بارت 5

2728 Words

وبشهر الثالث وورة مطلعت السنة مالت المرحوم راضي اخو فخرية صارت زفة نورية لزهير ابن ام سامي . ام سامي مرة كردية من خانقين وزهير كان ابنها الثاني والي جان ست خوات واخ صغير توها من والدته ... ومن خواته الستة كانوا اثنين متزوجات ومخلفات همين ... اول ماسووا الحنة ...وام كاطع سوت ذيج الجنة لبتها ... عزمت بيها كل جوارين المنطقة وجابن صينية الحنة ...ووزعن الدنابك وبدن يدكن ويركصن ... والتمن النسوان ووزعن كاسات الحنة والي جانت جفية يخلون بيها ملبس ومصقول وجكليت وينطون بيد كل مرة وحدة وطبعا الجهال الهم حصة الاسد .. وبوكتها الناس حسدت زهير على مااخذ من بنية حلوة وشاطرة .. وكعاداتهم كعدت نورية ويه عيالها اول سنة بيتهم جان كلش جبير ...وطابقين عمة نورية ام سامي مرة بعدها شابة وقوية ولساتها تحبل ويه بناتها ...تحب الخلفة ورجلها يشجعها ... جانت شكرة و كصيرة ناعمة وضعيفة ووجها عريض وعيونها عسلية وعلى طول تكص شعرها كصير لجتفها يعني هذا الشي مجان وارد يم النسوان بذيج الفترة ... بس هي تحب على الموديل توصي ابنها شكو مجلات تنزل للسوك يجيبلها منهن ...مثقفة ومرتبة وصاحبة عزوة ..روحها خضرة ودمعتها صعبة ... جانت هي اللي تدير البيت وعلاقتها طيبة وية كل الجيران صح ابنها سامي الجبير حاله جان حال جاسم اخو فخرية من شقاوات المنطقة بس جان ياخذ بالحق ويصيحوه بكل عركة وطلابة يدافع عن الفقرا ...وبكل مظاهرة هو مشارك ومرة من هالمرات جان راجع للبيت بنص الليل جيتوا عليه جماعة عدهم ثار وياه وكتلوه بالطريق ... الله يرحمه كثر مكان ضخم وسبع جانوا يسموه سامي البطل ...وحتى زهير من جان يحجي يتباهى باخوه المرحوم.. نورية جانت سبعة وكدرت تتعايش وية عائلة رجلها الجبيرة وصارت هي اول جنة الهم والجنة الجبيرة جانوا ياخذولها اعتبار وحتى هي ام سامي حبتها ودارتها و علاقتها زينة وياها جانو مثل مايكولون دهن ودبس ... وماكو كم شهر وصارت حامل ... بذيج الفترة بعد مافرغ بيت ام كاطع وشغله صار كله على فخرية وزهوري الا ان الاخيرة جانت حركة ماتكعد بالبيت شالت المسواك والخبز والصيدلية ... ام كاطع جان عدها هوس ويه الادوية تكوم وتكعد جيس الادوية بجيب دشاشتها .... فيومية لازم ادز البنية تروح للصيدلية ...يعني تقريبا مشوارها ثابت الا ان اول عيد جان اتفقت نورية وامها يروحون للمكبرة على ابوها ومقبلت زهوري تروح وياهم.. من الصبح كعدت صاحبتنا فخرية لبست نفنوها الوردي وبيه وردة بيضه صغيرة وسرحت شعرها وهدته وشالت قسم منه ليورة بقراصة ... وحطت صينية الگيمر وخدرت الجاي ابو الهيل وعلت صوت الراديو وعلى حسها كعدو اللي بالبيت وكاموا اتريكوا ووزع كاطع العيديات عليهم وحضروا نفسهم وراحوا بقت زهوري و فخرية بالبيت علمود رحاب مالها خلك جانت تطلع سنون متنحسة واسهال ... زهوري جانت بنية نشيطة حركة يعني...وماتعرف تكعد ابد بس عدها حالة تعيش بغير عالم وتحجي ويه نفسها يومية هي بشخصية بالبداية جانوا يضحكون عليها لانه طفلة بس هاي حالتها بقت وياها لما كبرت بذيج الصبحية جانت عايشة دور فنانة وممثلة مثل ليلى مراد ...تغني وتركص بالحوش والطرمة وتسرح بحلمها على الرغم من انه هي مو صغيرة يعني فرق العمر بينها وبين نورية سنتين بس ... لكن اللي يشوفها يكول هاي عقلها هواية اصغر حتى اهلها يعاملوها على اساس هذا الشي ... واول ما طلع كاطع واهله بلشت فخرية تغسل بهالحضاين مكومات من البارحة ... جابت طشت مي حاار وصابونة ركي وتفرك بيهن وزهوري تشطفهن وتشر وهي تركص وتغني ماكو اغنية محافظتها وماكو فلم مال سينما ينزل اذا ماتروحله ... ورة ماخلصو شغل تقريب بالعشرة ...ظلت زهورة تلح على فخرية يطلعون يفترون بالامانة اببغداد ويشوفون العيد وهوسة العالم برة الامانة قبل جانت مرقمة والها مكان محدد من منطقة معينة للكراج فقررو يروحون للكاظم وبعدين من الكراج يرجعون للبيت ... كون مايتاخرون حتى كاطع لايحس بيهم ويسويلهم مشكلة وصدك والله سوون جيس لفات واخذن حضاين زايدة لرحاب اللي جانت توها تمشي هاي الصغيرة اتاخرت هم بالمشي هم بالحجي ... وصدك بدلوا وديطلعون وهالمرة زهوري لبست عباية بعد اخوها كاطع مايقبل تطلع بلياها ...وفخرية تضحك عليها تكلها والله وحكمج اخوج بالعباية طالعة جنج عودة مال مطيرجية وذيج تضحك وتفر بالعباية وتفتر بيها بنص الحوش ... يله عينى ست ليلى مراد خلص الفلم خلي نلحك نروح ونرجع قبل الظهرية وشيلن غراضجن وطلعن ... والطريق كله يشوفون الجهال لابسين هدوم العيد وفرحانين يلعبون بهالدرابين الضيكة... يمشن ويعايدن بالناس وبالجيران والمواعين تتراكض من بيت لبيت اليوم شطابخين يوزعون لجارهم ... وصدك صعدوا بالامانه ومثل عادتهن كعدن بالطابق الفوك .. اول ماصعدن فتحن جيس اللفات وبدن ياكلن ويباوعن من الشباك جانت هوسة والناس طالعة تعيد ...المراجيح انصبت واهل العرباين مال الحصونة يملون العرباين جهال ويفروهم ...بذاك الوكت الناس صدك جانت تحس عيد ...كلها تلبس جديد حتى الفقير يروح يشتري من البالات ويلبس جهاله ...العيد الجبير جان باول ايام شهر خمسة يعني والجو بدى يحتر بس الواحد من الونسة والهوسة مايحس حتى الامانة جانت مقبطة والجعال يلعبون بيها صاعدين نازلين ...ازدحامات بكل مكان ومحد بحال احد شيلبس شيسوي شياكل ... ورحاب همين تلعب على واهسهم تروح ورة الجهال وزهوري تركض تجيبها وبدت السوالف جانت فخرية تتمنى تروح تزور اهلها بس تخاف يوصل خبر لكاطع راحت من وراه وهي كوة يخليها مرة بالشهر تروح ...جانت تصفن وتسال زهوري هسه بدرية وامي شديسوون ... ماتعرف هاي المرة المسكينة تشيل قهر شنو وشنو ...من جهة اهلها ومن جهة من حبلت نورية كل العيون صارت عليها حتى تحبل هي هم بس شتسوي قسمتها بعد ماديصير عدها حمل... فاندارت على زهورة وبدت تحجي وياها ... لج زهوري شسمها الدكتورة الي تروحلها نورية وحبلت على ايدها ... ام نجم !..جاووبتها زهورة وهي تعض بلفتها شكد فطيرة ام نجم شنو دااكلج دكتورة مو ام الخيرة فهي كملت اخر قطعة باللفة بلكمة وحدة مو كتلج ام نجم هي مراحت لدكتورة راحت لام الخيرة شبيج انت يااا ولج يا ام الخيرة اشو مكتيلي ! فخورة انت ولا مرةسالتيني ...وين تروحين وية نورية يا لعد ليش متاخذيني ! زين عود هاي شسوتلها بله والله مااعرف سمعت امي تكللها اوديج يم ام نجم ...سالي امي تعرف ... لج اخاف هاي ام الفنجان شسوي بيها اريد دكتورة تسويلي حمل ... صفنت فخرية مابقت وحدة مرحت عليها ...كلهم يكولون مابيج شي لعد ليش مااحبل! وبعدها ممكملة حجايته جرت زهورة العلاكة واخذت لفة لخ فضحكت عليها فخرية كالتلها اللي يشوفج هيجي معصعصة مايكول هاي هيجي تاكل ...لج جوزي من الفرفرة بين البيوت لمي روحج خلي تصير بيج لحمة متو ياخذج وانت جنج عودة هههه شسوي بالزواج بعدني صغيرة ...عود انت لميهن ...ترة كاطع مايحب الضعيفة وديدور على مربربة وانت شمدريج ياحوبة يكول لامي شوفيلي وحدة ...جنه هم رجع على سالفته القديمة يريد يتزوج بحجة ولد ! اي غير امج اتعلمه بله هي ترضاها هسه زهير يزوج على نورية ! منين ياحظي اجيب الولد ولج زهورة اخاف هذا صدك يتزوج عليه لعد شلون يكول اني كوة معيشكم اتزوج منين اجيب فلوس فجاوبتها زهورة ليش هو كوة معيشنا؛ ....والله مااعرف ... وظلن يسولفن الى نص الظهرية رجعن للبيت سوون غدا على السريع وماحجن لاحد واتفقن اذا ول خبر لاخوها تكول ودينا رحاب للصيدلية ... بس بيومها فخرية ظل ابالها رجلها حيتزوج عليها ... وهم جديد انضاف الها .... ومن يومها هي اتغيرت صارت اكثر توادده وتعتني بنفسه ... الى في يوم بشهر تموز جانت عصرية كاطع كاتلة الحر كاعد على الكرويتة وضايج ويفر براسه يمنا يسرى ماله خلك كلشي يسوي كوم لم شكو فلوس منا ومناك مجمعهن حطهن بجيبك وروح لمحل صاحبه ماجد ابو الراديونات اللي جان جايب تلفزيون اسود وابيض جديد توه مصارله كم يوم ومثل ماتعرفون كاطع صاحب كيف واهم شي ونستته اللي جان لامهن طلع بيها حك التلفزيون واكثر ...عود هو وكتها بدى يلم فلوسه مفكر يشيل يطلع من هذا البيت يروح يكعد بغير مكان ورة فضيحة ام الكيمر اللي ضوجته ... ووالله واشترى التلفزيون وجابه قله من جان عدهم تلفزيون ... يعني بالشارع كله بيت بيتين وبشكل عام بس الزناكين والموظفين يكدرون يشتروه ... ومن جابه وديمشي بالشارع لمحته فخرية من باب الحوش من بعيد وهي تجر رحاب حتى لاتطلع برة ... صفنت عليه اتاريه متغير جنه مو كاطع ايام زمان كرشة كبرانه ونازله ليجوه وشواربه ثخنانه وعيونه معجزة وخشمه جبيرجنه كوة يسحب نفس من يمشي وشعره طولان انوبة كلما ديسمن يزيد العرج مالته .... يجر بروحه جر والله محد ماهرمه غير هالشرب هذا الا كل يوم يشرب هماتين لو بالاسبوع مرة هم ميخالف عاد وكلشي ولاليلة الخميس السهر مالته للصبح على ام كلثوم هزت راسها واتعوذت بالله من هالتفكير ... بس شو انتبهت عليه هذا مو كلش حلو جان قبل احسن لو اني ماجنت اعرف ... طبت جوة لكبتها ورة مصاح على امه أصدقائه حيجون يمه ينصبوله التلفزيون ومن سمعوا الجوارين هم بدوا يلتمون ببيتهم ... صفنت فخرية على نفسها بنص المرايا الم**ورة على الحايط جانت كلش حلوة توها كبرانه وبالعشرينات ... الجمال اللي شايلته يحلم واحد غير كاطع يحصل منه هيجي ظلت تحجي ويه روحها يعني جي ماخلف وشنو يعني مو جبتله بنية لعد ليش فلان مرته موحلوة وهم عاكر شايلها بالصلاوات ! لو جي ماعندي اهل وظهري م**ور اي لانه مااكدر احجي ... وكطعت سلسلة افكارها ام كاطع تصيحها تجي تعاونها ... وصينية تركض ورة صينية ساعة جاي ساعة ركي ...ساعة ميوة الا ان صار نص الليل وانطفت الاذاعة وكلمن رجع لبيته ... بالبداية نسوان البيت ضاجن من هالحالة الخطار والهوسة يوميه وصارت كل عصرية صدقانه يجون يمه على التلفزيون... بعدين كالن هم احسن على اقلها بالبيت مايطلع برة ونخلص من مشاكل اللي ديصير بالشوارع هالايام ... وراها بكم يوم جان كاطع ماموجودراح بشغلة والتلفزيون مشتغل طلع المذيع يحجي وفاتت فخرية من كدامه وجانت تعيط عليها عمتها ... ولج ماتستحين تفوتين كدام الرجال شيكول علينه مرة ابو رحاب تفتر كدامي بلا شيلة فوتي جوة ليما يجي كاطع ويطفيه لو لبسي شيله او عباية ... فجاوبتها فخرية لا عمة سالت كاطع ويكول الرجال مايشوفنا بس احنى نشوفه اكو شي هاي الشاشة شايفتها هاي هيجي تخلي مايشوف بس احنه نعاين عليه فذيج ممصدكة الحجي تكله شلون بله مايشوفنا مو هياته ديحجي لعمد المن يحجي هو ! وزهوره واكفة تضحك عليهم ... لج تضحكين ادبسز شيكول عليج مامترباية فجاوبتها الاخيرة كالتلها يمه هذا مثل السينما احنى نشوفه بس هو مايشوفنا ... بس بقت ام كاطع ماامصدكة كالت يا لا هسه سبيته مايزعل! عاد هنا زهوري طكتها بضحكة كالتلها تريدن اغمه ها اها شوفي ...وظلت تغم بيدها على الشاشة عاد فزت امها من يمها مندهشه تشوف زهورة تغم بيه وهو عادي مكمل كلامه فصارت عصبية عليهن لعد غير تحجن تكولن صارلي يومين حابسة روحي مااطلع من هذا الملعون يحجي ! هههههه ضحكت زهورة ولفت عبايتها وطلعت على جيرانهم اللي بصفهم ...وامها تسب وتحجي عليها ترجع بسرعة قبل مايرجع اخوها ... وبشهر العاشر تحديدا نهاية الشهر يوم اربعة وعشرين اجى ليلتها كاطع حزين ومقهور ... ويض*ب جف على حف تراكضن النسوان ياعمي شبيك! كال ناظم الغزالي مات ...! جان هو كلش يحبه ويسمع اغانيه ومن تطلع اغنية جديدة يظلون يعيدون بيها وحتى يكعد هو يدندن ويه روحي ... امه هم ضاجت على ضوجته كالت هو الموت لاحكنا ياها الشباب اليومية تتكتل ياهذا الرجال هم راح ... بوكتها عبد السلام عارف هو اللي بدى يحكم وهم حكمه ماسلم من الاضطرابات والمشاكل...... بقت المظاهرات وزادت الاعتقالات واول بداية سنة اربعة وستين ولدت نورية ولد ... وشلون ولد ماشا الله عليه ...سموه سامي على اسم المرحوم اخو رجلها ومنو يكدر بعد يحجي ويه نورية الناس كلها فرحتلها بس خطية فخرية ظلت مقهورة انوب عمتها تكوم وتكعد جيبيلنا ولد ... حظ ام سامي يصيرلها ولد واني لا! وتوه طلع الاربعين عزلت نورية وطلعت ابيت وحدها عمتها ماحجت شي ...لانه اجرت بيت قريب عليهم وزهير رجلها بدى يترفع وزاد راتبه وجان يحب مرته حييل ويدللها ليش لا نورية هم جانت تستاهل بس هم مو هينة عرفت على صغر عمرها شلون اتخلي رجلها يسمع كلمتها وتصاحب غمتها و اول ماطلعت بقت ادز من راتب رجلها لعمتها حتى لاتغير رأيها وترجع تكللها كعدي ويانه صح بيتها جان صغير وعتيك بس اسمه عزلت ماكو هيجي كامت تتفاخر وتتباهى بين النسوان وكامن يسمونها من المسعدات يعني مو كل وحدة يوكعلها هذا الشي ... وظلت فخرية تدور وتسال على طريقة تصير بيها حامل بلكت زوجها يكعد ويسكت ويبطل من هاي الحجاية مال اتزوج عليج ... انوب كامت تعرف درب امهات الخيرة يومية بحجة اجيب دوا لرحاب لو اروح اجيب قماش من السوك كامت تركض عليهن تاخذ خيرة تشوف رجلها يتزوج عليها لو لا! يصير بعد عدها خلفة ليش ماتحبل اكو عمل عليها ويومية جايبة حجاب ومعلكته بدشداشتها هاي مال الرزق وهاي مال الخلفة وهاي مال محبة وغيرها كامت فلوسها الي تشتغل الليل كله تذبه على هذني السوالف الي مرت لاسنة ولاسنتين بدون جارة ... اما اهلها بقوا على نفس حطتهم عود جاسم كام يشتغل بالعلوة وها كام يذب للبيت هالجم فلس زايد و اخوها علاء وكف بعينه انه مايبطل بدرية وتكمل دراستها والبنية ماشا الله عليها جانت شاطرة والمدرسات كلهم يحبوها ... ورة سنة لخ نورية هم حملت وهالمرة عمتها ام سامي هم حملت والاثنين بسنة خمسة وستين ولدن ولد ام سامي العمة سمته فرات ونورية ولد ت نزار ... عاد هنا صارت فخرية مكروه من عمتها ورجلها وكام يصر ودك رجل خلاص الا يزوج عليها ... وصدك ماكو ورة شهرين فاتح امه على بت واحد تاجر معروف وياه بالسوك ... جان يشوفها مرتين تلاثة تجي ويه امها على ابوها هاي هم كيفت كالت ليش لا منو مايقبل بيك شعايزك شناقصك اشو تلعب بالفلوس لعب ... وشاب بعدك صغير وتكدر تفتح بدال البيت بيتين ... والبنية هم بت مدرسة ومثقفين ... هذا الحجي كله بالحوش وفخرية بغرفتها تسمع وتبجي ...ماتكدر تفتح حلكها كل حجاية اطلكج اخذي بتج وروحي خلي اهلج يلفوج ...شوفي له همه عدهم ياكلون حتى يوكلوج ! المهم راح كاطع فاتح ابو البنية كله انريد اناسبكم التاجر هم رحب بيه مافهم كاطع يريد بنته لنفسه كله تعالوا جيبهم وتعال هله بيك كل ظنه من كال جيبهم على اهله بس بحساب ابو البنية جان قصده جيب العريس وتعال وماقصر كاطع اول خميس اخذ امه وخواته وراحوا لبيت التاجر صاحبه واللي جانوا اهله ناس واصلين وزناكين ومن عائلة معروفة ...اخوانها صيادلة ومهندسين ... من حجت ام كاطع وكالت لابنا ام البنية فزت و لطمت على ص*رها كالت ليش يمه ازوج بنتي الي جنها اميرة ال واحد ابتدايية ماعنده وفوكاها اعرج ليش عيني! لا ويكبرها بعشر سنين! اني مو قصدي اعيب على ابنج دادة حاشى لله ... ورة ماذبتها الحجاية بدت تتراجع وتعتذر من شافت الناس سكتوا كلمة ماحجوا ...بس كلمن يعرف مقامه شنكول للعالم للناس لا عيني بتنا تريد تكمل دراستها واخوانها يريدوها تدرس هندسة اي فدوة خطية خليها تكمل دراسة احسن ...اصلا حتى بطلت ماافكر ازوجها ... طبعا همهرجعوا مو بس بخيبة جانت صدك صدمة مو بس لكاطع اللي خلته يعرف مقامه وانطكت النفاخة اللي جانت امه معيشته بيه ! بس جانت لاهله كلهم امه اللي رجعت ودمعتها بعينها ونورية اللي لامت على امها انه حق المرة شلون اصلا تفكرون تخطبون هيجي بنية ولزهوري الي نامت بحسرتها وقهرتها على اخوها ...من عيروه اعرج ... من رجعوا جانت المسكينة دتنوم بتها ومسلمة امرها ل الله مسحت دموعها من عينها وبدت تحضرلهم العشى ... اتخيلت حيجون شمتانين بيها ...والفرحة بعيونهم ومحيبطلون حجي عن ست الحسن بس اللي صار الع** رجعوا ودمعتهم بعينهم ... بعدين افتهمت كلشي من زهوري مع انه امها حذرتها لاتحجي شي لفخرية ... الي ليلتها نامت وضحكة جبيرة على وجها مو مثل منامت قبل ليلة ...ربج كريم فخرية .... الحمد لله اللي ما شمت الناس بيه .. طبعا ام كاطع ماسكتت ظلت طول الفترة الجاية يومية جايبتله وحدة من بنات جوارينهن هاي الحلوة وهاي الطويلة وهاي وهاي ..بس هو خلاص قفل على الموضوع مايريد هسه ولا يفكر بعد بالزواج وماكذب خبر الشغلة جرحته ودكت بگلبه ... كام من يومها يدور علاج النفسه وبدى يراجع دكاترة وتحاليل واشعة يومية رايح يم دكتور شكل ...وكلهم نفس الحجي عندي **ر قديم بالحوض وملتأم ... لازم يرجعون ي**رون عظم الحوض ويسووه اله مرة لخ ... وهذا يخاف لايسكطوه انوب حتى مشي مايكدر يمشي كعد وسكت ..وماكو ورة شي سنتين ... فد يوم رجعت فخرية من الكاظمية وبيدها حلال مشاكل جانت رحاب عمرها خمس سنين كاعدة تلعب كدامها وعمتها بصفها من جانت تطلع ويه عمتها يكعدون بالطابق الاول مال الامانة مو مال تصعد مابيها حيل رجليها تاذيها ... قبل جانت زهوري جايين عليها خطابة ...وا****عة تبين انه مترددين يوم يكولون حنجي ويوم يعتذرون وامها هم مقهورة من هاي الشغلة انه صارت ثمنطعش سنة ومااتزوجت ياهو اللي يجييها ماتصير لو يكلبون عليهم ... فجاننن الاثنين كاعدات ومدلغمات صاحبتنا ايست بعد من الخلفة ...والثانية تريد تزوج بتها ... من نزلت من الامانة داخت فخرية ... وكعدت على الدرج لزمتها عمتها وسندتها حسباله من الفر اللي افترته الامانة والدنيا جانت صيفية وحارة .. كعدت شوية وكوة كامت ...وجانت مسافة طويله من قطعة الامانة للبيت عاد اخذن ت**ي لراس الشارع ووهم بالكوة يمشن وكلما تشوف حب مال مي بباب بيت الناس تاخذ شويه وتغسل وجهها اتاريها صاحبتنا حامل وماتدري ... ولافكرت اصلا تروح تسوي تحليل وتشوف ... طبت للبيت وكعدت مدت رجلها ونزعت العباية ورحاب تلعب بصفها ... جانت نورية توها جايبة بنية ...سمتها اسمهان كثر مجانت حلوة وشكرة يكولون تشبه عمتها ... والله ومر شهرين من الحمل ... واتاكدت فخرية انه صدك حامل عاد ساعتها مجانت الدنيا سايعتها ... بس بذاك اليوم ... وكعت على هبطة رجلها من دخل مزورك ومكتول ذيج الكتله ....

Free reading for new users

Scan code to download app

App Store Google Play

Facebookexpand_more