رواية إحكيلي

الفصل ٧

بدأت كلامها و هى بتبكى بحرقة و بتقول انا جيت لحضرتك هنا من فترة و نصحتينى و خدت ادوية كمان بس مفيش اى تغيير بيحصل.

انا اتعس انسانه في الدنيا مش عارفه اتصرف حتى باب ربنا اتقفل في وشي جوايا قهر الدنيا و مش عارفه اتغلب على الوجع ده خالص.

المفروض اني ست متجوزه و عندي اولاد، جوزي في الأول كان مسافر بس بعد جوازي كانت مشاكلي كلها بسبب امه و اخته، لانه بيحبهم حب غير طبيعي و خصوصا اخته اللي هي اصلا كانت صاحبتي من ايام المدرسه..

انا بعترف ان انا تربيتي غلط في غلط، امي من النوع اللي بتكبر فى السن بس عاوزه تتجوز مفيش هدف تاني عندها فى الحياة، دماغها محدود جدا و كانت تعباني اووي في تفكيرها، متسلطه لأبعد الحدود و كلام الناس عندها رقم واحد، انطوائيه اوي و عوزانا زيها بالمللي و لو مش علي مزاجها تصرفاتي كانت نظرتها ليا بتبقى مؤذيه اوى، و تتعامل بعصبيه و متاكلش معايا و لا تكلمني لحد ما تجبرني على اللي هي عوزاه كنت عايشه على أمل واحد، انى هتجوز فى يوم من الايام و ابني بيت و حياه و مشاركه و حب و ود، كنت بقرأ كتب و أخدت دورات اونلاين و تابعت ناس استشاريين في الاسره كتير جدا كنت بحاول اطبق كل حاجه و عاوزه بيت صحي.

جوزي بعد الجواز لقيته واخذني د*كور بنت محترمه و بنت ناس و اخته تعرفني و تعرف اني عمري ما كان ليا كلام مع شاب و لا بحب الاختلاط و دايما بنتقد الناس اللي بتعمل مشاكل و بقدس الحياه الزوجيه جدا جدا.

جوزي مرتبط باهله من بعد الجواز تقريبا من اول يوم يسيبني و يروح ليهم، دايما لوحدي مفيش اهتمام و غيرة اخته اللى هى صاحبتى فى الاساس، بدأت تبان على طول، لو خرجنا تيجي معانا و هي اصلا متجوزه و طول الوقت بيدلعها و بيكبر بيها و انا و لا الهوا.

كنت بروح لاهلي و اقولهم عاوزه اتطلق يقولولي انتي خايبه و مش عارفه ت**بيه و يضعفوني مش هنكر اني كنت سلبيه بس معنديش خبره و اتربيت على عدم الحريه و مليش رأي..

سافر و انا كنت حامل كنت بعرف اخباره من اهله و كانوا بيداروا عني كمان و خصوصا عنده اخوات تانيين بس اللي مسافر و مراته معاه و اللي موجود بس مرتبط بمراته واسرته و علاقته باهله سطحيه و بحدود.

لكن هو الصغير و هو و اخته أصحاب جدا و كل لما حد يتكلم يقولي انهم زي التوأم طول عمرهم كده هي سره و راحته، حتى فلوسه معاها و تفاصيله و اسراره.

انا معرفش عنه حاجه و هي بتغير عليه مني اووي كانت بتزعل و هو دايما يراضيها.

تعبت من الوحده و القهر و قولت بكره يرجع و نستقر و كل همي اننا نبعد بس هو و لا بيسمعني.

بس هو من الشخصيات اللي بتعرف تنافق حلنجي يعني راميني طول الوقت و يجي في لحظه يعمل شو و هزار و حاجات و المفروض انسى و اضحك وكإنه مش مقصر معايا فى اى حاجه و لا مخلينى مهمشة.

رجع من السفر و قولت خلاص الدنيا هتظبط بس طبعا محصلش روحت من ورا اهلي رفعت قضيه طلاق كان عندي ولد واحد هو راح لأهلي و فضل يقول فيا عيوب الدنيا بس مقالش ان مفيش احساس بالحنان و لا الاستقرار و لا الأمان و لا الموده و هما طبعا مسابونيش و زن منه وبدأ يمثل بقى و انا تعبت و هموت و شغل افلام و هو ربنا مديله فصاحه يتخانق مع ١٠ و يغلبهم و يطلع هو المظلوم فظيع بجد و كنت مأجله حمل خالص و ابني بقى عمره ٥ سنين عمل مشاكل لحد ما حملت و خلفت توأم.

و المعامله فضلت زي ما هي بس بدا يتغير شويه و يتعامل كويس بس قلبي حس انه فيه حاجه مش مظبوطه.

مش هقول عرفت بالصدفه لا دورت و سعيت لحد ما عرفت و ده بسبب عدم احساسي بالأمان رغم اني كنت معيشاه ملك راعيته في بيته و ماله و أولاده.

و اكتشفت ان جوزي بيعرف ستات شمال و بيعمل تصرفات اق*ف منها، شخصيه قذره فعلا بمعنى الكلمه مكالمات و مقابلات و مش بيسعي غير للستات ال..... بس هو اي ست بتيحي قدامه على طول الالقاب تتشال بينهم و يبقى زي العيل الصغير برياله.

و احنا و لا على باله يضحك عليا بالشويتين بتوعه و خلاص و هو محدش بيقدر عليه في الكلام و لا عارفه امسك عليه حاجه ابدا و عامل نفسه طالع عينه في الشغل.

و محدش بيصدق عليه حاجه بس انا اتأكدت لاني اتعرفت على واحده اشتغلت معاه فتره حكتلي تفاصيل كتير بس متعرفش اني مراته او حتى اعرفه بس انا متأكده من اللي قالته.

بيقول مسافر شغل و متبهدل و هو بيكون مع واحده، خلاني معنديش ثقه في نفسي و كرهت البيت و اعصابي تعبت ده من يوم ما عرفته مكلفش خاطره يقرب مني يعرف بحب ايه و لا بكره ايه و لا تفكيري ازاى يعتبر ميعرفش عنى او عن شخصيتى اى حاجه، مش بيركز مع أي تغيير اعمله مبيحاولش يقرب، حتى البيت مش بيقعد فيه لحظه و كذاب بتاع حوارات و بيصدق نفسه اوي وو كل الناس شايفينه ملاك الظاهر انه بيعاملني كويس لانه اصلا بيعرف يتلون و يلف عقل اللي قدامه و ده كان تاعبني دايما عاوزه بيت مشاركه حياه و نربي أولادنا مع بعض، عندنا مشاكل بس عادي لكن كل العيوب دي هو انا مش بني ادمه و المفروض لما يجي يعمل الشويتين بتوعه اتنطط من الفرحه و الا ابقى ست نكديه.

و على فكره واجهته باللي عرفته مسكني ض*بني و سيبت البيت ساب المصيبه اللى هو عاملها و مسك اني بفتش وراه و طلع البنت دي كذابه و عملت كذا و كذا عشان شغل و انا كشفتها انها نصابه و بتسرق و انها راحت قالتله انا كلمت مراتك و فرحانه فيه انها خربت البيت و طبعا كل ده كدب بس هو فظيع و شاطر اوى فى التأليف و التمثيل.

دلوقتي انا تعبانه و معايا أطفال صغيره و موضوع الطلاق دلوقت صعب و أهلي مش واقفين جنبي خالص و لا حاسيين بيا.

مش عارفه اعمل زيه و امثل اني بضحك و فرحانه و لا ازعل و ابين وجعي و هو شايف اني ظالمه و مفتريه.

انا تايهه و قلبي واجعني و كل شويه اسأل نفسي ليه مليش حق اعيش زى اى زوجه و احس بالأمان.

و برضو مليش حق انفصل و اعيش نفسيتي مرتاحه بصلي و بدعي ليل و نهار و مفيش حاجه بتحصل و هو زي ما هو رامينا و عايشها بالطول و العرض بقيت لوحدي دايما عايشه في كوابيس و بقوم قلبي واجعني مش ببطل تفكير و صعبان عليا نفسي اللي بهدلتها مع واحد و لا يسوي مش قادره أتجاوز كل ده و لا اخرج منه.

ده بره بيعمل محاولات الدنيا عشان واحده شمال ترضى تبصله و بيكون متوتر و سرحان ط، بعرف علطول انه في حد جديد و بشوف اهتمام عمري ما شوفته و لا حسيته منه اصلا، منه لله زي ما **ر قلبي و انا دمرني و انا نيتي كلها خير ليه و عمري ما اذيته منه لله...

""""""""

و زى ما شوفتوا كده، قصتها ما اختلفتش كتير عن قصص ستات كتير اوى كلهم بيجتمعوا تحت نفس المشكلة، و هى الزوج اللى بيعرف ستات تانية على مراته حلاله اللى بتبقى بتتمنى كلمة حلوة منه و لا اى معاملة طيبة و بالمعروف، بتبقى بتتمنى منه ضحكه و اهتمام و حب و ساعتها بس هتديله عينيها الاتنين و هتخليه اسعد انسان فى الدنيا، بس للاسف الراجل مش بيبقى شايف نفسه و لا راحته فى بيته و وسط مراته و ولاده و بيفضل يدور عليها برا، و بيبقى من ست لست تانية و هكذا و دون ادنى شعور بالذنب او تأنيب الضمير، ده بل بالع**، ممكن يبقى قاعد جنبها و تفكيره كله فى ست تانية عرفها و لسه مش عارف ازاى يوقعها فى غرامه، او وقعت خلاص و بيحلم بلحظاته الحلوة معاها، فى حين ان قاعدة جنب منه ست ممكن تديله احلى اللحظات و اكبر سعادة و فى الحلال بدون ما يغضب ربنا و يعمل اى حاجة غلط، بس الشيطان دايمآ مزين ليهم الحرام و بيخليهم يشوفوه بأحلى صورة، و بيبقى فى انبهار، اللى بستغربله بس ان الشيطان بيزين الغلط لحد ما الانسان يوقع فى الغلط ده فعلا و بعد كده بيفوق لنفسه و بيعرف غلطه و بيندم عليه، لكن هنا فى الحالات اللى بنشوفها من معظم الرجالة انهم من غلط لغلط و من حرام لحرام، يا ترى برضو ده ذنب الشيطان؟، و لا خلاص بقى الشيطان ده جواهم و جزء اصلي من ارواحهم اللى مبتحسش غير بمتع مؤقتة؟...

طيب فى سؤال مهم بيطرح نفسه، حضرت لا بتستقر مع اسرتك و لا مراتك بالنسبة ليك كفاية و حلالك و كده، ممكن بقى نعرف انت بتتجوز ليه!!.

يعنى لما هتبقى مسافر طول الوقت و على علاقة بستات تانية طول الوقت، و يا سلام لو زى الراجل بطل قصة النهاردة ده، اسراره كلها مع اخته، حتى فلوسه بيشيلها معاها، يبقى ده بيتجوز ليه!!، ناقصك ايه أصلا فقررت تكمله بالجواز!!، حضرتك مخليتش لبنت الناس اللى خدتها من بيت اهلها و بهدلتها بالشكل ده، مخليتش ليها اى دور فى حياتك، يبقى ليه اتجوزتها و ظلمتها و جبت منها عيال تزود بيهم همها و مسئوليتها و معاناتها فى الحياة....

لو عايزين نمثل على بعض عشان نكمل الشكل المظبوط و نخلى الصورة عموما حلوة، هقولكم ان مستحيل اى مشكلة توقف قصاد العلم و الطب و التخصص النفسي بالتحديد، لكن لو هنتكلم على ارض الواقع و هنقول الصراحة و بس، يبقى حقيقي فى انواع من البشر بيتصرفوا تصرفات صعب اوى ان العلم يحللها تحليل منطقي و مظبوط و يضمن للضحية اللى واقعة تحت رحمة البشر دول انها تعيش بعد كده مرتاحه و ان يبقى فيه ليها حل واقعي و مريح..

و اللى يقول كده يبقى بيكدب و بيعشم الناس باللى مش فى ايده.

اللى نقدر نعمله هنا اننا نشجعها و نشجع السيدات اللى زيها انهم ميستسلموش لكل الاحداث الب*عة دى اللى بيمروا بيها، يحاولوا يفكروا صح و يرتبوا افكارهم، يشوفوا اولوياتهم ممكن تبقى ايه و بناء عليه يبدأوا يشكلوا حياتهم بالطريقة المظبوطة اللى تخليهم يتخلصوا من كل اللى بيمروا بيه و من اى مشاكل بتواجههم...

و قبل ما اى ست تتهم اللى حواليها بانهم مش مساعدينها و مش حاسيين بيها و مش واقفين جنبها، لازم هى فى البداية خالص تساعد نفسها و توقف جنب نفسها و متستناش ان ده يحصل من حد، و تعرف كويس انها طول ما هى مفرطه فى حق نفسها و مبتدورش ازاى تعتمد على نفسها عشان تتخلص من كل اللى مش قادرة تعيش فيه وبيضغط على نفسها، يبقى عمرها ما هتلاقي اللى يعمل ده بدالها و يوقف عنها، زى ما بنسمع لما بيقولوا مش هيمسح دموعك الا ايدك....