APOY NG NAKARAAN

Chapter 13 ANG BINHI NG IMPERYO

Sa katahimikan ng probinsya, nagsimula ang lahat.

Gamit ang mga lupaing minana mula sa kanyang mga lolo’t lola, nagpasya si Elijah na magtayo ng isang maliit na negosyo — isang construction and real estate firm na tututok muna sa mga low-cost housing project sa kanilang bayan.

“Simulan natin sa maliliit,” wika ni Lolo Ernesto habang tinatanaw ang bakanteng lupa.

“Basta matibay ang pundasyon, lalago ito.” dagdag ni Lola Teresa, hawak ang lumang blueprint ng unang bahay na ipatatayo nila.

Si Rafael naman ang naging katuwang niya sa operasyon. Marunong ito sa legal at financial side, kaya siya ang humawak ng mga permit, kontrata, at pakikipag-ugnayan sa mga supplier.

Si Elijah, bagamat baguhan, ay likas na lider — siya ang humarap sa mga kliyente, nagdisenyo ng mga proyekto, at nagpatakbo ng marketing gamit ang social media.

"Aria Developments."

Iyon ang pangalan ng itinayong kumpanya ni Elijah. Isang pangalang mula sa salitang Latin na nangangahulugang pag-akyat.

Sa una, inakala ng mga tao na isa lamang itong maliit na kumpanya na hindi tatagal. Ngunit makalipas ang dalawang taon, nagsimulang bumungad ang mga modernong townhouse at mid-class subdivisions sa kanilang probinsya — lahat may tatak ng Aria Developments.

Unti-unti, napansin sila ng mga bangko at investors. Nagbukas sila ng branch sa karatig na lalawigan, kumuha ng mga arkitekto, engineer, at marketing specialists — karamihan ay mga kabataang tulad ni Elijah na may talento ngunit walang oportunidad noon.

At sa bawat lumalagong proyekto, sa bawat bagong gusaling tumatayo, palapit nang palapit si Elijah sa kanyang tunay na layunin.

Ngunit sa likod ng kanyang mga ngiti sa mga press conference, nananatiling lihim ang kanyang panata:

“Lahat ng ito ay paghahanda. Kapag nakarating tayo sa Maynila… doon natin sila wawasakin.”

Sa isang gabi, habang nakatayo siya sa bubong ng kanilang unang townhouse project, tinanaw ni Elijah ang mga ilaw ng bayan at malamig na hangin.

Lumapit si Rafael, tahimik din.

“Handa ka na bang sumugod sa siyudad?”

Ngumiti si Elijah, malamig at matatag.

“Hindi pa. Pero malapit na. Hindi tayo pupunta roon bilang mga baguhan… pupunta tayo bilang mga kakumpetensya.”