TAHIMIK ang buong unit pagpasok ni Kila. Ginabi na siya galing ng Tagaytay. Sa sobrang haba ng kuwentuhan nila nina Nanay Perla, hindi na niya namalayan ang oras. Hindi niya nais na mag-isip kaya ibinuhos na lang niya ang lahat ng enerhiya niya sa pamilyang matagal din niyang hindi nakita at nakasama. Doon na siya pinaghapunan ng mga ito. Kung hindi lang niya marahil binanggit na baka hinahanap na siya na kanyang asawa ay hindi pa siya hahayaang umalis ng mga ito.
Sumandal siya sa pinto at pinakiramdaman ang paligid. Hindi niya naitanong sa guwardiya kung nasa gusali na si Xander. Kahit na walang nakasinding ilaw at tahimik na tahimik ang kapaligiran, alam niyang naroon na si Xander. Alam niyang nakauwi na ito. Malakas ang pakiramdam niya pagdating dito. Alam niya kung nasa malapit lang i
