SA KUSINA dumeretso ang magkakaibigan. Kalalapag lamang sa mesa ni Jeboy ng bilaong may mga seafood nang may nagbanggit ng pangalang Sabel buhat sa labas. Sa narinig ay nag-unahan silang magbabarkada na lumapit sa pintuan upang sumilip sa labas.
Nakita nilang dumating si Sabel na kaangkas sa motorsiklong minamaneho ng asawa nito. Samantalang sa unahang bahagi naman ng motorsiklo nakasakay ang unica hija nito.
""Sabel! Sabel!"" maingay na tawag ni Maica at kumaway rito.
Bumaba naman si Sabel sa motorsiklo nang makita sila.
Si Isabelle Guzman ay isa rin sa mga kaibigan nila. Masasabi nilang si Sabel ang isa sa mga nakaluwag-luwag sa buhay. Noon pa man ay kilalang-kilala na ng mga tao si Sabel dahil palaging kinukuha itong host sa mga piyesta, beauty pageants at parties.
Hasang-hasa na
