رواية إحكيلي

الفصل ٢٢

دى بقى بنوتة قابلتها برا العيادة بالصدفة كده و اتكلمنا مع بعض صدفة برضو و عرفت انى دكتورة امراض نفسية فقررت انها تقولى الكلام ده:

انا مفيش عندي مشكلة انما انا عاوزة اقدم نصيحة لعل و عسى تفيد اي بنت ناوية تغلط غلطتى انا الحمد لله اتطلقت النهاردة بعد رحلة عذاب 3 سنين شوفت فيهم كل انواع الوجع و الحرمان و القهر اللي في الكون لكنى مش ضحية انا ظلمت نفسي و اهلى و ابني و كل الناس اللي وجعتهم على وجعي لمدة 3 سنين انا ظالمة لان اخترت غلط اتجوزت، النسوانجي و الخمورجي اللي ميعرفش ربنا.

رغم ان جواه حنيه الدنيا و البر لاهله و يمكن ده طمنى من ناحيته و قولت جواه خير لكن نسيت ان بره باهله مجرد رد جميل و عاطفة مش التزام و لا خوف من ربنا، نسيت ان اللي ميراعيش ربنا مستحيل يراعيني صدقت الكدبة بتاعه ربنا بيغفر و يسامح، انت ياعبد فقير مش هتسامح.

و نسيت ان اللي فيه طبع مستحيل يغيره و ان النوعية دي من الرجالة عاوزة واحده محترمة ترميها في البيت تخلف و تربي و هو يسافر و يعيش و يشوف مزاجه بره و المحترمة تدفع تمن احترامها حرمان من كل حقوقها ممكن قلة خبرة لانه اول راجل في حياتي ممكن الحب الاعمي مش هتفرق الاسباب المهم النتيجة.

قالولنا اقلهن مهرا اكثرهن بركة لكن مقالوش ان ما بقاش في رجالة بتقدر و لا بتحفظ الجميل انا اتجوزت من غير شقة و اتطلقت من غير شقة.

3 سنين في بيت ابويا و هو بره عايش مع عشيقته و بيرميلي ملاليم كل شهر بيصرف قدهم مرتين على عشيقته في سهرة واحده رغم ان مرتبه يعادل 100 الف جنيه بس هي كده اللي رضيت بقليلها و معودتوش ان ليها طلبات هتعيش طول عمرها ملهاش حقوق كان في ايده يعملي 100 شقة بس هو فضل يصرف فلوسه على اهله و عشيقته و مزاجه و السفر من بلد لبلد و الفسح و انا اتطلقت زي ما اتجوزت معشتش معاه تقريبا و جبت طفل للدنيا عشان يعيش من غير اب و النهاردة بيقولي و احنا بنتفق على الطلاق هجيب شغالة تلملك هدومك و حاجاتك و هجيبلها كراتين لان معنديش شنط مش محتاجها و هشحنهم و انتى تحاسبي شركة الشحن لان الحاجات متستاهلش انى اشحنها او شوفي تمنها كام و انا ابعتهوملك و هتبرع بيهم.

الظاهر ات**ف يقولي هرميهم في الزبالة ده لانه سافرتله شهرين و عشيقته عيشتنى في قهر لحد ما نزلت و سيبتلها الجمل بما حمل و سبتهم لبعض و يشبعوا ببعض.

شوفتي انا قيمتى عنده ايه؟ انا اسفة انى مضطرة اقول متسهلوش الجواز يا بنات اللي بييجي رخيص بيروح ارخص اختاروا صاحب الدين و الخلق مفيش حد بيتغير اختاري بعقلك، عشان قلبك هيضيعك انا اسفة انى مضطرة اقول مش اي راجل يستاهل توقفي جنبه انا بعتله دهبي و استلفتله فلوس من امي حتى تذكرة الطيارة امي اللي دفعتها و لما سافر اول حاجة عملها رماني و لما قولتله انت ازاي عملت فيا كده انا عملتلك و عملتلك و ضحيت و و و هو و اهله فضحوني و قالوا انى مش اصيلة و دي بتعايرنا و نسيوا 3 سنين تضحية نسيوا ان كتر الظلم يولد الانفجار.

اوعي تتجوزي من غير شقة اوعي تلاقيه بيدخل اهله في اي مشكلة في الخطوبة و تكملي، هتكتشفي في الاخر انك متجوزة اهله و هو في النهاية ضيف شرف على فكرة عشان اكون امينه طليقي فيه مميزات كتير لكن عيوبه تلغي اي مميزات متضحكيش على نفسك و تقولي الحلو يشيل الوحش لان في وحش هتموتي بسببه كل يوم و عمرك ما هتقدري تستمتعي بالمميزات يبقى وقتها المميزات ملهاش اي لازمة شرع ربنا هو الحل اختاري بالشرع و اتجوزى بالشرع.

اختاري صاحب الدين و اتجوزي بشنطة هدومك و خدي مهرك و هو يفرش بيته زي ما يفرشه ان شاء الله يفرشه رمل حتى بيته و هو حر متجيش على نفسك و لا على اهلك، على الاقل لو طلع مش اصيل تخرجي بنفسك من غير ما حد يلملك حاجتك في كراتين و يرمهالك انا مش بعمم و لا بقول كل الرجالة كده و لا عاوزة اغلط فى الرجالة كلهم او اوجع حد بكلمة لكن ممكن واحده تكون على اول الطريق بتاعي الحقها و تتراجع.

انا مش عاوزة اغلط في طليقي مش حبا و لا احتراما ليه انما هو ميستحقش من حسناتي ولا يستحق ياخد مساحة من وقتى اصلا انى اتكلم عنه.

كل اللي طلباه منك دعوة ليا و لابني و ربنا يسعد قلوب كل البنات جميعا و يرزق كل البنات ازواج صالحين و يؤلف بين قلوب كل زوجين.

و نصيحة للرجالة اتقي ربنا في زوجتك الا الخيانة لو تعرف وجعها قد ايه هتزعل من نفسك و على نفسك قوي، لو عندك مشكلة مع زوجتك اتكلم معاها احتويها افهمها ساعدها تحتويك و تسعدك انت الاعقل و الاحكم حياتك و اولادكم تستاهل المحاولة مرة و اتنين.

انصحيهم يتكلموا مع بعض يا دكتورة، قوليلهم اتكلموا يا جماعه، الكلام بين الزوجين هو الحل هيقرب وجهات النظر و يؤلف بين القلوب.

و دى كانت نصيحتى اللى هتقوليها يا دكتورة لاى بنت هتلاقيها بتوقع فى نفس الفخ اللى انا وقعت فيه و فكرت بنفس طريقتى الغلط، و كمان لو راجل شبه زوجى ده برضو لازم يسمع نصيحتى دى.

انا دلوقتى افضل كتير و كويسة جدا و بدأت اتعافى من كل اللى مريت بيه و بقى كل وقتى و جهدى مكرثاهم لابنى بس لما اتكلمت معاكى و عرفت انك دكتورة نفسية عرفت ان ممكن تواجهى حالات كتير اوى زى كده فحكيتلك و قولتلك يمكن تقدري تنصحيهم و تلحقيهم، و حسيت ان مقابلتنا دى ممكن متبقاش صدفه و اننا اتقابلنا عشان اقولك الكلام ده مخصوص..

طمنتها انى اكيد هعمل كده لو قابلت واحدة تشبه لقصتها و خصوصا لو لسه فى البداية و متجوزتش راجل بالمواصفات دى فى مرحلة خطوبة مثلا او حب.

شجعتها جدا على سلامها النفسي اللى هى بقت بتتعامل بيه بعد خروجها من تجربة زى دى و ان كانت لسه فى بداية مرحلة الخروج و لسه مفاقتش من الصدمة طبعا.

طلبت منها انها تكلمنى فى اى وقت تحس فيه انها محتاجة لحد تتكلم معاه على سبيل الصداقة حتى بلاش خالص عشان مجال شغلي، فرحانه انى شوفت ست انتصرت على وجعها و اتخلصت منه و حست براحه لدرجة انها بقت شايفه فى نفسها الشخص اللى ممكن يقدم نصيحه تفيد غيره و تنقذه من الوقوع فى الخطأ.

لو هى لسه ضايعه فى عذابها مكانتش هتفتكر تنصح حد او توجه نصيحه لحد ما تعرفوش اصلا، زى كل اللى بتبقى لسه فى قلب الورطة بتاعتها مش بتبقى فايقة غير لمصيبتها و بس و مش شايفه غير ان ايه هو الطريق اللى تقدر تمشيه عشان تخلص من وضعها...

فانا النهاردة مقابلتى للبنت دى احسن حاجة حصلتلي....