بارت 3

1940 Words

بيوم اللي اكتشفت ام كاطع عمة صاحبتنا وبتها بدرية انه فخرية منطية الكلبدون والجلاب الذهب ابوالليلو لامها تبيعه وتدفع ايجارها... كبت ذيج العركة بيناتهن ومن فشلتها فخرية ورة ماسمعت كومة التعيارات واكلت ذاك الكتل وحتى تخلص منهن جبت على روحها نفط الجولة وهددتهم لا ماجازوا منها تحرك روحها ... اثناء ذلك الصياح والعياط جان واصل سابع جار وبدت الجيران تتدخل تحاول تهدي الموضوع بكلمة منا وكلمة مناك توقف الزمن ثواني ووكعت عينها المكرودة على بتها بنص الحوش طاكة من البجي ومزركة من الصياح والعياط محد بحالها مرت بخاطرها ولج فخرية مو هاي رحاب نور عينج اللي ماخليتي نذر مانذرتيه وماخليتي دكتورة ماجكجكتتج... يله حظيتي بيها المن تعوفيها اذا كتلتي روحج لقدورة لو لنورية يلعبن بيها طوبة ويسونها خدامة الهن ! وبهاللحظة ذبت الجولة من ايدها وركضت على بتها حضننها ومناك تلكنها عمتها وحماتها ودفرات على ظهرها ولطام على راسها شلون هيجي تسوين بهالساعة دخلت عليهن سهيلة وبتها جوري ...ومن شافتهن ملتمات عليها ...جيتت عليهن وبدت تتمالخ وياهن مهما كان فخرية جانت صاحبتها وبت صاحبتها ومنها وبيها ووحدها واكعة جوة ايديهن والجوارين تخاف تتدخل واكفة تعاين من بعيد عود كل شوي وحدة تجر ايد ام كاطع تبعدها ومنا حجاية ومنا عركة وصل الخبر لكاطع اللي جا متنرفز وثاير وبصيحة وحدة فاككهن ...وض*ب مرته راشديين وعاط على اخته وطرد سهيلة من البيت ... وماكو اقل من نص ساعة مجان يسمع غير صوت ازيز الباب الخارجيه تتحرك من مكانها ويه اقل هبة هوا ... كل وحدة بيهن كعدت بكبتها وظلت عمتها ترتدم وتندعي على فخرية وتتوعدلها والاخيرة حاضنة بجها وتبجي بسكوت وكاطع متضايك ويگلب عيونه بالحوش دور على سبحته ماكو شال روحه وكعادته طلع للكهوة حتى غدة ماتغدة وسهر لحد ورة نص الليل يله رجع بس هالمرة رجع سكران ويطوطح ... صح هو جان يشرب بس مايوصلها للسكر .. وظلت قدورة ام كاطع من ورة باب الكبة تلعن وتعاير فخرية انه من وراها ابنها عرف هذا الطريق والحقيقة هو من صار شريك بنص محلهم بالشورجة بدت الفلوس شويه تنزل اكثر بجيبه يعني اتحسن شغله وزاد الوارد ...ومن جهة كاطع صاحب كيف ويحب يصرف ...وصاروا عنده جماعة واصدقاء هواية وكلهم يحبوه ويردون خاطره ...فكثرت سهراته وكام يطوخ كعداته وشربه ومن شوية بدت امورهم تتحسن وزاد مصروفهم بالبيت كامت امه بين فترة وفترة تشتري حاجة جديدة للبيت من زولية وصوبة واخرها طباخ ... وصارت كل عصرية تنصب صينية الجاي ويلتمن الجوارين يمها يتعللن ... الا فخرية ظلت حاطة رحاب بحضنها... ودموعها تجري ورة ماانحرمت من شوفة امها واخوتها هو بلا كلشي حرمها من زيارة اخوها جاسم بالحبس ... على ابو هي حرمة وعيب مايصير تتراكض بالمراكز والسجونة ... اتقوقعت فخرية بعالمها عالم من الخذلان والوحدة والان**ار ورجلها واهله بعالم اخر اصدقاء وونسة وطبة وطلعة وعالم من والضحك والشماتة بعيون امه واخته تصعد وتنزل لانه من يوم العركة صار مكاطع بيناتهم بس من يجي رجلها ترجع تكعد وتلتم وياهن بس مايسولفن...الا كدامه حتى لايحسب اكو شي وانكطعت رجلها المسكينة حتى من طلعة السوك ومن جية سهيلة عليها ظلت بلا اهل وبلا صاحب تكضي ليلها تون من الم الشغل ومن الم گلبها ... وصارت تلم الليفة وادزها بيد زهورة تبيعه الها لام غايب وهن هم مصارن يردنها بعد ...يعني مو مثل الاول وتكضي ليلها كله بصف راديونها وعلى الاغاني القديمة مال ام كلثوم وعبد الحليم وعبد الوهاب وناظم الغزالي وغيرهم وهاي جان الي تثير شجنها وحزنها ...وتنزل دمعتها على خدها هي ياما سمعت عن الحب بس عمرها ماسالت نفسها اني حبيت لو لا حسبالها الحب مايحق الي مثلها .... وبحجة العركة الكطيعة ... فسخت نورية اخت كاطع خطوبتها ويه اخو سهيله قاسم ...ورة العركة بشهرين وكامت تعاير بيه على ابو فكري وكاضي عمره كله يصرف على امه واخته الارملة جنها نست اخوها هم لامهن ويصرف عليهن ... وراها بفترة جوي ناس يخطبوها ...بس فخرية جانت تشك وشافتها اكثر من مرة مصاحبة ولد شرطي عرفت اسمه زهير من اهله من جوي مشاية عليها ... وهي مخطوبة جانت مصاحبته وماصدكت حجة حتى تفسخ وترتبط بيه ... وهي انخطبت منا وطلع ل**نها منا ...صارت مرة عود والها حس ينسمع .. تجدون الكرم.. الصدق... وبدت هي وامها ينخبشن ورة فخرية ... ويزنن باذن كاطع اتزوج عليها هاي ماتخلف واحنى نريدلك ولد ... وهذا كاطع صدك بروحه كام ياهي الحلوة يشوفها يخلي عينه عليها ...ويتحرش بيها ويكوم ويكعد شوفولي مرة اتزوج... بس محد حان ماخذه على جدياته لانه يعرفونه يحب فخرية ويىيد خاطرها عود ومرت تقريبا اربع شهور لخ ...وجان جاسم باقيله هالشهر ويطلع من الحبس ... اتوسلت برجلها بساعة صفا وحدهم بالكبة بس تروح تشوف امها وحلفت يمين ماتتاخر ساعة ... الله هداه وخلاها تروح من الغبشة وترجع قبل الظهرية تكون موجودة من يرجع من الشغل بس شرط تاخذ زهورة وياها زهورة جانت ها يعني شويه احسن من اختها وامها. .. جانت بذاك الوكت بعد مو صغيرة صح كلش ناعمة بس صاروا خطاطيبها هواية ... بس هي عقلها طفلة لساها تحب السمسمية والمصاصة ام الديج ... ومن طبع كاطع مثل طبع هواية مثله بذاك الوكت بس تكبر البنية يبطلوها من المدرسة بس زهورة هالسنة يله بطلت خصلت سنتين بالمتوسطة وخطية هم زينة بدرجاتها بس بعد اخوها حكم تكعد بالبيت ... كعدت يومها صاحبتنا من الفجرية غسلت وحضرت نفنوفها وعبايتها الوحيدة جانت جديدة وتلمع لانه ماتطلع بيها هواية بس هم غسلتها البارحة بالليل .. وفتحت الجولة وبدت تسوي ريوك جان شهر دعش والجو برد ... خدرت الجاي وسوت الريوك وصبته وكعدت رجلها وكفت بصفه يم المغسلة شايلتله الخاولي هو هم اتنحنح وكعدمثل عادته اليومية لازم يزين لحيته كل صبحية ...وطلب منها تكعد امه وخواته يتريكون وياه ... بس بصباحيتهت امه وحدها كعدت هي وكفشتها ... تتململ على البنية وتسالها على شغلة شغلة ولج فخورة خدرتي الجاي اي عمة سويتي الجبن نكعيه بمي فاير اي عمة سويته جبتي ال**ون الحار اي عمة جبتهه وفرشته .. تدرين بيه مااكل بيض المن هلكد مسويه بيضات للبنات عمة وكلت انطي شوية لرحاب وبهالاثناء هي بغرفتها وترد عليها كاعدة تلبس بتها هدومها ... وماكو شي نص ساعة طلع كاطع لشغلة وناوشها نص دينار كون ماتصرفهن الا من تحتاجهن وناوش امه المصرف مال اليوم وركضت فخرية تكعد زهوري بالكوة حتى تتريك وتلحك تروح تشوف امها قبل الظهرية حتى تلحك ترجع قبل رجلها ... بس زهوري كوة كوة يله كعدت وماقبلت تتريك جان عاجبها لفة بيتنجان وعمبة مال السوك ووعدتها تشتريلها اللفة وسمسمية هم من ابو قدرية ... هاي هم كيفت وركض بدلت لبست نفنوفها اصفر وبيه ورد ناعم وردي واحمر...ولبست فوكاه قبوط سمائي وعلى السريع لمن البيت ومن ديطلعن صاحتلها عمتها عود جيبي وياج ربع لحم ... كلتها عمة ماعندي حكهن ! ليش مو توة كاطع مناوشج نص دينار كالتلها عمة مو تدرين كلي لاتصرفين منهن بس للكروة اذا رحت بالامانة وشعندج رايحة بالامانة هو هياتهن لا عمة والله مسافة والبنية بحضني شلون اركض بيها ! زين يالخايبة وفلوسج مال الليفة وينهن عمة داالمهم اشتري بيهم الكلبدون ارجعه ... موت ياحمار علما فخرية تلم فلوس الكلبدون ... فصاحت عمتها على زهوري تناوشها جزدانها فوك الحب وطلعت فلوس وانطته لزهوري هي اللي تجيب ربع اللحم وختمتها مابعوزة احد احنى ... ومصدكت فخرية شالت رحاب على جتفها وطلعت والهوا البارد يداعب كذلتها وضحكتها بشوفة اهلها وصعدت االامانة الحمرة ام الطابقين ظلت تفر بيهم شي نص ساعة يله وصلوا ومروا على دربونة صاحبتها سهيلة فكالت لزهورة ها لا رحت زرت صاحبتي هم تف*نين لاخوج ولامج ! فجاوبتها كالت دادة انه اخاف امي تحلفني بالعباس واذا كذبت يشور بيه ... فجاوبتها كالتها مو هاي صاحبتي صارلي شهور مشايفتها فضحكت زهوري كالت لعد مو شفتيها اخر مرة من رحنا زيارة للكاظم ويه كاطع اني شفتج اتباوستوا يم الكيشوانية ... يا عزة شفتينا والله صدفت شفتها خوما جنا متواعدات كون حجيتجي لاخوج ! كالت يااا طبعا ماحجيت يا ليش مااعرف اخوية جان طلعها الزيارة زقوم علينا لاتخافين ماحجيت لا لامي ولا للكاطع اصلا حتى نورية ماتدري... فدوة لعينج زهورة والله انت اختي وهنا بدت فخرية جر حجي من زهوري على اختها نورية اللي ديسير عليها ولد بالشرطة ... فضحكت زهوري كالت عود ساليهم مالي دخل اني ... ومن وصلت لدربونة اهلها ... نزلت بتها رحاب ورجعت عدلت هدومها ورتبتها على السريع وشالتها مرة لخ ...ومرت على البيوت واتذكرت طفولتها هنا وشافت بنات اثنين كاعدات بباب الحوش يلعبن طم خريزة ودمعت عينها على حالها اتزوجت حيل صغيرة ... ف*جعت تسولف وية زهورة شوفي هنا جنت العب اني وجوري بت سهيلة ... شبالعجل كبرنا شكد يعجبني ارجع للمدرسة زهورة لو تدرين شكد جنت شاطرة اني هم كلش احب المدرسة بس غير رجلج بطلني ومن ديميشن لمحت من بعيد امها شايله ابن جوارينهم صغير عبوسي وواكفة يم امه دتخبز ولابسه عبايتها على النص فخطية فخرية صاحت يمة يمة ودموعها كامن يجرن هيجي من وحدهن امها حطت الجاهل من حضنها وركضت حضنت بتها وظلت تبوس برحاب .. خطية حتى من حفيدتها انحرمت... وظلن يتحاضنن ويتباجن ... ولج ليش هيجي يمه كطعتي بيه ...ظلت امها تعاتبها فخرية تشهك ماتكدر تجاوب بس شافت عيون امها تعبانه ومن الكثر البجي غايرات .. وضعفانة حيل لحمة مابيها وحتى لونها مطوخ حضنتها وشمت بيها ريحة الدفو اللي جانت محرومة منه ... امها شالت رحاب على جتفها وجرت بتها تصيح على جارتها ام عباس تعالي شوفي منو زارنا اليوم ... وزهورة تمشي وراهن وتعض بلفة العمبة ... كعدن ورجعت امها سوت ريوك من جديد شافت البيت مابيه بس ام عباس كاعدة تخبز بتنور امها سالت على علاء اخوها كالتلها يداوم بالمدرسة ماقبل يبطل شاطر ويحب الدراسة وحتى ماقبل بدرية تبطل بعدها اداوم بس من يرجع من المدرسة ياخذ عربانة اللبلبي ويبيع بالدربومنات ...لو يوكف يم الكهوة ومايرجع الا تخلص الجدرية من سودة عليه يرجع هلكان يلف راسه وينام وهي هم ماعادت تطلع تفتر مثل قبل كامت تشتغل تسوي بلك للدشاديش وليفة وفجج وهالجم فلس يطلعوه يصرفونها على نفسهم ... ولفت كرصة الخبز الحار الي ناوشته الها ام عباس وغمسته بالجاي وكعدت امها تتريك ورحاب بحضنها كامشة حنونة صغيرة تعض بيها وكل شويه تعاين عليها لج هاي نسخة من عندي ... فخرية ظلت صافنة على ا*****ة الجاي الحار وبايدها تكلب بماعونة ... يمة جاسم شلونه ولا رحت شفته گلبي ناار عليه شلونه يمه شكلج شحيلج جاوبتها امها بس والله عيب على رجلج اللي بالجذب مراح زاره ولا مرة هسه صرنا كخة ... لايمه ليش هيجي تكلين ...تره كاطع امره بيد امه .. مااعرف شجارله حتى علي متغير ... اشو صارله فترة ولايگربلي ... وليله كله يكضي بره ومن احجي وياه يكلي اريد ولد ... اني اخواني ماتو اريد تجيبلي ولد هم اخ الي وهم لرحاب قابل هو بيدج يايمه شتسوين احمدوا ربكم الله رزقكم بهاي الگمر لج هاي محلوة ضحكت رحاب اي يمه من جتي للدنيا جانت طوبة شعر ههههه وطلعت جيس صغير من جوة عبايته اشتريت هذني الغراض لبدرية وعلاوي ... شوفي وجبتلها فركيتات حمر هي تحبها حمر ههههه عاد مو تخليهن بنص كصتها يومه لا طلع جسوم ...زوجيه حتى يكعد راحة ويجوز من هالسوالف الم**رة شتكولين يامومه احنى لاكين ناكل حتى ازوجه خايبه شتحجين انت خلي اكوم احضر لكم غدا ... زهورة شلونها امج عود سلميلي عليها كوليلها ماقصرتي ابد ... شو انت محلوة بس بعدج معصعصة وما كبرتي جنج تبقين هيجي ناعمة ... واندارت ام جاسم على بتها اكلج شخبار نورية صدك ... ديسيرون عليها وحتنخطب هالايام ... اي عافتهه لقاسم المكرود مايفيدها ... اسكتي يمه اختها كاعدة ومااريد مشاكل عشتو يمه منو ام المشاكل غير قدورة وبتها ... يوم لاتسوين غدة اني هسه ساعة واروح حلفني كاطع ارجع قبل مايجي من الشغل ... الله عليج سلميلي على جاسم هواية وعلى سهيلة مشتاقتلها وبودي ازورها ظلت فخرية شي ساعة ساعتين بيت اهلها وبطريق رجعتها للبيت بقت تندعي انه يكون تحبل وتخلف ولد حتى ترتاح شويه وتتحسن علاقتها وية كاطع ... جانت دائما تحب تصعد بالطابق الثاني مال الامانة ... تلف عبايتها بحضنها وتكعد رحاب على رجليه ... ظلت صافنة تعاين على الناس وتشوف كل واحد اله درده وهمه ... ماتدري تشيل هم رجلها الي ماصاير يردها مثل قبل لو تشيل هم اهلها لو هم الخلفة لو هم اخوها اوووف من هالدنيا بعدها مصايرة عشرين سنة وهم جبال على گلبها وين ماوصلت وفتحت الباب سمعت صوت مرة غريبة هاي المرة جنها تصرخ وتعيط وتعاتب عمتها وسيرة كاطع على ل**نها ... ركضت زهوري قبلها وهي هم شبخت خطواتها وذبت العباية على جتفها وبخطوتين صارت بنص الحوش لما شافت ام الكيمر مخرمشة روحه وتصيح وتعيط

Free reading for new users

Scan code to download app

App Store Google Play

Facebookexpand_more