UMUWI si Travis sa Villa Cattleya dahil bored na siya sa lungsod. Missed na missed na rin niya ang kanyang Lola Ancia. Panay na rin ang sermon sa kanya ng kanyang ama dahil wala na raw nangyayari sa buhay niya. Bukod-tangi siyang anak nito na walang trabaho. Siya na raw yata ang anak nito na walang patutunguhan ang buhay.
Hindi niya kasalanan kung bored na siya sa pagtatrabaho sa isang kompanya ng kanyang ama. Natapos siya ng Computer Engineering. Ilang kompanya na ng pamilya niya ang pinasukan niya at inayawan. Kapag tinatanong siya ng kanyang ama kung bakit, sinasagot niya ritong nababagot na siya. Noong una ay pinipigilan nitong magalit sa kanya. Inisip nito na hindi pa talaga niya alam kung ano ang nais niyang gawin sa buhay niya. Inisip din marahil nito na kagaya siya ng Kuya Dudes
