آلاء و المنحوس

الجزء الخامس

شافت فجنابها و قالت :"" باسم الله الرحمن الرحيم .. اخويا علامن كاتهضر .. شحال من مرة كانقول ليك ماتبقاش شاد تيلي فالحمام و تنسا راسك تما راك غاتشير .. هانتا تشيرتي دابا اش غانديرو فيك اه .. "" 

شاف فيها زياد و قال :"" الاء راه غانشقلب مك "" 

قدمات ليه دقنها و قالت بتهديد :"" ماتجبدش مي على فمك "" 

خمج ليها وجهها و قال :"" مك كانت مي قبل ماتزادي البرهووشة "" 

جاوباتو بغيظ و قالت :"" انا مااشي برهووشة .. البرهوش هو انت لي داير فيا راسك "" 

زياد :"" اذا كاتعتارفي بلي انت برهوشة "" 

هزات عينيها كاتدورها فراسها شوية و رجعات قالت ليه :"" على الاقل انا جات معايا و باقية صغيرة .. كيتك انت لي قدك بولادهم باقي تناغر مع ختك الصغيرة .. دابا من الاخر اشنو درت ليك حتى تغاودتي معايا دابا "" 

جاوبها و قال :"" وااالو .. مادرتي وااالو غير ضيعتي عليا حتى داك 0.0001 فالمية من الامل لي كنت منشيت بيه "" 

جاوبت و رجعات كتاكل و قالت :"" ماعليش .. غايتزاد 0 اخر و تسنى لعل الف*ج قريب "" 

جاوبها و قال:" تشهيت نهز شي طوبيس و نخبط مك بيه "" 

جاوبت و قالت :"" اوى حرربش تحط صبعك عليا "" 

شاف فيها .. حط صبعو فحنكها و هي تطير عليه ..

زيد كان حداهم .. حط البيسي من يدو سدو و دار يدو بين عينيه لي غمضهم .. و هاذي حركة كايديرها ديما منين كايندم على شي حاجة .. و الحاجة لي نادم عليها حاليا هي كونو اخ هاد زوج مصائب ذات افواه ...

-------

وقت العشاء ..

جالس زين ال**بدين كايتعشا مع امو و اختو  كايدردشو ..

نطقت شيماء:"" اوى شفتي .. ها هما تلاتة الخدامي عيطو ليك فخطرة .. و انت تظل تبرغم و تشكا من النحس "" 

جاوبها  :"" حتى لدابا باقي مافهمت كيفاش هاد النهاار خرج بنتائج مزيانة بحال هاذي .. خدمة و بركة ديال الفلوس واخا علاين يمشي ليا بيسي ديال الدري "" 

جاوباتو عائشة و قالت :"" وا حمد الله و سكت .. "" 

جاوبها قائل :"" اللهم لك الحمد ..  ""

------- 

كانت الاء فبيتها متكية سهرانة مع الدراما الكورية كيف عادتها حتى دخل زياد .. سد الباب و تكا حداها فالسرير .. 

بقا لمدة ساكت ثم قال :"" شيماء.. كيف كاتجيك "" 

كان السكات فالمقابل .. هز عينو شاف فيها لقاها حالة فمها فجونغ سوك .. عطاها بقبضتو لقلقولتها حتى شظاتها و قالت :"" واااا اااي الحمااار درتي ليا ارتجاج .. اش باغي "" 

"" واش انا كانهضر معاك و انت حالة فمك فالشينوا "" 

دارت يد على يد فوق خصرها و دورات وجها معوجة ملامحها و قالت :"" هاااهي سييرة الشينواا لي ماكاتقاااضااش... اش بغيتي اخويا ...    "" 

زياد :"" قلت ليك شيماء ... شنو رأيك فيها "" 

 "" شكون شيماء .. بنت جيران؟ "" 

"" اه "" 

قالت بتفكير :"" كيف كاتجيني؟ .. ضريفة و زوينة .. ماكانعرفهاش مزيانة .. ببناتنا غير الصواب صافي "" 

شاف فيها و قال بتردد :"" غانطلبك طليبة "" 

جاوباتو :"" اشنو هي ؟ "" 

"تصاحبي معاها .. و تقربي ليها "" 

طفات البيسي و شافت فيه خارجين عينيها :"" هااااا هادشي علاش ناويين تزيدو طبقة ... بيتذااكرووو من وراااياااا "" 

جمعها معاها بتسمقيلة للراس و قال :"" هاد*ك اه .. خلينا نهضرو بجدية شوية "" 

رجعات لبلاصتها و قالت :"" مزعووط فيها ؟"" 

:"" كاتعجبني من شحال هاذي و بغيتها للزواج .. اش بان ليك انت ؟"" 

سكتات شوية كاتفكر :"" ماعرفتش اخويا انت ادرى .. راه انت لي غاتزوج "" 

جاوبها :"" واييه و لكن .. كيف كاتجيك شخصيتها واش مناسبة ليا كيف كانشوفها انا ؟"" 

"" انا ماكانعرفهاش و حتى انت .. و بنادم ماكاتعرفو حتى كاتعاشرو .. "" 

"" اوى داكشي علاش قلت ليك حاولي تقربي ليها تصاحبي معاها .. و من بعد حطيني ليها فالصورة "" 

عاودت جلسات قدامو و قالت :"" اشناهو دابا فاخر ايامي غانولي مرسول الحب .. ندي خبارك و نجيب خبارها .. هاد الحزاق ماشي الستيل ديالي ""

شاف فيها .. شافت فيه .. ضيق عينو ..لعبات بفكها بين اليمين و الشمال .. حل فمو و ترقبات اش غايقول ..

زياد :"" بحلاوتك "" 

تبسمات و رجعات لبلاصتها و قالت :"" دابا هضرتي "" 

عوج وجهو و قال :"" اوى الله يلعن ترابيك  "" 

جاوباتو كاتبسم و تفقص فيه  :"" انتوما لي مربييني .. ماكاين لاش تلعن راسك .. و قول ليا اشنو ندير "" 

تقاد فالجلسة و قال :"" غاتقربي منها .. حاولي تقربيها منك بحال هدى .. حتى تيق فيك و تولي تعاود ليك " 

جاوباتو و قالت :" اويلي  لا هادشي منافي لاخلاقي اخويا "" 

جاوبها ساخر و قال :"" اخلاقك ؟!!"" 

جاوباتو متراجعة :"" شبه اخلاقي .. مهم كاينة ريحتهم .. و لكن تسنى مني نجيب ليك اسرارها .. غير تغعد اوليدي هادي ماغانديرهاش "" 

جاوبها و قال :"" اكيد لا ماشي لد*ك الدرجة ..  غير عرفي ليا اشنو تحت راسها .. اشنو كايعجبها هكا .. "" 

جاوباتو :"" ااه زعما نسهل عليك الطريق توصل ليها ؟"" 

جاوبها و قال :"" هااا كدااك ... انا بغيت نتقرب ليها بلا بيك و لكن هي ماكاتحملنيش و ماكاتعطينيش فرصة "" 

طلعات و نزلات فيه و قالت :"" وا بصراحة ماكانلومهاش "" 

جرها من شعرها تكاها على حجرو و برك يطرش و هي كاتلوى و تغوت ..

الاء :"" اااح شعري .. صافي صافي كانسحب كلاامي زيبن الرجاال انت "" 

طلقها و شافت فيه كلها مشنتفة و قالت :"" فراسك شعري كايطيح غير بسباب النتيف ديالك .. جمع معاغلك شوية .. انت حاليا فوضع مايسمحش ليك تحغر عليا "" 

شاف قدامو تن*د و قال :"" ااااه .. تلات بيك الايام ازياد تولي خاتم فصباع البراهش "" 

ضحكات و عنقاتو بدراعها و قالت :"" اييينا ايينا على البرهووش كبر و بغا يدير المراة و الترييكة  ""

--------

في الصبااح ... خارج زين ال**بدين باتجااه  المعمل و كلو امل باش كولشي يدوز بيخير ..

اما عائشة دخلات عند شيماء كاتفيقها و قالت :"" نوضي ابنتي .. ماخداماش ؟ "" 

جاوبتها و هي كاتقلب فبلاصتها و قالت :"" لا .. راه قلت ليك منظمين شي رحلة و انا مامشيتش "" 

جاوبتها  :"" و كوون مشيتي ابنتي تفوجي شوية "" 

"" ماعنديش مع داك التبرهيش لي كايديرو و زايدون .. فلوسي زايدين فينا بقا ليا غير نخسرهم على الخوا الخاوي "" 

جاوبتها و هي كاتقاد عليها الغطا و قالت :"" اوى نعسي ابنتي خااطرك "" 

خرجات  من البيت و مشات تكمل فطورها ..

------

دخل زيد لغرفة الاء .. ياله غايقول فيقي و هما يخرجو عينيه .. لقاها جالسة و شادا البيسي قدامها و عينيها طايحين بقلة النعاس و تحتهم كحل  .. و مع دلك خارجين في الشاشة و كاتبسم ببلادة .. دخل ووقف عليها و قال :"" عاااوتاااني سهراانة لوجه الصبااح المسخووطة واااش ماكاتهديييش ... واااش هادشي غاايهرب "" 

هزات عينيها فيه مبوقة و قالت :"" وااايلي .. وصل الصباااح "" 

جاوبها زيد بعتاب :""وصل الزمااار و انت ماتزعزعتيش من بلاصتك من الباارح .. غاتمشي تقراي هكا .. معاش داخلة؟ "" 

حدرات عينيها كاتحاول تركز:"" على حنا اشمن نهار "" 

جلس حداها و دار يدو فحنكو بتحسر :"" يااربي و اش هاد البلية.. غاتحضري بهاد الحالة لدرس و تركزي .. لا بلاتي نصحح واخا تنعسي 12 ساعة متابعة ماغاتشدي حتى حرف واحد "" 

ناض نطر البيسي من يديها و حيد الوسادة من ظهرها و خشاها في سريرها بالجهالة و غطاها و ض*بها بالوسادة و قال :"" ركدي مااتمشييش .. اخرتك غاتطلبيني ندير ليك محل تبيعي فيه البغرير "" 

وخرج كاينغر .. عنقات الوسادة باش ض*بها و تمغطات فبلاصتها كاتقول :"" كانت باقية غير حلقة و نكملو .. ماعليش ننعس شوية و نوض نكملو  ""

جمع زياد مواعن الفطور و غسلهم .. قرر يجمع الدار شوية بما وصلات 9 حيت الاء باقية ناعسة و خاصو يفيقها .. و هو عارف بلي هي داخلة مع 10 ...

منين سالا مشا لعندها .. دفع الباب بالشوية و دخل.. و كيف توقع باقية ناعسة .. دخل تحنى عندها و ململها .. و ماتحركتش .. الانسة ياله تلاقات بنعجات الاحلام غاديين بيها عند جونغ سوك .. رجع ململها و كايعيط اسمها عاد حلات عينيها كايتلصقو .. و قال

زياد :"" نوضي 9 هادي "" 

جاوباتو و هي ناعسة و قالت :"" ماغادياش بعد .. مني "" 

رجع ناض و قال :"" ضبري راسك .. انا غادي لشغلي .. و حاولي تحداكي و ديري الغذاء بلا مانهضرو حنا .. غادي نرجع قبل من الجاموعة ""

جاوباتو بتدندينات و خرج خلاها .. 

خرج من الباب .. و بانت ليه شيماء هازا قفة و لابسة جلابتها غادية .. مشا عندها كايجري تمشا فجنبها .. غير شافتو و هي تدور عينيها كاتن*د .. 

تبسم ليها :"" بغيت نسولك .. واش انت كاميرا ؟"" 

هزات عينيها فيه معوجة وجهها مستغربة .. 

ضحك و قال :"" حيت فينما كانشوف فيك كانتبسم و نضحك "" 

عوجات فمها و قالت :"" سبحاااااان الله .. تا سيير فحالك الجمعة هاذي واش ماكاتمركش ""

جاوبها و قال مازال ممازح :"" لا عادي .. علاش غانمرك..انت لي خاصك تمرغي معدباني هكا "" 

جاوباتو و قالت :"" جوابك خديتيه 300 الف مرة .. مرغ انت و قلب عليا الله يرحم جدك .. صبحنا عالله "" 

مشات و تبعها كايتبسم .. صدق لاصقها حتال السوق و حتى هو صدق مقدي معاها تقدية ال****و .. و رجعو و هي باقي  كاتقمع فيه و هو ماعندووش الدم لي يطلع ليه ... 

دخل للدار لاح التقدية فالكووزينة و طاار كايجري لبيت اختو .. حل الباب و دخل كايململها بالجهد و كايقول :"" الاء .. الااااء نوضي لمك عندك ماديري نوووضي عتقي خوك ""

دارت معنقا وسادتها و قالت :"" اوووبا .. وي غووريييه "" (اوبا .. ما الخطب )

رجع ململها و قال :"" واا تيي نوضي المصيييبة "" 

رجعات دارت و قالت :"" نيييغاا نوول تشووااهييه اوري جونسووكي "" 

جلس على ركابيه و كايشوف فيها و قال :"" هاد الدرية اش كاتقوول .. ولات تهضر بالشينوية ؟؟ الاااااااااااااء "" 

و هنا قفزاات و نااضت عيينيها حمرين و تحتهم كحل مشنتفة حاالتها كاتشوف قداامها .. ياله غاترجع تنعس و شدها جرها بالزز وقفها ..

بدات كاتغبن ليه و تحاول ترجع للسرير و هو كايجرها و قال :"" ماغاترجعيييش .. اتفااق الباارح داابا غاتبدااي فيه "" 

هي كاتجار كاتغبن و كاتقول :"" وا بعاااد مني .. سير تمووت انت و التخربيق ديالك وااا خليييني ننعس "" 

جرها و قال :"" و بربي لا طلقتك .. زيدي تغسلي وجهك "" داها للحمام غسلو ليها بالزز منها .. جمع ليها شعرها شفنجة مرونة .. و رجع خرجها جلسها قدامو فالسداري و شد يديها كايوغضها و هي كاتماوت ليه كل شوية تبغي ترجع لور و هو كايشدها .. 

زياد :"" الاااء توغضي معاايا لمك راني وااقف عليك  .. "" 

جاوباتو و هي كاتذمر و قالت :"" هانتا ننعس غير شوية مزال و .. "" 

وقفها و قال :"" وااالو .. دااابا نييت ""

-------

قدام بااب دارهم .. واقف زياد كايطل غير براسو .. و الاء تحت راسو حتى هي كاتطل و كاتكمع .. و كاتصنت ليه اش كايقول :"" هاانتي .. كيف قلت ليك .. غاتمشي عندها دقي و تقولي غاع داكشي لي حفظتك .. ياله سيييري "" 

رجعات كاتقول ليه :"" حشوومة عليبك و الله حتااا غاتحااسب على هاذشي لي كاادير فيا .. "" 

خرجو عينيها ف100 درهم لي دارها بين عينيها .. خ*فاتها كاتشم فيها و هو يركلها حتى طارت لصقات فالباب قداامهم .. ضارت كاتحكها و كاتخنزر فيه و هو من داخل عتبة دارهم كايتحلف عليها .. و كايشير ليها بيدو بااش تدق .. 

جمعات 100 درهم دارتها فشونها و دارت للباب و دقات .. 

دارت عند خوها ..تحل الباب و هو يسد بابو و بقا يطل من شقة .. 

خرجات عندها شيماء تبسمات و سلمات عليها ..:"" اهلا الاء لاباس ؟"" 

غير حققات فوجها و رجعات قالت :"" اويلي مال وجهك "" 

تبسمات الاء كاتمسكن و هي كاتلمس وجهها و قالت :"" الهموم و المشااكل و المطااارق اختي .. هاااد الحياااة صعيييبة "" 

ووركات عليها .. زاد قلق شيماء و خرجات عندها و قالت :"" علاش اشنو عندك اختي .. الى عندي فاش نعاونك مرحبا "" 

شدات الاء يدها و قالت :"" اه اختي .. ماكاينة غير انت تعاونيني .. "" 

جراتها تدخلها و هي كاتقول :"" اجي ندخلو بعدااا "" 

وقفاتها الاء و قالت :"" لا ماعندييش الوقت .. انقولك بالخف و نمشي "" 

جاوبتها بقلق و قالت :"" اياه اختي .. فاش نعاونك "" 

جاوبتها الاء كاتمسكن و قالت :"" كيف شفتي دابا انا عايشة غير بين زوج خوتي .. ماما ماتت و انا صغيييرة و بابا مات هادي 5 سنين .. و خلاونا مع بعضنا لا حنين لا رحيم .. مقاتلين مع الزمان و ماعايشينش كيف الناس "" 

جاوبتها شيماء كاتواسيها :"" حاسة بيك اختي ماعليييش مكتااب الله كايتصرف " 

جاوبت الاء و قالت :"" حمد الله .. الحمد الله .. خويا عزييز عليه ****و.. البارح شنق عليا و حلف عليا نطيبو ليه اليوم .. منين مات بابا الله يرحمو مابقا دااقو و انا اختي ماكانعرف منين نجي الطيااب .. و الى ماطيبتووش غايسلخ طااسيلتيي "" 

دارت شيماء صبعها على خدها و ربعات يدها و قالت :"" اوييبيلي على يسلخك على ال****و .. مالو تسطى .. يطيبو هو نيبت اش كايدير .. وا منيبن خرج تقدااه هااد الصبااح يكمل خييرو لاش يحغر عليك انت مسكينة "" 

خرجو عينين زياد ورى الباب لي كان كايتصنت و قال :"" ناااري على الصفرييطة بنت الحراام غرقات ليا الرواايض ""

نفات الاء دغيا كلامها و قالت :"" زيااااد ؟!!  *علاات صوتها و كاتعبر بيديها و تسبل بعينيها * زياااد رااه الظراافاات القلب الكبيير و الحنيييين .. الحداكة و الرجووولة ..سعداااات لي غاتزوج بيييه راااجل ديااال الزمااان ... "" 

ضحك زياد كايلعب برجليه و قال :"" ااااح على برهوشتييي ...يتوووب علييك الخواادرية .. ""

دارت شيماء يد على يد و قالت :"" و شكوون؟  .. الاستااد ؟!.. كايبان بعقلو ماشي ديال يض*بك على ****و "" 

جاوبتها الاء بهمس و قالت :"" هاذاك راه ساايكو اختي كايتسيف كيف الجن منين كايتعلق الامر ب****و .. العااار عتقيني و وريني كيفاش نطيبو قبل ماتوصل ال12 "" 

شافت فيها شيماء شوية و قالت :"" دخلي نكتب ليك الطريقة و نفهمك "" 

جاوبتها و قالت :"" ماكاينش الوقت .. ياك خالتي عائشة كاينة .. قوليها ليها و اجي انت معايا عاافااك "" 

تن*دات شيماء و قالت :"" صافي واخا .. سيري سبقيني .. انا نلحق عليك "" 

تبسمات الاء و قالت :"" شكرا بزااااف ""

مشات رجعات و دخلات شيماء تعلم خالتها ..

دخلات الاء و شقمها و قال :"" كنتي غاتخرجي عليا حظي فمك اش كايخرج .. "" 

عوجات فمها و قالت :"" شوف ااه بلا ماتبقا تأمر عليا انا راه ناعسة غير ساعة و نايضة ن**** باش نتصاحب مع الكراش ديالك .. ورخف عليا الله يرحم باك "" 

ربت على كتافها بزوج و قاد شعرها و قال :"" عاارف اختي غاتقضي ليا الغرض... نعول علييك "" 

جاوباتو و هي كاتفوه  و قالت :"" واخا ... وا سير غبر ماتبقاش دور حدانا باش البنت تاخد راحتها "" 

جاوبها و قال :"" ماتخافيش ماغانبانش ..  *قرص حنكها و خرج كايقول * وا عندااك .."" 

جرات قنت شفاهها كاتعوج و قالت :"" سير ..سييير غباارة تغبرك .. اخر يامي وليت دايرة عقلي فعنااب لاعب ليا دور روميو هنايا  .. *سمعات السرسار * هااه ها جولييت كاتدق .. *تمات غادية تحل * الله يحرقكم بزوج  ""

حلات الباب و تبسمات فوجهها و قالت شيماء:"" اوى ها انا جيت .. كاينة عير بوحدك ؟"" 

جاوبتها الاء و قالت :"" اه اه ... خويا يمكن خرج و لاخر فالليسي .. يعني ماغايبرزطنا حد  ""

تبسمات ليها شيماء و قالت :"" واخا .. "" و دخلو ..

دخلو للكوزينة .. و شافت شيماء فالاء و قالت :"" ياله جبدي الخضرة نقيوها هي الاولى .. و من بعد نصبوها ..

قالت الاء :"" واخا "" 

جرات القفة و بدات تجبد و تعطيها .. غسلوهم و الاء كاتشوف .. 

حتى قالت الاء:"" اويلي كانشريو القرعة هكا محلولة ""

ضحكات شيماء و قالت :"" اش كايسحاب ليك كايشريو قرعة كاملة يجيبوها للدار .. كلها كايشري قياسو و زايدون راك كاتغسليها و كاتض*بي الجناب تحيديهم .. اكيد ماغاتحطيهاش بلا غسيل .. *شافت فيها بالجنب ضاحكة و قالت * ماكاتعرفي ميين تجي لاكوزينة يااك ؟!" 

شافت فيها الاء و قالت :"" كايعجبني نطيب و لكن بخاطري .. بلي مشهياه ماشي بزز مني .. و انا هادشي ديال ال****و و الرفيسة و الويل كايعصبني حيت كتير و ماكانعرفش ليه .."" 

ضحكات شيماء و قالت :" غير كايبان ليك .. ساهل هادشي .. مرة و زوج و من بعد تولي تعرفي .. "" 

جاوبتها الاء و قالت :"" اش غانعرف .. لي بغا شي حاجة ينووض ليها راسو .. خدامتهم انا "" 

انتابهت لطريقة كلامها و شافت فشيماء لقاتها حتى هي كاتشوف فيها باستغراب .. ضحكات الاء بهرج و قالت :" ها ها ها .. غير كانضحك .. خوتي مساكن ضروري نتعلم لشهيوات باش نبرعهم .. اكييد .. هما خووتي لي ماعندي غيرهم و ماعندهم غيري "" 

ضحكات شيماء و قالت :"" الله يخليكم لبعضكم .. و انا نبقا نعلم اختي .. ماعنديش مشكل "" 

تبسمات الاء و قالت :"" واش بالصح .. هي نعول عليك "" 

جاوبتها  :"" بطبيعة الحال .. الله اودي انت بحال اختي الصغيرة  "" 

شكراتها الاء و قالت :"" شكرا بزااف اختي .. بارك الله و فيك ..*تن*دت و هي ماتمسكن و تبوحط و قالت * ماكرهتش كون كانت عندي  ماما و لا اختي تونسني .. نشكي عليها  و نخرج معاها ... خسااارة "" 

جاوبتها شيماء باسف و قالت :"" ياك عندك صاحبتك .. البنت لي كاتسكن فالدرب الوراني .. مالها ظريفة و ديما كانشوفك معاها "" 

هزات عينيها فيها و قالت :" ا .. ااه .. هدى صاحبتي و لكن بعلوكة بحالي .. انا بغيت اخت اكبر مني .. لي تنبهني و تعلمني و تنصحني راك عاارفة "" 

تبسمات شيماء بشفقة و قلت :"" اوى صافي من اليوم فصاعدا اعتابريني اختك الكبيرة و باب دارنا مفتووح ليك .. غانعطيك نمرتي و نبرقاو نخرجو و ندوزو وقيت مع بعضياتنا "" 

خرجو عينين الاء و نقزت بالفرحة .. عنقاتها ضاحكة هي و ياها و قالت :"" شكرا بزاااف لهلا يخطيييك "" 

ضحكات شيماء و قالت :"" اوى شكرا ماكايناش بين الخواتات .. ياله خففي بد*ك باش ندركو الوقت "" 

و رجعت لخدمتها بوجه بشوش .. و دارت الاء لي قالت ليها و هي كاتشوف فيها بطرف عينها و كاتبسم .. ماكانتش كاتمتل منين هضرات على احتياجها للام و الاخت فحياتها .. فهاذا نقص كاتكبتو فداخلها و كاتحاول تتجاهلو او على الاقل تتعايش معاه .. و لكن داك الجانب اللطيف من شيماء لي التامساتو عجبها .. و الف لييه قلبها ...

وقفات شيماء قدام الاء و قالت :"" اوى هحنا سالينا .. فاش يفور من هنا لشوية طفي عليه ..حتى يوصلو خوتك من الجامع و سغي ليهم كيف وريتك .. عنداك تنساي تطفي .. "" 

عنقاتها الاء ضاحكة و قالت :"" سيري لهلا يحرق فيك شي عظم .. دابا ماكاينش لي يفكك مني "" 

ضحكات شيماء مربتة عليها و قالت :"" هانية خوودي رااحتك ... ياله انا مشيت "" 

خرجات معاها الاء و هي مزال كاتشكرها .. 

بعدما مشات ..رجعات الاء دخلات للداار كاتفوه .. مشات لبيتها جلسات فسريرها كاتمسد عنقها .. 

الاء:"" عييت بغييت غير ننعس اعباد الله  .. "" 

رجعات براسها لور كاتشوف فالسقف .. حتى غمضو عينيها و مشات ..

------

دخل زين ال**بدين للدار مخنزر و طالعة ليه القردة .. جلس فالصالة و رجع راسو لور مغمض عينيه .. شافت شيماء فخالتها .. و رجعو شافو فيه و قالت عائشة :"" رجعتي من الجامع و لا من الخدمة ؟ " 

حل عينيه و بقا كايشوف قدامو و قال :"" الخدمة باااح "" 

ندبو بزوج و قالو فمرة وحدة :"" اويلي .. "" 

ضحك ضحكة ساخرة و دغية جمعها ..

سولاتو شيماء و قالت :"" كيفاش .. تلاتة الخدمات كلهم طارو مايمكنش  "" 

شاف فيها و قال :"" وحدة فيهم رفضتها حيت اختاريت احسن 2 .. مشيت للاولى .. دخلت كانخدم مابيا ماعليا حتى نزل عليا بااطل .. خسرات ماكينة سباها فيا واحد الشارف فمو فيه غير سنة كيف ساروت الحبس .. نضت ندافع على راسي جاو منو .. قلت ماطالعاش ماطالعاش خلطت بنادم و خليتها ليهم ... مشيت للاخرى لقيت العافية شاعلة ليهم فالبوونج .. رجعت فحالي للجامع بردت فقصتي ... تلاتة الخداامي اعبااد الله جاو فخطرة و طارو بتلاتة فدقة هذا راه مااشي غير نحس .. انا راااه عييت من هاادشي "" 

و ناض طلع كاينفخ ..

شافت شيماء فعائشة باسى و لقات عائشة كاتحسر و دايرة راسها على يدها كاتتحسر عليه حتى هي ..

------

دخل زيد و زياد من الجامع..

اول حاجة دور زياد عينيه فالدار كان الصقيييل .. و ريحة .. ريحة الشياااط .. لقا خوه سبقو للكوزينة .. طفا على البرمة لي وكحات و خضرتها و لحمها لصقو .. و ال****و شم ريحة الحرااق ... شاف زيد فزياد و قال :"" دابا شناااهوا جايين معولين على ****و غانصدقو مغديين بالبيض بماطيييشة  .. "" 

جاوبو زياد و قال :" ماعرفت فين دييك الحمااارة لي مخلية هاادشي شااعل .. آاااالاااااااء"" 

خرج من الكووزينة لغرفتها .. حل الباب لي كان غير مردود و لقاها كاتشخر فاردة يديها و كاتعوم وسط ريوغها .. دخل و عطاها للجبهة .. حلات عينيها حمرين مبوقين ماعارفاش اش واقع .. كاتشوف غير فمو كايتحرك بلا صوت ... استرجعات وعيها شوية بشوية و كان وقفها جارها وراه .. غير شافت البرمة كحلة و خرجو عينيها .. و دارت يدها على فمها .. 

دار عندها زيد لاح عليها سربيتة و عيبها بسخرية و قال :"" اشنو تصدمتي ؟!! شفتي البرمة كيف كحلة كي سعدك ؟!!"" 

قربات ليها كاطل و كتدوز يدها على خدها و قالت :"" اويلي كيفاش حتى وكحات و البرمة كانت عاامرة "" 

جاوبها زيد و قال :"" كون كنتي كاتديها فقرايتك كون عرفتي بلي الماء كايتبخر مع ارتفاع الحراارة .. "" 

شافت فيه و تفرغعات كاتغوت و قالت :"" تا كييفاش المووضوع لي هضرنا فيه تلقى شي دخاش تخشي فيهم القرايا... و مالك كاتغوت .. ال****و درتو غير فضلا ..درتو غير ضحك على قبل هااد "" 

سد ليها فمها زياد و شاف فخوه كايضحك بتوتر .. جرها معاه و باقي كايضحك و قال :" ماعليش .. البرهووشة غاتبقا تحل في فمها .. اللهم نجرها .. انا غانمشي نجيب شي بانينيات "" 

جر معاه الاء خرجها ساد فمها و هي كاتعربط عليه .. ياله غايخا** عليها و هما يسمعو الدقاان .. 

تقدم زياد للباب .. حلو و وقفات وراه الاء .. لقاو شيماء واقفة و هازة فيديها طويسة .. شافت فزياد لي تبششات ملامحو فورا .. و نقلات نظرها لالاء متجاهلة ليه و قالت مبتسمة :"" هذا سمن حر ديال خالتي .. سيفطاتو ليك ..عالله تكوني باقي ماسغيتي .. ال****و بلا سمن كايجي ناقص .. "" 

تبدلو ملامحها منين شمات الريحة لي كاتخنق و قالت :"" هااد الرييحة عندكم ؟!!" 

جاوبت الاء و هي كاتغبن و قالت :"" غفيت من هنا .. و خوراتني البرمة من هنا .. ممكن نرحل عنكم اختي .. حيت من هنا للعشية غانبقا نسمع غير مختلف الدروس على السهير و الاهمال و القرايا و قلة الحداغة .. و حتى على الشارجور لي كاننساه لاصق .. احمبااك تبناوني "" 

ض*بها زياد على قلقولتها و خنزرات فيه كاتحكها .. قالت شيماء :"" و فين كان عقلك شحال و انا نوصيك ماتغفليش و غير شوية و طفي .. اصلا الوقت كولو و عينيك مشقلبين ماشابعااش نعااس .. راه نيت هادشي علااش مامزيانش السهيير  "" 

هزات الاء راسها لسماء و طاحو كتافها و قالت :"" لا ياربي عافاك ماشي حتى شيماء "" 

ضحكات شيماء و قالت :"" صافي ماعليش هادشي كايوقع .. اجيو احنا اليوم عارضينكم تتغداو معانا ""

------

جالسين كلهم مجموعين على الطبلة فصالون دار زين ال**بدين ..

زيد و زياد .. الاء و زين ال**بدين ... عائشة و شيماء كانو فالكوزينة كايوجدو الغذاء باش يتحط .. 

نطق زيد و قال :" غير سمحو لينا اخويا .. را"" 

ماكملش كلامو منين قاطعو زين ال**بدين و قال :"" اش كاتقول بالع** مرحبا بيكم حنا غراب؟ الله يهدييك .. "" 

قال زياد :"" عولنا على هاد الحادكة زعما .. "" 

شاف فيها فجنبو حالا فمها و ناعسة على كتفو .. كايمشي راسها و ترجعو تاني ..

مد زيد يدو و عطاها بق*فادة حتى رجع راسها للقدام و  حلات عينيها و هزات راسها .. شافت فزين ال**بدين و كان على وجهو شبه ابتسامة .. ماشي لطيفة و ماشي ودودة .. ابتسامة تشفي و شماتة .. كايغيظها .. لوح راسو يمين و شمال .. غاظها و استفزها .. حتى ترعدات اعلى شفاتها العليا .. لمحها .. و هز حاجب مستغرب كايشوف فعينيها .. مالقات مادير .. حشمها بداك الحاجب المرفووع .. و حدرات عينيها .. وتبسم و عجبو كيفاش هزمها بغرور رجولي ..

حطات شيماء الكصعة .. و حطات عائشة اللبن و الديسير و جلسو كايرحبو بيهم ...

بداو يتغداو و الدراري كايهضرو بدون توقف ..و الاء كاتغدا و ماشغلها غير اللقطة لي غادي تخرج نيشان لغرفتها و غاتنعس ..

رحبات عائشة بالاء و الدراري .. و قالت لآلاء "" ماوقع بااس ابنتي .. مرة اخرى تتعلمي مزيان "" 

ضحكات ليها الاء و كملات ماكلتها ..

بعد الانتهاء من الغذاء .. كانو مزال جالسين مونسين بالديسير ..

كانت الاء مضاربة مع تفاحتها .. حتى زلق الموس و ض*بات يدها .. خرج دم و توترت .. شافو فيها خوتها .. ناضت شيماء و عائشة ..

شيماء:"" اجي .. اجي دغيا ها الحمام "" 

توترات اكتر و هي كاتجمع يدها و قالت :"" ا .. انا غانمشي نداويها فالدار .. "" 

جاوبها شيماء و قالت :"" تي غير اجي نداويها ليك علاش غاتمشي حتال داركم " 

ناض زيد و قال :"" ماعليش .. احنا نيت كنا غانمشيو تابعنا الخدمة ..غير سمحوو لينا و الله يخلف عليكم ..""  

تمات الاء غادية باش تخرج من بين السداري و الطابلة .. كان زين ال**بدين جالس فاخر السداري  .. تعكلات بشوية من الزربية لي كان مطوي .. و ماجات غير فيد زين ال**بدين لي دعمها بدون وعي منو .. و كانت شدات فدراعو بيدها المضروبة .. جمعاتها دغيا .. و قالت ليه:"" سمح ليا .. "" 

و جاوبها باماءة و قال :"" ردي بالك ""  

و خرجو بعدما شكروهم وودعوهم ..

------