Hindi man niya inasahan ang biglaang pagkikita nilang dalawa ni Mauricio ngunit nakahanda naman siya sa planong pagtugis rito. Ngayong may pagkakataon na siyang gawin ang nais niyang mangyari sa hinayupak na iyon ay hindi na niya sasayangin pa ang bawat oras na nakalaan para rito.
Malaki ang tiwala niya kay Sandro na magagawa nito ang ipinag-uutos niyang pagdukot sa matandang si Mauricio. Sa kadahilanang isang ex-convict at dating hitman si Sandro ay alam niyang madali lang para rito ang paggawa sa bagay na iyon.
Oras na mahuli na si Mauricio, handa na siya para pahirapan ito. Gusto niyang maranasan rin nito ang naranasan niya noon. Lihim siyang napangiti. Wala nang makakapigil pa sa mga binabalak niya.
"Mr. Mauricio Lorenzo!"
Muli siyang nanumbalik sa realidad nang magising sa palakpa
