«« شيزوفرينيا »»

البارت الخامس ❤️🤍

دخل يوسف من باب المعمل وراح لحد رغد

يوسف : عملتوا التحاليل ؟

رغد : !!!!!

يوسف : يبقى عملتوها .. تعالى معايا خمسة كدا عايزك

مسكت چنا في ايديها وخرجت من المعمل وهو وراها

رغد: ممكن أفهم اللي حصل دا تفسيره ايه ؟؟؟

يوسف : هو ايه اللي حصل ?

رغد : انت مين اداك الحق تدفع حاجة زي دي ؟؟

يوسف : آنسة رغد .. انا قولتلك قبل كدا وهرجع اعيدهالك ، انتو الاتنين أمانة في رقابتي وانا مبعرفش أهمل في أمانة اتحطت في عهدتي أيا كانت الظروف

رغد : عرفت ازاي إن التحاليل دي مطلوبة ومن المكان دا بالذات

يوسف : دي مصادري الخاصة بقا ? بيقولوا عني محامي وبتاع

رغد : أستاذ يوسف .. انا مقدرة جدا رجولتك واحترامك للأمانة وكل الكلام الجميل دا

بس انا مش ضعيفة واقدر أتصرف في كل حاجة تخصني انا وأختي ، وربنا معانا قبل أي حد

بصلها دقيقة من غير ما يرد ، اتلفت بص لچنا

نزل نص ركبة ومد ايده يسلم عليها : نسيت أتعرف على القمر الصغنن دا ??

چنا : نازلي مخصوص ??

يوسف : طبعاااا انزلك مخصوص ياباشا ، انتي مستقلة بنفسك ولا ايه ?

بتسلم عليه : انا چنا

يوسف : وانا يوسف ياستي

بيطلع شوكولاتاية من جيبه : وعشان عارف إني جاي أقابل القمر الصغنن دا قولت أعمل حسابي بقا

بيديها الشوكولاته .. رفعت عينيها وبصت لرغد

رغد : لا طبعا متاخديش حاجة .. انت شايفنا ازاي يااستاذ يوسف

مسك ايد چنا وحط في ايديها الشوكولاته بالعافية وقام وقف

يوسف : مبدأيا كدا تعالي نشيل الألقاب .. يوسف ، إسمي يوسف

تاني حاجه ياستي اعتبرني بلا اترمي عليكوا ومش هيحلكوا إلا ما تسمعي كلامي وتوافقي تساعديني في اللي قولتلك عليه

رغد : ولو قولتلك مش موافقة

يوسف : هقولك هييجي اليوم اللي توافقي فيه

نزل على ركبه تاني وباس چنا من خدها : معلش بقا ياحبيبتي ملحقتش أتعرف عليكي كويس .. أوعدك المرة الجاية لما نتقابل هاخدك افسحك معايا ونلف مصر كلها .. اتفقنا ???

چنا : اتفقنا ???

رغد باستغراب وهي بتشد چنا عشان تمشي : انت أكيد مجنون !

يوسف بيمسك ايديها عشان يوقفها : استني ..

رغد بتزق ايده : لآخر مرة هحذرك أوعى تفكر تلمسني تاني

يوسف : خلاص خلاص انا آسف .. ممكن بقا تقفي عشان عايزك في موضوع مهم

رغد : موضوع ايه دا ؟؟

يوسف : مش هينفع نتكلم هنا .. بس الموضوع ضروري ، تعالي نروح كافيه أحسن

رغد : انا آسفة ، اخلاقي متسمحليش أدخل كافيه مع راجل غريب

يوسف : ولو قولتلك إن الموضوع دا يخص أغلى واحدة في حياتك اللي بتسعي كل دا عشان تحميها

رغد بتبص علي چنا ...

رغد : ماشي

دخلوا كافيه هما التلاتة ، يوسف أخد چنا وداها جنينة الكافيه اللي مليانة أل**ب .. ودخل هو ورغد يقعدوا في الكافيه عشان يعرفوا يتكلموا

رغد : سامعاك ..

يوسف : مبدأيا كدا ، انا هتكفل بمصاريف عملية چنا من أولها لاخرها

رغد بتبرق : نعم !!!

يوسف : قبللللل ما تتعصبي او تفهمي غلط سيبيني افهمك وجهة نظري وبعدها اللي تحبي تعمليه اعمليه

رغد : اتفضل ؟؟

يوسف : بصي ياستي .. دلوقتي انا عارفة ومقدر عزة نفسك وكبريائك وكل الكلام الحلو دا ، بس انتي كمان لازم تقدري إني راجل وابويا الله يرحمه ... علمني ازاي اصون الأمانة

ولما الأمانة اللي اتحطت في عهدتي تتحط في مشكلة جامدة زي دي ويبقى عندها عملية خطيرة لاااازم تتعمل والحال ضيق يبقي لازم أساعد

رغد : واختها راحت فين ؟

يوسف : اختها مهما كان فهي بنت ومش هتقدر علي مبلغ زي دا لوحدها .. فأنا وصلت لحل وسط

رغد : واللي هو ؟؟

يوسف : اعتبريهم سلفة لوقت محدد ، لحد ما تقدري تجمعي المبلغ وترديه ليا في أي وقت ، المهم نعمل العملية دي في أسرع وقت

رغد : ممكن سؤال ولو محبتش تجاوب غير الموضوع

يوسف : اتفضلي ؟

رغد : انت عرفت منين إن انا الوحيدة اللي مسؤولة عن أختي وبقيت أهلي محدش مستعد يدفع فلوس العملية دي ؟

يوسف : تشربي ايه ؟

رغد : اه .. تمام

مع احترامي الكامل ليك ولكلامك .. انا للأسف يا أستاذ يوسف مضطرة أرفض عرضك دا لأني مقبلش عملية أختي تتعمل على حساب حد تاني غريب عننا

بتقوم من علي الكرسي : وانت تشكر جدا إنك فكرت بالطريقة دي بس حقيقي مش هقدر أعمل دا .. عن إذنك

سابته ومشيت راحت اخدت چنا من الجنينة وخرجت علي برا وقفت تا**ي ، ركبته واتحركت على البيت

?????????

*يوسف تليفونه بيرن *

يوسف : الو ..

هاجر : أيوة يا يوووسف انت فين

يوسف : انا في كافيه في المعادي ، في ايه ؟؟

هاجر : تعالالي بسرعة عاللوكيشن اللي بعتهولك ، بسرررررعة يايوسف

يوسف بيلم حاجته عشان يقوم بسرعة : حاضر حاضر جايلك أهو خليكي عندك

خرج من الكافيه يجري

?????????

رغد داخلة من باب الشقة هي وچنا .. مازن وإيمان قاعدين في الصالة بيتكلموا وأول ما دخلت سكتوا

رغد : يلا ياروحي ادخلي خدي شاور سريع كدا وانا شوية وهدخل عشان اسرحلك شعرك وناكل مع بعض

چنا دخلت على جوا ، رغد قعدت جنبهم

رغد : انا عاوزاكم في موضوع

مازن : خيررر ؟؟

رغد : دلوقتي انا أختي حياتها في خطر ولازم نفكر جدياً في طريقة نجمع بيها فلوس عمليتها

مازن : انا هنعمل ايه يعني ، نطير ؟

رغد بتحاول تمسك أعصابها : ممكن تسمعها الي هقوله للآخر ؟؟؟؟

وردة : استني انت يامازن .. اتكلمي يارغد في ايه بقا

رغد : انا لقيت حل في المشكلة دي

وردة : ايه هو ؟

رغد : بابا كان عنده شاليه في الغردقة كنا بنروحه في المصايف وكدا .. بفكر إننا نبيعه ونعمل العملية لچ...

مازن : نعععم ياختي ؟؟؟ انتي ازاي تفكري في حاجة زي دي اصلااااا

رغد : فين المشكلة يا مازن

مازن : المشكلة ان دا مش مالك لوحدك ياماما عشان تتصرفي فيه على مزاجك وبالطريقة اللي تحبيها

رغد : طريقة اااايه اللي احبها بقولك اختك هتموووت مننا انت مبتفهمش !!!

مازن : بت بت احترمي نفسسسك .. شاليهات مش هنبيع ، دا انا ماصدقت ان الساحة تفضى وكل حاجة تبقي ملكي

رغد بصتله بصدمة

?فلاش باك ?

يوسف : ولو دلوقتي مش مقتنعة بكلامي دا ، الأيام هتلف وهتدور وهتعرفي ان الخطر جايلك من اقرب ناس حواليكي

?رجعت من الفلاش باك ?

رغد : ولو بيعته انا بمعرفتي هتقتلني ؟

مازن : لا ياحبيبتي مش هقتلك .. بس وريني بقا هتلاقي الملف بتاعه فين

رغد : في مكتب بابا

مازن : هااااأو .. صباح الخير

رغد : منك لله يااخي .. منك لله

مازن : الحل عندك وانتي اللي واجعة دماغنا ، إبن الحلال تحت ومستنيكي وهياخدك بشنطة هدومك ويد*كي كللللل الفلوس اللي انتي عايزاها بس انتي قولي اه

رغد : ولو موافقتش ؟

مازن : وقتها بقا سيبي أختك تموت ☺️

رغد : اممممم

تمام .. اتصلوا بالناس و حددوا معاد الخطوبة بعد عملية أختي بأسبوع

وردة : بجدددددد ????????

سابتهم ودخلت على جوا

?????????

يوسف بيفتح باب العربية ونازل في مكان مقطوع .. وقف بص حواليه

هاجر قاعدة علي مصطبة بعيد شوية .. راحلها جري وهو مخضوض

يوسف : اااايه يابنتي في ايه ؟؟؟

هاجر قامت وقفت وهي بتعيط : شنطتي اتسرقت يا يوسف ??

يوسف : نعم ؟؟؟

مين اللي عمل كدا وازاي ؟

هاجر : كنت رايحة اقابل صاحبتي من شوية وماشية قام موتوسكل فيه شابين عدى من جنبي خ*فوا شنطتي وجريوا بس ستر ربنا ان الفون كان في ايدي التانية

يوسف بيحط ايده على دماغه : فاكرة أشكالهم او رقم عربيتهم ؟؟

هاجر : لا طبعا انا وقفت اصوت ومعرفتش أتصرف

يوسف : ولما انتي عارفة إنك بتغرقي في شبر ماية ومبتعرفيش تسلكي كللل مرة تنزلي فيها بتنزلي من البيت لوحدك لييييه ياهاااجر

هاجر : يوسف انت بتعلي صوتك عليا في موقف زي دا ! وانا اللي متصلة استنجد بيك ?

يوسف : يابنتي مش قصدي والله بس انا اتحرق دمي ، المهم

الشنطة دي كانت فيها حاجات مهمة

هاجر : كان فيها حاجات بتاعتي غالية بس

يوسف : خلاص متزعليش انا هد*كي فلوس تجيبي غيرهم

هاجر بتبسم وهي بتقرب من يوسف : ربنا يخليك ليا ياقلبي

يوسف بصلها باستغراب .. بعد عنها خطوتين

يوسف : طيب اركبي العربية بقا عشان اروحك

هاجر : تمام

ركبوا العربية ولسة هيبدأ يتحرك

هاجر : يوسف انا عطشانة

يوسف : الماية جنبك اهي !

هاجر : ماهو انا أعصابي بايظة من الي حصل وهغرق نفسي

يوسف : يعني انا أعمل ايه ؟

هاجر : شربني يايوسف في ايه دا انا حتى أمانة في رقابتك يعني

يوسف وهو بيبص من الشباك : يااادي الامانات

هاجر : هتشربني يعني ولا لا ؟

اتلفت بعصبية خد الازازة وبدأ يشربها وهو باصص الناحية التانية ... خلص وساق العربية في اتجاهه للبيت

??????????

رغد قاعدة على سريرها باصة لصورة أبوها وعينها مدمعة وساكتة تماماً .. الباب خبط

دخلت وردة

وردة : كلمت عمك وقولتله إنك وافقتي خلاص وقالي فلوس العملية هتكون عندك كمان ساعة بالظبط ?

رغد : كلمتي عمي !

ماشي .. انا كمان كلمت الدكتور وهروحله النهاردة بالليل بالتحاليل عشان يحددلي معاد عملية چنا

خرجت وردة من الأوضة وهي مبسوطة ... رغد تليفونها رن *معتز*

شافت الفون ومردتش عليه ، اتصل تاني

رغد : ألو ..

معتز : لقيت نفسي مش مصدق اللي سمعته قولت اتأكد منك ??

رغد : اللي سمعته مظبوط

معتز : ايه اللي غير رأيك فجأة كدا

رغد : حكم القوي ، لو كان عندي حل تاني صدقني مكنتش اترددت

معتز : صدقيني انتي هيكون أحلى حل تشوفيه في حياتك ??

رغد : معتز احنا لسة متخطبناش ومعتقدش إني ملزمة أكلمك في التليفون من دلوقتي خصوصاً لما تكون دماغي مشغولة بمليون ألف حاجة

معتز : هتفضلي مقفولة مني كدا لحد امتى ؟

رغد : لحد ما ربنا يخلق في قضاه رحمة .. انا هقفل معلش عشان محتاجة أنام ضروري

?????????

يوسف وهاجر وصلوا البيت وواقفين بالعربية عند بوابة الڤيلا

هاجر : مش هتطلع معايا ؟

يوسف : لا ورايا مشوار هعمله وبعدين أبقى أرجع على البيت

هاجر : تمام

فتحت هاجر العربية ونزلت ... رفع يوسف عينه من شباك العربية وبص على الڤيلا كلها من برا وبدأ يتأمل

*بعد خمس دقايق *

يوسف : مين كان يصدق إن بيت القاضي اللي عيلة القاضي كلها كانت بتتعارك عليه ، يتملكه أصغر واحد في العيلة "يوسف القاضي" ... معجزة

?فلاش باك من سنين ?

يوسف واقف هو وأمه وأخته الصغيرة على البوابة

تغريد عمة يوسف وبنتها هاجر داخلين

عمة يوسف : لو فضلت برا ببنتي لوحدنا بعد ما وقفت في صفك ضدهم كلهم هياكلوني يا يوسف .. انجدني بأي حل يابني

أم يوسف بتبصله بإستصعاب

يوسف : هتدخلي انتي وبنتك تعيشوا في البيت دا معززين مكرمين و الراجل يأذي شعره منكم .. لأن وقتها هتكونوا في أمانة يوسف القاضي

عمته : ربنا يكرمك يابني ويحفظك من كل شر .. انا دلوقتي بس اتأكدت إن أخويا فلوسه كانت حلال ❤️❤️

إيمان بصت ليوسف بابتسامة : هو دا ابني الأصيل اللي انا ربيته ??

? رجع من الفلاش باك ?

على دخول شهد من البوابة .. نزل من العربية

يوسف : شهددد

شهد بتقرب عليه

*نتعرف بشهد *

عندها ٢١ سنة .. طالبة في الجامعة

بشرتها قمحاوية ، شعرها كيرلي وملامحها حلوة نسبياً

مجنونة بعض الشئ ومش بسهولة تقتنع بكلام حد ، مع نسبة طيش كبيرة نظراً لدلع يوسف ليها عشان يعوضها عن موت أبوهم

شهد : نعم يا يوسف ؟

يوسف : ايه اللي اخرك لحد دلوقتي ياشهد .. دا الليل ليل يابنتي

شهد : في ايه يايوسف انا مش صغيرة للكلام دا على فكرة

يوسف : مش بالسن ياحبيبتي ، فيه حاجة إسمها أصول ومبادئ .. مينفعش بنت تفضل لحد الوقت دا برا البيت خصوصاً لما يكون تليفونها مقفول طول الوقت زي سعادتك

شهد : بقفله من زنكوا يا يوسف وبالذات انت ، انا دا انا صحابي طول الوقت بيتريقوا عليا عشان بتعاملوني زي الأطفال

يوسف : انا بعمل كدا من خوفي عليكي ياشهد ، ومش ذنبي ان اصحابك دول معندوهمش أهل يسألوا عليهم

شهد : يوسف انا مسمحلكش تكلمني بالمنظر دا !

يوسف بيبصلها بنظرة عتاب طويلة

وبعد دقيقة بيرجع لورا وبيفتح باب العربية : تمام يا شهد انا آسف .. سلام

ضميرها انبها وجريت بسرعة مسكت باب العربية قبل ما يقفله

شهد : خلاص خلاص انا آسفة حقك عليا

يوسف : انا مقدرش أزعل منك ياشهد انتي بنتي مش أختي .. بس ابقي خلي بالك من نفسك شوية اكتر من كدا معلش

شهد : حاضر ياحبيبي

قفل باب العربية ودور ومشي

???????????

*بعد مرور أسبوع *

في غرفة في المستشفى

رغد قاعدة على السرير وفي حضنها چنا

رغد عينيها بتدمع بس بتحاول تتماسك قدام چنا : ها ياحبيبتي .. فهمتي هنعمل ايه ؟

چنا : اه فهمت .. اول ماالاقي الممرضة جاية تاخدني هقرأ سور القرآن اللي انتي محفظهالي

رغد : وبعدين هيحصل ايه ؟

چنا : هدخل معاها أنام ساعة وبعدين أخرج كويسة

رغد بتبوسها : شطووورة يانوتيلتي ??

چنا : رغد

رغد : ايه يا قلب رغد

چنا : هما ليه ماما إيمان ومازن مجوش معانا ، مش المفروض دول أهلنا يبقو معانا ؟

رغد : اكيد طبعا ، زمانهم جايين ياحبيبتي

اول ما تخرجي من جوا هيكونوا هما هنا ?

فجأة سمعوا قلق جامد اوي جاي من برا .. برقوا هما الاتنين وقاموا يجروا على برا