بيت النجار الجزء الثاني

الفصل الرابع

سعاد : خير يا سامح .. موضوع ايه ..

سامح : بصي يا ستي .. انا دلوقتي قررت اكمل دراستي وهتعين السنة دي معيد في الجامعه ان شاء الله ... انتي عارفه مرتب المعيد بيكون عامل ازاي .. ومفيش فرصه اني اشتغل حاجة تانيه جنب شغل الجامعه عشان هيكون ورايا مذاكرة كتير .. فهماني طبعا ..

سعاد : فاهمه .. ايه المشكله في كدا ..

سامح : المشكله اني مش هعرف اوفر فلوس نأجر بيها سكن .. وانا بصراحة مش عاوز اتقل علي بابا اكتر من كدا .. وكمان موضوع الدراسة ده هيطول اكتر من كدا .. فمش معقول هنفضل معتمدين علي بابا .. فإيه رأيك لو اتجوزنا في اوضتي علي السطح والفلوس اللي تيجي من الكليه تبئي تقضي معيشتنا .. بصراحة انا كنت بفكر الأول اننا نفضل مخطوبين لحد ما تخلصي دراستك بس مع الوقت حسيت ان ده قرار غلط .. لو احنا مع بعض هيكون ده افضل لينا احنا الاتنين .. انتي ايه رايك ؟؟

سعاد ب**وف : اللي انت شايفه صح .. انا معاك فيه .. معنديش مشكله اقعد معاك في اي حته .. احنا ممكن حتي نقعد مع ماما تحت في اوضتي .. ما انا ليا اوضه لوحدي ..

سامح : بس احنا مش عارفين ظروف اختك عيشة هتتحل امتي .. وانا مقدرش اقعد معاكو وهي موجودة عشان متدايقش بردو ..

سعاد : خليها ب*روفها يا سامح .. اي حته هتكون جنه طالما احنا سوا .. متشغلش بالك بأي حاجة تانيه .. المهم نركز في دراستنا وننجح .. عشان ولادنا يكونو فخورين بينا ونعملهم مستقبل احسن من اللي كنا فيه ..

سامح بحب : ربنا يخليكي ليا يا سعاد .. مش عارف انتي كنتي فين من زمان ..

سعاد : كنت جنبك .. بس انت باين كنت شايفني لسه البنت الصغيرة ام ضفاير ..

سامح بضحك : تصدقي فعلا صورتك بالضفاير مش بتروح عن بالي ... هههههه ...

سعاد بضحك : ههههههه .. بتتريأ عليا حضرتك .. يلا بينا بئي عشان منتأخرش اكتر من كدا ...

سامح : يلا بينااا ..

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

لما وصلو الحي لاقو الدنيا مرشقه عساكر ومباحث ..

سامح : في ايه يا سيد .. ايه اللي حصل ..

سيد : ازيك يا انسه سعاد .. ازيك يا استاذ سامح .. ااه .. اصل جلال ابن الحاج سلامة قتل عروسته امبارح خنقها وبيقولو كان شارب حاجة باين .. المهم المباحث شكلها بتستجوب كل اللي كان حاضر الفرح امبارح ..

سامح : يا نهار ابيض .. دول هيستجوبو الحي كله علي كدا .. اومال ابويا فين ..

سيد : الحاج قفل الورشة وطلع البيت .. يلزم اي خدمه يا انسه سعاد ..

سعاد : متشكرة يا سيد ..

سيد : الا انتو كنتو فين سوا كدا ..

سعاد باستغراب : كنا في الكليه ..

سامح : كنا في الجامعه يا سيد .. بنقدم ورق الكليه بتاع سعاد ..

سيد : ااه مب**ك .. هو الحاج مقالكش حاجة عليا يا استاذ سامح ..

سامح : لا والله يا سيد .. اطلعي انتي يا سعاد .. ولا استني هجي معاكي .. الحي مش امان دلوقتي ...

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

فريدة : بتعمل ايه يا خالد ..

خالد : بحضر شنطتي زي ما انتي شايفه ..

فريدة : ايوه شايفه .. رايح فين يعني بالشنطة دي .. انا مبقتش فاهمالك حاجة اليومين دول ..

خالد : عندي شغل اسبوع سفر مع مدام عبير هنجيب شوية بضاعة للمحلات ما انا بقيت المدير بئي ..

فريدة : هيطلع لك مصلحة كويسة يعني في السفرية دي ..

خالد : مصلحة .. ااه طبعا .. هجيبلكو حاجات كويسه كمان وانا جاي ان شاء الله ..

فريدة : انت هتسافر فين طيب ..

خالد : مش عارف هنبدأ بايه بس هنروح اكتر من دولة .. امسكي دي مصاريفكو وانا مش موجود ... عاوزة تقعدي هنا ماشي .. عاوزة تروحي لمامتك اليومين دول العربيه تحت اهي .. اخدكو الحته اللي عاوزينها .. واعملي حسابك لما ارجع ان شاء الله هننقل في شقه تانيه جنب مامتك .. دوري علي الشقه اللي تحبيها وقوليلي ..

فريدة : انا مش مصدقه نفسي يا خالد .. كل ده من سفرية واحدة .. والعربية اللي تحت دي بتاعتك ..

خالد : مدام عبير عطيتهاني عشان الشغل .. بلف كتير طول اليوم .. مش معقول هلف علي رجلي يعني ..

فريدة : طيب عقبال ما تجهز شنطتك وتلبس هكون لبست انا والولاد عشان نروح لماما .. عشان ادور علي شقه هناك بالمرة ..

خالد : طيب يلا بسرعة ..

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

سلامة : اجمد كدا يا جلال .. هقوملك اكبر محامي في البلد كلها وهوصي عليك من فوق معارفي التقال متقلقش ..

جلال : متعملش حاجة يا بابا .. انا استاهل الاعدام .. انا مش عارف ده حصل ازاي امبارح .. مكنتش في وعيي .. هي ذنبها ايه ..

سلامة : خلاص يبني. .. هتلاقيها قالت حاجة نرفزتك ولا حاجة .. المحامي هيلاقي مخرج متقلقش .. متفتحش انت بوقك بس .. المحامي هو اللي هيتكلم ..

جلال : طيب يا بابا .. فريال عامله ايه دلوقتي ..

سلامة بغضب : سيبك من بوز الاخص دي .. لسه بتسأل عنها .. مش هي السبب في اللي احنا فيه دلوقتي .. لو كانت جابت حتة عيل مكانش كل ده حصل ..

جلال بحزن : لسه ظالمها بردو .. لو طلعت من هنا بخير هخدها ونروح اي حته تانيه .. ان شالله ننام في الشارع ونكل من الارض بس اخبيها منكو ..

سلامة : بطل الكلام الخايب ده .. انت اخرج بس وروح في الحته اللي انت عاوزها ..

سالم : شد حيلك يا جلال وخد بالك من نفسك بس .. فريال معانا وهي كويسه .. مستنياك تخرج بالسلامة ..

المحامي : عن اذنك يا حاج .. خليني اشوف شغلي بس ..

جلال : اشوفكو علي خير .. قول لفريال تسامحني يا سالم ..

سلامة : لا حول ولا قوة إلا بالله العلي العظيم ....

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

خليل : شوفت اللي حصل يا سامح يا ابني .. حد يتوقع ان ده يحصل ..

سامح : قدر ومكتوب يا حاج .. وحد الله ..

خليل : لا اله الا الله .. المفروض نعمل ايه دلوقتي يا ابني ..

سامح : ولا حاجة يا حاج .. دي قضية كبيرة .. الوحيد اللي هيعرف يتصرف هو أبوه .. يطلعه زي ما طلعنا انا وسالم ولبس فيها منعم الغلبان ..

انت بس يا حاج افتح الورشة من بكرة ان شاء الله وشغلها ولا اكن حاجة حصلت ونسأل علي الحاج من وقت للتاني .. هو لو احتاج اي حاجة هيقول علي طول ..

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

محمود : يا حاج .. يا حاج ..

خليل : ايوه يا محمود يا ابني .. خير ..

محمود : ابويا بيقولك كلم الحاج سلامة علي التليفون. .. عاوزك ضروري ..

سامح : مش قولتلك هو لما يعوزك هيتصل ..

خليل : طيب انا نازل علي طول ..

محمود : ازيك يا انسه نعمه ..

نعمة ب**وف : الحمد لله .. انت عامل ايه ..

محمود : انا كويس الحمد لله .. قدمتي في الكليه ولا لسه ..

نعمة : اه روحت قدمت النهاردة في تجارة ..

محمود : بجد .. انا كمان روحت قدمت في تجارة ..

سامح : بس مشوفتكش هناك يعني ..

محمود : ممكن عشان روحت بدري بئي .. قولت الحق المواصلات وهي فاضية ..

سامح : ااه ممكن عشان كدا .. احنا روحنا متأخر شوية .. انت عارف المشي مع البنات بئي .. ههههههههه .. يلا عشان تبئي تخد بالك من نعمة في الكليه .. سايبين راجل معاكي اهو ..

محمود : انسه نعمة في عنيا .. متقلقش عليها خالص .. انا هنزل بئي ..

سامح : استني اشرب كوباية شاي ولا حاجة ..

محمود : متشكر يا استاذ سامح .. بعد اذنك ..

سامح : اتفضل .. محترم اوي محمود .. صح ولا ايه ..

نعمة ب**وف : ااه صح ..

يتبع ،،،

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .