حكايات نهى

الفصل الرابع

الفصل : الرابع

صرخت في وشه و كأني بطلع كل الألم اللي جوايا و الدموع نزلت أكتر و وشي أحمر كأن جوايا بركان بيحذرني من إلانفجار و قولتله : " انت أكييد مش طبيعي . . انت مجنون ! أنا زهقت ! "

ضحك نفس الضحكة الباردة و السخيفة

_ " حبيبتي شكل أعصابك تعبانة أوي . . أنا هكلملك دكتور نفساني . . اصلك اتعصبتي عليا من غير سبب ! "

عليت صوتي أكتر : " لا لا لا كدا كفاية ، انت اللي فعلا محتاج دكتور نفساني . . ارحمني يا أخي أنا تعبت "

_ " خلاص خلاص أنا هسيبك تهدي عشان واضح انك تعبانة "

---- ---- --- --- --- ---- --- --- ---- ---- --- -- -- --- ---- ----- ---- --- --- --- -- ---- --- --- -- -

أول ما خرج من الأوضة . . نمت على السرير زي وضعية الجنين . . قضيت الليل عياط و عياط . . عيني ورمت و بقت حمرة حمار الدم . . العروق فيها زي الأنهار . . دموعي جفت و اكتفيت بعياط قلبي . . . معرفش نمت ازاي ولا امتي . . معرفش نمت ولا اغمى عليا

صحيت و الصداع اعلى من صوتي . . صحيت بس الخزن مغطي على ملامحي . .

بس لازم افضل متماسكة لحد ما أثبت اني صح . . و انه انسان ما يتعاش معاه . . هفضل متماسكة لحد ما انفذ اللي سمر قالتلي عليه

اتصلت بيها و دورنا مع بعض على رقم الفندق و جيبناه . . أنا متأكدة انه هيطلع بي**نني و مش همشي من هناك غير بالدليل اللي انا متأكدة من وجوده و لكن مش لاقياه . . اتصلت بالفندق

_ " آلو السلام عليكم "

_ " و عليكم السلام فندق" The blue " نقدر نساعد حضرتك ؟

_ " لوسمحت وصلني بالحجز "

_ " ثواني و هيكون مع حضرتك "

وصلني بالحجز فعلا

_ " ألو السلام عليكم "

_ " و عليكم السلام يا فندم . . أتشرف بإسم حضرتك "

_ " مدام نهى "

_ " أهلا وسهلا يا فندم . . اتفضلي "

_ " لوسمحت كنت عايزة احجز غرفة في الفندق . . بس انا عايزة غرفة معينة "

_ " تمام يا فندم . . انهي غرفة بالظبط و أنا هشوف لحضرتك متاحة ولا لا "

_ " هي غرفة « ١٨٠١ »

_ " حضرتك هتحجزبها من يوم كام لكام ؟ "

_ " من يوم 11 سبتمبر لحد يوم 25 سبتمبر "

_ " طب ثواني هتأكد لحضرتك هل متاحة ولا لا "

قعدت مستنية تلت دقايق و أنا بتمنى تكون فاضية . . .

_ " لحسن الحظ يا فندم النزيل اللي كان فيها لسة ماشي و محدش حاجزها "

_ " تمام كويس اوي "

_ " تمام الحجز بإسم مين يا فندم "

_ " بإسم ‹ علي عبد السلام › "

_ " تمام يا فندم و في زي عرض كدا الفترة دي ان احنا مش هنحتاج مبلغ عشان نأكد الحجز و هيكون الدفع عند الوصول.. و لو حضرتك حبيتي تلغي الحجز بلغينا قبلها ب 48 ساعة "

_ " تمام متشكرة اوي "

و فعلا تم الحجز و انا بستعد عشان أبلغ

لبست هدومي في أسرع ما يمكن و نزلت . . . دماغي مليانة أفكار و توقعات للي هيحصل و مش قادرة أبطل . . بفكر في أي لحظة أوقف اللي بعمله ، بس لأ لازم اتأكد

-- -- --- -- ---- ---- ----- ----- ----- ----- ----- ------ ------- ------- ------- ----- ---

وقفلي تا**ي و ركبت عشان أروح ل " علي " الشركة و أبلغه... سرحانة في الشباك و غرقانة في أفكاري ، وصلت الشركة بتاعت الأدوية اللي هو بيشتغل فيها

و طلعت . . . . أول حاجة شوفتها الريسيبشن . . مترددة و مش عارفة أعمل إيه

_ " صباح الخير دا الريسيبشن "

_ " صباح النور يا فندم . . ايوة الريسيبشن أؤمريني "

_ " لوسمحتي كنت عاوزة أخش لأستاذ مندوب المبيعات هنا "

" بصتلي بصة استغراب و قالت : " علي عبد السلام مندوب المبيعات مين يا فندم . . مفيش حد بالإسم دا هنا "

قولتلها بثقة : " لا ازاي . . . انتي شكلك جديدة هنا "

_ " أنا فعلا جديدة يا فندم لكن مفيش حد هنا بالاسم دا في الشركة كلها . . و مندوب المبيعات الحالي اسمه "

وقفت مصدومة . . . أكيد البنت دي مجنونة و مش فاهمة حاجة

_ " طب أنا عاوزة اقابل المدير "

_ " تمام "

أخدتني و طلعتني دورين و قالتلي : " دي سهام ، سكرتيرة مستر رامي المدير . . هتساعدك "

سهام بنت جميلة اوي . . شيك و رقيقة جدا

قالتلي ببشاشة

_ " اتفضلي يا آنسة اتعرف بحضرتك "

ابتسمتلها ابتسامة مخبية وراها وجع :

" مدام نهى"

_ " اتشرفت بيكي . . أنا متأسفة جدا مش هقدر أدخل حضرتك لأستاذ رامي عشان هو في اجتماع مهم . . لكن أنا اقدر اساعدك "

_ " تمام بصي . . انتي قديمة هنا صح "

_ " ايوة يا مدام نهى . . أنا هنا من أول ما الفرع هنا فتح "

_ " طيب.. في حد هنا عندكوا اسمه "

بصتلي باهتمام ، وطت صوتها . . و قالت بهمس :

" بصي يا مدام نهى هو حاليا مفيش حد هنا في الشركة اسمه كدا . . لكن كان في قبل كدا . . و المدير السابق رفده و قالنا محدش يتكلم عنه نهائي . . بس للأسف المدير السابق دا توفى الله يرحمه . . و يا عيني في ناس بتقول انه مات بسكتة قلبية . . و في ناس بتقول انه مات في حادثة . . . . . و في ناس بتقول انه اختفى قبل موته و مات مقتول بعدها . . لكن كلها اقاويل و محدش بيأكد حاجة "

_ " ازاي مشي و ما قاليش ؟ ! "

_ " تقصدي علي ؟ . . هو حضرتك تعرفيه منين ؟ . . "

_ " دا جوزي ! "

_ " بصراحة يا مدام نهى، أنا معرفش عنه أي حاجة . . بس كل اللي اعرفه انه كان غريب اوي آخر فترة . . و بيعمل مشاكل كبيرة في الشركة و دايما نسمعه بيتخانق مع أي حد لحد ما المدير رفده . . "

سمعتها و أنا بموت من جوايا ، حابسة دموعي . . جوزي و معرفش عنه حاجة . . جوزي و معرفش مكان شغله ولا حاجة عن حياته . . جوزي و كأنه واحد غريب

شكرتها و سيبتها و مشيت . . . مشيت و انا رجلي بتعافر عشان تتحرك ، ماما و سمر و كل الناس كان عندهم حق اما قالولي إن تلت شهور خطوبة قليل اوي . . .

وصلت البيت و أنا مهزومة . . مش حسة بنفسي و انا الزعل مأثر عليا في كل حتة . .

قعدت في الصالون لحد ما جه، دخل بوشه الغامض . . نظرته الشكاكة . . بيروح فين كل يوم و مفهمني انه عنده مشاكل في الشغل ! !

_ " مساء الخير يا نهى . . . ايه لسة تعبانة ؟ "

بصيتله بصة غضب . . و اتكلمت بجدية : " كنت فين يا علي ؟ "

ضحك و قالي : " ايه ؟ كنت في الشغل "

قولتله بزعيق : " بطل كذب بقي . . بطل كذب ! انهي شغل فيهم ؟ ! الشغل اللي انت مرفود منه و مفهمني انك في شركة أدوية . . ولا شغل ايه ؟ ! انت بتعمل معايا كدا ليه ! "

بلع ريقه و تردد : " انتي جيبتي الكلام دا ؟ "

ضحكت بسخرية : " هو دا اللي همك ؟ لوسمحت قول دلوقتي كنت فين ! "

تردد و جاوبني بنبرة صوت كلها ضعف : " كنت . . كنت كنت . . في ش . . شغ.. شغل . ت . . تا . . تاني . . ب . . بس . . مقولتلكيش . . ع . . عل . . عليه . . . أنا آسف "

و مشي من قدامي و دخل على مكتبه . . بجد انا مش مصدقة اللي بيحصلي . . خلاص بقيت أعيط و انا مش حسة بالدموع . . اخدت العياط كعادة روتينية لو معملتهاش يومي ينقص . . بس أنا مش هستسلم و همسح دموعي و أتظاهر اني كويسة . . مش هسمح ل " علي " و تمثيله عليا إنه مجنون انه يدمرني

قومت و انا بمشي بسرعة . . لبست وش الهدوء و الرقة . . اخدت وش الاستعداد لأي شخصية يمثلها عليا و أتعامل بالاسلوب اللي يمشي معاها . . لو هيجنني . . هجننه ، و البقاء للأذكى . . ههه أو للي يجنن التاني

خبطت على مكتبه . . خبطة بتاعت واحدة رايقة و تناسيت اللي حصل زي ما هو عامل نفسه ناسيه . .

قالي : " ادخل " . .

أما شافني ابتسم و قالي : " ايه يا نوني . . اتفضلي "

ابتسمت و رققت صوتي : " ممكن اتكلم معاك شوية ؟ "

_ " طبعا . . هو انا أطول نونو بجلالة قدرها تكلمني

ضحكت و قولت : " ايه الكلام الجميل دا . . بص بقى أنا عملالك مفاجئة و لازم تعرفها عشان تستعد "

_ " لا و كمان عملالي مفاجأة . . واضح انك راضية عني انهردة . . قولي يا ستي "

دانا راضية عنك اوي . . استهبل عليا استهبل . . فاكرني ساذجة . . لا و فاكرني ليه . . مانا فعلا ساذجة . .

رديت و قولت : " شوف بقي يا لولو . . أنا حجزت لينا اسبوعين كدا في فندق في الجونة . . ن*دي اعصابنا و نروق على نفسنا عشان ن**ر الملل اللي بقى في حياتنا دا شوية "

ابتسم كدا و قالي : " حلو أوي أوي . . حجزتلنا في فندق ايه بقي ؟ "

قولتله بمكر : " لو يهمك تعرف . . فاسمه " The blue " "

برق أوي و الإبتسامة الكدابة اللي على وشه اختفت و اتحولت لملامح صدمة و خوف و لغبطة و قال : " ايه ! . . . لا لا الفندق دا وحش ! غيريه . . . . لا لا أنا مش هروح المكان دا "

شيلت أنا كمان الملامح الهادية اللي كنت رسماها و اتكلمت بجدية : " ليه يا علي ؟هو أنت عمرك روحت الجونة قبل كدا ؟ أو عمرك روحت الفندق دا حتى؟ ! "

تردد جدًا بطريقة غريبة : " أ . . . .أ . . . أ . . لأ . . بس . . بس اسمع عنه كلام وحش "

كملت بوش القوة و الجدية اللي وراه نفس البنت الساذجة الضعيفة . . اللي م**ور مشاعر الحياه جواها و قولتله : " و من امتى بناخد بكلام الناس . . أنا بقى سمعت انه حلو . . ليه مانخودش الكلام الحلو . . اتغيرت ليه يا علي ؟ مش دايما تقولي مالناش دعوة بكلام حد ؟ "

بلع ريقه و هدى شوية لكن لسة متردد : "عندك حق . . بس بلاش الفندق دا أ . . أ . . أن . . أناا . . اا "

مسكت ايديه و قولتله بحب : " اهدى . . بطل تردد و توتر . . الفندق هيطلع حلو ، و أهم حاجة مانفكرش في أي حاجة غير كدا . . لأنك عمرك ما روحته . . صح ؟ "

هدى و ابتسم و قالي : " . . . . . . صح"

_ " ماشي . . . يلا كمل شغلك . . و أنا هروح أجهز الشنط "

قومت وصلت اخترق تفكيري و هو بيندهني : " نهى "

_ " ايه يا علي "

بصلي بضعف و ابتسامة صافية و قالي : " بتحبيني ؟ "

أنا فعلا بحبك يا علي ، بحبك فوق ما تتخيل ، بحبك و خايفاك ت**رني . . قولتله بابتسامة : " بحبك يا علي "

عينه اتملت بالدموع و قالي : " مهما حصل ؟ "

_ " مهما حصل ! "

وطلعت .. قعدت على الانتريه . . تايهة . . طبعا في غابة تخيلاتي و أفكاري . . هو انا فعلا بحبه مهما حصل ؟ مهما لو كان بي**نني ؟ !

معرفش . . حقيقي مش عارفة . . أحيانا بنجاوب على اسألة من غير ما نفكر اللي هنجاوبه دا حقيقي وقت الجد ولا لحظة صفا و خلاص ! . . .

الحيرة و الأسألة الكتير قتلتني . . عملت كوباية قهوة ، و أكيد فارت مني . . و عيدتها تاني ، أخدتها و دخلت الأوضة . . لقيته نايم ، طلعت الشنط . . هجهزها عشان مسافرين بعد بكرة . . حطيت الهدوم و أدوات البحر . . . البحر ! الحاجة الوحيدة اللي ممكن تبسطني هي البحر ! . . هبصله و هسرح ، هرمي فيه همومي هيشيلها و يعوم بيها و ميجبهاش تاني . . بس مظنش ان الهم المرة دي ، زي اي هم عدا . . الهم المرة دي لو رميته . . هيتولد من جديد ! . .

خلصت و نمت . . عادي حتى لو شربت قهوة

° °° ° ° ° ° ° ° ° °

. . ≈ يوم جديد ≈ . .

حسيت بحركاته من جنبي على السرير . . لكن من كتر التعب مش قادرة أقوم . . و دخلت في النوم من تاني . . طريق هروبي الوحيد !

صحيت بعد فترة من الوقت معرفش قد ايه . .

قومت عشان اغسل وشي . . . . لقيت البيت نضيف بيبرق ! مع إني ما نضفتش امبارح . . . لقيت المطبخ مغسول و نضيف جدا

طلعت على الصالة . . لقيت على السفرة . . فطار متكامل . . كأني في فندق بالظبط

و مرة واحدة طلع " علي " و قالي بحيوية . .

يتبع . . . .