الحضارة الفرعونية كمان كانت بتحكى عن الوهية البحر كانوا بيقولوا ان البحر اله وله سلطان وقوى خاصة وجبروت يقدر انه يرزق ويطلع خيره على اللي يختاره وكان بيثور ويطلع شره على اللي يكرهه او يكون غضبان عليه

وكانو في الوقت ده بيقولوا ان اله البحر اسمه (نون) او اله البحر وكان له خدم وحاشية وجنود

كانو بيشتغلوا على راحته وكانوا بيقدموله الهدايا والقرابين المتقدمة له من عالم البشر علشان ميثورش عليهم وي**بوا هدوئه وده كان بيحصل في يوم معين وتاريخ معين ولو محصلش ده في التاريخ المحدد له او يتأخر تقديم الهدايا ولو لمدة دقايق كان يغضب ويثور وممكن غضبه ده يوصل للاعاصير والفيضانات اللي ممكن تقضي على شعوب ووقتها بيكونوا هما اللي حكموا على نفسهم بالهلاك ده لأنهم مقدروش حجم قدرات الاله نون العظيم

جهاد: الله ياطنط ولاء مامتك كانت بتحكيلك الحاجات دى

ولاء: اه وغيرها كتير هى كانت مثقفة جدا

جهاد: ياطنط برغم انى مش عارفة ده حقيقي ولا لا لكن مجرد الحكاية نفسها شدتنى ودخلتنى في خيال وعالم مختلف خالص

ولاء: بصي ياجهاد انتى بنت مميزة لكن انا قلقانة عليكي خايفة يكون اللي انتى شرباه ده هو اللي عامل كل ده معاكى وبيخليكي تتوهمي واقولك لا عادى انزلي البحر واتبسطى ومتقلقيش وفي نفس الوقت خايفة جدا انه يكون حقيقي ونزولك للبحر يأذيكي ويضرك

بس في الحالتين عايزة اعرف ايه السبب في ان حد معين يكون مش مسموح له ينزل البحر

وهل دى حاجة ممكن تكون موجودة فعلا ولا لا

جهاد: وهتعرفي ازاي ياطنط

ولاء: اكيد هقرا ياجهاد انتى مش متخيلة كمية الكتب اللي قريتها دى فادتنى ازاي ومش قادرة اوصفلك بستمتع ازاى بالقرأة حاجة كده تخليكي في دنيا تانيه

جهاد: طيب ياطنط هو انا ممكن اللعنه اللي شربتها دى اخلص منها فعلا

ولاء: اه طبعا هنخلص منها والنهاردة وهترجعى تعيشي وقتك عادى جدا زي اي حد من غير خيالات ولا تهيؤات ولا اي حاجة تقلقك وتخوفك ولا حتى تخوف ماما عليكي

جهاد:اه ياطنط دى زعلانه جدا وخايفة وفضلت تعتذرلي كتير جدا مع انى والله مش زعلانة منها

ولاء: معلش ياجوجو هي حاسة بالذنب مش اكتر انها كانت ممكن تساعدك من البداية لو كانت صدقت كلامك لكن هى لما حكيت اللي حصل للدكتورة الكلام اللي الدكتورة قالته كان علمي مالهوش علاقة باللي احنا قولناه خالص ولا لعنات ولا مب**كة ولا سحر ولا الحاجات دى خالص

جهاد: طيب ليه ياطنط الدكاترة مبتصدقش الحاجات دى مدام هى موجودة فعلا

ولاء: لان فيه فئة من الناس عندها قناعة ب ان اي حاجة غامضة بتحصل اكيد لها سبب علمي ومفيش وجود للغيبيات والاعمال والسحر

برغم انه مذكور في القرأن الجن والحسد لكن مش بيصدقوا غير ب ان وجودهم في عالمهم مستحيل يأثر على عالمنا في شئ برغم انهم موجودين معانا في كل حياتنا وزى م فيه ناس كويسة وناس مؤذية

الجن كمان في منهم الطيب وفي منهم المؤذي لكن هما اذاهم بيبقى قوى جدا ويضر فعلا

جهاد: عمري م كنت اتخيل انى اتكلم في المواضيع دى ولا اسمع كل الحكايات دى اللي في وقت من الاوقات كنت بتعامل معاها على انها حواديت وقصص خيالية صح فيه عجايب وغرائب كتير جدا منعرفش عنها حاجة

بس ياطنط هو انتى هتخلصيني ازاي من اللعنة

ولاء: متقلقيش ياحبيبتي دى حاجة متقلقش بليل هتعرفي

بس ممكن بقى نرجعلهم احنا اتأخرنا عليهم جدا احسن ماما تفكرني خ*فتك ولا قتلتك هههه

جهاد: لا ماما مش دى طريقة تفكيرها هى اه بتخاف علينا فعلا ومش بتثق في حد كل الثقة لكن معتقدش ان تفكيرها في حضرتك ممكن يوصل لكده ابدا برغم انها اتصدمت في اقرب ناس كانت بتتعامل معاهم بقالها سنين لأنها عمرها ماتخيلت منهم كم الاذى ده لكن ماما لسه عندها نسبة قليلة من حُسن الظن حتى لو مش كتير لكن موجودة لسه شواية

ولاء: انتم طيبين جدا كلكم ماما وبابا وانتى واختك شخصيات مريحة كده في ناس تانيه ممكن من اول مرة تشوفيهم فيها تحسي بعدم راحة او قلبك يتقبض منهم وعلى فكرة سامية كمان مش بتحب تتعامل مع اي حد علشان هاجر وشيماء بتخاف عليهم جدا لكن هى مطمنه ليكم

جهاد: احنا كمان ارتحنا جدا بوجودكم ومطمنين جدا لمعرف*نا ببعض انا حبيتك اوى ياطنط