Mirror, Mirror, On The Wall... (Short Story) COMPLETED

Mag-aalas-diyes ng gabi nang matapos maiayos ni Madielyn ang mga dalang gamit sa bagong kuwarto na kanyang nilipatan.  Isang bungalow house iyon na nasa loob ng isang village malapit sa kanyang pinapasukan bilang Manager ng isa sa mga sikat na fast food chain ng bansa. Pagkatapos niyang maiayos ang lahat ng gamit ay pinasadahan niya ng tingin ang kabuuan niyon. Napangiti siya sa kanyang nakikita. Nakaramdam siya ng pangangati sa katawan kaya ipinasya niyang maligo muna. Pagkatapos maligo ay nagbihis siya ng damit pantulog. Hindi pa siya makakatulog dahil basa pa ang kanyang buhok kaya kinuha niya ang cell phone na nakapatong sa kanyang bedside table at nag-log in sa kanyang f******k account. Gusto niyang mag-post roon ngunit hindi niya alam kung ano ang ipo-post niya. Nag-iisip siya nang bigla siyang napatingin sa salamin. Full-length mirror iyon na nasa isang sulok ng dingding malapit sa may bintana.  Sinipat ni Madeilyn ang salamin dahil nawe-weirduhan siya sa pagkakadikit nito sa pader kung saan nakadikit muna ito sa parang poste na gawa sa semento na sa tingin niya ay ilang buwan pa lang ginawa base sa hitsura ng semento. Ngunit pagkaraan ng ilang saglit ay binalewala na lang niya ang isiping iyon dahil baka iyon ang gustong style ng may-ari. At isa pa, iyon lang ang tanging gamit na nadatnan niya kanina nang lumipat siya roon. Kaya laking pasalamat niya at may magagamit siya. Bitbit ang cellphone, dali-dali niyang tinungo ang salamin. Humanap siya ng perpektong anggulo, at nag-selfie roon. "Perfect!" bulalas niya nang makita ang kinalabasan ng kanyang selfie. Napangiti siya habang nagta-type ng caption nito. Mirror, mirror, on the wall. #newapartment #newlife #beforeIgo2sleep #stillalone.