حكايات نهى

الفصل العاشر

حكاوي نهى

°°الجيران الجدد °°

بقلم :جني الشناوي

-الفصل الثالث-

***********

عندما وصل بجانبي سمعته يقول " خلاص النهاية قربت عشان زهقت "

أخذت خطواتي إلى السلم و أنا أحاول أن أسمع كلامه . . لكنني لم أسمع أي شيء من همهماته . . نهاية ماذا بالضبط ؟ ما الشيء الذي ملل منه ذاك الأ**ق ؟ . . . وصلت إلى شقتي و ذرعاني كادت أن تقع بسبب الأكياس التي أحملها . . فتحت الباب و دخلت

استعديت للنوم . . لكن . . أنا قد نسيت شيء ! . . علي ! . . لم يرسل لي أي رسالة اليوم ! فتحت الهاتف و بدأت بالكتابة

" علي . . مختفي خالص النهاردة . . أنا بدأت أقلق عليك . . أنا النهاردة نزلت مع سمر ، فطرنا و اتمشينا و اشتريت كام حاجة . . بس!.. هفضل حاطة احتمال انك ممكن تكون مشغول . . و مش هخلي دماغي تروح لأسباب تانية بعيدة عن الحقيقة ، اتمنى لو ترد عليا في أقرب وقت "

و خلدت إلى نوم عميق . .

* * * * * * * * * * *

فجأه ! سمعت صوت المنبه و صوت البائع الذي يتكلم في مكبر الصوت . . و صوت ض*ب و صياح . . هرعت لباب الشقة و فتحته . . كان صوت ض*ب مريع ، و استغاثة امرأة . . . بالتأكيد كانا نادية و هاني . . ذهبت ناحية شقتهما و أخذت اسمع . . كان يقول هذا الرجل المتوحش و هو يض*بها بعصبية شديدة

- " انتي ايه ؟ . . مبتزهقيش يا ست انتي ؟ . . دا اناا . . انا هاني اللي مابزهقش . . زهقت منك "

و هي المسكينة ردت ببكاء و صراخ

- " دا أنا اللي زهقت منك و من عيشتك كلها ، خلاص ما بقيتش طايقاك . . زهقتني ! . . انا لو عليا أموت نفسي و ارتاح . . دا أنت تزهق بلد ! "

و تصرخ

- " والله هلم عليك الناس "

لن أ**ت هذه المرة . . يجب أن أفعل أي شيء ، أخذت أقرع الباب و أدق الجرس . . و لكن ساد ال**ت المكان ! . . . صوت المعركة توقف . . و أحدًا لا يفتح ! . . أليس تلك المسكينة تريد بطلًا منقذًا ينقذها ؟ ! . . و أنا البطلة المنقذة . . فلماذا لم تفتح لي ؟ ! . . يمكن أن . . . لا لا ! لا يمكن هذا ! هناك احتمال آخر . . يمكن أن تكون فقدت وعيها ! هذا احتمال أرجح ، عدت إلى شقتي في حيرة . . فتحت هاتفي لأرى رد علي . . لكن ! . . لم أجد أي رسالة منه !

هذا اليوم الثاني على التوالي ، لم يبعث لي أبدًا ! بدأ القلق أن يشتعل في نفسي ، أفكار كثيرة تراودني . . أخشى أن تكون حقيقية . . بدأت في كتابة رسالة أخرى

" علي لو سمحت رد عليا . . أرجوك طمنني عليك . . بقالك تلت أيام مبتكلمنيش خالص ولا بترد على رسايلي ، أكيد مش مشغول التلت أيام و مبتعرفش تبعتلي قبل ما تنام حتى يعني . . "

أغلقت الهاتف . . و جلست أفكر كعادتي . . ما الذي يمكن أن يجعل علي لا يكلمني كل هذه الفترة ؟ ! . . ثلاثة أيام كاملة و لم آتي في باله أبدًا ؟ حقًا أريد البكاء . . التفكير يقتلني ، مهلًا . . . و ما أمر هذين الزوجين ؟ لماذا **توا فجأة بعد هذا الصراع العنيف . . فتحت الهاتف و بدأت أكتب رسالة أخرى لعلي

" علي طبعًا أنا حاليًا مش عارفة انت فين ؟ و بتعمل ايه ؟ و هموت من القلق . . بس في حاجة لازم أحكيهالك عشان دماغي هتنفجر منها زي ما هتنفجر من قلقي عليك بالظبط ، بص و أنا راجعة من الشارع أما وصلت عند باب العمارة وقفت عشان أطلع المفتاح . . فلقيت جارنا الجديد هاني دا نازل و طلع عند البوابة كدا و وقف بعيد عني شوية بس كنت سامعاه و هو بيتكلم في التليفون و كان بيهمس كدا و كأن مش عايز مخلوق يسمعه و بيقول " خلاص النهاية قربت عشان زهقت " . . . أنا بصراحة ما شغلتش بالي و قولت عادي يعني و مارضتش أدي الموضوع أكبر من حجمه ، بس بقا اللي خلاني أفكر . . النهاردا صحيت على صوت زعيق و ض*ب و صويت و بجد تقول دا بيولعوا في بعض . . بصراحة المرة دي قولت أنا لازم أنجد الست المسكينة دي و أنقذها منه . . ففتحت و قربت من بابهم و كان الصويت و الض*ب متواصلين . . و أول ما خبطت . . سكتوا خالص بجد حرفيًا كأن الشقة مهجورة . . طب فكر معايا . . لو مثلًا هما بيتخانقوا عادي . . المفروض هيفتحولي يعني عيب ما يفتحوش و هما صوتهم جايب آخر الدنيا و انا عارفة انهم جوا . . فأكيد أكيد أكيد في حاجة حصلت و حد فيهم مش عايزني أشوفها . . بص بصراحة . . أنا بعد ما ربطت الأحداث ببعض طلعت بالآتي . . ، دلوقتي هو كان بيقول لحد في التليفون امبارح ان النهاية قربت و تاني يوم في عز الخناقة كانت الست بتصرخ . . أكيد كانت شايفة حاجة مفزعة و مرة واحدة و بدون مبرر صويتها وقف ! . . فتفتكر ايه ؟ تفتكر إن دي النهاية اللي يقصدها؟ أرجوك رد عليا . . "

* * * * * * * * * * *

انتهيت من كتابة هذا الكلام الكثير الذي بالتأكيد لا يهم علي . . فكرت في أن أعيد طرق باب شقتهما . . أعلم أنني سخيفة بعض الشيء . . لكن الفضول كاد أن يقتلني . .

لبست الشال و شبشبي الأنيق و ذهبت . . و طرقت الباب مجددًا ، و لكن بلا جدوى . . لماذا يتصرفون بهذه الغرابة ؟ . . جاء في بالي أن أسأل عم سلامة إن خرج أحدهما حالًا . . يمكن أنا يكونا خرجا و أنا اكتب لعلي . . . نزلت إلى عم سلامة و نديته بصوت عالي نسبيًا

_ " عم سلامة . . . يا عم سلامة "

جاء و هو يجري من حجرته و ابتسم ابتسامته هذي

_ " أؤمريني يا ست الكل "

_ " هو هاني أو نادية نزلوا من شوية صغيرين كدا ؟ من عشر دقايق او خمس دقايق ؟ "

قال متسائلًا في بلاهة

_ " مين هاني و نادية دول يا هانم ؟ "

تعصبت قليلًا و قولت

_ " عم سلامة ما تركز شوية في ايه . . هاني و نادية . . جيراني يا عم سلامة . . اللي كانوا في إسكندرية ، دة انت اللي قايلي عليهم يا راجل . . "

أجاب ببطىء ممل

_ " آه آه افتكرت خلاص . . . ما تتعصبيش عليا . . . . هدي أعصابك يا هانم . . . . . هيطجلك عرج . . . . عادي يعني كلنا بنن.. "

زفرت انفاسي في حنق و صرخت في وجهه بعصبية

_ " اخلص يا عم سلامة ! "

_ " خلاص خلاص . . . بس حضرتك يعني و متأخذنيش في السؤال . . بتسألي ليه ؟ "

أخذت اض*ب كفًا بكف و أتنفس بعصبية و ضغطت على أسناني

_ " عم سلامة ! . . . حد فيهم نزل قدامك ؟ ! "

_ " إيوة إيوة . . . هاني بيه نزل جبل حضرتك بعشر دجايج كدا ولا خمس دجايج "

أجابت بنفاذ صبر

_ " شكرًا "

ثم أكملت

_ " طب كان شكله ايه ؟ "

ضحك عم سلامة ببلاهة و قال

_ " هيهيهيهيهي شكله كان هاني يا هانم . . يعني نفس مناخيره و نفس عنينه و نفس رجلينه و ايدينه . . دا سوجال غريب جوي . . إيوة والله هيهيهيهيهي "

أجابت و كدت أن اتحول إلى قطر يهرسه

_ " أكيد ماقصدش هو اتحول لكائن فضائي مالهوش وجود ولا لسة بني آدم ! اقصد يعني تعبيرات وشه و هدومه و منظره و كدا ! . . "

قال بأسف

_ " حجك عليا يا هانم انا ماجصدش والله بصي هو كان مكشر و هدومه مبهدلة كدا و طالعة من بعضها تجوليش طالع من الحمام على السلم هيهيهي . . و كان بيجري كأن في أسد بيجري وراه . . آه والله زي ما بجولك كدا "

سرحت لبرهة ثم قولت له

_ " يعني كان ماعهوش نادية ؟ "

_ " لا يا مدام . . هو في حاجة ولا ايه ؟ "

_ " لا لا . . . ما تشغلش بالك انت ، ما تزعلش اني اتعصبت بس انت بصراحة عصبتني أوي " و ضحكت

_ " لا دا حضرتك فوج راسي يا هانم . . أنا همشي بجا لاحسن في ماتش هيفوتني "

ضحكت من طيبته و طلعت إلى شقتي ، لكن طبعًا كنت أفكر بفضول قاتل . . ما هذه الكمية من الأحداث الغريبة . . الجار و زوجته ، علي المختفي . . يكفي مقابلة وجه عم سلامة الأبله . .

مرت ساعات اليوم سريعًا ، فارغة بملل . . فتحت هاتفي و لكن علي لم يرد على رسائلي قط . . حتى لم يرها . . قلقي سيصل إلى درجة شنيعة قريبًا . . أخذت اكتب له . .

" علي أرجوك ! . . أنا مش عارفة أعمل إيه ؟ . . مش عارفة انت فين ؟ ، انت حتى مش في نفس البلد اللي أنا فيها . . كمان انا من غيرك خايفة أوي . . بالذات بعد ما شكوكي زادت في جارنا دا . . خايفة أكون اللي بفكر فيه صح . . و خايفة عليك أكتر . . ارجوك لو انت عايش رد عليا . . ارجوك ! "

أغلقت الهاتف و الدموع تتسلل من عيناي . . بعد فترة من البكاء . . مسحت وجهي و حاولت أن أنام دون قلق . .

* * * * * * * * * * *

مر يومان دون جديد . . الزوجة ( نادية ) لن أراها أبدًا ! . . أتوقع انها في حالة اختفاء . . و الزوج غامض . . لن يظهر إلا القليل جدًا . . حين أراه أحاول أن اهرع سريعًا خوفًا منه . . لكن هو يرمقني بنظرات تشبه الغضب أول الشك أو الغيظ . . جميع تلك التعبيرات مناسبة . . و لكن ! . . أين علي ؟ ! . . قضيت يومي ما بين مكالمات سمر و محاولة معرفة ماذا يفعل هاني و تنظيف البيت و النوم . .

و في الساعة الثانية بعد منتصف الليل . . شعرت أنني أريد أن أجلس في الشرفة . . في هذا الهدوء المرعب . . الكل نائم و الظلام دامس . . أحب هذه الأجواء الليلية الكئيبة ، قطعت قطعة كعك من التي صنعتها و أحضرت كوبًا شاي و أخذت هاتفي و كرسي صغير و دخلت . .

كان يوجد مصابيح ينبعث منها ضوء خفيف . . الشارع ساكن . . لا يوجد بشر . . حينما كنت شاردة . . سمعت صوت رسالة تأتي من هاتفي . . فتحته بفضول لمعرفة من الذي جئت في زهنه في هذا الوقت المتأخر . . . و كانت المفاجئة !

- يتبع -

_ جنى الشناوي

•••••••••••••••••••••

قراءة ممتعة