آلاء و المنحوس

الجزء الثالث

عوجات فمها و غمضات عينيها بيأس و بكبرياء مجروح ...ضحك زياد حيت وصل ليها الميساج وقال ممازح :"" خودي الفلوس من عند ماماك ...و باباك ماتقلقيش منو راه ماباغي غير مصلاحتك .. و الى ماض*بتيش على راسك من دابا غايسالي بيك الطريق كاتربي الدراري وكل شوية  تطلبي فلوس التقدية و فلوس الحمام و الى طحتي فشي زقرام غايعطيهم ليك بالشحيف و بالنغير ... اما الطريق الاخرى غاتبقاي تدوري من خدمة للاخرى و مافيهم غير تماارة و الشقا لي ماكاتحمليهش و لي بووص لي يظلو ينقصو من خدامينهم بحال الى كايخلصهم بالدوفيز .. ياله تخيري اشمن حل اهون ليك ؟""

شافت فيه عاقدة حواجبها و قالت :"" انا ماغاديش نولي هكا .. "" 

تبسم و قال :"" عارف .. عارفك واخا **ولة و لكن ذكية .. غير هو ماتضيعيش الوقت .. مهم دابا هاكي ها هما لي طلبتي و حاولي تنقصي الخسران و اقتاصدي و رحمي خوك راك قهرتيني اختي .. شوفي البيت عامر شراوط و عامر تخربيق فين غاتزيدي مزال .. "

شافت فيه و قالت :"" وا ايدي متقوبة اش غاندير ... " 

شاف فيها بعتاب و قال :"" الى متقوبة عمريها ... و لا غانحيد عطيان الفلوس و غاتولي تطلبي اشنو خاصك انا نجيبو "" 

جاوبتو قائلة  :" اويلي ماشي لد*ك الدرجة "" 

ضيق عينيه :"" اوى هاني علمتك .. ياله نوضي تعشاي .. "" 

تبسمات و عنقاتو :"" كنمووت عليك اخوويا "" 

بادلها العناق مربت على كتفها ، بعدها لقدامو و شاف فيها  :"" كنتي غاتنعسي بلي لونتي تاني .. شحال من مرة كانقول ليك تدخلي للدار فالعشية حيديهم ... خلي عينيك يتنفسو شوية .. "" 

ناضت جلسات و قرمات بصباعها على العدسة جبداتها و دارتها فبواطتها جنب سريرها و جبدات الاخرى حتى هي .. غمضات عينيها .. حلاتها و شافت فخوها .. تبسم كايتطلع ليها و قال :"" و هاد الجويهرات شحال غزالات "" 

تبسمات و قالت :" واش بالصح زوينين ؟ انا كايجيوني فشكل و كايخلعو "" 

غوبش باستغراب و قال :"" علاش كايخلعو .. عيونك ما شاء الله ماكاينش بحالهم .. هاد الصفاء فيهم عاطيك واحد الجاذبية ماكاينة فحتى وحدة .. دايرين بحال بحر المالديف ... فيروزي صافي كايبري ... "" 

جاوباتو مستغربة متسائلة:"" و لكن علاش انا دايرة هكا اخويا ؟علاش انا ماشي بحالكم شهبة عادية و عيوني زرقين بحالكم ؟"" 

دور وجهو مضيق عينيه بغموض و رجع شاف فيها وهو يقول :"" شحال من مرة شرحت ليك بلي عندك طفرة فالجينات ديالك .. ماعندكش الميلانين لي مسؤول على الصبغة لي فينا حنا .. داكشي علاش شعرك و عينيك و جلدك هكاك .. "" 

دور وجهو كايعض على شفايفو .. عارفها غاتبدا فسلسلة ديال الاسئلة ديالها لي ماكيساليوش .

ربطات حواجبها و جلسات مربعة كاتشوف فيه . كانت حاسة بكذوبه :"" بلاا ماتضحك عليا بد*ك الهضرة ديال الميلانين ... حيت بحت فهادشي حتى حفظتو .. البشر كوولشي عندهم اختلاف فتركيز الميلانين .. الناس السمرين عندهم مركز و الناس البيضين عندهم ناقص و لكن موجود .. "" 

قاطعها :"" هادشي عاارفينو .. و داكشي لي قلت ليك ...انت عندك طفرة ... الميلانين المسؤول على تصبغ الجلد و الشعر و العينين ماعندكش .. هادشي لي كايفسر لون عيونك و لون شعرك و جلدك "" 

احتجت :"" الى كان عندي خلل فالميلانين .. فهاذشي كيدل على حااجة وحدة و هي انا مصابة بالبرص او المهق .. في حالة البرص كايكون الجلد مخلط .. يعني بلايص فيهم الميلانين و بلايص لا .. و هادشي لا يتوفر فيا يعني هاد الاحتمال مستبعد .. ندوزو للمهق .. لي اعراضو كاتمتل فابيضاض البشرة و الشعر و حتى لون العين مغير .. ماكاتكونش زرقاء بحال لوني انا .. كاتكون رمادية بشوية ديال الاحمرار .. هاد الناس كايكون عندهم مشاكيل اخرى من غير شكلهم .. كايكون عندهم نقص فالشوف ماكايشوفوش مزيان ... عندهم ضيق من بريق الضو و الحساسية من الشمس و عينيهم كايلعبو بشكل غير ارادي و كاين لي كايكون مصاب بالحول .. هادشي كلو اسيدي مامتوفرش فيا .. قلت ممكن يكون نوع اخر من المهق .. قلبت لقيت بلي المهق نيت انواع .. كاين مهق بصري هذا كيأتر غير فالعين .. و كاين المهق البصري الجلدي و هو لي قلت ليك دابا شوية اعراضو ... و كاين لي عندو المهق مرتابط ببعض المتلازمات بحال متلازمة هيرمانسكي بودلاك و متلازمة جريسيلي و متلازمة اخرى نسيت سميتها .. هادو كاملين بحت فيهم حتى هما .. و عرفت بلي فيهم لي كايتمتلو فمشاكل فالقلب و الامعاء و الكلي .. و كاين لي كايتمتل فالمشاكل فالدم و النزيف و الرعاف و المشي الغير منتظم و كاين لي متمتل في العدوى .. هادشي كلو و الحمد الله ماعندو حتى صلة بيا .. انا حاسة بلي انا انسانة طبيعية .. هاذي طبيعتي ما فيا حتى اضطراب اولا خلل .. كانشوف مزيان.. الى تعرضت لشمس بزاف كانسمار بحال الناس و هذا دليل على وجود الميلانين فذاتي .. ماعندي لا حساسية من الضو ولا حول ولا والو .. و زايدون علاش شفراني و حجباني قهويين اولا الميلانين من دون داتي كاملة كاين غير فزغب حجباني و شفراني؟ .. و لون عيوني لي فشكل حتى هو .. و نخليو هاادشي كولوعلى جنب..علاش ماعمرني دوزت؟ ... علاش مادايرينش ليا فحص دوري عند الطبيب .. راه خاص حالتي تتراقب تحسبا لظهور سرطان الجلد ..اولا ؟ مالك سكتي جااوب .. لا لا .. انا متأكدة بلي ماعندي حتى اضطراب .. انا حالة شاذة .. ماعرفتش اشنو السبب و لكن شي حاجة غريبة فالموضوع .. انا طبيعية كليا كيفما انت طبيعي .. غير شكلي غريب و هاذشي لي محيرني .. و تفصيل اخر .. دمي .. علاش دمي --- ""

ماكملاتش كلامها منين وقفها :"" صافي باركة مانسمعكش كاتهضري فهاد الموضوع مزال "" 

جاوباتو :"" هااا حاجة اخرى كاتبرزطني .. علاش كاتقمعوني و كاتخبيو شكلي الحقيقي على الناس ؟ و ممنوع عليا نقول لاي واحد كيف دايرة انا .. حتى من حمام العيلات عمرني عتبتو "" 

شاف فيها لمدة بسيطة و جاوبها :"" صافي جا الوقت لي غادي نقول ليك فيه الحقيقة "" 

خرجو عينيها و تقادت فالجلسة و قالت :"" اشمن حقيقة .. هضر كنت متأكدة كاينة شي حاجة "" 

شد فيديها و قال :"" منين كنا صغار.. كنا مخيمين حدى البحر .. كنت انا و خويا كانتعشاو مع واليدينا .. حتى سمعنا شي حاجة تخبطات بالجهد .. خرجنا كانجريو .. و لقينا طبسيل فضائي طايح .. و خرجتي انت كاتزحفي .. اه .. انت كائن فضائي و قررنا نربيوه ""

كانت كاتصنت من نيتها ، وغير سالا.  بقا كايشوف فيها بملامح جدية ...سكنات غيرللحظة و هي تتلاح عليه قاجاه .. :"" واااش انااا كانهضر من نيتي و انت كااتقول ليا كااائن فضااائي .. واش كاتطنز علياااا "" 

ضحك و هو كايفك راسو :"" و اش كاتسناي مني نقوول لييك غير فهمييني .. صحتك هي هاذيك و مابيك والو علاش كاتقلبي ؟"" 

رجعات لبلاصتها كاتنتر مخنزرة  :"" انا بغيت غير نفهم سبب شكلي و صافي و الاهم .. علاش كاتخبيوني و شكلي سرعلى كولشي البشر "" 

تن*د و جاوبها :"" مابغيناكش تواجهي مشاكل مع الناس .. غايعقدووك و غايكرهوك فعيشتك .. و الوالد و الوالدة الله يرحمهم قررو يربيوك هكا مخفية شكلك بااش يحميوك .. "" 

جاوباتو و قالت :"" ماكايهمنيش .. شكلي عاجبني.. ماشي انا السباب فهادشي ... راه كاينة واحد المودل سميتها ويني هارلو .. فيها البرص و مامخبياش راسها بالع** كاتعرض جسمها لكولشي و واصلة و نااجحة فخدمتها و واتقة من راسها ... حتـى انا عاجبني شكلي .. ماعنديش مشكل يشوفوني الناس هكا "" 

جاوبها بصرامة و قال :"" آلااء .. شوفي فيا .. ممنوع منعا كلياااا .. تخرجي بلا لونتي اولا ترجعي شعرك للونو الطبيعي .. ممنوع تقولي هادشي لحتى حد .. شفتي رااجلك .. النهار تزوجي و تكوني براجلك... ماتقولي ليه والو على هادشي "" 

حلات فمها باندهاش وصاحت :"" واش من نيتك .. لهاد الدرجة واش حماقيتي .. على اساس هذا لي غانتزوج بيه .. غايسكن كل واحد فينا فقطب  ؟.. كيفاش غاندير ننعس بالعدسات و كيفاش غانبقا نصبغ شعري كلما طوال الجذر الفااهم  ؟.. "" 

تبسم و قال بسخرية  :"" اوى بلاش عليك الزواج .. " 

ض*باتو على كتفو  منزعجة  :"" قول ليا علاش كاتخبيوني "" رجع تن*د و دور وجهو و شداتو باصرار "" و اللهما نعاود نجبد الموضوع .. اخر مرة غير جاوب غير هاد السؤال "" 

رجع شاف فيها بغير حيلة  :"" ماغانقدر نقول ليك والو .. اكتر من انه خطييير علييك و بزاااف على حياتك .. الحاجة الوحيدة لي نوصيك بيها .. هذا سر يموت بينا حنا تلاتة .. انت و خوتك .. لا غير ..سمعتي "" 

جاوباتو باستسلام  :"" واخا اخويا .. شكلي سر ماغايعرفو حتى حد .. و لكن قضية راجلي مانضمنش ليك "" 

ضحك و شعكك شعرها "" لي سمع كلمة راجلك يقول نيت غاتزوجي .. شكون غايقبل عليك و انت هكا دايرة بحال الغرنينة ماتفعي ماتضري حمدي الله خوتك قابلين عليك "" 

جاوباتو بغيظ:"" بزااف عليك .. مالي كيف جيتك احسن واحد يتمناني.. و الى كنتي كاتهضر على داكشي ديال الحداقة و د*ك بلا بلا .. غانمشي لكوريا نتزوج بكوري احسن ليا من شي بوكرش عزيز عليه ****و .. "" 

ضحك و قال :"" كوري كاااع ...اش غاتجيبيه لينا نهضرو معاه بغولغل تخاد*كسيون ..  "" 

ضحكات بسماحة  :"" لا دابا انا كانتعلم ليها مع د*ك البنت الكورية لي كانهضر معاها فالفايسبوك يعني انا لي غانترجم ليكم كون هاني "" 

جاوبها ضاحك :"" اوى مزياان غير هو حلمي قدك و ماتبقايش طيري حيت هادشي ماغايوقعش .. براكة عليك ديري اصحاب اجانب و تنفاتحي على تقافات اخرى و تديري اصدقاء مختالفين على تقافتك و النشأة ديالك ..غير هو ردي البال " 

قالت مبتسمة  :"" عامين و حنا كانهضرو بنت قدي و ظريفة .. عايشة غير هي بين امها و باها .. هضرت معاهم واحد المرة فالسكايب انا كانهضر بالانجليزية و هي كاتترجم ليهم .. ظريفين بحالها و عرضو عليا نمشي عندهم شي صيف "" 

شاف فيها و قال :"" على جتتي "" 

عضات على شفايفها و شدات دراعو و بملامح مسكينة  قالت :"" و علاااش .. راك قريتي كولشي هضرتنا و قلتي ليا رتاحيتي ليها "" 

و قف و قال بشكل نهائي  :"" رتاحيت لهضرتها .. ماشي تسافري لعندها و زايدون .. شكون اصلا غادي يعطيك فلوس الطيارة باش تمشي .. انا ماتعوليش عليا .. و خوك حتى هو .. "" 

جاوباتو و قالت :"" و علاش حشومة عليكم .. غير 15 اليوم هكا مادات ماجابت "" 

جاوبها و هو خارج :"" انا و خوك متافقين نبنيو طبقة اخرى و نزيدو سطح ..  "" 

حلات فمها و قالت :" اش غااديرووو .. و علاش ؟"" 

ضحك و جاوبها :"" على المشماش ، نوضي تعشاي و دوزي تنعسي غدا ال8 و *دار عندها بنبرة محذرة * و الهضرة على شكلك اخر مرة نبغيك تجبديها "" 

و خرج .. شافت قدامها و قالت :"" مايعطيوكش راس الخييط وااالو ..اجي قالك يبنيو طبقة اخرى .. الكلاب ياكما شي واحد فيهم غايجيب لينا شي لفعة  ""

---------

مد يدو طفا المنبه ... ناض زين ال**بدين كايحك ظهرو بخمول .. وقف كايتاوب و مشا كايجر صندالتو للحمام ... بعدما قضى روتينو الصباحي من لبس و صلاة .. هبط للتحت لقا امو موجدة الفطور .. و كيف العادة .. حسوة و اتاي و ملاوي عاد مسخناهم مرافقين بزبدة و عسل ..

جات حطات لي باقي .. باس زين ال**بدين يدها و قال :"" صباح الخير الوالدة " 

تبسمات و قالت ليه :"" صباح الخير اولدي .. جلس تفطر "" 

جلسات حداه و جلس و كبات ليه زلافة الحسوة .. زاد فيها زيت الزيتون و شوية الكامون و شربها .. غير حطها على فمو و رجعو ...

قفزت امو من سهوتها و قالت :"" اتاامالك زربان غير بالشوية عليك ماكتشوفش فيه باقي سخوون "" 

حط الزلافة كايمسح فمو و قال :"" صافي الوالدة .. ماوقع والو ""

رجع بردها و شربها و من بعد لوى ملوية و ولاحها نيشان لفمو و شرب من اتاي .. شافت فيه امو و قالت بقلق :"" كول بالشوية غاتوحل ليك.. ""

شاف فيها و ضحك ..كمل دغيا و ناض وقف ..  :"" انا غادي الوالدة .. دعي معايا الله يسهل عليا هاد النهار ... "" 

هزات يديها و قالت :"" يااربي يسهل عليك ماصعااب و يبعد عليك ولاد الحرام فينما كانو اولدي  و الله يرضي عليك "" 

تبسم و قال :"" امين الوالدة .. انا مشيت ""

خرج و سد الباب .. تن*د وتتمتم  :"" يا بسم الله ""

دوز يدو على موسطاجو كيف عادتو و زاد مع الطريق ..

شافت عائشة فالبيت و عيطات .. :"" شيماااء .. نوضي ابنتي 7 لاربع هااذي "" 

تحركات شيماء كاتفوه .. ناضت جلسات و هزات تيلي طلات على الساعة .. لقات مكالماتو و لكن ماكانتش مجاوبة .. ض*بات على حنكها و قالت :"" وييلي نعست .. "رجعات غوبشات " خلييه هو لي تعطل عليا ..""

حطاتو وناضت باتجاه الحمام ..

-------

دخل زيد لغرفة آلاء .. حل الخامية ديال النافذة و مشا لاتجاهها جر عليها الغطا وصاح : آلااء .. نوضي ا آلاء ال7 هاذي ""

تحركات كاتغمغم بكلام غير مفهوم و رجعات دارت للجهة الاخرى .. 

جلس فجنبها كايحرك فيها :"" الاء .. نوضي .. ماغنخرج حتى توقفي قدامي للحمام "" 

تكلمات بنعاس :"" خليني غير 5 د .. عافاك "" 

جاوبها و قال :"" عاارف د*ك 5 د ديالك .. نوضي " 

حلات نصف عين طلات عليه و هي تغوبش:""سير بعد مني ... و لا سير قلب على راجل نيت لصقني فيه و تهنا مني و من صداعي "" 

ضحك و قال :"" على الصباح صابحة تنغري ؟ ياله غير نوضي الالا .. عارف راسي ماكانش خاصني نقول د*ك الهضرة " 

شافت فيه مغوبشة و قال :"" و صافي ماتزيديش فيه .. كاينة شي وحدة كاتخا** مع باباها "" 

ناضت جلست و قالت:"" و الى كنتي بابا .. *مدات يدها* طلع " 

هز حاجب فيها و قال :"" زعما لاخر ماعطاكش .. "" 

قرمات مابين شفايفها و عوجات عينيها للجهة الاخرى .. حصلها و قال :"" اوى حتى تسالي لي عندك .. و اقتاصدي شوية .. اقتاصدي " 

حدرات عينيها متذمرة و قالت :"" وااا خااا "" 

خربق شعرها و كان غاينوض و رجع جلس .. حدر راسها لعندو و قلب شعرها و قال :"" شعرك دغيا كايطوال .. ها الزغيبات البيضين كايطلعو.. عرفتي كون درتي الزيف و هنيتينا  "" 

شافت فيه و قالت :"" باقي مامقتانعاش بيه .. خفت نديرو و نندم نصدق كانلعب "" 

شاف فيها و قال :"" و هو بصراحة خاصك تبداي تفكري تبداي  تصلي و تحجبي .. راه مفروض عليك كمسلمة ابنتي "" 

عوجات وجهها كاتهرب .. خرجات من فراشها و علقت ..

بقا متبعها حتى خرجت لوح براسو بشكل دائري  و قال :"" شيطانك صحيييييح ""

تجمعو على الفطور .. شاف زيد فآلاء و قال :"" معاياش خارجة اليوم "" 

هزات عينيها كاتفكر ياكما دايرة هي و صاحبتها شي بلان .. حتى قاطعها و قال :"" فاش كاتفكري ..هو سؤال كايحتاج التفكير؟ .. "" 

جاوباتو و قالت :"" ال10 .. ال10 .. و لكن غاد.." 

قاطعها :"" ماكاين ما ولكن .. رجعي ديري الغذا ماغانشريو حتى حاجة من برا .. و ماديريش ليا لي بااط تاني .. راه جبدت الحوت منالتلاجة .. قلي بطاطا و الدنجال و ديري شلاظة و الزعلوك .. و ناااري و نلقاك ناقصة شي حاجة " 

هو كايهضر و هي كاتخبط راسها مع الطابلة .. ضحك زياد لي حداها و دار يدو تحت جبهتها و قال :"" داكشي دغيا دغيا ... مايستاهلش ديري لمخك ارتجاج "" 

ناض زيد لبس جاكيطو و هز حقيبتو و قال :"" ياله انا مشيت .. الله يعاون .. "" 

خرج زيد و ناض زياد حتى هو و قال :"" ياله حتى انا غادي .. سدي معاك الباب مزيان و رجعي للدار نيشان .. "" 

جاوباتو بملل و قالت :"" وااخا "" 

جر خصلة من شعرها ضاحك و خرج ..

شدات شعرها و هي كاتذمر من تصرفو قائلة :"" هااد الحماار ماتيرصاش .. شحاال و انا نجبد فيه تفوو.. "

ناضت للحمام و رجعات مشطاتو و جمعاتو .. هزات بوندا و دارتها فمقدمة شعرها تغبر الجذور البيضاء ..

خرجات جمعات الفطور و دخلات لبيتها تكمل لبسها  ..

------

خرج زياد نيشان هو و شيماء .. غير شافتو و هي تقلب وجهها .. هزات راسها و تمات غادية بالزربة .. تبسم منين شافها كيف مولف يدير و مشا لجيهتها .. وصل ليها و قال :"" صباااح الخير ..شيماء" 

مادارتش لجيهتو و مانقصاتش سرعتها و قالت "" الصبااح هذا .. و انا مزروبة .. فوتني عليك الله يرحم والد*ك "" 

جاوبها بمرح و قال :"" امين .. و لكن الانسان مزيان يبشر شوية و يبدا يومو مبشش و مبسم .. ماشي رابطهم و مغوبش "" 

وقفات شافت فيه مخنزرة و قالت :"" واش غاتبقا فينما تشوفني تجي تبسل عليا هكا ؟راه حنا جيران حشومة هادشي .. "" 

جاوبها قائل :"" اعود بالله ماقاصدش نتحرش بيك .. حتى انا عندي اختي و عندي النفس عليها .. انا بغيتك غير تعطيني فرصة .. و الى توافقنا ناوي نخطبك من ولد خالتك .." 

هزات عينيها فيه بغير صبر و قالت :"" ماكاين لا فرصة لا خطوبة انا وياك مستحيل يكون بيناتنا شي حاجة .. بلا ماتخليني نقول ليك كلام يجرحك .. الله يسهل عليك اخويا .. انا مانصلاحش ليك .. و اخر مرة توقفني هكا فالدرب و لا غادي نقولها لخويا و نصدق جابدا الصداع بيناتكم .. و خلينا بلا مانوليو دراري ... الله يعاون "" 

مشات و هو بقا واقف كايشوف تن*د و قال :" لوكاان تعطييني فرصة اشيماء .. غير فرصة ""

-------

خرجات آلاء من الدار .. سداتها و ض*باتها بجرية للدرب التاني فاتجااه منزل صديقتها .. 

وقفات قدام باب دار و غوتت "" هووودى الدوووودة "" 

طلات عليها صاحبتها و صاحت :"" الله يدود ليك الجناب الكلبة انا هابطة لمك "" 

ضحكات آلاء"" وا طلقينا .. خليني منشورة تاني "" 

بعد لحظات كانت هدى التحت .. شافت فيها و هي كاتقداد صباطها :"" شحال من مرة كانقول ليك ماتبقايش تصيحي على الصباح .. ماشي كولشي كايصبح فايق المصيبة "" 

جاوبتها آلاء و قالت :"" و هي لا طلقتينا .. غانتعطلو غايجري علينا داك المرض تاني و انا مكحلاها غياب و غانكمل ب0 فالفروض "" 

شدات فيها هدى و قالت :" و ياله ياله ..""

----

كان زين ال**بدين كايتمشى بين شوارع الاحياء الصناعية .. كيف عادتو .. كايدخل لاي مصنع قدامو يسول واش كاينة شي وظيفة شاغرة .. و بطبيعة الحال كيفما كانت... كانو اجوبة مختلفة و لكن نفس المعنى .. لا ... 

تن*د بعصبية و هو كايكلم نفسو :"" يااربي سهل فشي خدمة .. كيفما كانت يااربي لهلا تحشمني .. كيفما كانت يااربي ""

-----

وصلات ال10 ... و دق الجرس فالليسي .. تفتح باب القسم و خرجات آلاء هي الاولى كاتقوش بعينيها و كات**ل .. شافت فهدى حداها و قالت :"" كم لبتنا ؟"" 

جاوبتها و قالت :"" يوما أو بعض يوم "" 

جاوبتها آلاء و قالت :" كون كان المات امرأة اولا راجل  كون غيزت لمو "" 

جاوبتها هدى و قالت:"" غيزي ليه غير فالوراق و فوتي 5 .. راك لصقتي فيها "" 

شافت فيها بكبرياء مجروح:"" دابا انت لي كاتجيبي 6 و 7 فايتاني بشي حاجة ؟ "" 

جاوباتها ضاحكة:"" لي بغا يوحلها ليك و يتسبب ليك فاكتئاب يجبد ليك نقط المات "" 

جاوبتها آلاء :"" دابا انت صاحبتي و لا عدوتي "" 

عنقاتها بالجنب جاراها ضاحكة :"" بزوج .. على حسب فعايلك .. و قولي ليا فين غانمشيو هاد الساعتين .. "" 

جاوبتها آلاء كاتعوج فمها  :"" غانمشي نطيب لغذا لدوك زوج تيران.. "" 

جاوبتها هدى :"" واايلي ... نرجعو للدار من دابا باقي الحال .. نتسركلو شوية و نرجعو دغيا و نمشي معاك غاع نعاونك "" 

جاوبتها آلاء :"" وا بغيت و لكن غايرجعو يلقاوني ماموجداهش غايندموني .. غير خلي حتال العشية "" 

سولتها هدى :"" اش غاديري ليهم مرقة ؟ "" 

"" لا .. حوت مقلي "" 

"" ياء .. الحوت حلو ساهل .. و دغيا نرجعو يقدك الوقت "" 

جاوبتها آلاء  :"" يااله ازيدي الالة  ""

كايتمشاو فجنابات الشوارع الفارغة  .. كانو حيدو طابلياتهم خشاوهم فلي ساكادو ... و كيف عادتهم ديما متأنقات رغم ان ملابسهم ماكاتنتاميش لاغلى الماركات .. 

شافت آلاء فهدى بنصف عينها غاضبة .. و هي جاراها من يديها كاتزرب فيها و كاتقول :"" صافي قربنا ماتخافيش دغيا نرجعو .. بنت عمي البارح شرات من عندو شي بياسات واااعرين .. حلفت حتى نوقف عليه فاقرب وقت قبل ماتقادا السلعة .. هانتي غاتشوفي داكشي غادي يعجبك.. بنت عمي قالت ليا ماسخاتش تخرج من عندو .. وا كوولشي زويين .. حلفت عليها ماتوريه لحتى وحدة من غيرنا باش حتى حد مايتزاحم معانا عندو  "" 

جاوبت آلاء  :"" واش اصاحبتي شريان الحوايج على الصباح ؟ "" 

جاوبتها هدى :"" ماتخافيش كايحل النهار كولو غايكون خاوي نيت ناخدو راحتنا "" 

 "" الى ماكانوش نيت بياسات زوينين كيف قلتي .. غانعلقك... و زايدون مال طريقو هكا خاوية ..  "" 

جاوبتها هدى و قالت :"" راه هنا باقي فيه البني و اغلبية بني جديد .. باقية الدنيا خاوية و خفي رجليك لا بغيتي نرجعو دغيا ""

و اخيرا وصلو .. وقفو قدام داك الحانوت كايشوفو فيه .. شافت آلاء فهدى و قالت :"" عرفتي لاشافنا شي حد كانشريو من حوايج البال .. غادي نمرمد بيك الارض ""  

جاوبتها هدى قائلة :"" ماتخافيش عيبنا واحد .. على بركة الله "" 

دخلو و كان حانوت الملابس .. شي معلق و مجموعات مفرقة فكل جهة .. بداو كايقلبو و يشوفو اللى مناسبة لذوقهم .. داز وقت لي مناسب يخليهم يعرمو كومة ديال الملابس و حطوها قدام البائع .. نطقات هدى:"" و دير معانا المزيان راه شرينا بزااف من عندك .. بنت عمي البارح شرات من عندك و شفت شنو شرات حلفت نخلي شغالي و نجي حتال عندك و كون ظريف معانا "" 

ضحك الرجل  :"" مرحبا اختي على الراس و العين "" 

دار كايقلب فين يحط مشترياتهن و هي تغمز آلاء هدى ..

خرجو بعدما خلصو و تمو غاديين زربانين .. 

قالت آلاء:" وااو لمك مابايناش فهادشي غااع واش بااال ... ماشي بحال حوانت القيسارية داكشي ولا غير زبل هذا لمك خطيير الى بقا يجيب بحال هاذشي .. حتى من الحوايج الجداد مانبقاش نخسر فيهم فلوسي  ""

جاوبتها هدى بفخر و قالت :"" واشتي باش تعرفي صحايبتك ماكاتجيب غير الفرص النادرة ""

تقلات آلاء مشيتها و قالت بتوتر"" ناري مك .. شوفي دوك الزوج تما كيف واقفين .. زيدي نقلبو الطريق "

جاوبتها هدى بتوتر حتى هي :"" غير زيدي ماعندهم مايديرو لينا "" 

دازو من قدام زوج ذكور كايتكيفو .. زربانات مشادات ..غير دازو البنات من قدامهم ، تغامزو و وقفو .. 

آلاء قشعاتهم و هي تقول بهلع :"" خففي رجليك لمك راه وقفو غايتبعونا "" 

هدى "" مال مك كاترعدي .. ماتخافيش شوفي المشية عندهم مامستقيماش بقا ليهم غير يتبعونا "" 

جاوبت آلاء و الخلعة طلعات معاها :"" هادو مااشي حال وحدين غايتبسلو و يمشيو .. غايشدو والدينا انا و ياك.. و ماكاينش لي يعتقنا ..هانتي نحسب من 1 ل 3 و نعلقو "" 

هدى :"" نخاف يشدونا .. انا جريتي تقيلة "" 

جاوبتها آلاء :"" و عاد قلتي مشيتهم مامقاداش .. شفتي .."" 

جاوبتها هدى :"" صافي سكتي دابا .. اكيد كايتسناونا ندورو من شي قنت مستور على هذا .. و لكن و اللهلا كانت ليهم .. ياله ندوزو من جيهة البني .. راه تما كايكونو البنايا "

"" اه باش يتافقو هما و البنايا و فبلاصة مانتغريساو و نمشيو .. غانصدقو مغرسيين و مغتاصبين و بحال والو مقتولين  "" 

جاوبتها :"" فال الله و لا فالك ماالك يالطيف فمك فيه غير ال**ايد .. البنايا ضريفين ولاد الناس فوتي غير ضحكهم .. طلبي الله يبغي شي واحد يدوزنا ..  ""

بعدما فقد زين ال**بدين الامل فشغل المصانع .. داز لمشاغل لبني لعل و عسى يلقى باش يعتق يومو ..

وقف كايسول فكل بناية و نفس الجواب كان كايطيح على مسامعو .. بعد بكتاف طايحة من خيبات الامل المتواصلة و من التعب .. وقف داير يديه فجيبو كايشوف و يخمم لفين غاتكون واجهتو الموالية .. كايحس براسو دار الدار البيضاء كاملة بدون نتيجة فعلية .. و مازال مصر انه يقلب  ..

وقفات آلاء و هدى زربانات لاتجاه البناية حتى نطقات هدى بأمل :"" واااش هذاااك ولد دربنا و لا كذبت "" 

نطقات آلاء بلهفة و عينيها خارجين  و قالت :" اااه اااه ..و اللهتا  ابوووشنبااات زييييدي دغيا هو لي غايعتقنا ""

كان وااقف ناوي يتحرك حتى كايسمع اصوات بنات كايغوتو باسمو .. دار شاف فيهم استغرب فالاول ماعرفهمش .. حتى وقفو قدامو كاينهجو .. 

نطقات آلاء و قالت :"" عتقنا عتقنا .. بنات دربك احنا اخويا "" 

جاوبها و قال :"" اش كديرو هنا .. مالكم ؟"" 

تكلمت هدى  :"" اخويا و الله الى  كنا غير مصخرين .. فاش كنا راجعين تبعونا هاادوك كايلوحو الهضرة .. خفنا مالقيناك غير نتا قدامنا تعتقنا .. ديرنا خواتاتك و دوزنا الله يرحم مييمتك "" 

هز عينيه مخنزر .. شاف فيهم واقفين مقنتين حاضيينهم و هو يهز يدو صارخ :"" ماااالنااا نتوووما .. كاين شي مانقضيييو ؟"" 

شافو دوك الزوج في بعضهم .. دارو ريوسهم غاديين و لكن ماشي فعليا .. كايتسناو امتى يدوزو و ينفاردو بيهم من جديد ..

رجع شاف في البنات .. طلع و هبط فيهم و قال :"" زيدو قدامي .. "" 

تشادو و مشاو لاصقات حداه كيف الفليلسات .. غاديين و كايدورو يشوفو لايكونو باقيين وراهم .. و كانوا باقين وراهم بكل اصرار وقح .. 

دارت آلاء عند هدى نغزاتها و قالت :"" اويلي باقين تابعينا "" 

شافت هدى حتى هي لور .. حس بيهم زين ال**بدين و دار كايشوف فين كايشوفو و هو يوقف و غوت :"" واش غاتبقاو تابعينا ..تا سير لا عندك شي شغل قضييه لا انت لا هو "" 

ماتحركوش و هما كايحكو ورى ودنيهم و فراسهم مصرين يبقاو وراهم .. حيت عارفين اغلب البنات كايلجؤو لاي واحد فالطريق يعاونهم .. و هما كايتسناو الفرصة يمشي و ينفاردو بيهم ... عوج زين ال**بدين وجهو بغير صبر و قال :"" المشاكل .. المشااااكل كايلقاوني غير انا من دوون النااس.. ضرووري يخرج نهاري بشي كريتة ..  "" 

تقدم لجيهتهم بخطوات سريعة .. و هو كايتدمر و ينغر .. 

دخل فلي قدامو براس ماعطلوش طااح كااو و لاخر جبد موس .. وقف كايهدد :"" سير بلا ماتخليني نتقب ليك مصارنك بهادا .. خلي ليا العويتقات و سير ماحدك بصحتك .. ماشغلكش  "" 

هضر زين ال**بدين بعصبية و قال :"" حيد المضى من يدك و مد دراعك نشوف واش حتى هما طوال كيف ل**نك .. "" 

شدات هدى فآلاء كتوشوش ليها و هي كاتغزل و قالت  :"" زييييدي الساطة نهربو و خليه معاه هو راجل "" 

جاوبتها و قالت :"" لا حشومة ماجاتش .. و اصلا يقدرو يتلاقاو لينا شي وحدين اخرين .. غير خلينا هنا.. ماطالعاش ماطالعاش ""

و اكيد مارماش الشمكار المضى من يدو .. بل حاول يدوزو على كرش زين .. تفاداه و رجع بلور و البنات غوتو ..

هو كايض*ب و زين ال**بدين كايتفاداه .. حتى وصل للبنات و هما حاميينها غوات ... مد الشمكار يدو مرة اخرى و لكن شقمها زين ال**بدين هاد المرة .. لوى يدو باش يطلقو و لكن لاخر حلف لاطلقو .. حاول يتملص و زين ال**بدين حاكمو بجهدو بحكم الموس فيديه و كايتفدا ما امكن باش مايتقاسش.. و هو متأكد بلي نحسو غادي يلعب لعبتو و يتسبب فشي مصيبة فذاتو بحال ديما .. طوال الاشتباك و كل مرة واحد فيهم غالب .. شحفو البنات من الغوات و لبدوها حتى ملو ... ناض المبوق لاخر هز حجرة تقيلة ناوي يبجغ راس زين ال**بدين لي عاطيه بالظهر .. ماعاقت آلاء حتى جاتو من الجنب دخلات فيه طاح هو و ياها فالجنب و جا لاخر .. مابان ليه غير صاحبو فطريقو .. لا الفران كاين لا تقل الحجرة مخليه يتحكم فراسو بحيت تقلها غلبو و ماجا غير فراس صاحبو بجغو  طاح و لاخر طاح معاه و تزدحات جبهتو مع قنت الطريطوار و فالاخير تضغطو ريوسهم بزوج و شدو الارض .. ماعرف زين ال**بدين باش تبلى .. بقا تابت كايحاول يفهم اش وقع .. اما الاء عينيها خارجين فصديقتها لي مصدومة بدورها .. دورات وجهها من يمين لشمال و هي مسرحة على سدرو لي كاينهج .. جات تنوض بالزربة و هي تلقى شعرها تلوى فصدفة شوميزتو السوداء ... رجعات راسها لبلاصتو و غوتت بالم .. ناض زين ال**بدين جالس و هو مستغرب من تباتها على سدرو و قال :"" غاتبقاي لاصقة تما ؟!!"" 

جاوباتو بحرج و غضب فنفس الوقت و قالت :"" و علااش غانلصق فيك زعما ...راه شعري تلوى فحوايجك " 

باقي ماكملتش .. نطرو حتى غوتت و ناض وقف وقال :"" ها هو تفك "" و بدا يسوس حوايجو ..

شدات الاء راسها كاتركل و كاتغوت .. نوضاتها هدى و وقفاتها .. ياله غاتسبو .. وهو يواجهها داير يديه على جنبو و هاز حاجب بتهديد .. شدات ليها هدى فمها و تبسمات بحرج و قالت :"" ماتديش عليها .. "" 

دور وجهو عند دوك زوج لي طايحين .. قلبهم و لقاهم باقيين حيين ..

داز واحد من الطريق و جا سولهم و قال :"" هادو عاوتااني ضااربو ؟!! "" 

و دارو بتلاتة كايشوفو فيه مستغربين ...

ياله غاينفي زين ال**بدين كلامو و يقول بلي هو لي ضارب معاهم و هي تقاطعو آلاء و قالت :"" اه .. كانو مضاربين .. جا يض*ب هذا لاخر بحجرة صدقو طااحو بزوج كيف كاتشوف "" 

شاف فيها زين ال**بدين باستغراب و تفاجئ حتى قال لاخر :"" وا هادو واخا صحاب ولكن كايضاربو بزاف .. خلينا نعيطو لابيلونص دغيا  ""