آلاء و المنحوس

الجزء التاسع

و قطعات .. ردات الاء التيلي قدامها .. شافت فبه و لاحتو حداها و رجعات غمضات عينيها و كاتقول :"" تمنيت غير واحد فحياتي ماكاينغرش .. غييير وااحد يااربي .. "" 

شوية ناضت تاني ..شافت فالشرجم ..لقات الظلاام طااح شحال هاذي .. طفات التيلي .. و مشات هزات الدفتار لي عطاتها هذى .. صورات داكشي لي بغات لأجل غير مسمى ..هزاتو و خرجات .. تصادفت مع زياد خارج من بيتو .. طلع و هبط فيها و قال :"" اشتي انت ..الى قدر الله ومتي فداك البيت .. لا انا لاخوك غانعيقو و لا نجيبو الخبار .. نصف حياتك نعاس و النصف لاخر شبه ناعسة .. "" 

دازت فيه و هي كاتفوه و تحك راسها و قالت :"" ماعنديش ليك الغاانة دابا بقا تما فبلاصتك حتى نرجع "" 

جاوبها و قال :"" على فين غادية الكتكوتة فهاد الوقت "" 

جاوباتو :"" غاندي لد*ك المصعورة هاد الدفتار ""

جاوبها و قال :"" وا فين غادية هكاك .. رجعي غطي عينيك و جمعي شعكاكتك "" 

ساطت و رجعات لبيتها .. دارت لي لونتي و جمعات شعرها و رجعات خرجات ..

دازت فيه تاني و هو يجر ليها خصلة من شعرها خصرو ليها كيف عادتو .. محسات غير بالدفتاار خبطاتو بيه .. تحنى يهز كلاكيطتو هربت و تبعها .. هبطات كاتجري و كاتغوت فالدروج و هو الفوق هاز الصندالة كايتحلف ..:"" 10 الدقايق .. تفوتيهم نجي لمك "" 

حلات الباب التحت و قالت :"" سير قابل العشاء بغييت لييك مصييبة بقاا مقاابلني انا "" 

سدات الباب .. و تمات غادية كاتغر .. تفكرات زين ال**بدين .. ماباينش حسو .. تنفست الصعداء ... واخا هكاك ماشي كليا لان الزنقة تقريبا خاوية .. مشات دغية دارت مع درب هدى .. وقفات التحت كاتعيط :"" هوووودىىىى الدووووودة "" 

طلات عليها من الفوق و قالت :"" الله يدود ليك الجناااب ماغاتحيدييش منك هاد القااعدة  ... ؤااه السوونيط قدااااش محطووط تما .. مابقا غير ندير ليك اشارة حمراء كاتشعل بالضو باش تشوفيه "" 

جاوبتها الاء بملل و قالت :"" هبطي ازمر مامسالياش ليك .. تابعني زوج حلقات ديال ويكلي ايدول خاصني نتف*ج فيهم "" 

جاوبتها هدى :"" واااو مشغووولة .. "" 

غمضات الاء عينيها و غوتات :" واااا هبطيييييييي "" 

شهقات هدى و ض*بات على حنكها وقالت :"" وييلي ويلي الحلاااقم يابنيتي هاني هابطة "" 

دارت يديها فجيابها و دارت كاتلعب برجليها .. حلات هذى الباب و طارت عليها .. شاداها من ودنيها بزوج كاتجر :"" مااال مك كاتغوتي .. بابا بسبابك سمعني المنقي خيارو "" 

جاوبت الاء و هي كاتجر ليها شعرها كذلك و قالت :"" الى ماطلقتيش غانغوت تاني باش يسمعك المنقي خيزوه "" 

طلقاتها هدى و هي كاتشوف فهاد الحمقاء لي مستحيل دير عقلها ..

قادت الاء شعرها و قالت :"" غذا نلقاك هنا .. و يااربي مانلقاكش "" 

دفعاتها هدى و قالت :"" ياله دااركم يا شيخة "" 

دارت الاء عندها و قالت :"" الشيخة هي مك "" 

نتفاتها هدى تاني ..تمات هااربة لدارهم و هي تنزل عليها الاء للظهر و هرباات حتى هي .. وقفات هدى كاتحلف :"" ااحححح يدين هادوك و لا بالات .. هاهي فيك الكلبة حتال غذا "" 

مشات الاء راجعة فحالها .. و طلقات شعرها و رجعات جمعاتو و هي كاتنغر :"" الله على زغيباتي مساكن لي جا ينتفهم ليا .. و هو خفيف هكا الله ياخد الحق فالظالم .. ""

-------

كان راجع زين ..غير دار مع الدرب و شافها .. خرجو عينيه ..شاف الدنيا خاوية ..و فهم بلي هاذي فرصة لا تعوض .. تم غادي كايقرب ليها بخطوات تابتة صامتة ..خطتو كانت ينتفهم و يتخشا مخبي فجنب الديور لي فيسارها ... و لكن شعرها مسدوود .. اش هااد الزهر .. كيف غايدير لهادشي .. كمل طريقو كايقرب و كايشوف واش ممكن يتلهم بشي خطة اخرى .. ماحس حتى وقف وراها مباشرة .. كايقلب على شي خصلة حرة .. هي حسات بشحنات غريبة وراها .. غير ضارت بانت ليها الجسدة بلا ماتشوف الرااس و هي تطلقها بغوتة ..طارت كاتجري .. لبابهم لي كانت قريبة ليه ...جبدات السوارت و هي كاتشطح على انغام الموسيقة الزيمبابوية .. كاتطيح السوارت و ترجع تهزهم بالخلعة و زين كايحاول يهدنها و كايقول :"" غير بالشوية عليك .. ماتخااافيش االاء .. الاااء""

و مع الكلمة الاخيرة دخلات و زدخات الباب .. كان الظلام طلعات حاميااها غواات .. حتى دخلات لدارهم .. خرج زياد كايجري من الكوزينة و زيد ياله هابط من السطح ..

نطق زياد و قال :"" ماالنا انت اش كااااين .. "" 

شافت فيهم بزوج .. و قالت :"" ك...ااه ؟ ...خفت "" 

شاف زيد فزياد و غمض عينيه و لوح براسو يمين و شمال و مشا .. رجع زياد بانظارو لختو و قال :"" سيري ابابا تشدي الارض سيري .. طليتو اخضر ""

دخل زين لبيتو .. و تلاح فبلاصتو مفقوص على الاخر .. قمة النحس يكون حل ا****ة ديالك بين يد*ك و ماقادرش توصل ليه بسباب ا****ة نفسها .. مصييبة هاذي .. كيفاش غايوصل لشعرها و هي ذابا فينما تشوفو كاتهرب .. ترونات ديال المعقول و ولا كايفكر ينساحب و يدير بناقص غااع .. و لكن فاش كايفكر فمستقبلو .. ماباغيش يكمل حياتو بلا خدمة بلا زواج بلا استقرار بلا راحة .. بسباب غير شعرة وحدة .. ممكن تحسن اي حاجة مأرقاه فحياتو .. ممكن يخدم خدمة رسمية بمؤهلاتو الحقيقية ماشي اي خدمة ... و من بعد غايقدر يحسن مستوى عيشو هو و اسرتو الصغيرة و غايقدر يهزهم مرتاح البال .. و من بعد غايكون ممكن ليه يكون اسرة .. و يخطب البنت لي كايبغي و غادي يتهنا من اي نحس بسباب ا****ة ممكن يطاردو و غايعيش مرتاح .. كولشي هادشي غايتحقق غييير بزغبة .. فقط زغبة و لي الحصول عليها صدق بالنسبة ليه اصعب من تقليع ضرس من فم السبع .. 

جلسات بين خوتها كاتدور فعينيها و كاتقا**هم و هما كايتعشاو..

نطقات و قالت :"" عرفتو قبايلة كنت كانتف*ج فواحد الدراما .. البطلة مسكينة كاتعرض لمضايقات من واحد البسايكو م***ف .. و ماقدراتش تقولها لوالديها حيت هما محافظين .. و كايقلبو على اي فرصة يزوجوها .. و الى عاودات ليهم غايصحابوها هي السباب فلي كايوقع ليها .. و هي مسكينة مادايرة لا بيديها لا برجليها .. باشنو فنظركم غايسالي الفيلم ... اشنو خاصها دير فحالة بحال هاذي "" 

هز زياد راسو شاف فزيد و قال :"" البارح تلاقيت مع ايووب .. سلم علييك "" 

جاوبو زيد :"" وايلي ..ايوب ديال الليسي ؟"" 

جاوبو زياد كايضحك :"" بشحمه و لحمه .. راه خديت نمرتو حتى نعطيها ليك  ""

ضحك زيد و قال :"" و ايااام دوزنااهم معاهم .. لا هو لا امين "" 

ضحك زياد و قال :"" امين باقين معاه على صلة ..ايوب لي تجلى لينا "" 

ضحك زيد و جاوب :"" ان شاء تدالله شي نهار نتجمعو "" 

جاوبو :"" ان شاء الله "" 

رجعو كاياكلو و الاء بيناتهم كاتخنزر فيهم من يمين ليسار .. ربعات يديها و قالت :"" اشنو انا دابا طبسيل التقلية... انا كانهضر معاكم و نتوما منخليني ... "" 

شاف فيها زيد و قال :"" الى تعشيتي نوضي غسلي الماعن .. و نقصي من الدرامات الخاوية راك وليتي بحال الباندا .. لا من جهة ال**ل لا من الكحولية لي ضايرة على عينو .. ""

هزات يديها حطاتهم على عينيها و قالت :"" اويلي .. دارك سيركلز بانو "" 

جاوبها و قال :"" نوضي قبل مانردهم بلو .. ياله "" 

ناضت كاتنفخ كيف عادتها جمعات الماعن .. غسلاتهم و رجعات لبرى .. لقاتهم متكيين كايتف*جو ..دازت فيهم كاتخنزر و قالت :"" غذا عندي 8 .. و عاافاك فيقني بالشوية بلاش تهنزيير "

جاوبها وقال :" اوى لا نعستي من دابا بلا سهير غاتقدري تفيقي بلا مانهلك حلقي معاك ""

دخلات لبيتها.. شعلات الضو .. و مشات تكات فبلاصتها.. شافت فالسقف و سرحات كاتفكر ..

ضرها رااسها من جييهتو .. علاش فجأة ولاو كايص*رو منو هاد التصرفات العجيبة .. هو عمرو كان مهتم بيها و لا يعيرها اهتمام .. و دابا فجأة و لا كيف ظلها .. موضوع حيرها و لكن ماشي لدرجة يسهرها .. سهرتها كانت مع فيديوات الكيبوب لي ماكاتملش منهم ..

-----

يوم جديد .. راجعة هي و هدى من اليسي مع 9 .. البروف ماجاش و هما مافيهم لي يصبر لحصة التالية قررو يكاسيوها.. مشات معاها للدارها تدوز معاها الوقت ... و تستاغلها فالطياب كيف عادتها ...

بعدما فكرو للمرة التانية ناضو يرونو فالكوزينة ..

قالت هدى :"" اش غاديري ؟"" 

جاوبتها الاء:" زياد بغا مرقة الدجاج بالزيتون و بطاطا و لكن بان ليا الزيتون و الخرقوم ماكاينينش  "" 

جاوبتها هدى و قالت :"" طييري جيبيهم "" 

جاوبتها الاء :"" باش يخرج ليا ابوشنبات من شي قنت تاني .. لا اختي وليت نخاف "" 

جاوبتها هدى :"" تي سيري باراكة من الطنز .. واش هبلتي ؟"" 

شافت فيها الاء و قالت :"" صاي لي ليها ليها ماغاديش يعضني .. هانتي تحسي بيا قربت نجي ... هبطي حلي الباب تلقاي ليا "" 

ضحكات هذى ساخرة و قالت :"" بالحليب و التمر ؟""

هبطاتها الاء و قالت :"" البارح تبعني ... و وحلت فالباب .. البارح مادار والو هاد المرة غايدير .. انا غادية و ديري لي قلت ليك .. هبطي تلقاي ليا "" 

ضحكات هدى و قالت :"" واخا غير سيري .. ياربي تعطيها عقل ""

غير وقفات الاء فالحانوت .. و هي تلقاه كايشري حتى هو .. شافت فيه و دار شاف فيها .. ارتاسمت على محياه المفاجئة من وجودها .. و هي غير شافتو قلبات الكريق تمات راجعة حتى سمعات صوتو كاينادي :"" الاااء .. تسناي بغيت نهضر معااك "" 

غير شافها زين ال**بدين و تبعها يطبق داكشي لي قرر البارح و لي كايتمتل فانه يوقفها .. يعتاذر على تصرفو الغريب .. يخليها تطمن ليه .. غايهز يدو و يدير بلي شي حاجة لاصقة فيها ..اولا يلصق مغانتو فيها .. مهم اي حاجة ممكن تخليه يحصل على مرادو ..

صاح و هو تابعها :"" الااء .. تسنااي بغيت نهضر معاك .. "" 

غير نطق و هي تزرب .. زرب حتى هو باش يوصل ليها .. شافتو زرب و هي تطلق رجليها للريح .. و مالقا غير يجري و هو كايعيط ليها توقف..

هو يجري و هي تجري و تدور تشوف و تزيد سرعتها .. بان ليها باابهم من بعيد مردود و هي تغوت :"" هووووودىىىىى عاااتقييييييي ""

حلات هدى االباب .. طلعات الاء فوق التروتوار .. تعكلات فالباب طاحت تزربعات و هي باقي ماداخلاتش .. شافت زبن جاي كايجري و باقي كايقول تسناي . شافت فهدى و مداات يديها و قالت ليها :"" جريييينييي .. دغيااا .. واانااري ميي سربيييييي "" 

خرجات هدى مفزوعة .. ياله شدات يظيها تحرها و هو يشد زين رجليها .. هنا الاء بغات تسطى و خرج ليها الحلووق بالغواات و هو عيا مايهدن فيها و هي ولا هنا .. كاترطى مغمضة عينيها و كاتغوت .. :"" واا دخلييني و مييييي عتقيييي "" 

زين يجر و هدى تجر و الاء بيناتهم غاتسطى .. فالاخير قدرات تزبق ليه .. دخلاتها وردخات الباب دغية .. طاحو بزوج وراء الباب كاينهجو و زين كايدق من برا و كايقول :"" الاء ماتفهمينش غلط وا بغييت غير نهضر معاك و اللهما فنيتي شي حااجة خايبة "" 

شافت هدى فآلاء و قالت :"' خرجي عندو من هضرتو كانظن نيت بغاا غير يهضر معاك ماعرفتي اشنو بقا "" 

ناضت الاء وقفات شادا ظهرها .. شافت فهدى و قالت :"" اش غايكون باغي غااع .. من نهار تظغط ليه المخ بالفاز و هو يتسطى .. ماغايكون غير تخورج ليه داك المخ و مابقاش كايعرف اش كايدير ..  و اللهلا خرجت ليه بعدي مني .. احح اميمتي على حاالة .. غنشكيه لخالتي عائشة تشد عليا الجغل ديالها .. بزااف عليا هادشي "" 

طلعات الاء كاتخبط رجليها و الاخرى وراها ..

دخلو للدغر و جلسات الاء كاتسووط و قالت :"" اوووف خوا ليا المااء فركاابي الله يعطيه دقة با جدي لي ماشفتو .. ولد الحراام بنت ليه مسالية جايكمل عليا .. بقينا دابا بلا زيتون و خرقووم .. باش غانصبو داك الزبل بااش تفوو علامن صبحنت هااد النهار "" 

ضحكات هدى و قالت :"" صافي غانطل نشوف واش مشا و لا باقي "" 

دخلات هدى للبيت الاء و طلات .. بان ليها جالس فالتروتوار تحت منهم مباشرة ..

رجعات عند الاء قالتها ليها و قالت :"" خليه ينبت تما حتى انا ماخارجاااش "" 

و ناضت للكوزينة .. نصبات الغذاء بلا خرقوم .. خلاتو يطيب و خرجات للبرا .. مشات لبيتها لقات هدى كاتطل ..

قالت الاء ليها و هي مستغربة :"" اش معلقة كاديري تما "" 

دارت عندها هدى و قالت ليها :"" هضري بالشوية .. اجي تشوفي "" 

قربات الاء لعندها بتوجس .. طلات حتى هي و هالها منظر زين .. بحيت كان جالس و داير يديه على راسو .. جلسة شخص بئيس و مكتئب و ماشي بعيد مقبل على الانتحار .. حزنات عليه و ماعرفاتش علاش تأترات للمنظر ديالو .. و كملات عليها هدى منين قالت :"" شوفي مسكين حالتو و اللهتا قطع ليا قلبي .. غاتكوني جرحتيه بتصرفك .. او فينما تشوفيه تهربي بحال الى فيه الجداام .. و زايدون سمعتيه قالك ماتفهميش غلط بغا غير يهضر معاك .. انا جاني غير زدتي فيه و نيت يا أما محتاجك فشي حاجة اولا مزعوط فيك و بغا يقولها ليك .. منين عتقتيه داك النهار بالطارو و تصرفاتو من جيهتك مابقاوش كيفما شحال هاذي .. مابقاش يخنزر فيك و لا غااع يتشكا منك .. انا بان ليا غير هبطي شوفيه اش بغاك .. و ماتنسايش راه صاحب خوتك .. الى دار شي حاجة ماشي خي هاذيك قوليها لخووتك "" 

شافت فيها الاء و كانت شيئا ما قنعاتها نطقات و قالت :"" زعما هاذشي لي بان ليك .. اش غايكوون بغااني غاااع .. د*ك الهضرة ديال مزعوط فيا غير حيديها انا و هذاك الكائن خطان متوازيان و ماغادينش فنفس المنحى .. هو غادي فاليمين و انا فاليسار .. *رجعات طلات عليه* اووف صافي غانهبط نشووف ... الى تسطا تاني هبطي عتقي .. "" 

شافت فبها هدى ضاحكة و قالت :"" غانبقا نطل عليك من هنا غير سيري""

حلات الاء الباب و مادارش عندها .. تقدمات لحداه .. هزات راسها للسماء و شهدات .. هبطات لحداه و جلسات .. هز راسو .. شاف فيها .. و تعالات الصدمة على وجهو .. نقل نظرو منها لباب دارها و رجع شاف فيها مستغرب من تصرفها .. فهمات فاش كايفكر و قالت :"" سمع... بقييتي فيا .. و قلت نعطيك فرصة فين تهضر و تقول لي بغيتي ... و سمح ليا الى جرحتك بتصرفي و لكن حتى تصرفاتك غريببة و خلعااتني "" 

سكتات كاتسنا جوابو ... كان كايشوف فيها و ساهي كايفكر .. حتى نطق :"" ا..اه .. انا لي سمحي ليا .. عارف راسي خلعتك "" 

شافت فيه بملامح شبه مستريحة و قالت :"" ياله .. قول .. علاش مصر تهضر معايا ""

ألاء :"" اوى قول ليا .. علاش مصر تهضر معايا "" 

هبط عليه هاد السؤال كيف سطل ديال الماء بارد .. هي سولاتو .. اكيد غاتسولو علاياش بغا يهضر معاها.. و هو فينما يشوفها يقول ليها غير بغيت نهضر معاك .. هاهي قدامو اش غايقول .. راه ماعارف مايقول .. حتى من الاعتذار اعتاذرو بزوج و تصفات الخوااطر .. مابقا ليه منين يدخلها .. و هو كايفكر فهادشي بقا قدامها كايدور فعينيه و هي كاتتسنا جوابو .. و لكن قررات ترحمو و تكمل كلامها و توفر عليه اي حماقة ممكن يتفوه بيها .. و قالت :"" كاتبان مهمووم و عندك مشكل "" 

دار لقدامو .. تن*د و جاوبها:"" مشااكييييييل "" 

مطت بشفايفها و قالت :"" اممم .. ممكن نتخيل .. شومور و ماعندكش خدمة رسمية .. اذا الظغط المادي غايكون داير فيك مابغا .. و الظغط المادي غايأتر فيك و يدير ليك الظغط النفسي .. اوى الظغط النفسي كيأتر فالذات و كايولد امراض عضوية .. اوى و الامراض العضوية غاتتفاقم حيت ماعندكش باش تداويها .. و الى كنتي مريض ماغاتقدرش تخدم خديمة ديباني بيها حيت غاتكون عيان و ماتستحملهاش.. اوى و من هادشي كولو غاتزيد تتدهور الحالة و يتجمع كولشي .. الظغط المادي و النفسي و الامراض و يلعبو بيك الهوند.. و بالتالي هاذشي  غايأتر فالمدى البعيد لي كايشمل المستقبل و الحياة الزوجية و الولاد و ما الى ذلك ..  "" 

شافت فيه و لقاتو حال فمو كايشوف فيها مدهوش .. تبسمات و قالت :"" جبتها لااصقة يااك .. ؟"" 

رمش زوج مرات و هو باقي مدهوش.. شاف قدامو لبعييد مؤيد لصحة كلامها.. و كملات  :"سمح ليا على صراحتي او وقاحتي .. و لكن واش هادشي عندو علاقة بد*ك بلا بلا لي كايقولو عليك ؟ زعما داكشي ديال منحوس و لا ماعرفت اشنو "" 

رجع شاف فيها و كملات محسنة لكلامها :"" بغيتي الصراحة .. انا ماكنأمنش بهاد الهضرة ديال منحوس و لا حتى عندو الزهر "" 

تحولات نظرتو لدهشة و قال :"" ماكاتآمنيش بهادشي ؟"" 

جاوباتو :"" لا .. انا كنآمن بلي ربي عطانا تكافؤ الفرص فهاد الدنيا .. ماخلقش هذا بالزهر كولشي غادي ليه مزيان و لاخر خلاه بلاش و حتى حاجة ماغاديا ليه مزيان ""

دار يدو على خدو و قال :"" متأكدة.. انا عاارف بلي ربي سبحانو عادل فحكمو .. و لكن راه كاينين ناس لي كيف كانقول تزادو بملعقة ذهب في فامهم .. كاين لي عندو الزهر و كايجي الخير حتال عندو بلا مايتمحن عليه و ببساطة هادشي حيت عندو الزهر و لي صغع .. راه لي دار كايلقا فيه الع** " 

جاوباتو نافية لكلامو و قالت :" هااد الهضرة طااغية عندنا و كوولشي كايقوولها و مآمن بيها .. و لكن بالنسبة ليا ماشي منطقية .. ااه كايبانو لينا هادوك الناس الاغنياء بلي عايشين حياة متالية .. و اي حاجة ممكن يوصلو ليها .. اه بالصح و لكن هادشي ماكايمنعش انهم يكونو بهمومهم .. كوولشي النااس ..لا كوولشي المخلووقات على الدنيا عندها هموم .. راه حتى الدري الصغير لي غادي شاد فماماه و طاحت ليه مصاصتو فالارض و قالت ليه ماماه صافي ولات خايبة و بدا يبكي عليها .. بالنسبة ليه راه هم و مشكل .. كولشي كايواجه اوقات صعيبة غير حنا لي ماكانردوش البال و كانقلبو على اي حاجة نبردو بيها على ريوسنا و نعيشو دور الضحية ونقدرو نبررو بيها غااع اغلاطنا .. داكشي علاش كنظلو انقولو ااح ماعندي زهر  لي درتها ماتصدقش .. هادي هضرة الفاشلوون لي مافيهم مايديرو شي حاجة و سمح ليا عليها .. ماخاصناش نبقاو عايشين دور الضحايا لي حتى حاجة ماساهلة ليهم في حين لاخرين اه .. كولشي مدروس فهاد الدنيا و حتى حاجة ما صدفة ..كوولشي فبلاصتو و اي حاجة كاتوقع لسبب .. انا كانشبه الدنيا بورقة امتحان لي الاستاذ حدد فيها الاسئلة و كاتبقا انت كاتعمر الاجوبة .. و ربي عاطيك القواعد و الدروس فالقرأن و السنة باش تطبقهم فالامتحان ... الى جاوبتي باجوبة غير القواعد غادي تسقط .. و كل انسان عندو ورقة مختالفة على الاخر .. كل واحد و حياتو الخاصة ..كل واحد عندو ب**ة وحيدة .. و كل واحد عندو وجهو بوحدو .. كل واحد عندو adnبوحدو .. وكل واحد بكتابو بووحدو .. هاذشي علاش ماخاصناش نقارنو ريوسنا مع الاخرين .. ربي حاط كل واحد فداكشي لي كايناسبو و كايعطيه الامتحانات لي فحدود القدرة ديالو ربي ماكايعطيكش فوق طاقتك .. و دوك لي كايبانو ليك ض*بات حظ انا كانشوفهم مكافآت من الله لي وهبهم ليه حيت كايستاحقها .. حيت خدم و دمر عليها .. سواءا قرايا .. خدمة .. سفر .. اي حااجة .. داكشي علاش ماعندكش الحق تقول علااش هذتك عندو و انا لا .. هذا هو تكافئ الفرص تحرك ترزق .. غادي تتحرك ربي غايرزقك ..ركز غير فورقتك .. ماتشوف لاهك لاهك .. و حيد عليا هضرة الفاشلين و الجهلاء .. انت راك قاري و واعي .. و دير تيقتك فالله رزقك محفووظ فاي حااجة بغيتيها خااصك غير تتحرك ليه و ربي اكيد غايسهل ليك .. "" 

كملات كلامها ببسمة على وجهها .. ماجاوبش .. ماقدرش يجااوب .. اول حاجة لاحظها فاول ما جلس معاها .. ان هاد البنت ماشي د*ك الشقراء البرهوشة لي كان كايكره .. بل بنت عميقة التفكير .. اعمق من لي كان ممكن يتصور .. كيفاش بنت يافعة عندها رؤية و قناعات بهاد الشكل .. فهي قدرات تقنعو و تحيد الغبر لي تراكم على افكارو بسباب لي كان كايواجه حتال دابا .. كلامها كان بحال شحنة ايجابية حقناتها فاوردتو كاتجري  و تغلغل فجسمو بسرعة .. و دغيا انتاشر فجسمو .. حتى كاد يأكد بلي حس بيهم .. و اخيرا وصلو لوجهو و ظهرو بشكا ابتسامة خاافتة تحولت رويدا رويدا لابتسامة كاملة مشعة مشرقة فوجهها ..

ابتسامة مشرقة خلاتها تسكن للحظة و تأملو .. شخص لي عمرها شافتو كايضحك بهاد الطريقة .. ولفات تخنزيراتو و نظراتو المخيفة الوقت كامل .. عطات لراسها الفرصة تتامل شكل ضحكتو .. غمازتو تحت لحيتو الخفيفة و خطوط جنب عيونو لي مازادوه غير نضج جاذبية و ألفة ..

فيقها من سهوتها بصوتو الرجولي قائل :"" تبااركالله علييك .. قنعتيني .. الشي لي ماقدر حتى حد يديرو من قبل .. كلامك سبق تقال ليا من غااع لي كانعرفهم .. و لكن عمر شي حد ماقدر يقيسني نيت .. كاينين شي امور لي ساهل يتقالو و لكن صعيب تتطبق .. و خاصة منين كاتحاول و كاتحاول و لكن بلا فائدة .. "" 

جاوباتو و قالت :"" و حاول و بقا ديما تحاول عمرك تستسلم .. على الاقل انت راك عاارف اشنو باغي و كاتحاول توصل ليه .. راه كاين لي باقي ماعارف والو "" 

شاف فيها و قال :"" بحالك انت ؟"" 

شافت فيه و بركات كاتدور فعينيها .. ضحك و قال :"" اذا انت باقية ماعارفاش اهدافك ؟ "" 

تن*دات.. حدرات راسها و قالت فخاطرها :"" ناري يا ربي عاد كنت كانبان بعقلي و عميقة .. دابا غايتسلط الضوء للجانب الاسود من حياتي .. علاش ياربي هكا علااش .. ""

هزات راسها فيه لقاتو كايشوف و يتسنى جوابها و قالت :"" ا..اه .. ممكن تقول هكاك .. "" 

جاوبها و قال :"" كولشي كايدوز من هاد المرحلة .. و كاين غااع لي كايكون راسم خطة و غادي عليها و كايكتاشف بلي مامناسباهش و كايصدق مضيع راسو .. من رأيي خودي وقتك العمر كولو قدامك .. و انت راك باقيو صغيرة .. ماغايفوتش عليك الوقت "" 

تبسمات و تن*دت بارتياح و قالت :"" هاادشي بالظبط لي كاندير .. "" 

ضحك و قال :"" و لكن ماشي على الآخر و تبقاي فداك الباك 3 سنين "" 

جمعات الضحكة بسرعة الضوء و بقات كاتشوف فيه .. ضحك و رجع راسو للور و قال :"" ماتقلقيش غير ضااحك *مد يدو * هدنة ؟ ""

شافت فيدو و هزات عينيها فيه و مدات يديها و  قالت :"" مصالحة ابدية "" 

رجع راسو كايضحك من جديد ..صافحها و قال :"" ايياه .. لي تآمري بيه الالة "" 

ضحكات و قالت :"" و لكن غادي يخصك تتنازل و تخليني نتمزك فخاطري .. راه ماكايحلا ليا غير منين كانطلقو على جهدو ..

ضحك و قال :"" خودي راحتك فكل الاوقات .. فوتي ليا غير وقيتة من 3 ل5 .. "" 

جاوباتو و قالت :"" وايلي .. ماكاينش حل اخر "" 

جاوبها مازح و قال :"" وا دعي ربي يسهل فشي خدمة باش نظل خداام و تمزكي انت على خاطرك "" 

هزات يديها للسماء و قالت :"" ياااربي تغبرو فشي خدمة رسمية صاليرها وااعر يهنيني منو "" 

ضحك زين و قال :"" اميين .. من فمك لابوااب السماء "" 

"" اش واااقع هنا ؟"" 

هزو ريوسهم بزوج .. فإذا بيهم كايلمحو زياد واقف كايشوف فيهم باستغرااب .. شافت الاء فزين ال**بدين و رجعات شافت فخوها و قالت :"" والو .. كانتحتو فيها شي حاجة ؟""

تكلم زين ال**بدين و قال :"" اختك عندها واحد بعد النظر ماعندش واحد فعمرو 40 عام ""

شاف زياد فختو و هي تسوط فظفارها و مسحاتهم ..

رجع شاف فزين ال**بدين و قال :"" عاارف بلي هادي كاتقول كلام عميق .. و لكن ماتخليهاش تضحك عليك .. راه واحد الغمااقة منها ماكاين  "" 

وقفات الاء حدا خوها و قرصاتو من الجنب .. شافها زين ال**بدين .. ضحك ووقف حتى هو ..

شاف زياد فاختو و قال :" و لكن الغريب فالموضوع .. هو انتوما بزوج كاتهضرو مع بعضياتكم .. سنين و حنا جيران و عمركم شفتو فبعضكم حتى الشوفة "" 

جاوبو زين ال**بدين و قال :"" داكشي فالماضي .. حنا دابا تصالحنا و فكينا سوء التفاهم "" 

جاوبت الاء و قالت :"" عندو الحق.. كان بينا غير سوء تفاهم و دابا حنا جيران ودودين مابيناتنا غير الخير "" 

شاف فيهم زياد بزوج .. ميل بشفايفو و قال :"" مزيان .. الله يدومها .. زين ال**بدين .. كنت نيت باغيك "" 

جاوبو زين ال**بدين باستغراب و قال :"" ياك لاباس "" 

جاوبو زياد ببشاشة و قال :"" ما كاين غيير الخير .. جاات واحد الفرصة و خاصك تستاغلها و تشووف واش مكتاب ليك شي حاجة "" 

علا على وجهو التركيز و قال :"" اشنو هي هاد الفرصة ؟"" 

جاوبو زياد قائل :"" فرع جديد ديال شركة *** لتصنيع و بيع السيارات غايحل فهاد النواحي و علمني واحد صاحبي بلي ملونصيين اعلانات للتوظيف .. انت ماشاء الله بديبولوماتك و اجازتك فالاقتصاد و السيغي عندك عاامر اكيبد غادي تتقبل .. خاصك تدوز الكونكور و تشووف عالله يسهل ليك الله فهادي .. "" 

شاف فيه زين ال**بدين للحظة و نقل نظرو لالاء .. لقاها كاتبسم ليه و كأنها متحمسة هي كذلك للموضوع و قالت :"" اشتي اش كنت كانقوول ليك .. ربي استاجب لدعوتي فالبلاصة .. ياااخ كون غير طلبت يكون سيهيون راجلي .. "" 

ركلها زياد و قال :"' طلعي لداااركم  "" 

مشات كاتسب فيه .. حتى قربات و قالت ليه :"" توكل على الله .. و الله يسهل علييك "" 

تبسم زين و قال :"" اميبن .. شكراا "" 

تبسمات ليه و دخلات .. شاف فزياد و قال :"" و امتى هاد الكونكور ؟"" 

جاوبو زياد و قال :"" بعد غدا .. ياله توجد راسك تجمع معلومات على هاد الشركة و تعرف راسك من رجليك "" 

حدر راسو كايلعب فموسطاجو .. ربت زياد على كتفو و قال :"" شوف .. عارف بلي شحال مابقيتي تقدمتي لشي خدمة معقولة .. جرب هاد المرة عالله و طلب الله يسهل عليك و الله يسهل عليك .. "" 

تبسم فوجهو و عنقو مربت على كتفو و قال :"' الله يحفظك اخويا تفكرتيني "" 

جاوبو زياد و قال :"" هاانية رااك خوويا .. ياله نخليك نشوف د*ك المصيبة واش دايرة شي غذا "" 

ضحك زين و قال :"" واخا .. الله يعاونك هاد الساعة""

دخلات الاء للدار و شقماتها هدى و قالت :"" اش قالك ؟"" 

طلعات فيها الاء و هبطت و قالت :"" ااه .. على اساس ماسمعتيش " 

جاوبتها هدى و قالت :"" لا اختي .. كنتو كاتوشوشو "" 

تبسمات الاء و قالت :"" مانعرف .. لي عاارفة انا هو ان ابوشنبات عندو ضحكة كاتبلونطي ل5 دقايق كاملة ""  

تقدمات هدى حتال وجهها و قربات لعينيها كاتشوف فيها مصدومة .  دفعاتها الاء و قالت :"" مالك كاتشوفي فيا بحال الى كفرت بالله .. انا كانشهد على الحق واخا يكون مخالف ليا .. "" 

ودازت فيها و خلات هدى كاتشوف .. و هي تتبعها كاتغوت .. :"" و الله ما نطلقك حتى تفهميني كيفاش هاد ضحكتو كاتبلونطي ""

الغذاء محطوط فوق الطابلة .. الاء و هدى و زيد و زياد جمجموعين عليه و كايشوفو فيه .. غير مرقة بالدجاج و بطاطا بلا لون بدون حياة .. 

نطق زياد و قال :"" مال هاذ المرقة صفراء كيف كمارتك ؟"" 

نطق زيد و قال :"" حمد الله ماحطاتهاش كحلة كي سعدها "" 

نطقات هدى و قالت :"" ماكايهمش اللون و الشكل قدما كايهم المذاق "" 

نطق زياد و قال :"" نقطع ذراعي من هنا للهنا .. حتى مذاقو غايكون كيف السبرديلة "" 

وقفات الاء بالجهالة و خبطات الطابلة و قالت :"" لا بزاااف هادشي "" 

خرج فيها زيد عينيه و هي تجلس ملبداها .. 

و قال :"" صافي ماغاديش يضيع .. خلينا ناكلوه .. الخرقوم كايدير غير اللون ..ماشي المذاق "" 

قطع الخبز و كل واحد بدا يتعطل باش يبدا الضحية الاولى .. شافت الاء فهدى لقاتها كاتقطع الدغمة بالشوية و شافت فزياد لقاتو داير راسو كايقلب فالتلفازة و زيد كايقاد الخبز .. عوجات وجهها فيهم و قالت :"" عقلو على هااد الاهااناات .. "" 

و دارت اول دغمة في فمها .. شافو فيها و كايتسناو ردة فعلها .. و كانت بدون ملامح .. فقط كاتندغ ... هزات كتافعا و قالت :"" كايتكاال "" 

و هنا زعمو .. بتلاتة دارو الدغامي في فمهم .. مافاتتش تلاتة التواني دفلووه "" 

نطق زيد و قال :"" تي اش هادشي "" 

جاوب زياد :"" مطيباه بالماء ديال البحر ؟"" 

هدى :"" تي واش زدتي الملحة ؟"" 

قالت الاء :"" لا .. زدت فالاخر تلاتة ضامات البنة باش مايجيش باسل "" 

جاوباتها و قالت :"" يااا المكلخة على ماعارفاش ضاامة البنة فيها الملح ؟"" 

جاوب زيد و قال :"" لا .. هاذي مخها معششة فيه الرتيلة .. تقدري تلقاي المعلومة مغبرة فشي قنت فمخها و لكن ماكاتستعملهاش "" 

نطق زياد و هو كايوقف :"" لا لا .. انا خااصني نتزوج فاقرب وقت .. اشمن بانيني بغيتو "" 

وقفات الاء من جديد و قالت :"" مستحييل نقبل اهااناات اكتر من هاادو ""

العشية ... راجعة الاء من ليسي بعدما تفارقت مع هدى .. بانت ليها شيماء غادية فاتجاه منزلها .. قالت الاء قبل ماتعيط عليها :"" ها هي مرات خويا المطنغ نطلعها عليها شوية ...احم .. شيمااااء "" 

دارت شيماء عندها ووقفات كاتضحك .. و طارت عندها الاء .. سلمات عليها و قالت :"" ياله رجعتي من الخدمة ؟"" 

شيماء:"" واايه .. كيف كاتشوفي .. انت كنتي قارية ؟"" 

الاء:"" كيف كااتشوفي .. غاندخل نصيب كاسكروط كيف العادة .. ياااخ لي نديرو اليوم نعاودو غدا "" 

ضحكات شيماء و جاوبتها :"" خليهم يضبرو راسهم .. و اجي ديري معنا كاسكروط هانتي جايبة معايا حريشات و سفينجات "" 

الاء:" اا احبيبة بصحتكم .. الى جا زيد و مالقانيش فالدار غايدير ليا فيلم من دياول بروسلي و انا عظيماتي على قدي "" 

شيماء و هي كاتضحك  :"" زعما انت كاتخافي منهم و كاتسمعي الكلاام .. احيااني عليك اسلييعفانة .. غير اجي و من بعد قولي ليه كنت عند شيماء "" 

آلاء و هي كاتفرنس :"" اوكي .. نحط شكارتي و طابليتي و نجي "" 

تتمات شيماء داخلة للدار و اصرات عليها :"" اجي راه غانتسنااك "" 

طلعات الاء لدارها .. حطات شكارتها فبيتها و طابليتها .. سمعات الباب تحل و خرجات .. لقات زيد داخل من خدمتو .. دازت من حداه و قالت : جيتي بكري المهم انا عند شيماء "" 

شدها من ق*فادتها .. و قال :"" شفتك لصقتي على شيماء "" 

الاء و هي كاتطل عليه بنصف عين :"" اشنااهو .. انا كانلصق .. ليكوون في علمك .. انا بنادم كايبغي رفقتي و بناادم لي كايلصق فيااا ..  "" 

طلقها و دفعها :"" سيري سيري .. سووقك خااوي "" 

دخل فحالو بقات كاتعوج فمها و تخنزر فيه من لور و قالت :"" كيف داااير .. على اسااس سووقك انت عاامر .. الله يلاقيني بجينيونغ اوبا يتزوج بيا نغبر من قرينتكم "" 

هبطات طايرة لباب شيماء .. حلات ليها و دخلات

الاء:"" شفتي انا جيييت .. "" 

شيماء:" وا دخلي عاارفاك ماترديهاش فوجهي "" 

-----