الحلقة السابعة

2779 Words

مالك :الووو آيه : ازيك يا مالك اول ما سمع صوتها حس انه ارتبك مالك : مين معايا آيه : مش عارف صوتى مالك بتنهيدة : أزيك يا آيه آيه : الحمدلله انت عامل ايه طمنى عليك مالك : بخير والله الحمدلله آيه بعياط : انا تعبانه يا مالك انا مش قادرة اتخيل حياتى من غيرك مالك بحزن : آيه بالله عليكى بطلى عياط ، انا مش ناقص انتى متعرفيش انا فيا ايه آيه بعياط : انت اللي مش عارف انا فيا ايه ، انا بموت من البعد ، حاسه ان روحى بتروح منى ،ارجعلى يا مالك انا والله حاسه ان بموت من غيرك. انا قلبى محروق اوى مالك بحزن : مينفعش يا آيه مينفعش ، فى واحده تانيه مقدرش اظلمها آيه بانهيار: انت ليه مش حاسس بيا ، ليه مش حاسس بوجع قلبى ، انت اللي عملت فيا كدة ، انت دخلت حياتى دمرتها ، عمالة بخبى وجعى منك بس مش قادرة ، نفسي اترمى في حضنك و اعيط ، يمكن ناري تهدى شويه ،هو انت ازاى قلبك موجعكش عليا مالك :قلبى واجعنى عليكى طبعا ، انتى والله ما تعرفي اللي فيا ، ولا بالذنب اللى حاسه من ناحيتك ، بس مش قادر آيه بانفعال : مش قادر ايه بالظبط ، مش قادر تظلمها ، لكن تظلمنى انا عادى صح مالك : لا طبعا مش عادى ، بس نصيبنا كده ، مش هنقدر نغيره آيه : لا يا مالك انت الل اخترت يكون كده ، انت عمرك ما هتعرف اللى انا فيه ، انت لو تعبان زيى هتفهم ، لكن انت مش حاسس مالك : مين قالك انا تعبان اكتر منك كمان، انتى مفكرة ان متعلقتش بيكى ، انا اتعلقت بيكى يمكن اكتر ما انتى اتعلقتى بيا كمان آيه بدموع : يعنى انت حبيتنى بجد مالك : اها يا آيه آيه بعصبيه مختلطه بالعياط : اومال قادر تسيبنى، ازاى جالك قلب تعمل فيا كده ازاى نفسى افهم مالك بعصبيه مكتومه : يعنى كنت اتجوزكم انتوا الاتنين هترضيها آيه بعياط : ايوا يا مالك هرضاها مادام هبقى معاك هرضى بس متمشيش. مالك بعصبيه : وانا مش هرضاها يا آيه ، انا مش شركة عشان ابقى معاكم انتوا الاتنين ، بصى متخلنيش ازعق عشان انا في الشارع و معايا ناس و راح نافخ دخان السيجارة آيه :ايه ده استنى!! ؟ انت رجعت تشرب سجاير تانى مالك : اهاا انا بشرب اصلا آيه : لا يا مالك انت مبطلها بقالك كام سنه رجعتلها ليه مالك : رجعت يا آيه عادى مخنوق آيه : تقوم ترجع تدخن، كل ده بسببى! مالك : الله يخليكى يا آيه بلاش كلام فى الموضوع ده آيه : مالك انا هتخطب مالك : ربنا يسعدك آيه : يعنى انت مش فارق معاك مش فارق ان هكون مع حد غيرك مالك بخنقه : ربنا يسعدك يا آيه آيه بانهيار : ده ظلم والله العظيم ظلم ، انت ازاى قادر تعمل فيا كده ازاى كنت بتتسلى بيا ، انت محبتنيش زى ما بتقول حرام عليك ، انت ليه مدتنيش فرصة اختار ، ليه حكمت فى الموضوع لوحدك ، ليه طلبت مفكرش فى الموضوع و اعيش حياتى ، انت ليه اذتنى بالشكل دة لييييييه ، انا والله حبيتك فضل تعيط مكنتش قادرة تستحمل مالك بحزن : ابوس ايدك متعيطيش ، صدقينى يا آيه انا تعبان من غيرك ، والله ربنا شاهد على كل حاجه كانت جوايا ليكى و هو عارف ان كنت... عشان خاطرى اهدى آيه بعياط : اااااااه يا مالك ، انا مش قادرة اكمل لوحدى من غيرك ، انا كل ما احاول انسى مبعرفش ، كل حاجه في غيابك ملهاش طعم ، انا حياتى وقفت من بعدك صدقنى ، انا قلبى واجعنى اووووى انا بموت وانت مش موجود ، عشان خاطرى متسبنيش لو بتحبنى بجد خليك معايا يا مالك مالك بزعيق : بس بقا يا آيه بسسسس ، كفايه حرام عليكى الل بتعمليه فينا ده خلاص احنا موضوعنا انتهى ، افهمى بقى آيه بخوف و عياط : وطى صوتك عشان بخاف من الصوت العالى مالك بحنان : حاضر بس اهدى و عشان خاطرى كفايه يا آيه ،كفايه وجع قلب ، كفايه تعذبي فينا بالشكل دة ، احنا غلطنا اما قربنا من بعض و لازم نتحمل نتيجة غلطنا دة آيه بعياط : انت السبب ، انت اللى خبيت عليا انك مرتبط من الاول مالك : و عرفتك بعدها ، و انتى فضلتى نتكلم آيه بانفعال : فضلت نتكلم كنت بقولك ايه ، كنت بتطمن عليك ، هل دة كان غلطى ، مش انت اللى جيت قلتلى محتاجلك ، مش انت اللى قلتلى بحبك ومش هسيبك مالك بندم : ايوا ، و انا اسف ، كان غصب عنى ، مقدرتش اكتم مشاعرى ناحيتك آيه : وبعدها تيجى تظلمنى و تسبنى ولا اكنك كنت بتحبنى مالك : حقك عليا والله ، انا عارف ان الاعتذار مش هيعمل اى حاجة ، بس دة نصيبنا ، و ان شاء الله ربنا يعوضك خير آيه : يعنى كده خلاص بجد يعنى انت هتمشى مالك بعياط مكتوم : غصب عنى والله غصب عنى ، حقك عليا انا اسف ، بس انسينى ، حاولى تركزى في حياتك ، امسحى اى حاجة متعلقة بيا ، امسحى رقمى و كل حاجة عندك بتفكرك بيا، متفكريش فيا تانى ، انسينى يا آيه آيه بعياط : انا عمرى ما هسامحك على اللى انت عملته فيا ،مهما عملت خلى بالك من نفسك مالك : بتمنى تراجعى نفسك و تسامحينى ، انتى كمان خلى بالك من نفسك لا اله الا الله آيه : محمد رسول الله و قفلوا مع بعض و هى انهارت فى العياط هى لنفسها كنت فاكرة ان هفرق معاك يا مالك كنت مفكرة انك بتحبنى طلعت لعبه بالنسبالك في الخلفيه اشتغلت اغنية اصالة يا عالم ************************************ عند مالك ، رجع تانى لصحابه بس كان وشه متغير و الخنقه باينه عليه محمد صاحب مالك : ايه يا بنى مالك مالك بجمود : ابدا مفيش. رائد بضحك : هتلاقى المزة نكدت عليه ولا حاجه مالك اتعصب جدا من الكلمه راح ضاربه فى وشه صحابهم : ايه ده فى ايه ، فى ايه يا مالك اهدى مالك بعصبيه : انتو مش سامعين بيقول ايه رائد باصصله بذهول و كان هيقوم يض*به ، بس صحابه مسكينه ، و جزء ماسك مالك عمرو : خلاص ياجماعه مفيش حاجه ، يلا يا مالك نمشى مالك بنرفزة : خليك، انا همشى لوحدى عمرو : انا اسف يا شباب يلا نمشى الاتنين مشيوا مع بعض و ركبوا العربية ، بدا عمرو يتكلم عمرو : آيه كلمتك سند دماغه على الكرسى و غمض عيونه مالك : اهاا عمرو : و قالتلك ايه مالك : وجعت قلبى عليها عمرو بحزن : هو انت بتحبها مالك : انا تقريبا حبيتها بجد يا عمرو عمرو : و عملت فيها كده ليه و فى نفسك كمان مالك : عشان سارة متستاهلش منى اخونها عمرو : تانى يا مالك سارة تانى مالك : اهاا تانى و تالت يا عمرو ، سارة اول حد حبيته ، ووقفت جنبى كتير و وقفت قدام اهلها عشانى ، و فوق كل دة بقت خطيبتى عمرو : مين دى اللى وقفت جنبك ، اللى كانت كل شويه بتسيبك ، ولا اللى كل مرة تقلك حجة شكل عشان تبعد ، ولا بلاش زمان ، هى دلوقتى بتعمل معاك ايه مالك مبيردش عمرو : ما ترد بتعمل معاك ايه مش بتقول انها أتغيرت و بقيت مش زى الاول مالك :ايوا بس مش معنى كدة ان اسيبها عمرو بنرفزة : انت متخلف يا بنى، هو انت المفروض مستنى منها ايه ، عشان تتاكد انها مبتحبكش مالك بانفعال : معرفش يا عمرو معرفش ، انا بقيت بستغربها معرفش ازاى، ساعات بتبقى حنينه اوى ، و بتتمنى تعمل اى حاجة عشانى ، و ساعات بحس انى مش في بالها و مبتحبنيش اصلا عمرو : عارف بتحس كل دة ليه مالك باستفهام : ليه عمرو : عشان انت جربت الحب بجد مع آيه ، فهمت يعنى اهتمام ،يعنى ايه لهفة الاشتياق ،عرفت ان الحب افعال مش مجرد كلام ، شفت تمسكها بيك برغم كل اللى انت عملته فيها ، كل حاجه كانت طالعه منها كانت حقيقى وعلى فكرة ده كلامك مش كلامى مالك : اللى هيجننى ان كل مرة اشوفها بفتكر آيه و كلامها و أقولها انتى مبتعمليش كذا ليه مش بتقوليلى كذا ليه ، معرفش طول الوقت عايز احس ان آيه اللى معايا و دى حاجه خنقانى عمرو : انت مبقتش تحب سارة صح مالك : مش عارف ، دى حاجه مخليانى هتجنن بس فى نفس الوقت ، بضعف قدامها و مبقدرش اسيبها ، و لو سبتها هحس ان بسيبها عشان واحده تانيه ووقتها هبقى فى نظر نفسى مش راجل عمرو : كلامك صح بس مش مقنع مالك : ده الل هو ازاى لا مؤاخذه. عمرو : يعنى مفيش حد كده يا مالك ، مفيش حد بيضحى بحبه عشان خاطر حد تانى مالك : لا فى انا عمرو : غبى الل يعمل كده يبقى غبى و انانى كمان ، الحب الحاجة الوحيدة ، اللى بتتنسف قدامها كل القيود و المبادئ مالك بحيرة : ربنا يقدم الخير ************************************** آيه من كتر العياط صدعت و نامت موبايلها رن كان مروان ، نفخت زهق و مردتش لحد ما الرنه خلصت و رن تانى آيه : ايوة يا مروان مروان : ازيك يا آيه عاملة ايه آيه : كويسه الحمدلله وانت مروان : الحمدلله ، صوتك ماله ، كنتى نايمه ولا ايه آيه بملل : اها كنت بدأت انام مروان : مممممم يعنى سمعتى الفون اما رن آيه : ايوة بس مبصتش على الاسم مروان بانفعال : ما هو انتى لو مهتمه ان بقى في حياتك حد ، كنتى بصيتى بس انا مش في دماغك ، انتى حتى مسلمتيش عليا وانا ماشي آيه : في ايه يا مروان ، قلتلك كنت هنام ، و مجاش في دماغى انك تتصل اصلا مروان بحدية : انتى ازاى بتتكلمى معايا بالاسلوب دة اصلا آيه بتعجب : اسلوب ايه ؟ دة انت اللى بتتعصب ، و من غير داعي أساسا مروان بانفعال : بصي يا آيه ، انا طول حياتى كلها الناس بتتعامل معايا باحترام ، و عمرى ما سمحت لحد يتجاوز حدوده معايا ولا هسمحلك بكدة، حتى لو هتكونى مراتى ، ياريت تعرفي انتى بتتكلمى ازاى و مع مين آيه بعدم فهم : اسلوب ايه ، و بتكلم مع مين ايه مروان : انتهى النقاش على كدة ، سلام و راح قافل الخط في وشها فضلت متنحة و مش مستوعبه اللى حصل ، و بعدين انفجرت في الضحك آيه : هو ع**ط دة يا ربى ، ايه الهبل الل بيعمله دة ، هو انا نقصاه ، ولا يكونش دايبه فيه ، فهستحمله بقى ، دة مختل رسمي ، يا ربي انا هلاقيها منه ولا من الحيوان التاني ، يارب ارشدنى للصح بقى و ارزقنى الخير ، بعدها قرأت قرآن شويه لحد ما نامت ************************************ صحيت تانى يوم راحت الشغل فضلت تذاكر كتير عشان كان عندها امتحان لحد ما مريهان جت ، لانها بتيجى بعد الظهر و آيه بتيجى الصبح مريهان : يويو عاملة ايه آيه : الحمد لله يا حبيبتى ، انتى عاملة ايه النهاردة ، بقيتى احسن مريهان :عادى يعنى اتعودت ، المهم انتى ، ايه اللى حصل امبارح آيه بحزن : اللى حصل امبارح مش عايزة افتكره مريهان : ليه بس ايه حصل آيه : قرو الفاتحة ، و اتدبست بشكل رسمى مريهان : يا ربييييي ، طب كلمتى مالك آيه : و ياريتنى ما كلمته مريهان : ليه عمل ايه المنيل دة آيه : قالى مش هينفع نكمل مريهان : لا احنا نطلب اكل و تحكيلى بالتفصيل بعد طلبوا الاكل ، حكتلها كل اللى حصل امبارح بالتفصيل لحد مكالمة مروان مريهان : مش عارفة اقلك ايه آيه : ولا حاجة ، انا بس مش مستوعبه كل اللى بيحصلى و عايز اغمض و افتح الاقي كل دة انتهى مريهان : هينتهى يا حبيبتى ، هينتهى و هتبدأي حياتك من جديد ، مع حد يستاهلك بس لازم تنسي مالك و كفايه وجع قلب لحد كدة آيه : ياريت اقدر انساه ، بتمنى فعلا عشان اقدر ارتاح مريهان : ان شاء الله هتقدرى ، عايزين بس نشوف حل في التانى دة كمان آيه : هنلاقيله حل بس امتى معرفش ، اللى انا متأكدة منه ان اهلى مستحيل يجوزونى غصب عنى ************************************** في الفيلا عند سارة دخلت الاوضه عند سها سارة بغل : ازيك يا سو عاملة ايه سها : الحمدلله كويسه سارة بخبث : شفتى مالك جابلى ايه و راحت مطلعة علبه قطيفة فيها خاتم دهب رقيق بصيتلها و قالت سها : مب**ك عليكى سارة بخبث : مالك يا سها حساكى مش مبسوطة و كنت بتعيطى ، تكونيش مش فرحانه عشان اتخطبت وانتى لسه ابتسمت بسخريه على حال اختها وقالت سها : و هزعل ليه ، انا لسه نصيبى مجاش سارة : يعنى كدة اعتبر ان الرهان اللى بينا خلص بصيتلها و قالت سها : سارة انتى ليه بتكرهينى اوى كدة ارتبكت من السؤال سارة : و انا هكرهك ليه ، دة انتى حتى اختى الوحيدة سها : كويس انك فاكرة ان اختك سارة : لا متقلقيش انا فاكرة ، سلام بقى عشان رايحة اقابل مالك فضلت هى قاعدة تفتكر اللى حصل اول ما عرفت مالك فلاش باااااااااااااااااااااااااااك بنت بتغرق في البحر و عمالة تغطس و تطلع اكنها بتعافر الموت و شاب بينط فى المية و بينزل ينقذها بعدها ما خرجها كان مغمى عليها فضل يخبط على وشها بض*بات خفيفة و يحاول يضغط على ص*رها عشان ترجع المية اللى شربتها ،بعدها بدأت تكح جامد و فتحت عيونها مالك بقلق : انتى كويسه سها بتعب : انقذتنى ليه ، انا كنت عايزة اموت مالك : استغفر الله ليه كدة بس ، مفيش حاجة تستاهل سها : لا في ، اما يبقى كل اللى حواليك رافضينك يبقى الموت اهون مالك : طب و ليه محاولش اغير الفكرة دى سها : حاولت و مفيش فايدة ، محدش بيصدقنى مالك : حاولى تانى اكيد الانتحار مش حل ، لازم تثبتى انك صح ، و ان انتى ناجحة و انك ع** كل الكلام اللى بيتقال عنك ، و انا واثق انك تقدرى ابتسمتلك و قالت سها :شكرا يا .... مالك ابتسم : اسمى مالك ، وانتى سها : انا سها ، انا هقوم امشى بقى قبل ما الجو يضلم اكتر من كدة مالك : هتروحى ازاى و هدومك مبلولة كدة سها : لا متقلقش معايا عربيتى مالك : هشوفك تانى سها : لو لينا نصيب هنتقابل مالك : هستناكى هنا كل يوم في نفس المعاد دة ضحكت و ردت سها : ان شاء الله و ابتدت مقابلتهم تزيد كل يوم باااااااااااك سها بعياط : ياريتنى ما قابلتلك ولا عرفتك ، انا معرفش ليه بيحصلى ، ولا عملت ايه في حياتى عشان ربنا يعاقبنى بالطريقة دى ************************************** فى سنتر الكورسات كانت واقفه مستنيه دورها فى امتحان المحادثه امتحنت و خلصت الانستريكتور : كنت هايله النهارده يا آيه آيه : متشكرة جدا frau رباب رباب : انا متنبآلك بمستقبل هايل ف مجال اللغه ده و يا سلام بقا لو ظبطي الموضوع ده اكتر ، واخدتى كورس HR هيفرق معاكى جداا في اى شغل هتقدمى فيه آيه : هو انا فعلا باخد هنا الكورس دة ، بس انا خايفة ان بعد كل دة و طلعان عينى في المذاكرة ملاقيش شغل كويس رباب : من ناحية الشغل مجالات الألمانى مفتوحه ، بس اهم حاجه شهاده اللغه. آيه : شهادة جوته ههههههههههههههه دى الامتحان بتاعها معدى 5000 جنيه وانا الحقيقه افلست رباب : ههههههه متقلقيش سيبى موضوع الشغل ده عليا ركزى انتى بس فاضلك شهرين معايا و تبقى ظبطى C2 و وقتها يا ستى هقدر اشوفلك شغل بقلب جامد آيه بسعاده : انتى بتتكلمى بجد رباب : اهاا طبعا انتى من اشطر الناس هنا في الكورس و تستحقى الفرصه دى آيه بتعجب : فرصه!!! رباب : ايوة آيه : افهم من كده ان الشغل بالفعل موجود بس حضرتك مستنيه اخلص الليفل الاخير رباب : بالظبط بس انا كنت عملاهالك مفاجأة وانتى بوظتيها ههههههههههههههه آيه : لا خالص حضرتك هههههه اعتبرينى اتفاجئت رباب : ماشى يا لمضه ، اشوفك السيشن الجايه ، خلى بالك من نفسك بقا آيه : اوووك يلا بشوفك بااااى *************************************** في نايت كلوب ، كانت عمالة بترقص و ماسكه كاس في خمرة في ايديها و لابسه ؛ شورت جينز قصير ، و عليه بادى اسود مفتوح من الضهر ، و شغال اغانى انجلش بصوت عالى شاهيناز : ايه يا ساااااااارو مختفيه ليه بقالك فترة سارة : كنت مشغولة شوية ، و ادينى رجعتلكم اهو ليان : ايوة يا ستى محدش قدها بقى اتخطبت لحضرة الظابط شاهيناز : ايه دة بجد يا سارة حصل امتى دة سارة : من اسبوع كدة عقبالك بقى شاهيناز : طب و هو عارف حوار خروجك معانا و السهر و كدة ليان بضحك : لا طبعا يا بنتى ، و هى دى حاجة تتعرف خلينا كدة ، لو عرف اكيد هيمنعها سارة بضحك : قوللها يا بنتى ، سؤال ميتسالش بصراحة يا ايشو فضل التلات بنات يضحكوا و يهزروا لحد ما جه واحد من ضهرها و مسك سارة من وسطها و باسها من رقبتها سارة بتفاجؤ : رامز ازيك وحشتنى رامز : وانتى كمان يا بيبى ، بس لو كنت وحشتك كنتى سالتى سارة : معلش يا بيبى متزعلش رامز : طيب كنتى فين الفترة اللى فاتت و صحيح ايه حوار خطوبتك دى سارة بتوتر : تعالى نرقص و احكيلك و سحبته من ايديه و رقصوا سوا **************************************** و نزلت آيه و هى مبسوطه جدا انها وصلت للمرحله دى و هى مروحه البيت تليفونها رن بصيت لاقيت مالك... آيه بصدمه : مالك !!

Free reading for new users

Scan code to download app

App Store Google Play

Facebookexpand_more