بيت النجار الجزء الثاني

الفصل الثالث

في الفيلا..

البيت كله مليان مباحث وبوليس..

اخدو جلال علي قسم الشرطة وسالم راح وراه..

سلامة كان قاعد مش قادر يتحرك من الصدمه...

ثريا ببكاء : ليه تعمل فينا كدا يا ابني بس.. ابنك راح يا حاج.. ابني البكري هيتسجن ومش هشوفه تاني. ..

سلامة بغضب: بس يا وليه بطلي كلامك السم ده . . هيطلع منها ان شاء الله. . انا هقوم ليه اكبر محامين في البلد .. وكمان هكلم ناس كبيرة تخرجه منها زي الشعرة من العجينه ..

فريال ببكاء : ليه كدا يا جلال .. ده انا مليش غيرك في الدنيا دي ..

سلامة : بس يا بوز الاخص انتي .. كله منك.. لو كنتي بتخلفي مكانش كل ده حصل .. ايه يا شيخه عملاله عمل ولا ايه.. ابعدي عننا بئي . ..

سلمي : ليه كدا يا بابا هي ذنبها ايه بس يا ناس..

جرت فريال طلعت اوضتها مع سلمي وهي بتعيط اكتر علي جلال...

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

في المحل..

خالد : سلام عليكم.. ازيك يا مدام..

عبير بفرحة : عليكم السلام ورحمة الله وبركاته.. اهلا يا خالد.. نورت مكانك اتفضل . .

خالد : تسلمي يا مدام ..

عبير : مش هتشيل التكليف بئي وتقول يا عبير علي طول .. تشرب ايه . .

خالد : اشرب قهوة بس من ايدك الحلوة دي ..

عبير : بس كدا .. من عنيا الاتنين ..

خالد : تسلم عيونك . . علي فكرة انا قدمت علي أجازة من الشغل وفرغت نفسي عشان نشتغل سوا ..

عبير : بتتكلم جد .. طب مردتش عليا في الموضوع التاني ..

خالد: موضوع ايه ..

عبير : الجواز ..

خالد : ااه .. انا موافق .. تحبي نتجوز امتي .. ايه رأيك النهاردة ..

عبير باستغراب : النهاردة .. مش هلحق اجهز نفسي واشتري فستان ..

خالد : لا احنا مش هنعمل فرح .. احنا نسافر يومين عسل سوا في اي حته تحبيها ..

عبير : خلاص موافقه .. انت قولت لمراتك؟

خالد : هقولها اكيد .. بس مش دلوقتي .. حضري نفسك هعدي عليكي بالليل ...

عبير : امسك ..

خالد : اي ده ..

عبير: مفتاح عربيتك .. هتعدي عليا من غير عربية .. وده مفتاح شقتنا .. انا جهزت كل حاجة ..

خالد : ده انتي كنتي متأكدة اني هوافق بئي ..

عبير : طبعاا.. انا واثقه في نفسي ..

خالد : ماشي يا قمر .. سلام ..

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

محمود : صباح الخير يا بابا يا حبيبي . ..

سعيد : صباح الخير يا ابني .. انت نزلت الصبح بدري ولا اي ..

محمود : اه يا بابا قولت الحق المواصلات بدري كدا قبل الزحمة ..

سعيد : ها عملت ايه بئي ..

محمود : قدمت ورقي في كلية التجارة ..

سعيد : ربنا يكرمك يا ابني ويوفقك فيها ان شاء الله ..

محمود : يارب يا بابا .. اوعي تكون لسه زعلان ..

سعيد : لا يبني الحمد لله كل اللي يكتبه ربنا خير ..

محمود : في خبر كدا مش ولابد ..

سعيد بفزع : خير.. ايه اللي حصل ..

محمود : جلال ابن الحاج سلامة قتل مراته الجديدة امبارح وخدوه علي القسم وناحية الورشة كدا مليانه مباحث ..

سعيد : لا حول ولا قوة إلا بالله العلي العظيم .. ازاي ده حصل .. ده ذنب منعم اللي رماه في السجن فدا ابنه .. كله سلف ودين يا ابني ..

محمود : ربنا يعديها علي خير والله يا حاج .. مش عارف هيستجوبو كل اللي حضرو الفرح بئي ولا هيحصل ايه ..

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

خليل : لا حول ولا قوة إلا بالله العلي العظيم .. قفلنا يا ام عادل .. محدش ليه نفس يشتغل بعد اللي حصل ده ..

ام عادل : دول اكيد اتحسدو يا اخواتي .. الناس عينيها وحشة يا حاج .. كانو عاملين فرح ولا اللي بيطلع في التلفزيون ..

خليل : لا يا حجة .. ده بسبب ان ابوه ضغط عليه يتجوز .. انا قولت له لو ابنك مش عاوز يتجوز بلاش تغصب عليه .. سيبه مرتاح مع مراته .. العيال دول رزق من عند ربنا .. وهو مش رزقه العيال .. قعد يقاوح ويغصب عليه .. وادي النتيجه .. لا حول ولا قوة إلا بالله العلي العظيم ..

ام عادل : لا حول ولا قوة إلا بالله .. ربنا يصبر أهلها .. ويصبرك يا ثريا علي اللي انتي فيه ..

خليل : هو فين سامح اومال ..

ام عادل : نزل من الصبح بدري هو وسعاد ونعمة بيقدم لهم في الكليات يا اخويا .. ربنا يستر طريقهم ..

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

سامح : تعالو اعزمكو علي حاجة حلوة بئي بمناسبة انكو قدمتو في الكليات الحمد لله ...

مش كنتو قدمتو في كلية واحدة عشان تساعدو بعض في المذاكرة ....

نعمة : لا انا حابه كلية التجارة اكتر ..

سعاد : وانا كنت بحلم ادخل الكليه اللي انت فيها وتكون الاستاذ اللي بيشرح لي ..

نعمة : احم احم .. اجيب اتنين لمون ولا اروح لوحدي احسن .. انا هروح عشان مبقاش عزول ..

سعاد : اقعدي يا بنتي .. هتروحي فين بس .. سامح لسه هيعزمنا علي حاجة حلوة ..

سامح : سيبيها تروح يا ستي .. خلينا نقعد لوحدنا شوية .. يلا مع السلامة. .. خدي بالك من الطريق ...

سعاد : كدا تمشيها لوحدها .. باباك يقول علينا ايه ..

سامح : مش هيقول حاجة .. هيفهم لوحده انك وحشتيني ومش بعرف اقعد معاكي عندنا في البيت او فوق السطوح وبعدين كنت عاوزك في موضوع كدا ..

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

عيشة : ماما .. يا مامااا ..

ام عيشة : خير يا بنتي .. في ايه .. جايه من برا بتجري كدا ليه ..

عيشة : باركيلي يا ماما .. باركيلي ..

ام عيشة : مب**ك يا بنتي .. بس علي ايه ..

عيشة : مش انا كنت مقدمة علي اعارة للتدريس برا مصر يا ماما .. اتقبلت .. ومش هتصدقي فين كمان ..

ام عيشة : فين يا بنتي ..

عيشة : في السعودية يا ماما .. ربنا كريم يا ماما .. عشان ابئي اعمل عمرة وحج ..

ام عيشة : يا ما انت كريم يارب .. مب**ك يا بنتي .. ربنا يجعل السفرية دي قدم السعد عليكي ويكتب لك الخير كله .. يا ريتني كنت معاكي .. ده انا نفسي ازور النبي عليه الصلاة والسلام ..

عيشة : طب ما انتي هتيجي معايا .. انا ليا مرافق يروح معايا غير محمد .. هتيجي معايا عشان تخدي بالك منه ونروح العمرة والحج كمان سوا .. ايه رأيك ... عشان خاطري متقوليش لأ ..

ام عيشة : ايوه يا بنتي .. بس اختك اوديها فين .. وجوزك هتسافري من غيره ..

عيشة : اختي يا ماما هتتجوز .. حتي يخدو الشقه دي يتجوزو فيها .. وعلي سيبيهولي انا هقنعه .. طالما انتي معانا هيكون متطمن .. ولو موافقش انا هتطلق منه ومش عاوزة منه اي حاجة .. المهم السفرية دي .. هي دي اللي هتحسن اوضاعنا وتأمن لمحمد مستقبله ..

ام عيشة : طيب وهو مستقبله هيكون احسن بعيد عن ابوه يعني .. فكرك كدا ..

عيشة بعصبيه : يعني انتي شايفه ان ده اب يا ماما يعني .. ده البعد عنه غنيمة ..

ام عيشة : مهما كان يا بنتي ده أبوه .. هنعمل ايه يعني .

عيشة ببكاء : الله يسامحك يا ماما .. انا كنت جايه فرحانه .. ليه تنكدي عليا بس .. انا داخله اوضتي ..

ام عيشة : لا حول ولا قوة إلا بالله العلي العظيم .. ربنا يصلح حالك يا بنتي ..

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .