بارت 4

2194 Words

ولدت نورية عام سبعة واربعين ومن اجى عبد الكريم قاسم للحكم طلع قرار كل اللي ممسجلين وماعدهم جناسي يطلعون ويسوون ولادتهم كلها واحد سبعة يعني اول يوم من شهر تموز ... قبلها محد جان يهتم لهذه الامور لذلك من طلع القرار كلها سجلت وصار نص الشعب العراقي بذيج الفترة ولادته بهذا التاريخ مع اختلاف السنين طبعا حتى فخرية نفسها تكول امي ماتتذكر اني اربعة واربعين لو تلاثة واربعين ! نورية ولدت اصغر بعشر سنين من اخوها الجبير كاطع بس قبلها امها ولدت اثنين ولد ماتوا وهمه رضع الاول مات صغير بالحصبة والثاني بعد اسبوع عمره دترضعه بالليل وص*رها خانكه وميت ...لانه جانت نومتها كلش ثكيلة ... ورة نورية ولدت اختها زهوري اصغر منها بسنتين .... ابو كاطع اتوفى من جان عمر نورية اربع سنين يعني بالكوة هسه تتذكره حتى من تحجي عن نفسها وتكول اني ربيت يتيمة مااتذكر من ابويه بس ملامح وحركات اصلا حتى شكله لو مو الصورة مااذكره ... ومن هي صغيرة امها علمتها كلشي بشغل البيت واعتمدت عليها بالصغيرة والجبيرة ... نورية جانت سمرة وطويلة يعني بطول اخوها ولو هو مو كلش طويل ... وشعرها جان اسود طويل وثخين كوة يتمشط فامها من سنين علمتها بالصيف كل اسبوعين تسوي حنة ...فالكل يعرف نورية شعرها احمر وعيونها سود وكبار ووجها شويه طويل وحلكها عريض بس حلوة دمها معجون ... بس من جانوا يعيبون عليها وهذا شي طبيعي جدا ووارد جانوا يصيحولها ام حلك بذاك الوكت جانت مودة الحلك الصغير هي المرغوبة ... ومن عمرها ست سنين او سبعة من الصبح تروح تجيب **ون لو خبز حار وتحضر الريوك لأمها ومن كبرت صارت عشر سنين بعد شالت البيت كله عليها القصد هاي البنية كبرت قبل عمرها وكبرت قبل اوانها وامها سمحتلها تتخشخش بين البيوت وتعرف كل صغيرة وجبيرة عنهم جانت ادزها يم الجوارين قبل بحجة تساعد النسوان لانه بذاك الوكت البيوت كلها مفتوحة والبنات الصغار يصيرن صاحبات علاقات ويه مثيلاتهن بالعمر على بعد شارعين تلاثة فماكو وحدة بالمنطقة مجانت تعرف نورية وزهوري بس معرفة...والحق يقال البنية خوش بنية ابد ماتنطي مجال لاحد صح حركة بس سباعية الا هذا زهير ...كدر يلعب بعقلها ... شافته بفاتحة راضي اخو فخرية الله يرحمه وظل يعاين عليها وينطيها نظرات وكام كلما يرجع من الدوام يمر گبال بيتهم وهي هم جانت تنتظره وتباوع عليه اول بداية من فتحة الباب وبعدين كامت شوية شويه تعوف الباب مفتوح حتى يمر ويبطئ خطواته ... وواحد يعاين على الثاني ها من جانت الدربونة فارغة والشارع هم مابيه احد ... فخرية حست بيها من كامت تصير العصرية نورية تنخبص تخلص شغل اللي بيدها على السريع وتبدل وتكحل وتظل تحوص يم باب الحوش والفترة الاخيرة كثرت طلعاتها ويه امها يوم للكاظمية ويوم للسوك وهيجي الى فد يوم الكل جان نايم وطلعت على كيف بباب الحوش وفد مرة لكفتها تتسحب يم باب الحوش وجانت ورحاب توها نايمة حطتها من حظنها وعلى كيف ختلت ورة بستوكة خاليها بالمجاز الا وتشوفها تاخذ وردة لافها بكاخد هذا الولد الشرطي ناوشها اياه... بس عادة فخرية تسكت ماتحجي وكالت بگلبها بله لو شايفة عليه شي مو جانت انكلبت الدنيا عليه ... بس شلون عين كوية مخافت لا من اخوها يشوفها ولا واحد من الجيران يلمحها ... وراحت ذيج الشغلة وماكو شهرين واجوي اهله سيروا عليها ... بس علمود السنة مال اخوها اخروا الخطوبة لنهاية الثالث السنة الجاية ... وبذاك اليوم من طلعت فخرية تزور اهلها جانت نورية متفقة وية الولد يمر عليها ويشوفها من بعيد لبعيد ومحضرة نفسها بس يتغدى كاطع وينام تسوي روحها تغسل باب البيت حتى يتلاكون وواحد يعاين على اللاخ ... الا ان جتي صبرية ام الگيمر كامت تصيح وتعيط بنص الحوش انه كاطع متحرش اكثر من مرة ببتها الجبيرة ... واول مخشت فخرية سمعت عمتها تكللها ولج صبرية لج صبرية ام الكيمر لمي نفسج واطلعي منا يلي سيرتج على كل ل**ن .. فام الكيمر زادت بعلو حسها حتى الناس تسمعها ... ولج اني قدورة اني! ...اني يا بت الحافي صار عندج فلوس وتعيرني بشرفي يلي انظف من وجهج شو تعالي اريد اشوف منو بالسوك يكدر يحجي عني كلمة مزينة اي اني صبرية ام الكيمر وشرفي ابيض من الكيمر اللي ابيعه اليوم الا اسويها وياج عشاير ...واسويها گوامه شلون تتهميني بشرفي ولج خايبة عايبة. .. ومنا راسا رحاب كامت تبجي من صوت الهوسة اخذتها فخرية طبت بغرفتها وكامت تبجي وياها جرتها نورية كلتلها خشي جوة لاتكبر الحجاية والمسكينة ظلت تفكر اول تالي كاطع يتحارش بالبنات ...انوبة من سمعوا بيها عشاير كامن البنات يرجفن ويهدن بامهن اللي بالزايد كام تهدد هي هم بعشرية رجلها واهلها ... الا ان دخلت مرة جيرانهم وصاحبة ام كاطع ... لامة عبايتها وهدت الموضوع وهي مرة معروفة يصيحلوها مرة الحجي سكتتهن وطببت ام كاطع للگبةهي وبناتها و جري المرة على صفح ... اخذت صبرية ام الكيمر على على صفحة وبدت تحجي وياها وتهديها .... خالة يمه بنيتي عيب هالحجي تفضحين بنتج كدام العالم والجوارين لا تريدين تعاتبين احد عاتبي بسكوت بتج حديثة ليش ت**رين قسمتها ويعيروها ... ومنها حجايتين ومن ام الكيمر حجايتين هدا الموضوع وسكتت المرة شويه ...وكومي مرة الحجي كلتلها هاج هاي دينارين اخاف مااسترزقتي اليوم وذباك الوكت الدينارين كوومة ... وكملت كالت احنى اليوم لازم نحجي على ابنا ونوكفه عد حده ...بس كوليلي هو خوما ماخذ منها شي فعاطت صبرية ام الكيمر لاعيني لا شحده اكطعه براس الدربونة بسنوني لعد شلون امرده مرد والله ... عيني حجية اني جيت دااكلكم خلوا الولد يجوز من بنتي كلما يناوشها الفلوس يعصر ايدها لو يحصرها ورة باب المحل كلما اخذتله ماعون الكيمر يصير هيجي! جاوبتها المرة لامايصير طبعا ...عيب وماتطلع من كاطع ماادري شجراله عاد تنكت عليها مرة الحجي هماتين انت هم جوزي بعد ادزين بنتج للمحلات البنية كبرت واحلوت واكيد يتحرشون بيها خالة صبرية ... غسلت وجه المرة ونفضت عبايتها ورضت خاطرها بجم فلس وبوستين على الراس حتى بس تفض الشغلة ... وتخلص قبل لايجي كاطع ...ويكبر الموضوع ... بس جنه كاطع جان يدري لانه الظاهر المرة فاضحته بالسوك هم ومعاتبيه الرياجيل وحاجين عليه لايكطع رزق المرة بهالتصرفات فبذاك اليوم اتاخر ومارجع بوكته والمرة ظلت كاعدة شربت لا استكان ولا الثاني تنتظره حتى تعاتبه....عاد من شافت فخرية طلعت ا لصوبة ملتها نفط لافة شعرها كبوبة ودشداشتها السودة العريضة مطكعة حليب واكل رحاب واكع عليها كلتلها يمه ليش هيجي حالج ... يعني يجي رجلج ويشوفج هيجي اكيد يهج وينفر منج ... ياحالة خالة ..! جاوبت فخرية والخجل **رها وظلت مدنكة ماتحجي حال روحج يمه شنو هالدشداشة السودة ووصخة وشعرج منتف وطايره وايراته ...ووجهج اصفر ... كالتها خالة غير لابسة اسود على اخوية بعدها السنة مالته مطالعة وهاي هسه رحاب كبت الحليب عليه ...ووو سكتت ماعرفت شتجاوب بس ام كاطع تعاين وعينها تتطاير وتقرا وتحجي الف كلام ... فكملت مرة الحجي وكالتلها خالة كومي بدلي ماعندج غيرهاي الدشداشة كومي بدليها ومشطي شعرج وخلي زواكه وشويه ريحه ... شحلاتها من يرجع رجللج من الشغل وتتلكينه مثل العروس يفرح بيج كومي يومه ... ماكلتي ماعندج غيرها! لا خاله عندي الصبح لميتهم من على الحبل يله يومه يله خالة روحي خضي نفسج جبي مي وخري العرك وريحة الحليب وتاني رجلج ولاتفاتحيه باي موضوع حتى لاتكبر الشغلة هسه هو منه ومن كيفه يخجل وما عاد يعيدها .. وظلت شويه لخ كاعده اتاني كاطع يرجع وهو مابين اخر شي ملت و لمت عبايتها ورجعت لبيتها وظلت نورية تلوب رايحة جاية تخاف لاجية كاطع تصادف ويه جية صاحبها الشرطي وكعدت تغسل بالصبة وتنشفها والجو بارد ثلج ...وامها كل شويه تعيط عليها عاد هي هم من خوفتها طبت للغرفة وسدت الباب ...بذيج الظهرية حتى غدا محد اتغدى الا زهوري راحت لبيت جوارينهم جابت ماعون مركة فاصولية وكرصة خبز اكلت هي ورحاب ... ظلت فخرية بغرفتها تحوك الليف وعيونها تجري دموع دخلت عليها عمتها تتنحنح ...اسمعي دادة فخورة ...شوفي اللي صار اليوم مايطلع من حلكج لاي احد خصوصا اهلج شغلة صارت وانسيها ها وديري بالج من يجي كاطع تحاسبيه وتعاتبيه تره هو يضوج وانت اتعلمت على طبعه بعد نحس وميحب احد يكله على عينك حاجب والرياجيل كلهم هيجي ...عادي يعجبهم ونفسهم تدنى على النسوان والصدك الصوج منج ! عزة ليش عمه هسه طلع الصوج مني ! ليش انه اللي دفعته عليهن لو انه الي مقصرة وياه بشي!!!! فعمتها جاوبتها اي طبعا مقصرة لعد ما ماتشوفين حالج ...هاي صارلكم يجي ست سنين ماخلفتي بس هالبنية والرجال بنفسه ولد هم ماله اخوان وهم ماله ولد طبعا يفكر يتزوج عليج عمه هو مافكر انتوا اللي علمتوه على هالشغلة ليش عيني ليش هو مو رجال وديشوف بعينه كل صدقانه صاروا ابو فلان الا هو لساته ا سمه ابو رحاب ... ثم تعالي شوفي روحج شكلج هاي صارلج شكد بنفس الدشداشة السودة شفتي مرة الحجي شكالت عليج ... خالة يعني شسوي مو دتشوفيني اكعد من فجرية الله اكبر مااغفى الا تالي الليل ...ويله تطلع السنة مال اخوية الله يرحمه يله عودين انزع الاسود هم مايصير عيب من العالم تاكل وجي باعي دكلج خ** الحجي **ري الشر ولاتتعاركين ويه رجلج ...علمود بت ام الكيمر مشكلة فضت وراحت لحالها ... خلي رحاب يمي وروحي غسلي وبدلي وحضريله لكمة ياكلها ... وبالليل عود بس من انت وياه بدلي ولبس غير الوان خلي شويه تتغير نفسه عليج كامت بحيلها فخرية حتى بس تخلص من حجي عمتها مو لانه عجبها تبدل وتتزوك وظلت بالزايد تبجي وتشهك يعني فوك ماهو اللي غلطان وماراجع للبيت لازم نعززه وندلله ونمسحله واحنى اللي نعتذر عن التقصير! ليش ربي ليش ! مر الموضوع والمرة ماحجت مثل ماوصوها بس هي ظلت غصة بگلبها وحسرة عليها ومصار الها نفس عليه مثل قبل حتى هو هم يرجع تالي الليل حتى بته ميسال عليها ولايعرف شكو ماكو ... مرت تلاث اسابيع وعلى نفس الحال الا ان جتي زهورة مغربية تركض للبيت وشافت فخرية كاعدة تصفط هدوم بالصندوك توها شايلتهم من الحبل ...اتسحبت على كيفها ... وصاحتها امها ولج خايبة وين جنت لج لحد هسه دايحة ! لج ص*رج شكبره صار وبعدج تفترين مثل الزعاطيط على الجيران م**ورة الركبة بعد اذا اتاخرتي لو طلعتي ا**رها لرجليج ...وظل تتوعدها بس هي ماهتمت الجو جان بارد حييل برة وكبة فخرية دافية مدت رجلها على الصوبة والضحكة مالية حلكها ووجها من المشك محمر ... كالتلها ولج فخورة لو تدرين ... ماهتمت كالتلها خيرج وهي سارحة وصافنة ورحاب كامت زحفت عليها حطتها بحضنها ... وكملت وهي تضحك ... ولج طلع اخوج جاسم من الحبس وامج جابت ابو المزيقة ...ودكوا طبل وكامت تركص بنص الدربونة ... فزت فخرية واندارت عليها ... الله عليج وليش ماكتيلي ... كولي والله مدااجذب والله فخرية مدااجذب عليج شبيج انت خطية هذيج هم ماصدكت شالت رحاب وحطتها وجرت زهوري وهي تضحك لج تعالي احجيلي شلون وشوكت وانت شوداج ... فجاوبتها زهوري باعي جنت بيت ام حسين كالت روحي ودي ابني لبيت اختي وانطتني درهمين بالطريق دااخذه شفت سهيلة تركض ورايه وتصيحني كالتلي تعالي ويايه نروح لبيت ام جاسم جسوم طلع اليوم من الحبس وامه جايبة موسيقى وديوزعون حلاوة ...ترحين تكولين لفخرية وتجيبها وتجين ؟! ... كتلها مااكدر لازم اخذ ابن ام حسين لاختها فاني هم وديته على السريع ومناك رحنا لبيت اهلج وشفنا الهوسة وامج تدبج بعبايتها بنص الدربونة وطشوا جكليت وهاج جبتلج جم وحدة ...لج والله شكد حلو جان ووزعو زلابية كوومة اكلت بس مابقيتلج ... لو تدرين الناس كلها تركص ويه امج بنص الدربونة ههههه هي تحجي وفخرية تبجي ماتدري تفرح اخوها طلع من الحبس تحزن ماتكدر تروح تشوفه ظلت نار تحرك گلبها كلشي ولا الاخو ياناس ياعالم هذا اخوي ... ليلتها منامت ابد ظلت تتكلب بفراشها الناس كلها هناك الا هي اصلا حتى من كالت لرجلها راسا لطمها على حلكها مايريد يسمع سيرة اخوها وتسد الموضوع... كعدت صاحبتنا من الفجرية والدنيا بعدها ظلمة الصوبة انطفت وفتيتلها محتركة لازم اتصعدها وتكصها وترجع تفرها مرة لخ حتى يطلع الجديد منها اللي مامحترك وانشلع گلبها يله كملتها ترجف بهالبرد تفرغ نفط وادير نفط وتسحب حيل بالهفتيلة الا ان صعدتها وايدها تشكشكت من المشك والنفط ... انوبه غسلتها وحطتلها دهن مال طبخ حتى بس شوية يهدى لما تطلع الشمس ودز زهوري اتجيبلها نيفيا ... وظلت شي يومين تلاثة اخر اكلها الهم والقهر مازارت اخوها لا بالحبس ولا هسه تكدر تشوفه ... الاان اتنازلت وراحت اتوسلت باست ايد عمتها بس تحجي وية رجلها تخليها تروح لاهلها تشوف اخوها ...والله ومكذبت خبر ثاني يوم راحت هي وزهوري من الصبح وركضت لبيت اهلها وماصدكت وصلت طكتها هلهولة من قبل بيتين تلاثة وطشت جكليت وزهورة شايله رحاب تمشي وراها واول مشافت اخوها كاعد على الكرويته حطت بتها بحضنه وظلت تبوس براسه وايديه وتشمشم بركبته بس هو ماتحرك دفعها على كيفه وطب جوة كال لامه يمه اني جوه مااريد احد يضوجني ... خطية خجلت وراحت لبعيد ودموعها بعينها ... كالتله خويه حقك تزعل عليه بس انت مو تدري امري مو بيدي بيد رجلي شسوي اذا مخلاني اجي ازورك اندار عليها كاللها رجلج حسابه بعدين اذا مسكطته وفركت حلكه فلا اني جاسم ... اذا مخليته عبرة الج ولامه ولغيرهم فلا اني من صلب ابويه ... وخش جوة وكللها بعد مايريد يشوف شكلها بالبيت ... يايمه شكد متغير هذا شكد صاير قاسي ...جان كلش ضعفان وشواربه ثخانه ...متغير حيل علاوي اخوها بوسها واخذ رحاب منها وكام يلعبها خطية جانوا الجهال فرحانين بيها ... وحتى امها ظلت تطيب خاطرها ...بس شيطبه حتى اخوها خسرته ... شويه وجتي سهيله وياعيني شكد فرحت على شوفتها ظلت تحضنها وتبوس بيها وتعاتبها انه ماعرفت تلوف رجلها مثل باقي النسوان وتحطه جوه باطها فاهية ومو شاطرة ... هي تحجي وفخرية بالها بغير مكان جنها الدنيا كلها التمت عليها بس صاحبتنا جانت فقيرة وجبانه وتخاف خوف لا والله و ترجف رجيف من تسمع اطلكج وادزلج لهلج وين يااهل ترجعلهم! سالتها على بناتها جوري ونرجس جانن يداومن بالمدرسة مابطلتهن لانه رادتهن يصيرن ويصير عدهن راتب ...بناتها كلش حلوات وهواية يردونهن بس هي ماتقبل تنطي ... بيومها رجعت بسرعة والطريق كله تتوسل بزهوري لاتحجي لاحد من اهلها على حجي جاسم ...حتى لاتصير مشاكل ... ومرت شهرين لج جانت صعبة حيل يومية مظاهرات وهوسة والبرد يكتل كتل... الا ان بداية شهر الثاني الناس كلها كعدت على مصيبة الله الساتر منه

Free reading for new users

Scan code to download app

App Store Google Play

Facebookexpand_more