بيت النجار الجزء الثاني

الفصل الثاني

فريدة بحيرة: مالك يا خالد بقالك يومين مش مظبوط كدا...

خالد: محتار شوية في الشغل..

فريدة: خير بس.. ماله الشغل..

خالد: ايه رأيك ارجع اشتغل مع مدام عبير تاني... بتقول هتمسكني المحل كله وهبئي المدير بتاع حساباتها وهتعلي مرتبي اكيد.. علي فكرة هي عطتني مبلغ كدا المرة اللي فاتت بعد ما قطعت وصولات الأمانه...

فريدة بفرحة: بجد عطتك كام.. ها..

خالد: هي عطيتهومني عشان اكمل علاج البنت.. انتي رأيك ايه.. ارجع ولا ايه..

فريدة: خلاص بئي يا خالد الست كويسة اهي واعتذرت عن اللي حصل.. تلاقي صاحبك عماد اللي لعب في دماغها..

خالد: انتي رأيك كدا يعني.. طب ايه رايك لو سيبت شغل الحكومة خالص وفرغت وقتي ليها ولمحلاتها..

فريدة: وتسيبه ليه.. قدم علي اجازة.. افرض هي مشتك في اي وقت..نعمل ايه ساعتها..

خالد: عندك حق بردو..

فريدة: يعني الفترة الجاية هنتنقل نقله تانيه خالص.. مش كدا.. نسكن في حته انضف بئي ونجيب عربية.. وعفش جديد.. ايه رايك..

خالد بشرود : هجيبلك اللي انتي عاوزاه كله..

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

يوم الخميس المنتظر جه . .

يوم الخميس كان فرح جلال...

الحاج سلامة عمل فرح كبير جدا وعزم كل اهل الحي وكبار البلد ودبح الدبايح..

سعاد: ما بلاش نروح يا سامح.. خليني انا حتي وروح انت.. مش عاوزة اشوف الراجل ده خالص ولا احتك بيه.. انت عارف مشاكله..

سامح: انتي قلقانه كدا ليه.. هو انتي مش معاكي راجل ولا ايه.. وبعدين هو عازم اهل الحي كلهم مش احنا بس.. عاوز اشوفك باحلي فستان عندك بئي يلا...

سعاد بفرحة: حاضر.. هلبس هوا ...

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

اهل الحي كلهم راحو الفرح...

سلامة: يا ما شاء الله الفرح كبير اوي والفندق ده حلو اوي.. عقبال ما ربنا يدينا بالحلال يا ابني ونفرح بيك انت وسعاد..

سعاد: هو احنا لازم عشان نفرح .. نفرح هنا يا عم الحاج.. الفرحة فرحة القلب.. لو القلب مبسوط يفرح في اي حته.. حتي لو عملنا فرحنا علي السطوح...

سلامة: الله يفتح عليكي يا بنتي..

سامح: ايه رأيك بئي يا بابا في رزقي الحلو ده... ايه رايكو بئي نعمل فرحنا علي السطوح بجد..

سعاد : والله فكرة حلوة اوي يا ماما.. ايه رأيك..

ام عيشة: يارب افرح بيكو يا بنتي في اي حته... المهم اتطمن عليكي مع راجل يصونك ويحافظ عليكي...

ام عادل: ان شاء الله تفرحي بيهم يا حبيبتي قريب...

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

نجات: هي العروسة والعريس مالهم مكشرين كدا ليه يا اخويا...

سعيد بضحك: مش عارف يختي.. دول شوية ويقومو يض*بو بعض.. صارفين كل الصرف ده وقاعدين مكشرين.. يلا ملناش دعوه..

نجات بضحك: ايوه ملناش دعوه احنا جايين عشان البوفيه... هههههه.. عقبال ما افرح بيك يا محمود يبني واشوف عيالك حواليا...

محمود: يسمع من بوقك ربنا يا حجه..

نجات: شوف الواد متسربع علي الجواز ازاي.. طب حتي ادخل الكليه وخلص دراستك...

سعيد: ملكيش دعوة انتي.. شاور يا واد علي اللي انت عاوزها.. ولك عليا هروح اخطبهالك واجيبلك اللي انت عاوزه ... انشالله حتي ابيع هدومي..

محمود: ربنا يخليك لينا يا حاج.. سامعه الكلام الحلو يا حجه... هههههه. .

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

سلمي: الف مب**ك للاستاذ سامح يا عم خليل... مب**ك يا عروسة.. لايقين علي بعض..

سعاد: الله يبارك فيكي يا انسه سلمي.. عقبالك..

خليل: الله يبارك فيكي يا بنتي.. عقبال ما نفرح بيكي..

ام عيشة: تعالي يا بنتي اقعدي معانا.. اتفضلي..

سلمي: شكرا يا طنط... ربنا يخليكي..

سلامة: يلا يا جماعه اتفضلو البوفيه...

ثريا: اتفضلو يا حبايبي.. عقبال عندكم جميعا..

ام عادل: عقبال ما تفرحي بسلمي وسالم وتشيلي عيالهم يا حبيبتي...

ثريا: يارب يا حبيبتي... منورانا..

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

سلامة: يلا يا جلال خد عروستك واطلعو شقتكو يا ابني..

جلال: حاضر يا بابا...

اسماعيل بصوت واطي في ودن جلال: فك التكشيرة دي يبني.. امسك..

جلال: ايه ده..

اسماعيل: ده شريط برشام كااامل هدية مني لصحبي وحبيبي يوم فرحه... هيص يا عم..

جلال: تسلم يا سمعه.. جاي في وقته والله.. عقبال ما نفرح بيك..

فريال كانت واقفه متماسكة وبتمثل الفرحة...

جلال وفريال بصو لبعض بصه كلها حزن وألم وطلع شقته من غيرها لأول مرة..

جلال اول ما طلع شقته مع العروسة اللي ميعرفش اسمها حتي اخد حبايتين من اللي كان اسماعيل مديهومله...

جميلة: ايه يا جلال قاعد عندك كدا ليه.. مش تيجي تقعد معايا عشان نتعرف علي بعض.. احنا حتي مقعدناش مع بعض قبل كدا..

جلال بشده: لا انا كدا كويس خالص ومرتاح.. انتي نامي متشغليش بالك بيا..

جميله بعصبيه: ايه المعامله دي.. في حد يعامل مراته كدا ليلة فرحهم غير واحد قليل الذوق.. انت مش عارف انا بنت مين ولا اي...

جلال بغضب: هتكوني بنت مين يعني.. اهي كلها بيعة وشروة... ابويا جايبك عشان تجيبي عيال مش اكتر... وابوكي باعك عشان تجارته تكبر .. تصدقي اني معرفش اسمك لحد دلوقتي...

جميله: تصدق انك بني ادم متخلف وانا مش هقعد معاك ولا ثانيه...

هنا جلال مشافش قدامه وقام خنقها: انا متخلف ...انتي بتقولي اي.. انا فعلا متخلف عشان مخدتش مراتي وهربت م البيت ده.. انا هموتك واخلص منك..

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

ثريا: ايه الصوت ده.. يا ساتر يارب.. الحق يا حاج.. الحق..

سلامة: مالك يا وليه في اي.. سيبيهم براحتهم..

ثريا: لا يا حاج انا قلبي مش مطمن.. في خبط ورزع فوق...

جميله: الحقوني.. همووت..

جلال: مش هسيبك الا اما تموتي.. انتي السبب في كل ده..

ثريا: الحق يا حاج هيموتها ويجيب لنفسه مصيبه..

البيت كله جري علي شقتهم..

سلامة بصوت عالي: افتح يا جلال.. افتح يبني هتجيب لنفسك مصيبه..

فريال ببكاء : افتح يا جلال عشان خاطري.. سيبها تروح لحالها.. عشان خاطري ..

سالم **ر الباب ودخل لقو جلال علي الأرض وجنبه جميله مش بتتحرك...

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .