آلاء و المنحوس

الجزء السادس

تكا زين ال**بدين فسريرو .. هز دراعو يديرو على عينيه ناوي يتصنت لعظامو .. حتى كايشم ريحة غريبة .. ريحة قوية و عمرو شمها .. بدا كايشمشم و يقلب مص*رها .. حل عينيه و بدا يشوف فكمو لي حاطو على وجهو .. و اذا بيه كايلمح نقطة دم متوسطة .. استغرب من وصولها لكمو .. و بدا يتفكر منين جات .. قربها لنيفو شمها كايقلب على مص*ر الريحة و كانت هي .. ريحة غريبة .. كاتغلغل فالاعماق بحال شكل فليو و النعناع .. و لكن ماشي ريحتهم .. كانت غريبة بشكل غريب .. كاتخليه يشمها و يرجع يعاود بدون اكتفاء .. استغرب متسائل .. منين جاتو هاد النقطة الحمراء لي بريحة غريبة .. ماصادف حتى حاجة بهاد الغرابة فهاد اليوم كامل.. 

و هو كايفكر .. تردخ الباب قدامو و دخلات عائشة لابسة نظارات القرب ديالها .. و هازا قاميجتو الكحلة .. رابطة غوباشتها و قالت "" هما زوج كلمات .. غانسولك و تجاوبني بلا لف و دوران "" 

قال بملل  :"" مالك الوالدة .. اش كاين ؟"" 

سولاتو بتحقيق امومي :"" كاتعرف شي شهبة  ؟"" 

غمض عينيه و تن*د .. قربات لعندو جلسات قدامو و خبطاتو بقاميجتو و صاحت :"" هضر .. كتعرف شي شهبة ؟"" 

حل عينو فيها و قال :"" و والواالدة .. واش مابقا لطاسيلتي غير شهبة .. منين جبتي هاد الهضرة .. " 

هزات القاميجة المكمشة و حلاتها و وجهات ليه الصدفة المكمش عليها شعر و مداتها ليه و قالت :"" هانتا .. شعرها لاصق فحوايجك .. اش وصل هاد الشعر لجيهة سدرك لاماعنقاتك ؟.. شووف نقوولك .. ماعنديش الولااد لي يدورو بالبنات فالزناقي .. راه نقول ليك و نعاودها  .. ماغاتزوج غير لي نختاار ليك انا .. "" 

جاوبها بانفعال بسيط  :" و الله الوالدة ماكانعرف شي وحدة .. ماعرفتش كيفاش وصل اصلا .. و لا بلاتي... صافي صافي عقلت .. را داك النهار بنت الجيران وحلات مع شي براهش فكيتها وطرا شي تخربيقات زلقات عليا و وحل شعرها فقاميجتي .. و الله العظيم ماكاين شي حاجة من داكشي لي فكرتي فيه .. واش انا ديال داك التبرهيش الوالدة ؟"" 

استغربات و قالت :"" شكون فبنات الجيران؟ .. "" 

رجع تكا و شاف فيها و قال بملل:"" و شكون فبنات الجيران كاملين لي شهبة .. راه غير وحدة "" 

خرجو عينيها و قالت :"" اخت التواام !!.. "" 

جاوبها و قال :"" اه .. هي "" 

جاوباتو كتأكد و قالت :"" اخت التوام الشهبة لي ماكاتحملهاش فكيتيها ؟!!"" 

جاوبها بملل :"" ايه "" 

بقات ساكتة .. هز عينو فيها و شاف فجنبو و رجع شاف فيها لقاها مصدومة فيه و قال :"" ناري الوالدة مالك كاتشوفي فيا بحال الى كاتشوفي فيهودي "" 

جاوباتو و قالت :"" و انت مسلم .. و لكن غير كاتكون اخت التوام قدامك كاتولي يهودي .. تا كيف درتي حتى عاونتيها "" 

جاوبها و قال :"" وا الوالدة .. راني ماشي ميت القلب لد*ك الدرجة .. البنت احتاجتني و عاونتها .. بلا ماتزيدي فيه .. و زايدون بان ليا واخا هكاك شجيعة و بنت الناس بحال خوتها واخا فيها شي فعايل "" 

جاوباتو و هي نايضة  :"" وا هي بنت الناس غير انت اولدي لي واحلة فقرجوطتك .. ماعمري سمعت عليها كلام العيب .. "" 

شاف فامو و قال :"" دابا اشنو انبقاو نهضرو فيها .. صافي عرفتي الزغيبات منين جاو .. واخليني نتصنت لعظامي .. "" 

لاحت القاميجة على وجهو و قالت :"" فك الزغب منها بشي مقص.. مابغاش يتفك ليا  و جيبها نغسلها .. "" 

خرجات و حيدها من وجهو كايتن*د .. مد يدو للمجر حداه و جبد مقص .. جلس مقاد .. ياله غايقطع و لمح شيء لفتو .. جزء من الزغب ابيض اللون ...و مع سواد القاميجة .. كان وااضح مزيان و مفصول على الجزء الاشقر .. قرب اكتر لعينيه كايحقق و هز عينيه كايتخيل و يتفكر شكل شعرها .. و رجع كايشوف فيهم .. فكهم بالشوية و قدر يعزل تلاتة الزغبات و سرحهم فوق القاميجة .. كان جزء طولو فقط شي سانتيم  .. و ماكانش صعيب عليه يستنتج بلي كان من جيهة الجذر .. و بما ان الجذر لي كاينوض ابيض .. اذا فاللون الطبيعي للشعر هو الابيض .. و دغيا نقل عينو للنقطة الدم و رجع شمها .. تفكر فاش تجرحات و ناضت متوترة كاتسد يدها و لكن منين تعكلات شدات فيه .. و تطبعات فيدو .. و مشات دغيا و تبعوها خوتها .. جلس مقااد اكتر مركز بكل عقلو كايربط الامور ببعضها .. اليوم لي كان لابس هاد القاميجة كان يوم كلو حظ لقا فلوس و لقا تلاتة الخدامي في مرة وحدة .. كان غايطير ليه البيسي ولكن رجع على يدها هي .. هز عينيه كايرجع الذاكرة لابعد قليلا .. لعيد الاضحى لي فات ..شهور قليلة ..

#فلاشباك ..

كان فالسطح .. خرج الحولي يدبحو .. كان حولي ق**ح رغم صغر حجمو و هو كايتصارع معاه زلق و فلت من يدو .. و ماهرب غير من جيهة الحافة .. بحيت نقز و ماجا غير فالزنقة .. شيماء و عائشة غوتو و هو ناض كايجري يطل .. و متأكد ان نحسو خلاهم بلا حولي هاد السنة .. حتى كايلقا زيد كايدبحو و الاء حداه شادا ليه ..

هبط كايجري و لقاه كايتركل نوعا ما .. 

شاف فيه زيد و قال ليه :"" راني حللتو كان باقي حي.. و اللهتا عندكووم الزهر "" 

جلس زين ال**بدين فوق الطروطوار و قال :"" هادا الله "" 

ضحك زيد و قال :"" غير قول ليا كيف طرا ليك .. كون ماكنا دايزين انا و الاء راجعين من عند مول المضى كوون بقييتو بلااش .. انا ماقشعتوش حي حتى قالتها ليا هاذي "" 

نغزاتو الاء و قالت : "" هاذي راه بسميتها "" 

جاوب زين ال**بدين و قال :"" و اللهتا جيتني كيف الدرهم الحلال .. هاد الكميشة حتى هو كان كايطير من خفو  .. زلقت و هو نقز نتاحر .. كونت غانتبعو ندير بحالو بالفقصة ... "" 

ضحك زيد و الاء رجعات لور ورا خوها كتشدها .. حتى خرجات شيماء و عائشة لي كاتولول

رجع للحاضر و عاود تفكر ...

تفكر لقطات كتيرة كانو ض*بات حظ و مانتبهش ليهم ... و لكن القاسم المشترك بينهم  .. وجود الاء فالمكان ... 

نفض هاد الافكار من راسو .. اكيد كايخرف .. هو عمرو تيق بلي البيل**نات موجودين .. و بعض الامور لي حدتات بمجرد صدفة خلاتو يتشتت و يمشي فطريق المعتقدات المتخلفة .. لعن الشيطان .. فك الزغب و حطو فوق المنضدة و ناض خرج .. هبط للتحت و عطاه لامو فالكوزينة .. خداتو من عندو و لاحتو فلاماشين الموجودة تما و رجعت منهمكة فشغلها .. و قف كايخمم و يلعب بموسطاجو .. شافت فيه امو و قالت :"" فاش كاتخمم ؟"" 

هز عينو فيها و قال :"" فالبيل**نة "" 

خرجو عينيها و قربات لعندو بلهفة قالت :"" لقيتيها ؟؟"" 

انتابه لشنو قال و  لعن هاد القاعدة لي فيه .. بحيت الى سولو شي حد فاش كايخمم .. بدون وعي منو كايقول الحقيقة فاش كايخمم و دابا غادي يخصو يبرر ليها اشنو قال .. تلبك و تقاد فالوقفة و قال :"" لا .. غير .. وليت كانقول خاصني نقلب عليها نيت "" 

فرحات و قالت بلهفة :"" صافي تيقتيني دابا .. و غادي تبدا تقلب ؟؟"" 

جاوبها و قال :" مابقا ليا حل غير نتيقك .. انا غادي نقلب عليها حتى انا .. و لكن خاصك توصفيها ليا كيفاش دايرة نييت بالضبط "" 

جاوباتو و قالت :"" اوى راني ما مرة مازوج شرحت ليك .. كاتكوون بيضااء بلقة .. شعرها حتى هو .. غالبا كايكونو زوينات .. و عيونهم بيهم لون غريب كايبري صاافي .. و اشنو اخر .. اه .. دمهم "" 

جاوبها :"" دمهم !!؟"" 

" ااه .. قالت ليا دمهم ماشي عادي ..دم فيه ريحة .. "" 

سولها "" ريحة كيف دايرة ؟"" 

جاوباتو :"" الله و اعلم اولدي .. مهم قالت ليا ريحة غريبة كاتشد وو غريبة .. "" 

رجع ساهي كايلعب بلحيتو  :""ماتكونش د*ك الشوافة زادت فيه و تكون زعما غير شهوبية عادية و زروقية عين عادية ..؟"" 

"" لا اوليدي .. مووحال تكذب فهادشي  ؟ ""

رجع كايفكر و قال :"" و هااني لقيتها غااع .. ضروري نتزوج بيها؟ "

جاوباتو :" ااه ... على كيفاش غانبطلو هاد ا****ة .. خاصها تبقا معاك حياتك كاملة .. "" 

غوبش و رجع كايفكر .. آلاء البنت لي من ديما كانت مص*ر ازعاج ليه .. مستحيل يتزوج بيها فقط لهادشي .. و االاهم .. مايقدرش يستاغل شخص كيفما كان و قدما كان كايكرهو فقط لمصلاحتو الشخصية .. انفض هادشي كامل من عقلو و قال لامو :"" الوالدة انا الفوق "" 

و طلع و خلاها كاتشوف و قالت "" يااربي تشووف من حاال ولدي انت عالم و عالي "" 

دخل لغرفتو غادي جاي .. كايفكر .. كايتمرجح بين العقل و المنطق و بين الدلائل و الصدف لي بين يديه .. مايمكنش كولشي هادشي يكون غير صدفة .. كولشي الامور كاتوجهو لكلام امو .. و كتأكد ليه صحتها .. مابقا ليه غير يقطع الشك .. خدا داك الشعر و كمشو و لصقو فسكوتش و دارو فجيبو .. و هبط .. علم امو بخروجو و خرج ..

------

اللحظة لي دخلات الاء و خوتها للدار .. مشات للحمام تغسل يدها .. تبعها زياد .. جبد دواء .. مسحات يدها بغات تاخدو من عندو و شد يدها .. و قال :"" اري انا نديرو ليك "" 

رفضات :"" لا بلاش .. انديرو راسي "" 

جر يدها و هو كايشوف فيها بعتاب  .. باقي النزيف ماحبسش و مسحو بكليني** .. دار ليها الدواء بقطن و ضمدها ..

جمعات يدها كتقادها .. هز د*ك الكليني** و شمو .. و قال :"" علاش هربتي هكاك خليتي الناس كايشوفو "" 

هزات عينيها فيه .. غوبشت و نطراتها من يديه و قالت :"" علاش كاتشمو  .. واش انت حمق "" 

تبسم و قال :"" ريحتو ماخايباش .. علاش انت حساسة من هاد الناحية "" 

جاوباتو و قالت :"" انا ماكانحملهاش ... و ماكنحملكمش تشموه قدامي .. فينما نتجرح كاديرها .. انا هربت باش مايشدوش يدي و يشموها حتى هما .."" 

ضحك عنقها و قاال :"" ماعندهم منين يعيقو و ماتبقايش حساسة من هاد الناحية .. ريحتو ماخايباش و انا بعدا كاترولا**يني .. ماتعمريش لخوك واحد القرعة ؟ "" 

ضحكات و ض*بات كتفو و قالت :"" بعد مني كولشي عندك ضحك "" 

دخل زيد و قال :" داويتي يدك .. ياكما ض*بة غارقة""

جاوبو زياد :""  لا لا غير من الفوق .. "" 

شاف فالاء و قال :"" راني شريت صباغة الشعر .. اجي نديرها ليك .. شعرك الابيض بان "" 

شافت فالمراية و زياد رجع شعرها للور و قال :"" اااه ..  رااه باان لييك "" 

شافت فزيد و قالت :"" على ماخدامش .. ياك قلتي تابعاك الخدمة "" 

جاوبها :"" اليوم جمعة كاينة شي قرايا هاد العشية؟ و زايدون انا قلت هكاك على قبلك انت .. ياله تبعيني انا فالصالة "" 

خرجات للصالة .. لقات خوها كايخلط لي برودوي .. و قال :"" ياله اجي تجلسي "  

جلسات قدامو و طلق شعرها و بدا يمشط ..

جلس زياد حداهم كايبقشش في التيليفون ديالو ..

هزات الاء يدها كاتشوف فالجرحة و قالت :"" بابا .. ""  

جاوبها و هو خدام :"" امممم "" 

سولاتو :"" علاش انا دايرة هكا؟ "" 

هز زياد عينو فخوه لي حتا هو بادلو نفس النظرة ... و رجع قال لختو :"" رجعنا تاني لهاد الموضوع؟ "" 

قال زياد :"" غير خليها كاتقلب على شي جواب غريب ماكاينش .."" 

قالت الاء :"" كون لقيت منين نعرف كااعما ندل راسي ليكم نتوما .. بااينة فراسكم شي حاجة و ماباغيينش تقولو .. "" 

جاوبها زيد و قال :"" خوي راسك اختي من هاد الشكووك .. و لي قلنا انا و خوك هو لي كاين و ديري فبالك ماباغين غير مصلاحتك .. "" 

جاوبت و قالت :"" واخا اخوتي .. ماقلتو عيب ..فاش كانبقى نفكر فيها بعض المرات .. كانقول تقدرو تكونو مخبيين عليا لمصلاحتي حيت اكيد داكشي لي مخبيين خطير و ممكن غااع ندم علاش عرفت   "" 

قال زياد :"" انا رااه دييما كانقوول ختنا الاء ذكية .. واخا ماعندهاش مع المواد العلمية "" 

جاوباتو و قالت :"" طنز طنز .. احح بابا بالشوية على زغيباتي خفاف دغيا كايطيرو ""

-------

كايتمشا زين فالشارع و يديه فجيابو .. و كايتترقب و يتسنا اي مصيبة تنزل على راسو كيف موالف يوقع ليه .. و لكن حتى حاجة لحد دابا مابانت .. و قرر يمشي لاي بلاصة و يشوف القدر اشنو مخبي ليه ..

غادي و غادي حتى كايبان ليه محل لبيع الالات المنزلية تحل جديد فمحيط السكن ديالو .. لفتاتو لافتة كبيرة حدا الباب مفادها قرعة لربح اخر اصدار من التلفاز الذكي كنوع من الدعايات .. و هنا جبد داك شوية السكوتش لي وسطو زغب الاء و قال :" اوى انا غانشوف بركة البيل**نة واش كاينة و لا مخي تخوورج "" 

دخل .. و خرج غابر وراء التلفازة لي هازها .. حطها بالشوية قدامو و بان وجهو لي كايفرنس و يضحك فرحان .. هز الزغب فيدو .. باسو و قال :"" سيري يا الاء .. لهلا يحرق فيك شيي عظم "" 

هز تلفازتو و مشا مضارب معاها للدار .. و لي داز من حداه يقول ليه مب**ك التلفازة الجديدة و هو كايجاوب ضاحك على غير عادتو ..

وصل للدار و دخل .. حطها فالصالة قدام شيماء لي ناضت جلسات كاتشوف مستغربة و قالت ::"" تا منيين جبتي هادشي ؟"" 

جاوبها و قال :"" ربحتها "" 

قالت ليه بتشكيك :"" ربحتيهاا ؟ تا قول منين جبتيها "" 

ضحك من جديد و قال :"" وا و الله حتى ربحتها .. واحد المحل جديد حل قريب .. دارو قرعة باش يروجو لمحلهم و جات فيا انا .. اللهم ليك الحمد  و الشكر .. دابا ماكاين غير الماتشات و الاكشن .. حيدو عليا هاد القرقاشة كرهاتني فعيشتي اكتر ماني كارهها .."" 

صاحت شيماء :"" خاالتي .. خاالتي اجي تشوووفي "" 

خرجات كاتجري من الكوزينة .. شافت التلفازة و تصدمات و قالت :"" تا اش هادشي " 

ضحك و قال :"" طبسيل التقلية "" 

ضحكات شيماء و قالت:""المسخوط ربح التلفازة "" 

قرصاتها عائشة و قالت :"" ولدي مامسخووطش الحلوفة  .. و انت كيف درتي ليها "" 

جلس تسرح مبتاسم و قال :"" ربي كبييييير "

-------

جمع زيد شعرها و قال :"" ياله ..انا ساليت نوضي و من هنا لشي ساعة دوشي.. "

جاوباتو و قالت :"" بسبابك دابا غاندوش و انا مافياش باغية غير ننعس .. هاد النهاار محلفيين فيا "" 

جاوبها و قال :"" النعاس مديور لليل .. ماشي للنهار .. احتارمي قوانين الطبيعة .. و عنداك تنعسي دابا و تخلي الحرام فشعرك تولي بلا شعر "" 

دقات فالطابلة و قالت :"" فال الله و لا فاالك "" 

نطق زياد و قال:"" خفتي على نصف جمالك ؟""

جاوباتو معوجة فمها و قالت :"" نصف جمال المرأة عقلها .. ماشي شعرها .. هذاك لي قال شعرها راه غير شي شاعر فاشل حياتو مقضيها جلوسا على قاعدته كايتغزل فاي حاجة كاتحرك قدامو "" 

ضحك و قال :"" حااقدة "" 

جاوباتو :"" و افتشخر "" 

جاوبها :"" تباركالله على السي علاء"" 

جاوباتو و كاتض*ب على سدرها كيف كايديرو الدراري :"" الللهحافضااااك خويا الحبيب ""

تحنا يهز صندالتو و هي تهرب لبيتها ..

------

ركب زين ال**بدين التلفازة .. و وقف قدامها كايشوف و كايفرنس ..

شاف فامو و قال :" هانتي الوالدة .. غاتولي تشوفي نيف منار اشنو فيه .."" 

ضحكات و قالت :"" الله يرضي عليك اولدي .. و رزق و جابو الله .. حمد الله "" 

قالت شيماء:"" و اللهيلا صدقت وااعرة .. زهر الى جا كايجي فخطرة "" 

شاف فيها و رجع شاف قدامو ساهي و قال :"" ااه الزهر .. عندك الحق ""

طلع لبيتو و خلاهم .. جلس فسريرو كايشوف قدامو و كايخمم ... هز د*ك السكوتش لي فيدو و شاف فيها .. و قال :"" واااو .. انا منحووس لدرجة الحل ديال نحسي طاح بين يدين د*ك البنت بالضبط.. *هز راسو و كمل * و لكن بااش نكوونو صريحين و نخلي مشاعري على جنب .. د*ك البنت واخا هكاك شجيعة و ماخايباش لد*ك الدرجة .. *شاف فجنبو و هز التريكو لي فيه بقعة الدم و شمو و قال * سبحااان الله رييحتوو نيييت فشكل .. عمر هادشي كاان يطيح على البال ... كلام الوالدة صدق بالصح .. و فوق هادشي كاامل كاانت ساكنة غير حدايا .. 19 العام و هي غير قدامي ..  مخبية و متخفية .. ااه .. اكيد والديها غايخبيوها و هادشي لي كايفسر غيابها فالصغر ..  و اخييرا ياربي .. و لكن ماغانقول هادشي لحتى حد .. خااصة الواالدة لا تصدق ملصقانا فبعضنا باي تمن .. و لا انا لا هي مناسبين لبعضنا .. و اللهما متيق هاادشي داير فحاال الحلم ..لا بلاتي نعاود نتأكد .. حط الشعر فوق المنضدة و حط التريكو و ناض خرج و قال :"" ياااربي تستر و تحفظ "" 

زاد  خطوات و هو  كايشوف حواليه و كايتسنى  ... مشى خطوات لابأس بيها فوقت لابأس به و باقي ماوقع والو ..

وقف كايخمم و قال :"" اشنو زعما النحس يكون طار فخطرة و لا كيفاش زعما  "" 

ماجا فين يكملها حتى سمع صوت امرأة كاتغوت من الفوق :"" عنداااااك " 

هز راسو و بووم .. طاح عليه محبق و طااح هو معاه كااو و تجمعوو ولاد الدرب كايتغااوتو ...

حل عينيه بتتقال .. كايلمح .. صورة امو لي كاتطل عليه ... تابعاها صورة اختو .. و زوج من ولاد الحي لي بلاشك هما لي وصلوه للمشفى ..

سمع صوت امو كاتقول :"" ولدي ... لاباس دابا "" 

حل عينيه مزيان و بدا يستوعب اش كاين ..  حل فمو و قال :"" اش وقع ؟؟ "" 

جاوب واحد من الشباب و قال :"" راك وقفتي تحت بالكو ديال واحد السيدة كانت كاتسقي غرسها و فلت ليها واحد جا فيك .. "" 

رجعات سولاتو امو و قالت :"" باش كاتحس اوليدي "" 

جاوبها و قال :"" حمد الله الوليدة .. غير راسي شوية كايضرني "" 

قالت شيماء:"" قال الطبيب ماشي شي حاجة صعيبة .. غدا غاتقدر تخرج "" 

شد راسو و قال :"" و اللهما عرفت كيف وقع ليا .. من امتى و انا هنا " 

جاوباتو امو :"" شي ربعة السوايع دابا .. راه 6 العشية هاذي "" 

اومأ براسو و رجع غمض عينيه ..

استأذنو الدراري خرجو و بقات شيماء و خالتها لي قالت ليها :"" ابنتي مابقيت فاهمة والو .. و حتى كاتضحك الدنيا لولدي و كاترجع تصنكعها معاه .. اش بغات فوليدي مسيكين مابقا ليه غير الرااس .. واتجي فينما جاات تفووت ليا غيير رااس وليدي "" 

عنقاتها شيماء و قالت :"" ماعليش اخالتيي.. ""

------

جالسة الاء فغرفتها بعدما دوشت و لوات الفوطة على شعرها .. بقات بلا لونتي .. خرجات الماعن فاش كلات .. و تصادمت مع خوها زيد لي غير شافها قال :"" باسم الله الرحمان الرحيم كاتسيفي"" 

حطاتهم و قالت كاتطنز :" غير سمح ليا اخويا .. و لكن منين تزاديت ماكنتش عارفة غايكونو عندي عينين المش كايض*بو من كليومتر .. و كايقفزو خويا الكبير كلما خرجت ليه من شي قنت "" 

خبطها على راسها و قال :"" زيدي من الطنز .. كملي هاذشي .. غانمشيو انا و خوك للسبيطار  .. راه زين ال**بدين تض*ب فراسو نشوفو لا قدرنا نعاونو خالتي عايشة فشي حاجة "" 

جاوباتو و قالت :"" تض*ب فراسو ؟ عاد قبايلة كان قدامنا واقف صحيح كيف البغل "" 

جاوبها و قال :"" طاح عليه فااز قبايلة من شي بالكو  ""

"" ناااري على داك الصغع .. بصراحة ماكانآمنش بداكشي .. و لكن د*ك الهضرة لي كايقولو عليه .. زعما منحووس .. بعد المرات كاتجيني نييت بالصح "" 

حمر فيها و قال :"" الاء .. حشومة تقولي د*ك الهضرة على الجيران .. و د*ك الهضرة ماكايناش كلها و نصيبه و الحوادت كاينين فالدنيا .. مهم .. اجي نشوف شعرك .. خرج مزيان ؟"" 

حيدات الفوطة و قالت :"" اه .. اجي هاد المرة بغيت نصبغو بلون اخر "" 

جاوبها :"" اشمن لون "" 

تبسمات و عوجات راسها و قالت :"" بينك "" 

تبسم نفس تبسيمتها و عوج راسو و قال :"" على جتتي "" 

و خرج من الكوزينة كايعيط على زياد  .. خنزرات و تبعاتو .. خرج زياد من الحمام و قال :"" ياله "" 

شاف فالاء و قال :"" ديري سباكيتي للعشاء "" 

خنزرات فيه و قالت :"" غانديرها فعزااك "" 

 :"" يااااك ؟"" 

لبس زيد صباطو و قال :"" الاء .. ديريها الله يرضي عليك .. غانرجعو وراء صلاة العشاء لامطاولناش فالسبيطار "" 

جاوباتو و قالت :"" واخا .. "" 

ناض خرج و شاف زياد فيها و قال :"" غاتكوون فرماجتي تما .. منين ترجع غادي تمشي عندهم باش تديري الواجب يااك .. هادي فرصة اخرى فنفس النهاار باش تض*بي الحديد ماحدو سخوون  "" 

جاوباتو مخنزرة وهي كاتدفعو يخرج و قالت :"" سيير سييير .. انا لي ماعند جدي عقل تاابعاك انت وهبااالك .. قالك فرمااجتي  "" 

شاف زيد فزين ال**بدين مربت على كتفو و قال :"" الحمد الله على سلاامتك "" 

جاوبو زين و قال :"" الله يسلمك اخويا .. "" 

ضحك زياد و قال :"" اوى فلتي منها تاني اصغع .. "" 

ضحك زين ال**بدين فالمقابل و قال :"" و اللاهيلا .. راه ديما كانقولها للوالدة هاهي حداك كانت كاتبكي .. راه يصيبني لي يصيبني .. كانخرج منها كيف البغل "" 

ضحكو جماعة و قالت عائشة :"" ماتقولش هكاك اولدي الله يحفظك ليا "" 

باس يدها مواسيا ليها .. دوزو معاهم و قيت خفيف و جا وقت المغادرة .. نطق زيد :"" وا الحمد الله على سلامتك مرة اخرى .. احنا غانمشيو .. الزيارة اصلا وقتها دابا كايسالي "" 

جاوب زين :"" الله يحفظكم الدراري .. "" 

جاوبت عائشة كذلك :""الله يسلمكم و يرضي عليكم اولادي .. *شافت فشيماء و قالت * ااه .. بلاتي اولدي ديو معاكم بنتي فطريقكم ظلام الحال  ""

شافت شيماء فيها و قالت :" على ماغاتمشيش اخالتي "" 

قالت :"" فين انمشي وولدي هنا مانقدرش نخليه بوحدو "" 

قربات ليها شيماء لودنيها و قالت:"" اويلي .. و انا نبات بوحدي ؟"" 

جاوبتها و قالت :"" على انت باقية صغيرة؟ .. "" 

سمعهم زياد لي ناشر ودنيه و قال :"" تبات معاها الاء الى بغات .. ماكاين مشكل "" 

شافت فيه هي و شيماء و قال عائشة :"" ها انت .. ها هي اخت الدراري غاتبات معاك .. غدا ان شاء الله كيف قال الطبيب غايخرج و انجيو ""

قالت بغير حيلة :"" واخا .. انا غذا غانجي بكري "" 

جاوبتها و قالت :"" مكاين لاش .. واسيري دابا ماتعطليش الدراري "" 

خرجو الدراري و خرجات معاهم .. شافت فزياد حداها غادي كايتبسم .. و هي تقلب لجهة زيد لي بعقلو و تمشات فجنبو  .. حتى وصلو لسيارة زياد لي على قدو .. ركب حداه خوه و هي لور ..

الطريق كولها كايهضرو فالخدمة و لا مواضيع بعيدة على التخربيق .. و زياد كايتفقص .. مابغات تعطيه حتى فرصة يهضر معاها ..

حتى وصلو .. ركن السيارة و هبطات هي و هبط زيد كذلك و زادو كايهضرو و خلاو لاخر كايتفقص لور .. 

طلعو مع الدرب حتى وصلو لقدام ديورهم و قال زيد :" ياله الله يعاون اختي .. ها الاء شوية و تجي عندك "" 

جاوباتو و قالت :"" شكرا اخويا عذبناكم معانا.. انا غانتسناها .. "" 

تبسم و قال :"" هانية .. الله يعاون "" 

دخل و ياله غايتكلم معاها زياد و هي تدخل و ردخات الباب ..

غزز بين فكيه و قال :"" ابلاتي على مك .. ردخي عليا البيبان و  تجاهليني دابا .. و لكن نهار تولي ديالي .. غادي نخليك دوبي بين يديا .. غيير بلااتي ""

و دخل لدارو ..

-------

خرجات آلاء من بيتها منين سمعات خوتها دخلو ..

شافت فيهم و قالت :"" اشنو وقع .. كيف بقا "" 

جلس زيد و قال :"" حمد الله .. دقة ماكانتش بعيدة .. غذا يخرج "" 

هزات راسها متفهمة و قالت :"" اوى مزياان .. "" 

جاء دور زياد و قال :"" راه خالتي عايشة بايتة مع ولدها .. و انت سيري باتي مع شيماء و ونسيها "" 

خرجات عينيها فيه و قالت :"" نعام اخوويا "" 

رجع قال :"" كيف سمعتي .. راه قلناها ليها .. غير سيري الله يرضي عليك الدار خاوية و غذا غير السبت "" 

شافت فيه لبرهة و قالت :"" شتك ضسرتي هاد النهار .. منين صبح الصباح و انت تزينن عند راسي ب"" 

ماخلاهاش تكمل كلامها منين ناض و سد فمها و جبد خمسين درهم دارها فيدها و قال :"" غاتخلصي لمك هاادشي كاامل غيير بلاتي "" 

ضحكات و خشاتها فجيبها و قالت :"" اوى دابا مزيان "" 

قال زيد :"" اش بيناتكم انتوما دوك الزوج "" 

جاوبو زياد :"" ماسوقمش دخل سوق راسك .. و انت لمك دخلي جمعي قشك و تدردربي مع الباب "" 

زيد :"" بلاتي تتعشى "" 

قالت الاء:"" انا غانتعشى معاها .. و انتوما راه سباكيتي ياله  دابا شوية درتها تصلق .. كملو شغلكم راسكم  "" 

دخلات لبيتها .. لبسات عليها كاب .. هزات تيلي ديالها و ليزياتها و خرجات عندهم .. كان زياد ناض للكوزينة و زيد متكي كايتف*ج و قالت :"" و لكن بلاتي اخويا .. انا مانقدرش نبات بلي لونتي "" 

شاف فيها و كانت دارتهم و قال :"" ماتحيديهم حتى تنعس ..  و منين تفيقي .. حاولي تفيقي قبل منها .. اولا منين تفيقي تفادايها حتى دخلي للحمام و رجعي ديريهم "' 

جاوباتو و قالت:"" واخا ... بلاتي نجيب بواطة ديالهم ""

حلات شيماء باب دارها و قات الاء قدامها .. تبسمات و جراتها تدخل و قالت :" مرحبا بالاء دخلي "" 

دخلات الاء كاتدور عينيها و قالت :" على سلامة خوك "" 

ضحكات شيماء و قالت :"" الله يسلمك .. هذاك مش بسبع رواح كاعما كانتخلعو عليه .. اجي اجي دخلي .."" 

شيماء خدامة كاتنقي ماطيشة و الاء حداها مربعة يديها كاتشوف فيها .. 

سولاتها شيماء و قالت :"" اشنو اخبارك مع القراية "" 

غير نطقات و هي تن*د تنهيدة ديال الغذايد .. ضحكات شيماء و قالت :"" هاازة فقلبك يا الصغعة "" 

جاوبت الاء و قالت :"" هازة فقلبي ؟!! داكشي لي خااص .. طووووز لهلا يقلب و لا يشقلب "" 

تبسمات شيماء و قالت :"" ساهل تقولي هاد الهضرة حيت الامور مساهلة معاك .. كون كنتي فظروف اخرى كون ماكنتي تفكري فحتى شي حاجة اخرى من غير قرايتك و مستقبلك.. و هاذشي مامزيانش ليك .. الانسان ديال هاد الوقت .. واخا يكون وضعو ميسر .. و لكن خاص ضرووري  القرايا و الشواهد .. ماكاينش هادشي ماكاين والو .. يعني غير شدي حيلك كيف كايقولو المصريين و ض*بي على راسك ماحدو باقي الوقت "" 

جاوبتها الاء و قالت :"" هادشي عااارفااه .. و تقريبا كانسمعو 10 المرات بالنهار .. كايتناوبو عليا .. واخا لاخر راخي شوية .. مهم انا عارفة بلي القرايا مهمة و كاتحل الطريق للانسان باش يكون مستقل بنفسو .. انا باغية نكون مستقلة و مانبقاش معولة على خوتي .. ولكن ماشي نأرق راسي و نصدع راسي بهادشي .. اكيد شي حاجة غاتجي فالطريق تلهمني و نعرف اشنو بغيت .. حاليا باقي ماكاين والو و مخربقة .. "" 

جاوبتها شيماء و قالت :"" بالصح ماتستريسيش راسك ... عجبني تفكيرك مزيان تكوني متمهلة فاتخاد قرارتك و لكن واخا هكاك مافيها باس تديري الريسك مرة مرة ماعرفتي طريقك تكون قدامك و انت ماعارفاش "" 

جاوبتها الاء و قالت :"" اوى هاحنا غانشوفو "" 

سولاتها شيماء و قالت :" عمرك فكرتي فراسك اشنو ممكن تكوني فالمستقبل .. فين غاتلقاي راسك متلا من هنا 10 سنين "" 

هزات الاء عينيها للسماء كاتفكر .. تبسمات .. شافت فشيماء بكل تقة في النفس و كل حب و هيام قالت :"" من هنا ل10 سنين .. غانكون فكوريا فشي فان ميتينغ ديال ا**و اولا بيتياس و غانكون واقفة فجنبهم من الستاف لي كايهزو ادليهم الماء و يمدو ليهم كليني** يمسحو العرق .. احسن خدمة ممكن يخدمها كائن بشري انتوي بحالي .. بلاتي بلاتي صافي لقيت حلمي .. "" 

جبدات تيلي نيشان لغوغل و كتبات "" مركز تكوين حاميلي المياه لكيبوب ايدولز "" 

بقات تشوف و قالت :" اويلي مكاين والو .. اشنو زعما ضعت ؟ كيفاش كايديرو يوصلو لدووك المناصب ؟"" 

هزات عينيها فشيماء لقاتها كاتشوف و دايرة يدها على خدها ..

قالت الاء و هي كاتشوف فيها :"" مااالك .. ماصعيباش الاحلام ديما كاتحقق للناس الى داروها هدف حقيقي فحياتهم.. و انا كولشي كايقول ليا ديري هدف فحياتك .. اوى ها هو هدف "" 

جاوبات شيماء مزالة مصدومة و قالت :"" بااااز لخوووتك و الله العظييم "" 

عقدات الاء حواجبها و قالت :"" اويلي .. واش غانبقا فينما ندردش مع شي حد نخرج فالاخر بباز لخوتك .. اويلي راعيو لمشاعيري اعبااد الله "" 

ضحكات شيماء و قالت :"" صافي صافي خلينا من القرايا و المستقبل .. نهضرو على الجانب العاطفي من حياتك ..*غمزاتها * كاين شي توتوز .. شي لووز .. شي كرااش "" 

تبسمات الاء تاني ببلاهة و هزات عينيها للسماء كاتنهد.. تبسمات شيماء كذلك منتظرة بحمتس اش غاتقول حتى قالت :"" اااااه .. مزعوووطة ياااختي و قلبي محن .. "" 

نغزاتها بمداعبة و قالت :"" عاودي ليا عااودي "" 

تن*دات الاء من جديد و قالت :"" منين نبدا و كيفاش نسالي .. العنين المجبدين .. و الضحكة الزلزال.. و الشوفة القتالة ...و الموهبة الفتاكة .. و الصوت الرناان .. و الشعر الحرير .. و الكتااف العرااض .. "" 

قاطعتها شيماء و قالت :"" الله ياربي هاادشي كولو مجمووع فيه ""

شافت فيها الاء و قالت :"" بطبيعة الحال الا .. كل واحد و باش كايمتاز *تبدلو نظرات شيماء لاستغراب  و كملات الاء * العينين المجبدين فجيميني ..الضحكة الزلزال فال**نشاين يونغجااي الحب .. الشوفة القتالة فحبيبي جينيوني .. و الموهبة الفتاكة مولاها اميري التايلاندي شيتابون ليشايابوونكول لي هو تين .. اوى يالالة الكتافةالعراض ديال سيهيووني الحب ديالي الاول .. و الصوت الرنان ديال الشرير ديالي كيونغسو .. و الشعر الحريري جامعينو كااملين واخا هكاك ... هادشي بلا مانجبد جا**وني .. و تاهيوني و تيوني و جوني و جيهيوني و بامبام و يوغيوم و شين و لاي و تايميني و جوهيوني الله يرحمو و جايبومي و "" 

قاطعتها شيماء هازا عليها مووس و خرجات فيها عينيها و قالت :"" سكتي .. سكتي هاا عاار ربي قبل مانخور ليك عيينيك بهادا .. اويلي على بنت كيف داايرة .. لا لا انت نيييت خاص شي اخت اكبر منك توقف على راسك تقرصك .. اما زوج رجاال ماعندهم ماعرفو لييك ""

بعدات الاء راسها و قالت :"" اويلي تي مالك تسيفتي .. انت جبدتي ليا الكراش ديالي عاودت ليك عليهم .. هما بصراحة كتاار و لكن قلبي قاادهم الحمد الله .. و هاد الايام الرادار شااد ليا عند نسيتي دريم واخا بزاقل و لكن مرمدو لطاسيلتي المشاعر .. خساارة متنقدرش نقول ليهم اوباواتي .. "" 

شافت فيها شيماء و قالت :"" خرجي اختي تف*جي برا خليني نطيب هاد الحرام فخاطري "" 

جاوبت الاء و قالت :"" صافي صافي بان ليا موضوع اوباواتي نرفزك .. انا غانسكت "" 

رجعات شيماء لشغلها كاتشوف فيها بطرف عين و الاخرى حتى هي كاتشوف بطرف عينها و دايرة يدها على فمها ..