بيت النجار الجزء الثاني

الفصل الخامس

سامح : خير يا بابا .. في ايه ..

خليل باستغراب : الراجل ده غريب والله .. هو في ايه ولا ايه ..

سامح : ايه اللي حصل بس ..

خليل : الراجل سايب ابنه في الحبس ومتصل بيا مخصوص عشان يقولي افتح دلوقتي وجمع الرجاله وخلصو طلبية الموبيليا كلها النهاردة عشان هتتشحن علي برا الصبح ..

سامح : قولت لك يا بابا .. هو مش شايل هم ابنه .. هيعرف يطلعه منها .. كل اللي همه شغله ميقفش ...

خليل : ايوه يا ابني بس القضية كبيرة اوي .. دي قضية قتل ..

سامح : متشغلش بالك انت غير بالشغل اللي طلبه منك .. لو عاوز مني حاجة قولي اساعدك في ايه ..

خليل : لا مفيش يا ابني .. نادي علي سيد بس .. قوله يروح لعادل البيت يقوله يجمع الصبيان عشان ورانا شغل ..

سامح : حاضر يا بابا ..

خليل : سامح .. ابئي فكرني اقولك علي حاجة مهمه جدا بخصوص سيد .. بس بعدين اما اخلص الشغل اللي ورايا ده ..

سامح : حاضر يا بابا .. سلام عليكم . ...

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

خالد : يلا يا ولاد عاوزين حاجة مني قبل ما امشي .. عاوزة حاجة تانيه يا فريدة .. اي خدمة مني يا حجة قبل ما اسافر ...

ام فريدة : لا يا ابني .. ربنا يستر طريقك .. ربنا يرزقك الحلال ويكفيك شر الحرام ..

فريدة : خد بالك من نفسك ..

خالد : اللهم آمين .... حاضر .. سلام عليكم ..

ام فريدة : في واحدة تسيب جوزها يسافر مع واحدة لمدة اسبوع .. ايه الخيبة اللي انتي فيها دي .. هي الدنيا كلها فلوس وبس .. لمي بيتك وعيالك .. ما كنتو مستورين يا بنتي ..

فريدة : مستورين ايه بس يا ماما .. هي دي عيشة .. ده قالي دوري علي الشقه اللي انتي عايزاها .. وهنفرشها فرش جديد .. مش شايفه العربية اللي جايين بيها .. وبعدين هتطمع في ايه دي يعني .. هو خالد حيلته حاجة يتطمع فيها ..

ام فريدة : براحتك يا بنتي .. انا بنورك بس واللي بيشيل اربه مخرومة بتخر علي دماغه ..

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

سميحة : يا تري بعد اللي حصل مع جلال ده ابويا هيكمل المعرض ولا لأ ...

مختار : مش عارف والله .. بس مظنش لحد ما يطمن علي جلال .. ربنا يطلعه منها علي خير ..

سميحة : انا مكنتش عاوزاه يخلف و يكوش علي

شقا ابويا كله .. بس مش لدرجه انه يقتل مراته ويدخل السجن ...

مختار : ربنا يسترها عليه .. المشكله دلوقتي ان الواحد مش عارف يشتغل ايه من ساعة ما المحل اتهد .. حاسس ان مليش لازمة كدا .. هنجيب مصاريفنا ومصاريف العيال منين ..

سميحة : هي كل مشكلتك في المصاريف .. سهله دي .. هميل علي ابويا ولا امي هيدوني .. المشكله في وقف الحال ده .. علي العموم انا هكلم ابويا اشوف موضوع المعرض ماشي ولا هيقف ..

مختار : لا يا سميحة اهدي كدا مش دلوقتي .. ابوكي يقول علينا ايه .. خلينا لما يطمن علي جلال .. ولو ان الموضوع شكله مطول .. دي قتل مش زي موضوع سالم ..

سميحة : خلاص مش هفتح بوقي دلوقتي خالص ..

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

عبير بدلع : اتاخرت عليا اوي يا خالد ..

خالد : انا اتأخرت نص ساعه بس يا جميل ... اصل كنت بودي العيال عند جدتهم وخدت لك اجازة اسبوع .. ايه رأيك ..

عبير : ايه .. اسبوع بس .. ده حتي اسمه شهر عسل ..

خالد : متبقيش طماعه بئي .. لازم نرجع عشان الشغل .. وبعدين هبئي معاكي هنا علي طول .. كل يوم سوا .. اياك بس متزهقيش مني ..

عبير : انا ازهق منك .. ده انا مصدقت ..

خالد : خلاص يلا يينا .. تحبي نروح فين بئي ..

عبير : لا يا حبيبي .. مش هنروح ولا نيجي الا اما نكتب الكتاب ..

خالد : يلا اطلبي المأذون دلوقتي حالا وانا هرن علي عماد وواحد كمان ييجو يشهدو علي جوازنا ...

عبير : هوا .. الو ..

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

خليل : يا ف*ج الله .. اخيرا خلصنا ..

سيد بتعب : الشغل ده كان مفروض يخلص لسه كمان يومين .. ليه بتسربعنا كدا يا عم خليل .. ده الواحد مش قادر يخد نفسه ..

خليل : اعمل ايه يا ابني .. صاحب الشغل أمر بكدا .. قال الطلبيه هتتحمل بالليل .. صحيح هات مفاتيح الادراج كلها بتاعة الاوض عشان الحاج سلامة قالي اديها للراجل اللي جاي يحمل ..

سيد بعدم فهم : مفاتيح ادراج ايه ..

خليل : ايه يا سيد .. المفاتيح بتاعة ادراج الاوض اللي لسه مخلصينها ..

سيد : طاب ما نسيبها في الإدراج عادي .. ايه المشكله ..

خليل : احنا مالنا يا سيد .. احنا بنعمل المطلوب مننا وخلاص ..

سيد : طيب هو احنا هنقعد لحد ما الطلبية تتحمل ..

خليل : ااه اومال مين اللي هيحملها علي العربيات .. المفروض ان العربيات علي وصول .. خلينا نخلص بئي احسن الواحد مش قادر خلاص ..

سيد : هو انت قولت لاستاذ سامح علي موضوعي ولا لسه .. اصل انا سألته الصبح وباين عليه مش فاهمني ..

خليل : والله يا سيد مقولتلهوش لسه .. كل اما اجي اقوله يحصل حاجة بس متقلقش .. بكرة ان شاء الله هقوله .. الدراسة خلاص علي الابواب ..

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

المأذون : بارك الله لكما وبارك عليكما وجمع بينكما في خير ...

عماد : الف مب**ك يا نمس .. طلعت خطير يا واد يا خالد .. عقبالي ياارب ..

عبير : انت هتحسدنا ولا ايه .. يلا يا بابا كل الجاتوه وامشي ..

خالد بضحك : سيبيه يولع في نفسه كدا ...

عماد : ماااشي .. ده انا سبب السعد كلو .. مش هتعشوني طيب ولا ايه ..

خالد : لا معندناش عشا .. زق عجلك يلا ..

عبير : حق العشا هيوصلك ناشف متقلقش ..

عماد : اذا كان كدا بئي .. سلام عليكم .. انجووي . ..

خالد : يلا يا قمر حضري شنطتك ويلا بينا ..

عبير : من عنياا .. حالا اكون جاهزة ..

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

سامح : حمد لله علي سلامتك يا بابا .. ايه كل ده في الورشه ..

خليل : اه يا ابني .. شغل كتير اوي .. كان عاوز كمان يومين علي رأي الواد سيد .. يلا الحمد لله خلص علي خير وحملناه علي العربيات كمان ..

سامح : هخلي ام عادل تحضر لك العشا علي طول واشرب كوبايه الشاي المظبوط وادخل نام . ..

خليل : اه يا ابني يا ريت .. احسن جسمي م**ر خالص ..

سامح : ربنا يقويك يا بابا ..

يا مامااا حضري العشا لبابا ..

انا كنت عاوزك في موضوع كدا يا حاج .. بس انا عارف انك تعبان النهاردة فخليه لبكرة بئي ..

خليل : ده انا اللي كنت عاوزك في موضوع غاية في الاهمية والله يا سامح .. وكل اما اجي اقولك يحصل حاجة ..

سامح بقلق : خير يا بابا ..

خليل : خير يا ابني ان شاء الله .. بس هو شرحه يطول فخليها بكرة ان شاء الله يكون بالي رايق شوية ... قول انت عندك ايه ...

سامح : خليها اما تروق بئي ..

خليل : لا قول عقبال ما امك تحضر لنا العشا ...

يتبع ،،

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .