صغيرة باعوني

الفصل العاشر

اختي الكبرى 

الفصل الثاني

ظليت افكر بمنار وهي خايفة تتلطخ سمعتها من ورة هذا الولد الغريب قررت اتصرف من وراها واروح اكول لامي بالي ديصير ورة ما رجعنا للبيت ما انتظرت رحت لامي وكلتلها اريد احجي وياها وبعدين كتلها على ابن جيرانا الي ديحارش بمنار بس امي ردت رد ابد ماتوقعته:

ابتسمت وكالت لي:

-بنتي لتخلين غيرتج من اخت تأثر على اخلاقج

انصدمت بكلام امي ورديت عليها:

-ماما ترة افتهمت الموضوع خطا اني ما غيرانة من منار بالع** اني خايفة عليها وما مرتاحة من روحتها لبيت الجيران وهمة عدهم ولد ديحاول يغريها

دارت امي ظهرها عليه وقالت:

-واذا جان كلامج صحيح انت شعليج عدج صغيرة متفتهمين بهاي السوالف فلتخلين خشمج بشي يخص اختج انت شمدريج يجوز هذا الولد يتقدم لاختج ويخطبها يلة هسة عندي شغل هواي اذا متريدين تساعديني روحي لغرفتج

امي ما اهتمت بكلامي وفتهمت وراها ليش منار رفضت تكللها لان جانت تعرف مراح تهتم لان متريد مشاكل وهي واثقة من بناتها مراح يسوون شئ غلط لا متربايات زين بس الي متعرفة امي او تتجاهلة ان بعض الناس ميربون اولادهم بنفس المعايير المتربايين احنة عليها.

هالمرة قررت اروح وية منار من تروح لبيت الجيران تدرس سوسن وامي اكيد اعترضت بس اني ما اهتميت وعاندت الة اروح بدلت هدومي ورحت وياها. كعدت بالغرفة الجبيرة وية منار وسوسن وبالقوت الي هنة يدرسن اني هم جبت وياية كتبي وكعدت ادرس وجانت سوسن مثل ما كالت منار بالضبط ونهائيا ما مركزة وية منار وقبل لا تخلص الساعة صاحت ام سوسن لمنار للمطبخ واني بقيت يم سوسن الي ظلت تحل مسائل انطتها الها منار وردت اروح وية منار بس ماقبلت اميمة وبنظرة كلها اصرار اقرب للامر طلبت مني اظل يم سوسن.

انتظرت منار واني كلش ضايجة لان ما كدرت اروح وياها ورجعت منار ورة 10 دقايق وجهها اصفر وخايفة وطلبت مني نروح للبيت وهي بالكوة تحجي سالتها اول ما طلعنا من بيتهم:

-شصار وياها؟

ردت عليه:

-طلبت مني ما اكول لامي عن الرسائل الي انطاها الي ابنها وحذرتني راح اندم اذا انطيت خبر لامي واذا ابنها تأذى. هاي العائلة تخوف كلش البيت من جوة اصلا ميشبه الغرفة الي كعدنا بيها حتى اثاث مابي هلكد اعتقد هذولة الناس ضامين شئ كلش خطير ويمكن اني راح اكون ضحيتهم.

كلت الها بجزع:

-كليلة لابوية هو راح يحميج منهم

باوعتلي وصبرها نافذ:

-لا عبالج ما اعرف انت كلتي لامي عن هذا الموضوع وصابتني خيبة امل لان ما حافظتي على وعدج الي وتاكدي ابوية راح يعاقبني اني بدل ما يروح للولد واهله ويحجي وياهم لان معاقبتي هواي اسهل بالنسبة اله.

سالتها:

-شلون عرفتي اني كلت لامي

ردت:

-امي كالتلي انت تغارين مني ودتألفين حجي مو زين.

كلت الها بت**يم:

-ليس ما تكولين لامي روحتج لبيت هذولة الناس ديأثر على درجاتج بالمدرسة

كالت لي وبدون اي امل وبصوت غضبان:

-نجب ونشوف بس اني متأكدة مراح يفيد لان تعرفين امي اهم شئ صورتها كدام الناس مو مهم اذا اني احتركت هذا حالها من اول يوم انولدت بي

دخلنا للبيت وجانت امي تحجي وية بيبي بالتليفون ورة شوية خلصت المكالمة وكالت النة:

-بنات بيبي راح تجينة باجر اريدجن ترتبن البيت ماريد بيبي تكول بيتنا وصخ وبناتي ما مرتبات

ورة ساعة من رجوعنا للبيت راحت منار تكول لامي وبكل اصرار متريد بعد تروح لهذولة الناس لان درجاتها بالمدرسة دتتأثر ومدتكدر تدرس مل قبل.

اني جنت اتجسس عليها وعلى امي من باب الغرفة لان ماجان كلش مسدود جان مردود جانت منار دتحجي لامي شكد صعب عليها الروحة وشكد دتتعب وشكد البنية متريد تتعلم والوقت الي دتفقدة بالروحة لهناك بدون اي فائدة امي ردت عليها وهي تتبسم:

-يمة هذولة جيرانة ولازم نساعدهم اني وعدت اميمة انت راح تظلين تروحين اليوم خابرتني وتوسلت بية حتى تبقين تدرسين سوسن وهي هواي تمدح بيج وتكول مستواها بتها كلش متحسن همة هسة ديعتمدون عليج يا بنتي لتخيبين ظنهم وظني بيج اني اعرف انت بنية ذكية وراح تدبيرها لخاطر امج.

لمحت نظرة الغضب على وجه منار وجانت تباوع لامي ماراضية ابد مع هذا اضطرت تكول:

-راح اروح لخاطر يمة بس اذا صار شئ موزين انت الي راح تتحملين المسئولية تذكري هذا زين

طلعت من الغرفة وهي تشتغل من الغضب وكالت لي:

-كتلج مراح يفيد هي هسة منتظرة خبر بتها الذكية الي انقذت هاي البنية  من الرسوب ينتشر بين الجيران وتكعد تتفاخر شكد هي ام منظمة ومرتبة امور بيتها وبانجازاتها تتكاشخ. راح اسوي الي هي تريده امري لرب العالمين

انتهى هذا النقاش وبطلنا نحجي بهذا الموضوع ومر اسبوع لاخ والامتحانات كلش قربت ومنار بعد متحجي عن زياراتها لبيت الجيران بس اني جنت الاحظ شرودها وخوفها واضح بعيونها.

جنت بين فترة وفترة ادور بغراضها عسى ولعل الكة شئ بين غراضها جديد بس مالكيت اي شئ ابد. فاتحتها بالموضوع حاولت تتملص من الجواب طلبت مني بعد ما احجي وياها بهذا الموضوع لان كلش يضوجها بس اني ما اهتميت وظليت اسألها مو بدافع الفضول لا بس  اريد اطمئن عليها واصراري جاب نتيجة فقررت تكلي شئ بسيط قالت:

-هو رجع للجامعة وبعد ما ينطيني رسائل بيد سوسن بس امة هي المصيبة

سألتها:

-امه مو المفروض تمنع ابنها يتحارش ببنات الناس

ردت منار:

-ما اعرف بس هاي المرة عبالك مو امهم لان متتصرف مثل ام تتصرف عبالك يشتغلون عدها

اشتغل عندي الفضول حتى اعرف شلون منار وصلت لهذا الاستنتاج:

-شلون يعني

ردت:

-مثلا ولا مرة سمعت سوسن تصيح الها يمة او ماما وهي كلش تخاف منها حتى مرة من المرات كلتلي لتضوجين اميمة

سألتها:

-كلتلج اميمة؟!

ردت منار:

-اي ومو بس هاي هواي شغلات الي كدرت استنتجها من زياراتي الهم الي تأكذلي هذولة الناس مو مثل ما همة يكولون اكو هواي جوة الغطا شغلات تخوف كلش.

صرخت بفضول:

-بعد شنو احجيلي

كالت منار خايفة:

-بيتهم الي مبين عليه فخم بس هو كلة نفخة جذابة واميمة مبينة مو طبيعية كل حركاتها تمثيل وتحاول تحجي بشكل مرتب وانيق بس هي بالحقيقة مو هيج اسمعهم من يحجون هي وسوسن وحدهن ما اعرف شكلج يا اختي هواي شغلات مربكة دتصير

رديت عليها:

-شوفي الاثاث شغلة عادية لان الناس تحاول تظهر بمظهر انيق كدام الناس فيهتمون بالي يظهر للناس واميمة تحب المظاهر

باوعتلي منار وصبرها نافذ وعلنت:

-اتمنى الي تكوليه صحيح وهسة كافي لغوة دخت خل نرجع ندرس لان مراح تنفعنا لا اميمة ولا غيرها اذا رسبنا

وافترقنا ندرس نتحضر لامتحاناتنا القريبة.

اليوم الورا جانت منار تعبانة وقررت امي تلغي الموعد الدراسي وية سوسن بس مرت ربع ساعه ورجعت اميمة خابرت امي كلتلها سوسن هي الي راح تي لمنار حتى تشوفها شلونها وبحجة تطمئن عليها امي رحبت اكيد بجية سوسن بطيب خاطر ومن جتى سوسن تأكدنا اني ومنار هي جاية حتى تتأكد منار صدك مريضة ومدتكذب حتى متروح لبيتهم يعني جاية تتجسس علينا ببيتنا ظلت تلف وتدور بغباء وبعدين كالت لمنار بهمس:

-لترجعين بعد لبيتنا افتهمتي؟

ظلعت وراها من الغرفة ورجعت لبيتهم واني ومنار بحيرة من الي كالته وتأكدنا هذولة الناس مو مثل ما همة يكولون بيهم شئ غريب اكيد منار متريد تروح بس شلون امي راح تقنع منار متجبرها تروح.

ورة ما طلعت سوسن حالة منار صارت اسوء واخذتها امي للطبيب ومن رجعوا جانت منار تعبانة هلكانة من كد التحاليل الي حللتها وجان بيها صخونة خفيفة وتتقئ هواي بس مابيها زكام ومابيها اي مرض من الامراض الي جان الطبيب يشك بيها فاخر شئ كللها لامي احتمال اكلت شئ ملوث وصار بيها تسمم خفيف.

--

اخيرا امي قررت منار تبقى بالبيت لحد ما صحتها تصير احسن وحتى للمدرسة ما داومت يومين وما راحت لبيت جيرانة هم بهل الاثناء ظلت اميمة تخابر اي كل يوم بحجة تمئن على صحة منار بس الحقيقة جانت تريد تتجسس وبعد ما تحملت تتجسس من بعيد لبعيد دزت سوسن مرة لخ حتى تعرف اخبار منار واذا جانت صدك مريضة لو تتحجج حتى مترجع لبيتهم.

ظلينا اني ومنار نعاين على سوسن ابد ما مرتاحين لجيتها وكدام امي ظلت تمثل الشوق لشوفة منار ورة ما امي طلعت رادت سوسن تحجي وية منار على انفراد بس اني ما قبلت اطلع فقالت سوسن:

-عدي رساله من اميمة اريد انقلها لمنار

صفنت عليها منار واشرتلي بيدها حتى اطلع فطلعت بس ما رحت بعيد ظليت اتسمع يم الباب والحوار جان هادئ والصوت ناصي كل شئ ما سمعت بس ورة ما طلعت سوسن سالت منار وشفتها مترددة تكلي شصار بس اني اصريت اعرف فكلتلي بشكل متقطع بالموضوع واستنتجت من كل الحجي الي كالته اميمة تريدها ترجع تدرس سوسن بس بفلوس فكلت الها:

-راح تكولين لامي

ردت باصرار:

-لا وانت هم واعديني متحجين شئ

واعدتها مجبورة ما احجي وهالمرة حلف*ني لان المرة القبلها خلفت الوعد.

ورة ما تحسنت صحة منار انجبرت ترجع مرة لخ لبيت اميمة تدرس سوسن وبقى اسبوع واحد على امتحاناتي النهائية وظليت عايشة بقلق على منار.

جان الها اول يوم تروح لبيت اميمة ورة ما صارت زينة راحت ساعة ستة العصر ومن راحت جانت بداخلها سر وهذا السر ما كالته لاي احد حتى الي هذا هو احساسي وقبل لا تطله كلت الها:

-تريدين اجدي وياج الح على امي واجبرها تقبل

كالت لي :

-شكرا بس ماريد مو كافي اني واكعة بهل المصيبة النوب انتي. بعدين كعدي درسي امتحاناتج مابقالها شئ

باوعتلي ولاختنا الصغيرة وطلعت جنت انتظر رجوعها للبيت بفارغ الصبر بس مارجعت ورة الساعة المقررة. امي ظلت قلقة بس ما خابرت بيت اميمة لان التأخير ما جان هواي كالت احتمال سؤال زايد سالتها سوسن وظلت تشرحة الها ونست الوقت. ساعة لخ خلصت ومنار ماكو وامي كلش زاد قلقها فخابرت اميمة دتسأل على منار.

شفت وجه امي كدامي يصفر وقالت بصوت مشوش خايف:

-شنو يعني مو يمكم؟ شوكت طلعت من يمكم. شلون يعني بوقتها اليومي؟ لا ما ردت للبيت لسا؟ راح تدزين ابنج عادل يدور عليها وين يدور عليها مستحيل تروح لاي مكان بلا متكلي عمرها ما مسويتها

امي جانت منتهية من الخوف والقلق وجانت تعيد كلام تكولة الها اميمة وهي مرعوبة وتبجي لان منار عمرها ما طلعت بلا اذن امي ولا سوت شئ بلا متسألها وعلمود هيج جانت امي خايفة لا كل التحذيرات والشكوك الي تجاهلتها وتوسلات منار ان بعد متروح هسة صارت صدك خلصت امي الاتصالوصاحت:

-راح اطلع ادور عليها بنفسي

بعدين صاحت امي علية وكالت:

-اميمة تكول منار مو بيتهم طلعت من ساعة راح اروح ادور عليها ديري بالج على اختج لحد ما ارجع

طلعت امي وراحت كبل لبيت اميمة وكفت اني يم الحايط اسمع الحوار الي ديصير بين امي وبين اميمة وقلبي يدك برعب وما احتاجيت ابذل جهد واني اسمع الحوار لان امي ظلت تصيح على اميمة بصوت عالي

كالت الها امي:

-خليني اوت ادور عليها ببيتكم هي بنتي اني اعرفها كلش زين مستحيل تروح لاي مكان بلا متكلي

كالت اميمة لامي وهي رافضة تلميحات امي:

-كلامج هذا ما مقبول ليش اضم منار لتذبين مصايب عائلتج علينا

كلام اميمة خلة امي تشتعل نار دفعت اميمة وفاتت للبيت.

من طبت امي لبيتهم غاب عني الكلام الي انحجة بداخل البيت بس اني تأكدت امي استجوبت كل الي بالبيت وبالذات سوسن عن منار بس الكل جان عدهم جواب واحد:

"منار طلعت من بيتهم علساس تجي لبيتنا وهمة ميعرفون وين راحت"

رجع ابوية للبيت وعرف وتخبل بدة يصيح على امي ولامها على الي صار وخابر عمامي حتى يساعدوا يدور على منار وصارلها مختفية خمس ساعات والليل ليل.

سال ابوية امي:

-دورتي عليها ببيت صديقاتها؟

ردت امي:

-كل صديقاتها ومدرساتها وجيرانة وطلعت ادور بالشوارع عنها دورت بكل مكان بكل مكان مالها اثر

وانهارت امي تبجي واجاني ابوية الي جان وجهه محتقن وصرخ بوجهي:

-لتجذبين علية وكليلي وين اختج؟

كلت لابوية:

-ما اعرف راحت لبيت الجيران كالعادة بدون اي تغيير

وظليت احلفله لابوية:

-بوية منار ما شردت من البيت بس اكو شئ مو زين صار بيها

باوعلي ابوية بعيونه الحمرة وقال:

-شنو قصدج؟

رديت عليه:

-منار ما جانت مرتاحة بالروحة لبيت جيرانه كالت لامي وامي ما اهتمت وجبرتها تروح اكثر من مرة منار جانت خايفة من اميمة وابنها يجوز قتلوها وخفوا جثتها

ابوية كام يرجف صدك خاف ورة الي كتله اله وقال:

-لتخافين بوية كوليلي الصدك شنو جان الي ديخوف منار؟ كالت الج؟

رديت عليه:

-ابنهم تحارش بيها اكثر من مرة وانطاها رسائل حب وبتهم سوسن اكثر من مرة خوفتها وكالت الها ما ترجع لبيتهم

ابوية ما بقى عنده شك وخوفة خلا يروح للشرطة. مرت 10 ساعات ومنار ماكو الشرطة دوروا بيت اميمة وكالت مالها علاقة باختفاء منار عمامي وجيراني كلهم دوروا ويانة بس ماجان لمنار اي اثر.

ورة يومين بدو الناس يحجون عن اختفاء منار والاشاعات بدت تنتشر وجان الكل يعرفون بموضوع رسائل عادل الها وكبر الموضوع فد مرة والكل ظل يكولون صاحبت عادل ومابقى الموضوع مقتصر على الرسائل وصار عدهم علاقة وشردت بسبب العلاقة هاي وناس تكول اتفقت وية عادل يشردون سوة وناس تكول هي ماجنت تروح تدرس سوسن لا جانت تروح علمود عادل واتضح افراد العائلة اميمة وعادل وسوسن ينشرون الاشاعات اكثر ويغذوها عن منار واكاذيب عن حياتها ويانا وان منار جانت تريد تشرد من البيت بسبب امي وتحكمها بيها.

عادل كال ع** الي قالته منار الي ونشر بين كل اصدقائه بالمنطقة ان منار انطته صورتها عارية وجانت تتحارش بي ودمر هو واميمة وسوسن سمعتنا بالمنطقة بشكل مستحيل نكدر نصلحة والبنات الي جانن يتعاركن حتى يمشن وياها ويصادقنها هسة كامن اذا يسمعن اسمها كلهن يكولن ما نعرفها وتبرن منها تماما.

منار جانت كانها فص ملح وذاب اختفت وماشفناها بعدها ابدا. ورة فترة عائلة اميمة اختفت وبيتهم ظل مهجور سنة كاملة ورة ما طلعوا من المنطقة وابوية هم قرر يعوف المنطقة لان جان ميكدر يرفع راسه ويباوع بعيون الناس لان هو هم الفكرة الوحيدة الي سيطرت عليه الفكرة الي يفكر بيها الناس بمنار وكل بباله شردت وظل يحس بالخزي والعار وماكدر يبقى بالمنطقة.

من ذاك اليوم ما شفت عائلة اميمة ولحد هذا اليوم الي شفت بي عادل وتمنيت اخنكة بايدي واموته على الي سواه بينا. اني متأكدة هو قتل اختي وش*ه سمعتها ودمر عائلتنا كلها.

جانت فاتن تسمع قصة منار وهي مشدودة ومتأثرة بالي صار بمنار واول سؤال مر بخاطرها:

-ليس تتهمي بقتل منار؟

رديت بدون تفكير:

-وشنو غير هذا مثلا صار؟

ردت فاتن وهي حزينة:

-متأسفة ذكرتج بالحادثة بس اختفاء منار لازم ميبقى لغز واجهي عادل واحجي ويا عن الي صار بذاك اليوم يجوز يكلج سر كتمة بقلبه وديعذبة كل هاي السنوات ترة تصير

رفضت بصرامة كلام فاتن:

-تخبلتي تريدين اروح للي قتل اختي واكله تعال شنو الي صار كلي اكيد مستحيل اسويها

كالت لي بهدوء:

-اني وياج لتخافين هنا ميكدرون يسوون اي شئ دولة بيها قانون واذا اقل شئ يسوي ينسجن

ماعجبتني الفكرة بس واعدت فاتن افكر بالموضوع.