الجزء الرابع

1204 Words

سيبنا يوسف واحلام في شغلهم الجديد اللي نوعا ما حاسين فيه ب شواية امل نروح ل فكرية اللي حاسة ان روحها بتروح منها بعد ما عمتها قررت انها متنزلهاش المصنع تاني خافت انها تهرب العمة: ايه يامخفية لابسة الوش ليه مالك سحنتك جابتلنا الفقر فكرية : بقولك ايه انا مش احلام علشان تحرقي دمى واسكت طلعيني من دماغك وسيبيني في حالي العمة: لا ياروح امك خلاص بقيتي لواحدك لا اخوكى ولا اختك ولا بقولك ايه اجري يلا استخبي عند امك ياكش تخمدك مع الكلاب المرة دى هههههههه طلعت من الاوضة بنت عمة فكرية كانت فكرية مسمياهم اسماء حركية الحرباية والعقربة العمة: البت ياختي صبح ليل مخشبة خلقتها في وشنا جابتلنا الفقر وكل ده علشان خالك قالها ع الراجل اللي هتروح هههههه تخدمه بقى في واحدة تكره الخدمة ياختي فكرية: طيب ايه رأيك ياعمتى ماتبعتي واحدة من بناتك تعمل الههههه اللي بتقولي عليه ده حتى ساعتها انتى اللي هتتنغنغي لكن انا ابويا هحط اي قرش في كرشه ويرميلك بريزة ولا ريال العمة بغيظ: لا ياختي اطلعي انتي منها وهي تعمر وبتقول بالراحة ال بريزة ولا ريال ليه هسكتله انا ساعتها فكرية حسيت انها قلقت عمتها ف ضحكت بخبث وهي عندها امل تحاول من السكة دى العمة لبنتها: بقولك ايه ياحبيبتي معلش خدى البومة دى انزلي هاتيلها جلابيتين مدندشين كده لزوم الشغل بس اوعى تستغلي شوفي الحاجة المشخلعه بس تكون رخيصة اهى ارزاق بقى داهيه تاخدهم في شوطة واحدة البنت بيدلعوها يقولوا نوسة : ياما انا لا بحب اتعامل مع عيال اخوكى دول ولا بطيق اسمع صوتهم عايزانى انزل معاها اجهزهالك كمان خدت العمة نوسة من ايديها للاوضه بتاعتها: يابت ياع**طة خلينا معاهم خطوة ب خطوة الخير اللي هيعم ده هيعود عليكم هو انا لما اكبش واحط في حجرى ليا مين غيركم يتشبرق معاية نوسة: وانتي فاكرة ان بت اخوكى كانت بتكدب لما قالت اخوكى هياخد كل الفلوس في كرشه هههههه عليا النعمة ياما انتي طيبة يلا خليها تلبس انا هنزل معاها خلينا نخلص من ق*فهم في البيت جهزت نوسة وجهزت فكرية ونزلوا يشتروا الحاجة اللي العمة قالت عليها عند ابراهيم في الورشة .. الاسطى: مالك النهاردة ي ابراهيم في ايه من ساعة مادخلت متكلمتش معايه ولا اكلت ولا شربت هى عمتك ض*بتك تاني ابرهيم كأنه مصدق حد يفتح معاه كلام فتح في العياط مسكتش حاول الاسطى يهديه ويخليه يبطل عياط وفضل يطبطب عليه ويحضنه: طيب الراجل مينفعش يعيط لكن لو زعلان اوى اوى ومخنوق ممكن يحكي لاخوه او ل صاحبه ايه اللي مزعله وصاحبه هيشيل معاه الزعل والخنقة ويمكن كمان يقدر يساعده ابراهيم:بس اخويا سافر وانا معنديش غير فكرية وهى اللي عندها خنقة وانا مش عارف اساعدها الاسطى: طيب مش انا مكان اخوك وبعدين مش انت من ساعة ماجيت هنا واحنا اصحاب وبنحكي لبعض وبنتكلم سوا في كل حاجة روق كده واحكيلي وندور على حل مع بعض للخنقة اللي عند فكرية ابراهيم بدأ يهدا فعلا وابتدا يحكى كل حاجة للاسطى بتاعه اللي بيسمع ومش مستوعب ان ممكن اب او راجل عموما ممكن يسمح بحاجة زى دى على واحدة حتى لو مالهوش علاقة بيها الاسطى : طيب شوف بقى ياعم ابراهيم انت هتعمل اللي هقولك عليه بس المهم تبقى راجل كده علشان اللي لازم تعمله ده عايز حد يبقى فاهم هيقول ايه وهيعمل ايه اتفقنا ابراهيم باصص له وساكت الاسطى: جرى ايه ياض بقولك تفهم تقوم متنحلى اكبر بقى كده يلا علشان تبقى مكان اخوك يوسف وتساعد اختك ابراهيم: ماشي يااسطى قولي وانا هعمل كل اللي هتقولي عليه في الشارع ماشية فكرية ونوسة برغم ان فكرية عادية وجمالها عادى هي سمرا وعنيها ضيقة شواية وشفايفها ومناخيرها صغيرين وهي كمان كحجم قصيرة لكن كان عندها قبول مش طبيعي كل اللي يشوفها يحب يتعامل معاها كانت بالكلام بتعرف تشد اللي قدامها كانت امها علطول تقول عليها مش سهلة نوسة ماشية معاها ساكتة ومش طايقة نفسها فكرية: نوسة هو انتم بتكرهونا ليه هو انا واخواتي بنزعلكم في حاجة طول عمرنا حد فينا ضايقكم انا ساعات اقول يمكن احنا مش قرايب بس يعني مش معقول هكون انا واخواتي احنا الاربعه مش قرايبكم او مش كلنا اخوات من نفس الاب علشان كده بتكرهونا لكن انتم بتكرهونا كلنا يعني مش حد فينا ولا اتنين مننا لا ده احنا الاربعه ليه عملنالكم ايه نوسة بزهق: بصي ياستي انا لا بتاعت كُهن ولا صعبانيات انتم سبب ق*فنا وخلاص قاعدين على قلبنا طول عمركم فكرية: والله يانوسة مش كُهن هو احنا يعني اختارنا نقعد عندكم ولا احنا اللي قولنا لابونا وامنا يسيبونا نوسة: امكم ...اهي امكم دى سبب كرهنا ليكم امكم دى سبب المصايب كلها فكرية: طيب احنا مالنا ..حتى لو بتكرهوا امي ..حبونا علشان خاطر ابويا خالكم واخو امك نوسة : ماهو ابوكى اللي جابلنا العايبة ياختي ..هو انتي متعرفيش بجد امك دى عملت ايه فكرية: علشان اطلقت من ابويا يعني نوسة : لا والله واحنا مالنا ماتطلق ولا تولع انا بقى هقولك عملت ايه يمكن تحسي ليه كرهناها وكرهناكم على كرهها عند ابراهيم في الورشة الاسطى: ها ي ابراهيم فهمت هتعرف ايه حفظت اللي قولتهولك ابراهيم: اه حفظت ي اسطى هعمل كل اللي قولتهولي الاسطى : طيب بص انت دلوقتي هتسمعلى اللي انا حفظتهولك وهنكمل يومنا وقبل مانقفل هخليك تعيدلي تانى علشان اتأكد انك هتنفذه بالحرف ابراهيم: ماشي يااسطى انا جاهز وفعلا كملوا اليوم والاسطى خلى ابراهيم ياكل لأنه كان مأكلش حاجة من بليل حتى الشغل قرر انه ميشغلهوش كتير علشان مينساش اللي حفظه عند العمة في البيت قاعدة مع العقربة اللي بيدلعوها ب زوزو زوزو: بس قوليلي ياما بذمتك انتى البت فكرية واللي هيحصلها ده مش فارق معاكى العمة: لا طبعا فارق اومال انا بسايس في المعدول ابوها ليه ماهو علشان يعود علينا اومال يستنفع لواحده هو والرمم اللي بيقع عليهم زوزو: لا ياما بلاش تلفي وتدوري عليا انا اقصد مش صعبانه عليكي مش مستحرمة طيب اللي هيحصلها ده انتى عارفه انا لا بطيقها ولا بطيق اخواتها لكن بيني وبينك كده فكرت لو انا مكانها كنتى هتعملي زى مابتعملي معاها العمة: فشر بعيد الشر عنك انتي واختك بقى انا يازوزو ارضالكم كده اخص عليكي زوزو: ليه لاء ياما ماهو اخوكى اللي هو ابوها راضي على عرضه ولحمه كده وانتي اخته يعني اكيد زيه العمة: لا يازوزو انا مش زيه بس هو اللي عمل كده خلاني اكرهه وكرهت مراته ولأن دول عيالهم هيبقوا شبههم وطالعينلهم ابوهم ومراته وجعونى و**روا نفسي يابت عيشونى عمري كله بقهرتي من ساعة مادخلها علينا وهى جت بالمصايب والقهرة لما بوجع العيال واذلهم بحس ان امهم وابوهم هما اللي بيتذلوا قدامى بحس ان حقي بيرجع ساعات مع نفسي اقول هما مش حاسين بالعيال وباللي بعمله فيهم طيب ليه اذلهم وا**ر نفسهم كده لكن اول م اشوف وشهم افتكر امهم وابوهم عملوا فيا ايه زوزو: ايه ده ياما بجد بتأنبي نفسك في اللي بتعمليه فيهم والنبي مكنتش اصدق ان ده ممكن يحصل العمة: لو حسيتي بالفرحة اللي في عنيهم وانا بوطى على رجليهم ابوسها علشان ميعملوش فيا كده عمرك عارفة يعني ايه عمرك في حياتك ماهتحسي بتأنيب ولا حتى ضميرك يلومك ل ثانية يابت دى كانت تقولي في وشي قدام الجيران وقدام جوزها ياسودة انتي كعبك مشقق وشك يجيب الفقر في البيت وتضحك ويضحك جوزها وابقى واقفة قدامهم مبلولة من **رة النفس والذل جوزها اللي هو اخويا يازوزو يسمع تهزيقها ليا قدام الجيران وضحكهم عليا ويضحك معاهم عليا مع اني يابت من يوم مادخلت علينا ورحمة امى وابويا مافيش يوم ضايقتها بكلمة ..شايفة عيالها بيكونوا عاملين ازاي قدامى وانا بوجعهم واذلهم ..انا كنت ببقى كده قدامهم وبرضو مصعبتش عليهم وهونت على اخويا علشان يرضي مراته العايبة اللي اول ماشافت شوفة رميته بعياله وملقاش غيري الحيطة المايلة يرميلها عياله علشان يجيبلنا رمة تانيه بس خلاص بقى مبقاش عندى اللي اخسره .

Free reading for new users

Scan code to download app

App Store Google Play

Facebookexpand_more