بنات ٣٠

بنات ٣٠ البارت الخامس (عشق لا ينتهي)

لم تعد لمياء تفكر في شىء سوي مشاكل هؤلاء البنات الاتي لم يعشن حياه طبيعيه وجمعتهم الحياه في مكان واحد وشعرت لمياء بمسؤليه كبيره .... حيث أصرت على التعرف على باقي البنات ومعرفه حكايتهم .

ووعدت نفسها انها ستحاول ان تتقرب منهن وتحاول ان تكون طاقه امل جديده تدفعهن للتغير... وعدم الاستسلام للماضي الأليم.....

وفي رابع ايام العمل تعرفت لمياء على زميلتها الجديده وبعد محاولات جديه من لمياء... فتحت قلبها وحكت للمياء قصتها .....

عشت عمري كله بخاف من اي راجل وعمري ما فكرت اني ممكن احب او اتحب ماما كانت ديما تقولي أن الرجاله ملهمش امان وان الحب آخرته ألم وحسره بس لما شفت حسام كل ده اتغير....... كنت في عيد ميلاد واحده صحبتي وكالعاده في اي تجمع بقعد لوحدي مش بعرف اندمج مع الهزار والرقص مني صحبتي جت عندي وقالتلي

_ ايه يا ريهام مالك بعيد كده تعالي يابنتي معانا خلاص حنطفي الشمع

_ يا ستي سبيني هنا انا كده كده قربت امشي انا اتاخرت وانتي عارفه ماما قاعده لوحدها

_ تمشي ايه بس قومي كده معايا وشدتني من ايدي ولقيت نفسي وسط صحابها اللي انا معرفش فيهم حد خالص كنت حاسه انهم بيبصوا عليا كلهم يمكن لان لبسي غيرهم وباين اني من اسره فقيره لقيت نفسي بتسحب وبرجع للكرسي اللي كنت قاعده عليه تاني

_ انتي بقي ريهام اللي ديما مني بتحكلنا عنك

_ايوه انا...... حضرتك مين؟؟ وكانت بتحكلكم ايه عني؟؟ يارب خير

_ حضرتك ههههههههه انا حسام مع مني في النادي وياستي متقلقيش بتقول كل خير عنك، وقد ايه انك شاطره ومؤدبه وجدعه بس في حاجه هي مقلتهاش

_ حاجه...... حاجه ايه؟؟؟

_ قد ايه انتي جميله الصراحه استتقلت دمه ورديت عليه بابتسامه سخيفه وجوايا بقول أنجز بقى علشان انا مش نقصاك

روحت اليوم ده ومافيش في دماغي اي حاجه و تاني يوم في الكليه مني قعدت تسالني اسئله كتير عن حسام قلتلها

_ يابنتي انا دار بيني وبينه كلمتين بالعدد قالتلي

_ امال ليه هو من امبارح هاريني اسئله عنك، شكله اتعلق بيكي يا جميل اه زي ما بيقولوا تحت السواهي دواهي حسام ده يا بنتي كل البنات في النادي بتجري وراه ده من عيله ا***ذلي يا بنتي عارفه يعني ايه عيله ا***ذلى

_ لا والله ما حصليش الشرف بقولك ايه يا مني قفلي على الموضوع انتي عارفه انا مليش في الكلام ولو مبطلتيش حزعل بجد

لما روحت البيت قعدت افكر ليه حسام بيسأل عليا معقول يكون........ لا طبعا اكيد فاكرني زي البنات اللي بيجروا وراه دول فعلا ماما عندها حق الرجاله كلهم واحد مني قعدت تكلمني عنه كل يوم تقريبا ولما لقتني مش مستجيبه لها دبرت لقاء بنا في النادي من غير ما اعرف وقعدت تتحايل عليا اسبوع اروح معاها النادي وفي الاخر رحت معاها وطبعا شفت حسام هناك........

في الاول اضايقت من مني بس الفضول يمكن خلاني اسمعه او من كتر كلام مني عنه فعلا الزن على الودان بقى

.... حسام بدأ كلامه معايا بجمله غريبه

_ انا شاب بايظ على فكره وعارف عيوبي كويس

_ ممكن اعرف حضرتك عاوز مني ايه بالضبط

_ عاوز اعرفك اكتر

_ مش فاهمه

_بصي يا ريهام انا ححكيلك حكايتي انا شاب بن ناس اغنيا زي ما بيقولوا احنا عايشين في بيت كبير مع عمي وأولاده تقدري تقولي قصر ودي كانت رغبه جدي ان أولاده يعيشوا مع بعض في بيت واحد........ المهم ماما ومرات عمي بالرغم من انهم عايشين في بيت واحد إلا انهم كانوا مختلفين تماما امي ست طيبه بتصلي الوقت بوقته ومرات عمي كل همها الخروج والفسح والحفلات ومن غير ما ادخل في تفاصيل عمي اتصدم في مراته صدمه عمره..... وانا اتعلمت من اللي حصل والصراحه كنت بدور على واحده شبه امي.... فهماني يا ريهام

_ بس انت ماتعرفنيش كويس

_ يمكن من كلام مني عليكي يمكن لما شفتك شفت فيكي هدوء نظرات امي الحنونه، مش عارف بس اكيد في حاجه شدتني ليكي وخلتني عاوز اتعرف عليكي اكتر

بص انا مش بتاعه الحب والكلام ده ولا بيفرق معايا انك غني ولا لا انا طول الوقت قافله على نفسي وخايفه على قلبي

_ ده احلى كلام انا ممكن اسمعه، وكل لحظه بتعدي عليا بتاكد انك انتي الانسانه اللي انا يتمناها طول عمري حاول حسام ياخد رقم تليفوني بس انا مردتش واكتفيت اننا نتكلم على الفيس بعد ما روحت الفضول خدني اني ادخل على صفحته واللي لفت نظري فيها شويه حاجات اولها انه فعلا غني جدااا وده باين من صوره والاماكن اللي بيسافر فيها وحبه الشديد لأمه واللي طول الوقت كلامه على الفيس عنها، ده غير كميه البنات اللي عنده وعلى قد ما ارتحت على قد ما خفت هو ممكن انا وحسام يكون في بنا حاجه زي الافلام والحكايات الخياليه دي اللي فيها الشاب الوسيم الغني لما يحب البنت الفقيره، ولا كلام ماما صح والرجاله مايعرفوش غير الخيانه والخداع حسام خلاني افكر ولأول مره في الحب وفي الحياه...... صحيح خايفه بس التجربه تستحق اكيد انا من حقي افرح واحب واعيش، يارب يا حسام تطلع قدري وتكون انت الحاجه اللي حتحلي ايامي......

رحت الكليه بدري والمره دي انا اللي قعدت اسأل مني عن حسام كنت عاوزه اعرف عنه كل حاجه وانا مروحه زي كل يوم بعدي على محل كتب لقيت شويه بنات واقفين عند المحل وبنت بتقول لصحباتها انها عاوزه كتاب سندريلاسيكريت و ياريت واحده منهم تجبه لها هديه، كلهم قعدوا يضحكوا ومحدش رد عليها

انا رحت اشتريت الكتاب وعتطهولها وقلتلها ده هديه البنت بصتلي نظره عمري ما حنساها هي صحيح حاجه صغيره بس حسيت اني كنت سبب في ان ربنا حققلها حاجه هي اتمنتها من قلبها وربنا كمان حققلي اللي اتمنيته، حسام بقى يجي الكليه ويعمل المستحيل علشان يدخل ونتكلم مع بعض عرفنا بعض اكتر واتعلقنا ببعض اكتر

حسام عرفنى بسرعه ومكنش بيعمل حاجه ممكن تضايقنى

كل يوم كان بيفاجئنى بحاجه جديده علشان بس يسعدنى

وفى يوم حصلت حاجه غيرت اللى بينى وبينه خالص .........

وجه اليوم اللي كنت بستناه

_ ريهام احنا لازم نرتبط بشكل رسمي انا خلاص مش حقدر اعيش من غيرك

_ طب وأهلك يا حسام

_ مالهم اهلي؛ متشغليش هم الموضوع ده مافيش حد ممكن يعترض

_ ازاي بس انت عارف انت فين وانا فين

_ الله يخليكي بلاش كلام الأفلام ده وحددي معاد مع مامتك علشان اجي الأول اتعرف عليها وبعدين ابقى اجيب بابا وباقي العيله ماما...... كلمته فوقتني على المشكله الاكبر ازاي مكن اقنع ماما وانا عارفه انها حتخاف عليا ومش حتصدق حكايه ان مافيش فرق مابنا وان اهله حيوافقوا دي طول عمرها وهي زي ما تكون خايفه ان ده يحصل معايا واحب حد زي حسام رحت البيت وقعدت ارتب الكلام في دماغي ازاي حبدأ وحقول ايه

_ ماما

..... _ ايوه يا حبيبتي

_ بدون مقدمات كده في واحد عاوز يتقدملي

_ واحد مين؟؟؟ واتعرفتي عليه امتي وفين؟؟؟ وازاي انا معرفش؟؟ هو انا نايمه على وداني ولا ايه

_ براحه يا ماما واحده واحده الموضوع كله

.... _ موضوع ايه وبراحة ايه..... بقى كده يا ريهام بعد تعبي وسهر الليالي تعملي فيا كده

_ اعمل ايه يا ماما بس، انتي عارفه انك ربتيني كويس واني عمري ما حعمل حاجه غلط يا نور عيني وبعدين انا بقولك عاوز يتقدملي يعني نيته سليمه

_ طيب اشوفه الأول واصلي استخاره احنا ملناش حد غير ربنا نستشيره يا بنتي

_ يا حبيبتي صلى براحتك وان شاء الله خير وعلى فكره هو ابن ناس اغنيا وناس طيبين جدااا جده عدلي ا***ذلي اكيد سمعتي عنه _ بتقولي ايه....... مين

........ _ مالك يا ماما في ايه ماما انهارت من العياط وماقلتش غير كلمه واحده استحاله، استحاله الجوازه دي تتم وفضلت في زهول وإصرار اعرف ليه ماما رافضه وليه لما سمعت اسم عدلي ا***ذلي اتصدمت وفي يوم دخلت عليها بعد ما قفلت كلام مع حسام واللي كان كل يوم بيلح عليا علشان يجي يقابلها وقلتلها

_ ماما حرام عليكي اللي انتي بتعمليه فيا ده انا اهون لي اني اعرف الحقيقه مهما كانت ولا اني انسى موضوع حسام وبعدين انا فكرت كتير لو جد حسام او باباه عملولك حاجه حسام ايه علاقته وايه ممكن تكون الحاجه دي انا حتجنن من التفكير

... _ اسكتي انتي مش عارفه حاجه

_ ارحميني يا أمي أنا بموت وانتي مش حاسه بيا فصلت تتحايل عليها واعيط لحد ماقلتي ويارتني ما عرفت

_ ريهام انتي اسمك ايه؟؟

_ ايه يا ماما السؤال ده

_ اسمك في شهاده الميلاد ريهام احمد السيد متولي بس ده مش اسمك الحقيقي

_ ايه يا ماما اللي بتقوليه

_ يقول الحقيقه مش انت عاوزه تعرفي الحقيقه انا كمان حبيت، حبيت ابن عدلي ا***ذلي رؤوف وزغلل عنيا بفلوسه لحد ما ضحك عليا واتجوزته عرفي وبعدها قطع الورقه ومرديش يعترف بيكي لولا صاحب البيت اللي كنت ماجره عنده البيت كان راجل طيب وكتبك باسمه قبل ما يموت

_ ايه يا ماما اللي بتقوليه ده..... يعني ايه يعني انا وحسام اخوات مستحيل..... مستحيل يا ماما انتي اكيد بتقولي كده علشان ابعد عنه ماهو مستحيل احب اخويا..... مستحيل

لا انا ظني في ربنا جميل...... يارب بحق اي حاجه حلوه عملتها في حياتي، يارب تنجيني من اللي انا فيه يارب حلها من عندك انت يارب...

منمتش طول الليل لحد ما النهار طلع وبعت لحسام رساله اني لازم اشوفه بسرعه وانا بدعي يارب يبقي تشابه أسماء يارب ميكنش بابا حسام هو بابا الحقيقي.... يارب الثواني كانت بتعدي ايام مش ساعات لحد ما قابلت حسام ومعرفش انا قلتله ايه ولا بدأت منين كانت دموعي هي اللي بتحكي

_ ريهام.... استني بس اولا انا مش ابن رؤوف ا***ذلي رؤوف ده عمي اللي كنت حكتلك عليه بس معقول عمي يعمل كده..... ايه ده استني يعني انتي ممكن تكوني بنت عمي

_ بجد ياحسام........ الحمد لله انا كنت عارفه ان ربنا كريم الحمد لله يارب...... الحمد لله

_ انا مش عارف اقولك ايه بس الحكايه دي لازم نتأكد منها ولو فعلا عمي هو باباكي يبقي لازم يعترف بيكي ويصلح غلطه زمان

_ يعترف بيا ايه يا حسام الظاهر ان حكايتنا كده دي نهايتها اذا كان مرضاش يعترف بيا وانا لسه صغيره حيعترف بيا دلوقتي ويشوه سمعته

_ انتي مش عارفه حاجه يا ريهام يمكن اللي حصل لعمي كان بذنب مامتك انا كنت قولتلك ان عمي عايش معانا في نفس البيت وانه كان متجوز واحده والحقيقه ربنا صدمه صدمه عمره فيها واكتشف ان ابنه الوحيد مش من صلبه وان مراته خانته

_ انت بتقول ايه

_ زي ما بقولك كده علشان كده انا متأكد انه لو عرف انك بنته حيصلح كل اللي فات

_ حسام انا مش حمل اي صدمات تاني

_ اطمني وسيبي الموضوع عليا روحت البيت وانا مش عارفه هو اللي بيحصل ده حلم ولا حقيقه ولا ايه.......

وفي نفس اليوم جه حسام ومعاه رؤوف ا***ذلي وكانت صدمتي لما شفته جاي على كرسي متحرك ودخل شقتنا المتواضعه اللي في الدور الأرضي ماما اول ماشفته

_ رؤوف...... ياه يا رؤوف ١٩ سنه عدت من آخر مره شفتك فيها جاي ليه يا رؤوف

_ انا

..... _ انت ايه..... اه حتقول ندمان وجاي علشان بنتك.....

ماعدش ينفع خلاص دي مش بنتك دي بنت الراجل الطيب اللي انقذها و انقذ سمعتها و بنتي اللي سهرت عليها وشفت الذل لحد ما كبرتها

_ كفايه كده يا اميره مش شايفه ربنا عمل فيا ايه

_ لا مش كفايه يا رؤوف انا قعدت ١٩ سنه احسبن عليك وعمري ما سامحتك وعمري ما حسامحك طول ما انا عايشه وانت يا بني انسى حكايه ريهام دي خالص وياريت متحاولش تشوفها تاتي

_ ماما حرام عليكي

_ ادخلي جوه يا ريهام مش عاوزه اسمع صوتك

_ تعالي في حضني يا بنتي انا ابوكي

_ انا قلت ادخلي جوه يا ريهام و انت لو سمحت خد عمك ده واتفضلوا من هنا فجأه الدنيا لفت بيا واخر كلمه سمعتها صوت ماما وهي بتقول بأعلى صوت ليها : بنتي...... ريهااااااااام

لما فقت لقيت حسام جمبي و ماما و قالتلي انه مسبنيش لحظه واحده

حسام ابن الناس الأغنيا طلع ابن عمي...... قعدت فتره طويله استوعب الموضوع ... ازاي الدنيا صغيرة كده وازاي بابا يعمل كده في ماما ..... حسام عمل المستحيل علشان يقنع ماما انه يتجوزني و بعد ما وافقت على مضدد طبعا وجعتني مشكلة تانيه ..... وهي ان حسام طلب من ماما اننا نعيش في الاقصر لان حياته كلها واهله هناك .... ماما اعترضت وانا كمان كنت هتجنن ازاي اسيب ماما لوحدها ده ممكن يحصلها حاجه ماما استحاله تقدر تعيش من غيري دي روحها يا حبيبتي فيا ... بس حسام عمل المستحيل علشان يقنعنا احنا الاثنين ... ماما حبيبتي وافقت علشان سعادتي وعلشان شافت ان احسن ليا اني اكون معاه لانها مش عايشه ليا زي ما قالتلي وكمان حسام وعدني اننا هنسافر لها علطول مره كل شهر وعمرنا ما هنتاخر عليها وبالرغم من اننا اتجوزنا لكن ماما رفضت تيجي معانا الاقصر ولو مره واحده و عمرها ما نسيت و لا عرفت تسامح بابا

اللي بين ماما وبابا عذاب منتهاش و اللي بيني وبين حسام عشق منتهاش عشت مع حسام اجمل سنين عمرى وفي يوم واحنا جاين من الاقصر علشان نشوف ماما عملنا حادثه وحسام اتوفي فى نفس اللحظه و انا دخلت فى غيبوبة طويله ولما فقت منها مكنتش مصدقة ان كل ده حصل ...... رجعت تانى لحضن امى وكان كل اللي حصل ده حلم جميل عدي بسرعة .... و فضلت عايشه على ذكرى حسام الجميلة انا عمري ما هقدر انساه ولا احب بعده ..... وبقالي هنا في المركز سنه بس .... جيت هنا علشان احاول اخرج من الاكتئاب والوحدة اللى انا فيها و خصوصا بعد وفاه ماما .... مساعده الناس هي الحاجه الوحيده حاليا اللي بتحسسني اني سعيده انا حرفيا مبقاش ليا حد ... صحيح

بابا بيسأل عليا علطول بس انا مكنتش قادره اعيش معاه.... حتى بعد وفاه ماما الحاجز اللي اتبنى في سنين عمره ما هيتشال بالايام ..... والحقيقه انا عشت ايام سعيده كتير مع حسام تخليني اقعد على ذكراه العمر كله وتخليني مش محتاجه لحد ....

.بس يا لمياء دي كل حكايتي ....