الجزء السابع
4437 Words
رجعات قالت شيماء من جديد :"" مسطية .. عايشة ليا حياة افتراضية و مخلية الحياة الواقعية لي فيها مايدار و داكشي حقيقي كايتحس نييت ماشي الخوا الخاوي ""
جاوبات الاء و قالت :"" فين هادشي اختي .. فين هما هاد المشاعر الحقيقية .. المشاعر الحقيقة الوحيدة لي معتارفة بيها هي رابطتي بناموسيتي ""
هزات شيماء يديها فوق راسها و تذمرت :"" اللهم طوولك يااا روووح .. ""
ضحكات الاء و قالت :"" العااار اختي ماتعصبيش .. ديني على قد عقلي ..كاتهضري على الارتباط ياك ؟ اشتي نقول ليك امور الكبار كااعما كاتستهويني .. انا رااه غير لاعبة فهاد الدنيا .. كاينين زوج طرقان فهادشي .. يا التصاحيب ..يا الزواج .. التصاحيب غير نفكر فيه و غانلقا راسي معلقة من شعري ..اما الزواج راه يظلو يضحكو عليا بيه و يتحسرو على الصغع لي غايديني .. و انا اصلا عمري جلست و فكرت فهادشي .. مامعمراش راسي بيه .. يعني مكاين والو .. و اصلا غااع غااع غااااااع الى فكرت فيه .. المغاربة ماشي الستيل ديالي ""
جاوبتها شيماء:"" ياك اختي ؟""
جاوبت الاء :"" وايه .. اختي لي تظل تف*ج فالزيين .. ها الكوري ها الشينوي ها التايلاندي ..ها البريطاني .. وا حتى التواركة لمك تف*جت فيهم .. غير قولي ليا غانقد نشوف فهااد الكماامر عندنا .. الله يسمح ليا ..ولكن اختي عيوني تعودو على الزين .. مانقدرش.. مانقدرش ""
جاوبت شيماء و قالت :"" غاارقة فالوهم ابنتي .. على انت غاتديها غير فالمظهر صافي .. انت راك غاتزوجي و لا غاترتابطي ببنادم ماشي بوجه ""
جاوبت الاء :"" بطبيعة الحال .. حتى تفكير المغاربة مامناسبنيش ..""
جاوبتها ضاحكة و قالت :"" اطربيني اختي ؟""
جاوبت الاء :"" اختي الرجل المغربي هو الجفاف بعينو .. لدرجة يقدر يتعامل مع غااع الناس مزيان .. يجي ليك حتال ليك انت لي مراتو و يعطيك على قلبك حيت انت بوحدك لي عارفاه اش كايسوا .. تجي تضحكي معاه ديري ليه شي حاجة زوينة يندمك .. ماشي كووول و اي حاجة درتيها كاتجيهم تبرهيش كاتعيشي معاهم مكنزة ياختي حتى كاتولي فحالهم .. غير هما الدنيا عاطياهم الدق و كاينوضو يبردو هوايشهم فعيالاتهم .. اختي انا بغيت راجل اجنبي عايش بنفسية مرتاحة و كوول ماحاقدش ""
قلزات ليها شيماء و قالت :"" ها الراجل الاجنبي "
قلزات باليد الاخرى و قالت :"" و هاا النفسية المرتاحة و كوول ماحاقدش .. تي علاامن باااركة تقنبلي .. ماغترتاحي غير مع مغربي و الع** راه غير كيبان ليك .. راه صعيب يكون تزاوج بين تقافتين .. و زايدون انت هضرتي معممة .. راه كل واحد كيف داير ماشي كولشي بحال بحال .. حلي عينيك و حاولي تنساي معتقداتك و عطي لراسك فرصة تشوفي بشكل اخر ""
جاوبت الاء و قالت :"" كيفاش .. ""
جاوبت شيماء :"" اول حاجة بعدا انا كانهضر على المستقبل .. منيين تقدي براسك و توصلي لسن الزواج ماشي دابا ""
جاوبتها الاء و قالت :" اه دابا كاتديري شروط السلامة و لا كاتبراي من اي نتيجة غير مرغوب فيها ""
ضحكات شيماء و قالت :"" دااااكشي ""
قالت الاء :"" ياله .. غير قولي راني بعقلي واخا هكاك ""
جاوبت شيماء و قالت :"" ماشي شي حاجة لي صعيبة .. كل معتقداتك تحطيهم فالجنب .. و الى تصادفتي مع شي شخص .. عطيه فرصة ماتقوليش فيه و لا فيه .. كل شخص بمميزاتو و سلبياتو .. تاحد ما بيرفيكت و تاجد ماخايب 100 % .. حلي عينيك و فتحي قلبك و حضري عقلك ""
قالت الاء :"" اوى بزاف .. نحل هادشي كولو .. راه جهد عضلي كتيير خاصو طاقة .. ""
ضحكات شيماء و قالت :""جبدي العصير من التلاجة ""
جبداتو و كبات ليها و لشيماء و شربو و هما خدامات ..
كملات شيماء :"" بحال متلا خويا .. عمرو لفتك و لو غير مدة قليلة ""
لاحت الاء العصير من فمها و شافت فيها فازعة و قالت :"" شكووون .. ابوشنباات ؟!!""
و تفرغعات بالضحك :"" بوااااهااااهاااااهاااا ... مالقيت شكووون .. سمحي ليا اختي و لكن هاذاك السيد بالذااات اوووهووو .. ""
جاوبت شيماء متسائلة :"" و علااش ؟؟ كانظن خوويا فيه بزااف الشروط لي تخلي اي بنت تبغييه .. زويين..طويل صحيح كتافو عراض منين قلتي كايعجبوك .. شخصيتو قوية ونفسو حارة و مسؤول .. رااجل شرقي حرش بمعنى الكلمة .. قااري و واعي .. واخا مسكين ماعندو زهر ماسهلش ليه ربي فخدمة ... و لكن هي لي ناقصااه و يكون كامل مكمول .. كيفاش اختي مالفتكش .. شفتي اش كانقول ليك .. حيدي د*ك العصبة من عينيك و شوفي الدنيا كيفما هي ""
جاوبت الاء و قالت :"" خوك ماكانعرف عليه والو .. من غير سنيتو و التخنزيرات لي فينما نشوفو يديرهم فيا حتى بعد النوبات مانتفكر واش فايت ليا قتلت ليه والديه ""
ضحكات شيماء و قالت :"" وا بغيتي الصراحة ... ماكاينة حتى حاجة فالدنيا كاتصعرو قدما كاتصعريه انت ""
جاوبت الاء و قالت :"" مالي اختي اش داايرة ليه .. ""
ضحكات شيماء و قالت :"" والو فارعة ليه راسو و مطيرة نعاسو بالصدااع .. هو عدوه لي يخصر ليه نعاسو .. و الى فاق خااسر كايبقا هكاك النهاار كاامل .. ""
جاوبت الاء و قالت :"" اوى احنا ولينا نقصو على قبلو .. غير يحيد عليا د*ك التخنزيرة .. الدرب كولو عارف بلي ماكايحملنيش ""
ضحكات شيماء و قالت :"" ماشي لد*ك الدرجة .. ""
جاوبت الاء مغيرة للموضوع :"" اوى قولي ليا .. نوبتك دابا .. واش عمر شي واحد من خووتي لفت نظرك ؟؟""
ضحكات شيماء و قالت :"" خوووتك ؟ بحااال خووتي .. شحال لعبنا فالصغر و ضاربنا .. ""
جاوبت الاء و قالت :"" اوى فالصغر دابا كبرتو .. ""
جاوبت شيماء :"" بصراحة عمرني فكرت فيهم .. كانت علاقتي مع زيد احسن من لاخر ... و لحد دابا .. غير سمحي ليا على صراحتي .. و لكن زياد كايجيني تقيل على القلب و ضحكو ماكايعجبنيش .. اما زيد .. بعقلو و كايعرف حدودو و مرزن .. ""
دورات الاء وجهها و برغمات :"" الصغع خف من رزقو .. بقا يطير حتى طاح زنافرو ""
دارت عندها شيماء و قالت :"" اش قلتي .. ماسمعتكش "
جاوبتها الاء :"" قلت ليك وا بالصح .. زياد ضحكو بسل من اللفت ف****و .. انا اختو و نقولها و نعاودها .. و لكن واخا هكاك فيه بزااف الاموور لي زويينة .. و انت عااد كنتي كاتقولي ليا خاصك تحطي معتقداتك على جنب و تعطي للشخص فرصة ""
ضحكات شيماء و رجعات قالت :""بالصح .. و لكن انا تقريييبا مرتابطة .. يعني ماكاين لاش .. ""
خرجو عينين الاء و صاحت :"" اشنوووو ""
شافت فيها شيماء بذهول و قالت :"" مالك ؟""
تذاركت الوضع و قالت و هي كاتبسم :"" زعما .. واااو مايسحابش ليا .. واش مخطوبين و لا باقي غير كاتعارفو و لا اشنو ""
ضحكات شيماء و قالت :"" اوى يالالة .. هاد الساعة باقيين كانتعارفو .. كانهضر معاه يوميا .. بصراحة حنا تعارفنا غير فالسوشل ميديا .. عايش بعيد عمرنا قدرنا نتلقاو واخا كانتعارفو هادي شي عام و نصف .. شاب زوين و عقليتو زوينة و خدام بدراعو ""
قربات ليها الاء اكتر و قالت :"" تعرفتي عليه فالسوشل ميديا و كاتعطي لراسك الحق تهضري على حياتي الافتراضية و لايني راك واحد الشلااهبية .. ""
ضحكات شيماء و قالت :""ماشي بحال .. انا واللهما عندي مع داك التخربيق .. غير هو دخلني دخلة فشكل و بقينا شادين الحتة و فالاخير عجبني .. و بقينا هكاك .. ""
اومأت الاء براسها و قالت :"" اااه "
تراجعت كاتفكر و قالت فخاطرها :"" الله ياربي الله على خويا مسكين مشات ليه فرماجتو .. مشات على عينو ضباابة .. عالله مايكونش طاايح نييت حيت المسخووط غايتصدم صدمة العمر ""
بعدما تعشاو البنات و غسلو الماعن .. تكاو فالصالة كل وحدة فبلاصة كايتف*جو و يدردشو مع بعضهم ..
ديشارجا تيلي ديال شيماء و قالت :"" ماعرفت فين شارجوري .. انا غانطلع نشوف بيت خويا .. ديالو خاسر و كايقلب يخسر ديالي حتى هو ""
الاء :"" واخا ""
طلعات شيماء شعلات الضو .. لقاتو فوق المنضدة .. جراتو و مارداتش البال بلي جرات معاها حتى السكووتش لي فيها الزغب.. طفات الضو و هبطات ..
لصقاتو فالبريز و طاحت السكوتش بين السداري و الحيط بدون ماتلاحظ شيماء و رجعات تكات حدا الاء ..
قالت الاء :"" دابا هذا لي عاودتي ليا عليه .. واش نيت حاسة براسك كاتبغيه ؟""
جاوبتها مبتسمة و قالت :"" اوى اش غانقول ليك .. انا ولفتووو .. و كانظن نييت كانبغييه.. مستقبلي ماكانتخيلو غير معاه و عجبااتني عقليتو و هضرتو و روحو المرحة ""
رجعات الاء شافت قدامها و هي كاتفكر فخوها الصغع .. و الفليسات لي غايطير ليها بسباب الخبار الملاوطة لي غاتجيب ليه.. و ماشي بعيد يقجها اولا يركلها و يسيفطها للبردقييز جوا ..
------
يوم جديد ...
كانت شيماء كاتنشر الحوايج لي صبناتهم فالسطح و الاء باقية مغطية و ناعسة فالصالة ...
داخلة عائشة شادة فولدها لي راسو ملفوف فضمادة بيضاء .. و فعتبة الباب قالت ليه :"" دخل اولدي.. انا بالخف نمشي للحانوت نجيب شي سخرة و نرجع ""
جاوبها و قال :"" غير دخلي انا نجيبها ""
قالت ليه و هي كاتدفعو :" غير دخل اولدي و رتااح .. قادة بشغلي ""
و ماكان ليه غير يدخل .. اول ماطاحت عينو غير على الجتة الهامدة فوسط الصالة .. لي مغطية من راسها لرجليها ..
قال و هو داخل للصالة :"" هاذي عااضااها تسيسي ؟!!.. ""
جلس فالسداري حداها و قال :"" شيمااء .. واااااشيمااء ... راك قربتي تشركي النهاار مامواالفااش ليييك ""
تحركاات و دارت و رجع قاال :"" واااديييكااه ""
هز الوسااادة من حدااه و خبطها بيها .. و هنا لاحت الاء الغطا و هي كاتذمر و قالت :"' و داااك الحمااار بعد مني ""
خرجو عينيه و جمع يديه ... جلسات هي بدون ادرااك و حلات عينيها فيه .. و هنا وساعو عينيه و بعد بجزؤه العلوي للور .. مصدووم و عينيها اسرينو بدون اي ردة فعل حركية .. فقط عينيه خارجين فعينيها بدوون حرااك .. وصلها الادراك و اخيرا و لكن ماص*ر منها حتى ردة فعل من غير انها بقات تابتة حتى هي لبرهة و ناضت كاتجري فاتجاه الحمام .. كذلك هو بقات عينو فنفس النقطة لي كان مأخود فيها .. دار كايشوف فالمنحى فين اتاجهت وناض وقف .. و تم غادي مصدوم باتجاه الدروج و طلع .. فطريقو تلاقا شيماء هابطة بالسلة .. شافت فيه و قالت :"" على سلاامتك اخويا .. جيتوو ""
ماجاوبهاش و دخل ساهي للطابق فين كايتواجد غرفتو .. دخل ليها و سد الباب وراه .. بقات شيماء كاتشوف و قالت :"" اويلي .. هذا مااالو ""
دخلات الاء للحمام و بدات تندب و تصرفق حناكها ..:"" نااري شااف عيوون المش ناااري تفضحت ناااري غايض*ب بيا الطرر .. نااري قفرتها .. ناري و يسيقو الدراري خبااري غايحرمو عليا الخريييج .. لا لا خاصني نهرب فاسرع وقت ""
خرجات راسها كاتطل و مشات كاتجري لبلاصتها هزات البواطة نيشان دارت لي لونتي .. و هنا هبطات شيماء و قالت :"" صبااح الخييير النعاسة .. ""
دارت عندها الاء مفزوعة و قالت :"" ا..ا صبااح الخير .. الله يعاون انا غادية ""
هزات كابها و تمات غادية كاتجري حتى خرجات .. استغربات شيماء و قالت :"" اويلي .. مال هادو صابحين موضرين .. مايكونوش دارو شي لقاء درامي""
طارت للدارها .. سرسرات.. حل زياد و دخلات كاتجري لبيتها ردخات بابها و شدات الارض ..
بقا زياد كايشوف .. تبعها لبيتها دق و قال :"" اش درتي المسخووطة .. ياكما كحلتي ليا الدواسا مع فرماجتي "
------
جلس زين ال**بدين على سريرو .. و ماقدامو غير صورة عيونها .. بإندهاشها و بلونها الغريب لي مالمحو غير لحظة قبل ماتوض تهرب .. ناض وقف و تم غادي جاي كايحك مؤخر راسو باستغراب و قال :"" واااش هاادوك عيوونها لي شفت يااربي .. و راااه هااادشي ماكايتقبلو لا عقل و لا منطق .. آلاء بيلسااانة كيفما قالت الواالدة .. نفس التفاصيل لي قالت جامعااهم .. مامتيقش هادشي واش انا فحلم و لا فعلم ؟.. *وقف تابت و كمل * ماشاء الله على دوك العيوون .. ماكرهتش نبقى نشوف و نحقق فيهم حتى نقنع .. *طل من الشرجم على شرجمها المسدود و كمل* اشنوو انت ا الاء .. اشنو انت البرهوشة ""
ناضت الاء من سريرها بعد لحظات و حلات الباب لزياد .. شاف فيها و شافت فيه .. ضيق عينيه و حدرات عينيها و قال :" اش كاين ؟""
هزات عينيها فيه و قالت :"" والو .. اش غايكون ""
دخل جلس فوق سريرها و جاوبها :"" عاودي ليا اشنو قلتو انت و شيماء و اشنو درتو ""
مشات جلسات حداه .. شافت فيه و قالت :"" ها انت لي غانقول ليك ممكن يتسبب ليك فجلطة و لا يتسبب ليك فاكتئاب و لكن خاصك تعرف بلي ما فإيدي والو .. انا درت لي عليا و لكن ماعندك زهر المسخوط ""
ربط حواجبو بتوجس و قال :"" هضري دغيا ""
شافت فيه ربتات على كتفو و قالت :"" نصيحة غيير قلب على شيماء .. الفتاة مزعوطة فشي واحد سميتو امين و ماعندك معاها حتى فرصة شحاال و هي تهضر معااه غير ض*ب الدورة اخويا و لبدها ""
رجع لور ت**ل كايتن*د و قال ليها :"" اش قالت ليك عليه ""
رجعات تكات حداه مكالية راسها بيدها كاتشوف فيه باستغراب و قالت :"" قالت ليا غااع التفااصيل عليه .. اشنو سميتو اشنو قرا اشنو خدام .. المدة لي هضرو فيها .. تصاورو و فيديواتو معمرين تيليفونها .. ظلات ليل كولو و هي تكركر معااه فرعات ليا مخي .. السيدة طاايحة فييه و ناويين يتلااقاو .. ماعند بووك زهر اولد ميمتي ...*شافت فيه * اويلي مالك ساكت ...نوض بدا تغبن و تض*ب فالحيط و قول علاش الحياة صعيبة ""
شاف فيها .. ضحك و قال :"" واش كاتبقى تشوف فالتصاور ؟ اش قالت على وجهو ""
هزات راسها كاتفكر و قالت :"" قالت كاتعجبها حفرة الزين ديالو ""
ناض جلس و خرج عينيه فيها و قال :"" حفرة اشنو ؟""
شافت فيه باستغراب و قالت :"" هادشي لي ضرك فهادشي كامل لي قلت .. راه قلت ليك كاتبغي واحد اخر اشمن نوع ديال الرجال انت ..""
رجع جلس و قال :"" خلينا من امين دابا.. هضرتي ليها عليا ؟""
عوجات فمها و قالت :"" كاتعتابرك خووها .. ضحكك اسيدي ماكايعحبهاااااش و كاتجييها تقيييل على قلب و نزييدك .. كاتفضل زيد عليك ""
شهق و وقف داير يدو على فمو مخرج عينيه ..
ضحكات .. ض*بات يد على يد و قالت :"" هااااا دابا عاااد كاتبان كائن بشري ""
رجع جلس و قال :"" كاتفضل زيد .. ولد الجراااان .. فيين كااتعرفو ""
عوجات فيه وجهها و قالت "" من نيتك .. اويلي على فين كاتعرفو .. كاتعرفو كيفما كاتعرفك .. غير هو قالت ليك مرزن و كايعرف حدودو ... و انتااااا ""
هزات يدها و شافت قدامها .. فهم و قال :" مالي انا .. انا راه هو امين لي تزعطااات فييه... ""
رجعات شافت فيه و عينييها خااارجين و قالت :"" اويييل الشيييطاان .. حلف بالله .. ""
ربط حواجبو و قال :"" و الله حتى انا .. حاولت معاها حتى شحفااتني .. و والو ماكاتاعطينيش فرصة .. خديت الكونط ديال صاحبي امين و مخليني نهضر فيه و هو داير واحد اخر و مبلوكيها فيه باش مايطلعش ليها .. مدام بغات امين و عجبها تفكيرو لي هو انا فالاصل .. فراه غاتبغيني انا .. كاان خاصها تعطييني فرصة .. غير فرصة بااش تعرفني .. و مالقيت غيير هاد الحل ""
بقات الاء حالة فمها .. هبطات عينيها كاتفكر فالكلام لي قالت ليها و هما فالكوزينة ...الغ*ية عطاتها نصيحة لي كان خاصها هي نيت تطبقها ..
هزات عينيها فيه و قالت :"" و علااش يالمكلخ درتي هكااك راك زدتي عقدتيها دابا ""
جاوبها و قال :"" لا .. هي بغات امين يعني غاتبغيني الى تقربنا من بعضنا .. خاصني غير نبان ليها فالصورة و هادي هي خدمتك ""
ربعات رجليها قدامو ..تقابلت معاه و قالت :"" واش كاتعاطا لخرى الضباااع ياهاد المكلخ .. كيفاش غادية تديها فيك و هي عند بالها كاتبغي امين .. واخا نبقا تعاود ليها النهار كولو عليك .. ماغاتسوقش ليك مادام كاين امين .. يا المكلخ يالمطنغ .. اش دااك اخويا لهادشي كاامل .. سير اخويا ضبر ليك على شي عويتقة من العروبية و لا الجبل .. اش داك للحب و الرومانسية و هاد الزمر كوولو .. جلست معاك 2 د طلعتي ليا السكر و هبطتي ليا الطوونسيو و انا باقية مقطووعة بلاا فطوور .. *ناضت خارجة * مزيااان تبااركالله .. باغيها تزعط فيه و هو حاط قدامها زوج رجاال .. حقلها فييك .. ""
شد دراعها .. و جلسها و قال :"" خوووك انا البرهوووشة .. ""
شافت فيه بنصف عين و قالت :"" كاتبقا فيا الزمر و الله .. مهم حيت انت بريئ و انوصنت ماكاتفهمش فهادشي داكشي علاش درتي غلطة بحال هاذي .. و انا غانعااون خويا حيت ماعندك غيري ""
تبسم و بجغ حناكها بين يديه و باسهم و قال :"" هاااااكاك نبغيك .. عتقي خووك ""
شافت فيه و قالت :"" هو نيت كاين احتمال تبغيك لشخصك .. كزياد .. و الى بغيتيها تبغييك .. خاصك تطير امين من الصورة ""
جاوبها و قال :"" لا طيرتو .. ماغايبقا عندي منين نهضر معاها .. اجي .. نقول ليها الحقيقة .. ؟؟""
جاوبات برفض :" لا .. وااياااك ماتخاطرش .. خلي امين ينساحب في هدوء و انت رايزي شوية بشوية حتى تلفت ليك و انا اختك نعااون حبيبي و نزند ليك الفيخراات ""
ضحك و قال :"" زعما زعما .. هادشي لي بان ليك ""
جاوباتو :"" ااه.. حيد الغش و صفي كولشي .. الى بغاتك خاصها تبغيك ليك انت ماشي على صورة غاتخلقها ليها.. بغاتك مرحبا مابغاتكش غادي يخصك تقبلها بكل روح رياضية ""
جاوبها و قال :"" صافي ..انا متأكد غاتبغيني ""
جاوباتو مشجعة و قالت :"" بطبيعة الحاال غاتبغييك .. فين تلقا احسن منك .. ""
ضحك و تلاح عليها قاجها .. بغيت نقول معنقها و هي كاتغوت و تض*ب فيه ..
الاء :"" واا طلااالق منيي الحماااااار دعيبتك لله ""
----------
ساعة و هو غادي جاي فبيتو .. كايطرطق صباعو و يلعب فلحيتو .. و كايفكر .. و هو كايقول :" بما انني لقيت البيل**نة و تأكدت من كلام الوالدة .. و الى كانت نيت كاينة البيل**نة فراه اكيد حتى داكشي ديال كايقتلوها السحارة غايكون بالصح .. و هذا السبب المنطقي لي يخليها تتخفى و تخبي شكلها الحقيقي .. و انا غادي نسكت و ماغانقول هادشي لحتى شي حد باش تبقى الدرية فامان واخا هماك مانقدرش نأمن الوالدة لى شي سر .. و تقدر غااع تسعى ورا البنت باش تزوجنا و انا ماغاديش نمشي بعيد و نستاغلها غير على قبل مصلاحتي ... واخا البيل**نة لقيتها قدامي و لكن هادشي ماغايعني والو .. غاتبقا ديما د*ك بنت الجيران المزعجة بالنسبة ليا .. ااه .. صافي .. و نحسي عندي باش نتدرع منو .. و غانخلي الدرية فالتقار ""
دار كايشوف فوق السرير مالقاش التريكو لي فيه بقعة الدم .. خرجو عينيه و بدا يقلب ..منين مالقاهش تفكر السكوتش حتى هي .. خشا يدو فجيابو و تفكر تاني بلي كان حاطها فوق المنضدة .. طار كايقلب فوقها و مالقاش ... و هنا طاحت ليه النقطة .. بدا يقلب بشكل هيستيري هنا و هنا .. فوق السرير و تحتو .. فكل بلاصة حتى شقلب البيت .. جلس شاد راسو و قال :"" ناري على الصغع المنحوووس ""
-----
دق زيد فغرفة الاء .. و دخل لقاها كيف عادتها دايرة ماكياج مبهرج فعين و كاتصور جوانب وجها .. صور فوتوغرافية فنية .. عندها صفحة على الانستاغرام كاتشارك فيها موهبتها و عندها متابعين كتار كايشجعوها ... شافتو دخل و دارت عندو و قال ليها :"" اش كاديري .. مسحي وجهك و هاكي تقداي ليا هادشي راه خاص ""
جاوباتو متدمرة و قالت :"" مامسالياش سير شوف زياد ""
جاوبها و قال :"" خوك ماكاينش .. طلقيني راه محتاجهم ""
حطات الكاميرة و خدات من عندو الورقة و الفلوس .. و قال ليها :"" و جيبي معاك الحوت نصايب ليك الشهيوة لي كاتعجبك ""
خرجو عينيها و قالت :" حلف حتى غاتصايبها .. ""
ضحك و قال :"" الى رجعتي دغيا .. يال طلقي راسك""
مسحات وجهها و بدلات حوايجها و مشات عندو للكوزينة تسولو على كمية الحوت .. شاف فيها ياله غايجاوب و بدل كلامو و قال :" اش هاد اللبس راك غادية غير للسوق ""
جاوبلتو و قالت :"" اويلي لابسة حوايجي مالهم ""
جاوبها :"" اللاء الى ماكانهضروش ماضسريش .. سيري حيدي عليا هاد الزمر (كولون ) و جمعي شعرك شوية .. ""
ربطات حواجبها و قالت :"" ماعندكش الجق تدخل فلبسي مانيش درية صغيرة ""
خرج عينيه فيها بصرامة و هز ايدو مشير ليها ترجع و قال :"" لبسك مامحتارمش .. مانبغييش بنادم يحل علييك في فمو .. راه و الله و نعرف شي حد كايتبسل عليك يا حتى نعلق مك من شعرك انت و ياه ها ني كانعلمك""
صاحت محتجة وبغضب :"" و انا اش دنبي الى بنادم قليل الترابي و كايقلل ادبو على شي حد .. غاتحاسبني على اغلاط الناس و لا اشنو ""
جاوبها :"" ااه .. مادام انت لي غاديري ليهم السبب علاش يحلو فامهم فالومة عليك انت بالدرجة الاولى حنا ماعايشينش فنيويورك .. ياله غبري من قدامي ""
مشات كاتخبط برجليها و تدعي فيه ... بدلات و لبسات عوضو سروال مفضفض عليه .. و جمعات شعرها .. دازت قدامو .. خنزرات فيه و خرجات ..
--------
هبط زين ال**بدين كايجري لعند امو و قال :"" الوالدة .. الوالدة .. "
خرجات عندو كاتجري قالت :"" اتا مالك اش كاين ""
سولها :"" فين تريكو لي كنت لابس البارح ""
قالت شيماء من البيت :"" صبنتو راه منشور فالسطح ""
شد راسو و قال :"" و علاااااش .. انت لي دخلتي لبيتي .. ماشفتيش واحد السكووتش مجمووع فيها الزغب ""
خرجات عندو مستغربة كاتشوف و قلت عائشة كذلك مستغربة :"" ولدي .. واش ضارك راسك .. كاتحس بشي حاجة . اشمن زغب كاتهضر عليه ""
مرر عينيه عليهم بزوج و طلق كايتفقص و ينغر .. شافت عائشة فشيماء و قالت :"" هاد الولد تسطى ""
طلع لبيتو غادي جاي و قال :"" منين غانجيب انا هاد الزغب تاني .. نتناتف معاها ؟ ماجاتش .. نقول ليها تدفل ليا .. واخا نمووت .. نهز عليها موس .. مالي تسطييت .. ناااري على بلااان كيف دااير .. ""
ناض يطل عليها من الشرجم (ملاحظة : غرفة زين فالطابق التاني و غرفة الاء فالطابق الاول غير هو دار زين ..كاين السفلي لي مباشرة على الارض وعاد طابق التاني و السطح اما دار الاء فهي كاتطلع فالدروج عاد كادخل للطابق الاول عاد السطح ) و بانت ليه خارجة و هازة قفة .. لبس تجاكيطتو و سبرديلتو و هبط كايجري ...
غادية الاء و دايرة الليزيات كاتمزك و تغني ... و زين ال**بدين وراها ... كايتمشا وراها و يدو فجيبو و الاخرى كااتبرم موسطاجو ... كايفكر كيفاش ياخد منها لي بغا بلا مايآديها و بلا ماتعيق .. و هو وراها و هي بعيدة عليه غادية غير مبالية ...
قال بينو و بين راسو :"" مصييبة هااذي .. كيفاش غادي ننتف شعرة منها دابا .. عالله مانتلاقاش بشي مصيبة هاااد السااعة .. لا لا موحال هي قريبة مني دابا ماغايوقع ليا والو .. و لكن خاصني غير نضمن زغبة بين يديا و نتفرق منها .. يااربي تسهل ياربي .. ""
و بقا وراها .. حتى دخلات للسوق .. تابعها من محل لاخر .. و اخر وجهة ليها كان جهة الحوت .. هزات عينيها و شافت زين ..و دار راسو كايشوف فجهة اخرى نقلات عينها لطريقها بغير اهتمام و كملات مشوارها .. و قفات عند مول الحوت و طلبات شنو خاصها .. و هو كاينقيه ليها نقلات عينيها حواليها و شافتو عاوتاني واقف فجهة اخرى و كايشوف فجهة اخرى .. رجعات دارت مستغربة .. و خدات شغلها خلصات و تمات راجعة .. راجعة و كاتخمم متشككة فانه تابعها .. تفكرات بلي شاف عيونها و برد الماء فركابيها .. و ماعرفاتش اشنو ممكن يكون كايضور دابا فدماغو و علاش ممكن يكون تابعها ..دايزة و كاتلوح طرف عينيها للجناب عالله تحصلو .. حسبات من 1 ل3 و هي دور على غفلة .. و حصلاتو .. شاف راسو حصل ووقف كايدور فعينيه .. ووقفات رابطة حواجبها .. و كمل طريقو و داز بحال الى هاد*ك كانت طريقو .. داز من قدامها و يدو فجيبو كايمتل البرود .. حتى داز و هي ترجع تتمشى بخطى بطيئة و كاتصغر عينيها .. و هو لايح عينيه لور كايحلل ردة فعلها .. حتى سمعها عيطات بأسمو .. استغرب ووقف .. وصلات حداه .. شافت فيه و قالت :"" سلام اخويا زين ال**بدين ""
جاوبها :"" و عليكم السلام ""
قالت :""على ص..صبااح .. سمح ليا ""
قاطعها :"" لا انا لي يسحاب ليا اختي .. سمحي ليا انت ""
اومأت براسها شافت فالفا**ة لي ملوية فراسو و قالت :"" حمد الله على سلامتك ""
جاوبها :"" الله يسلمك ""
بقات كاتشوف فيه و كاتفكر كيفاش تجبد ليه ل**نو و تشوف واش شاف عينيها و لا لا .. حيت لحد دابا ماقال والو و ماباين عليه والو ..
و هو ساكت كايشوف و يفكر كيفاش يمد يدو و يطير ليها زغيبات ..
بقاو شوف فيا نشوف فيك .. حتى نطقات الاء اخيرا .. و قالت :"' واش .. كاينة شي حاجة فوجهي ؟""
استغرب و سولها :"" علاش ؟""
جاوباتو :"" حيت كاتشوف فيا ""
تدارك راسو حشم و دور وجهو للجهة الاخرى و قال :"" ا.. الى بتي هاد المرة عند شي حد .. حاولي تنعسي داخل شي بيت ماشي فمرح "'
و مشا كمل طريقو ..
بقات كاتشوف فظهرو غادي و حلات فمها .. ضحكات باستعزاء و باهانة و قالت كاتهضر مع راسها :"" كيفاش .. اش كايقصد هاد هذا انا قليلة التراابي .. هادشي لي كان ناقصني فهااد الصبااح .. و هاد الإهانة غادية تزاد لزياد فالاتعاب ديالي .. و لكن بلاتي علاش ابوشنبات كان تابعني .. و لا غير جاب ليا الله .. اكيد خاصني ننقص الدرامات شوية .. اولا نمشي نشد شي وحدة دابا ""
و مشات مكملة طريقها .. دارت طالعة مع دربهم و هي تقشعو واقف هو و خوها زياد .. شافت فيه و شاف فيها ... كانت غاتدوز كون ما خوها وقفها و عيط ليها ..
وقفات قدامو و قال ليها :"" فين كنتي ؟""
جاوباتو :"" كونت كاندير التقلية ""
جاوبها و قال:"" فينما نهضر معاك جبدي التقلية ""
جاوباتو :"" اوى انت كاتشوف فيا هازة القفة و كاتسول فين كنت .. ""
شاف زياد فزين ال**بدين و قال ليه :"" وا شووف ليك هاد الموصيبة .. اختك دايرة بحال هكا معاك ؟.. انا هادي راه بسبابها ناض ليا الشيب ...هانتا ها هو ""
ضحك زاين كايشوف فيه و نقل عينيه ليها و قال :"" تهضر معايا هكا نطوعها من السطح ""
عوجات الاء فمها فيه و قالت :"" و على شكوون انت .. سليمان القانوني و لا ..""
سد ليها زياد فمها و قال :"" داركم البرهوشة قبل مانركلك يالله ""
عوجات وجهها فيهم بزوج و مشات كاتدعي .. دار عند زين و قال ليه :"" ماتديش عليها .. ""
نقل زين ال**بدين عينيه من عليها لخوها و ض*ب على كتفو ضاحك .. و رجع شاف فيها .. و هو كايفكر كيفاش غايقدر يمد ايدو عليها و ياخد لي بغا بلا ماتعيق ..
عطات لزيد السخرة و مشات لغرفتها .. تلاحت فالسرير كاتشوف فالسقف .. و قالت :"" غايكوون شااف عينيا زعما ؟ "
ناضت جلسات و هزات البيسي ديالها تشغل راسها فيه ..
دخل زين ال**بدين للدار .. شعل التلفازة و جلس يتف*ج فالاخبار ... الجسدة هنا و العقل عند الاء .. جالس كايفكر و يخمم... و هاد الحل مابغاش يبان .. خاصو فرصة لي يتجمعو بيها و تخليه ياخد الشعر ديالها ..
حطات عائشة الغذاء و جات شيماء حتى هي و تجمعو يتغداو ..
- Writer
- chap_listContents
- likeADD