KUSANG tumaas ang isang kilay ni Cameron nang may dumaang hindi pamilyar na kuting sa harap niya. Nakaupo siya sa sofa sa sala at nanonood ng TV.
“Hunter,” tawag niya sa anak niya na kasalukuyang kasama si Damian. Tinuturuan nito sa assignment nito ang bata. Kasama niya itong umuwi kanina at nilambing ito ni Hunter na doon na maghapunan. Pagkatapos nilang maghapunan ay hindi hinayaan ng anak niya na makaalis kaagad ang ninong nito. May mahalagang bagay raw itong sasabihin. Dati ay nakikitulong siya sa paggawa nito ng assignment kahit na naroon si Damian, ngunit ngayon ay sinabihan siya nitong manood na lang ng teleserye sa TV. Pribado raw ang pag-uusapan ng mga ito.
“Po,” anito habang palapit sa kanya. Nakasunod dito si Damian na ngingiti-ngiti.
Itinuro niya ang kuting na kulay-puti na
