الفصل ٦
1679 Words
المرة دى الحالة اللى جاتلى طلبت منى طلب غريب جدآ، و هو انها مش عايزة قصتها دى مجرد قصة كده هسمعها عشان هى حالة عندى و خلاص و بعد كده اشوف غيرها، لأ هى عايزة انى استخدم قصتها دى كعبرة لمن لا يعتبر!، و انى لازم اوظف قصتها دى فى التوعية بأى طريقة بقى اقدر عليها...
و كانت واخدة الموضوع جد لدرجة انها كانت بتتكلم و كأن فى ناس سمعاها و بتوجهلهم الكلام!!
بدأت كلامها بإنها قالتلي، شغلى اى ريكورد عندك، عايزاكى تسجلي كلامى.
سمعت كلامها من غير ما اعرف هى ناوية على ايه و شغلت تسجيل جنبها و شاورتلها انها تبدأ تتكلم.
قالت: فى الاول بس عاوزة اقول حاجة للرجالة، لما تتجوز اعرف حاجتين مهمين اول حاجة مراتك لو حنينة عليك وعلى اهلك و كويسة مع امك او اختك او اخوك ومع ولادك دي تتشال فوق الراس.
تاني حاجة اذا خلفت ربي مع مراتك عشان ولادك مايطلعوش مش*هين نفسيا لان الست اما بتربي لوحدها في وجود راجل بيصرف عليهم بس، بيطلع عيال مش*هين نفسيا و ام حزينة و المسؤلية عجزتها و فِي نفس الوقت بيهرب الأب لواحدة (رخيصة) تقبل انها تأخذ واحد من علي مراتة اللى هو اهملها و عجزها برمي المسؤلية كلها عليها لوحدها.
ومن هنا نبدأ حكايتي اللى ممكن نحطلها اسم و هو (صائدة الرجل) !!
و مش اَي راجل ده لازم يكون الراجل اللي متجوز و اللي معاه فلوس....
حابة اعرفكم على نفسي بقي انا سولاڤ السورية.
كارولين التونسية
حنان المغربية
نهال السعودية
وكل يوم باسم.
طبعا اللي عمله ابويا في امي و تربية امي لينا لوحدها و كتر المسؤلية عليها و ان ابونا كان وجوده للدفع و الشراء فقط، عقدني و كمان اما جه و بمنتهي البجاحة و قال لها ان الشرع حلل إنّه يتجوز و لما قالتله طيب ليه؟ قالها عشان انتي اهملتيني و ركزتي مع العيال و المشاكل و انا بقيت مش مرتاح..!
ده كان كلامه المزيف و على فكرة انا على طول بدعى عليه ان ربنا ينتقم منه اشد انتقام، مع انه المفروض ابويا اللى كان بيصرف علينا، بس هو فعليآ مكانش اكتر من مجرد ماكينة فلوس، كان وجوده مقتصر على كده و بس.
عايزة اكلمك شوية يا بابا عن امي و اللى هتتفاجئ انها كانت نظيفة و جميلة و جسمها مظبوط و ريحتها حلوة و نعمة انت اللي مجرم، انت عمرك ما جبت ليها برفان او لبس جديد او حتى أديتها فلوس و قولت ليها اشتري اللي نفسك فيه.
انت ظالم عمرك ما إديتها اللي اديته لمراتك التانية و مع ذالك امي كانت على طول مهتمة بنفسها و انت الي سبتها تربينا لوحدها.
عمرك ما كنت متعاون معاها و فِي الاخر جبت الحق عليها برغم انك انت متقتش ربنا فيها بس عادى، ربنا بعد كده دوقك الذل اللى هى شافته على ايدك.
و من هنا بقى بدأ الكره جوايا لكل راجل، كبرت و اشتغلت و شغلت دماغي للرجالة الناقصة اللي بتفكر تبص برا بيتها و تسيب ولادها و مراتتها يتبهدلوا لوحدهم.
و ابتديت أدور علي المتجوز الغني اللي عادتآ بيكون بكرش او اقرع و الاغلب ان الكل ضعيف جنسيآ وعنده مشاكل كتير منيلة بنيلة.
وتبتدي الحكاية مع كل اهبل بس معاه فلوس كأنها صدفة.
(بصيتلى فجأة وقالتلى لو سمحتى يا دكتورة لو هتنشري كلامى ده كتابة يبقى تكتبيه بنفس المصطلحات عشان الرجالة تعرف احنا بنقول عليهم ايه ويعرفوا ان تراب مراته جنه.)
و رجعت تكمل كلامها وهى بتقول: بدأت بقى اجمع معلومات عن الأهبل و اعرف ايه إمكانياته المادية ايه و مكان شغله و بصباص و لا ايه.
كل المعلومات و مشغلة معايا اللي بيجيب كل حاجة عنه و اروح مكان شغله و من هنا الصدفة، دكتور الاسنان بتاع التجمع صاحب ال بي ام في الاربعين سن الهبل بقي.
و اروح و اكشف و بطريقتي الكاذبة الحقيرة و برفاني المثير بيكون من اول جلسة وقع تحت رجلي و شديته لعلاقة نظيفة و غيرها و معلوماتي عن مراته انها دكتورة زيه، جميلة و مهتمة بيه و بنفسها و بأولاده.
طيب انت كده بتخونها ليه؟!! يبقى انت تستاهل اللي عملته فيك.
شديته ليا و كالعادة اتسجلت على موبايله باسم دكتور راجل و كنا بنفضل نتكلم مع بعض واتس و فيس و طبعآ مقابلات كتير و بيصرف عليا فلوس بالهبل للكوافير و اللبس و المكياج والبرفانات و مصروفي الشخصي كمان شهريآ.
و مليون جنيه مهري مقابل الجواز العرفي و كام الف كدا لزوم طلباتي و اتفق معاه علي الجواز العرفي عشان بحبه ومش عايزة اهد بيته و ان انا بضحي عشانه و ننزل نجيب الشبكة و اختار شبكة كبيرة محترمة و شبكة تانية صغيرة و الفواتير بإسم المغفل طبعا.
و اقول ليه ان الشبكة الصغيرة يديها لمراتة الجميلة و يعرفها انه هيسافر اسبوع ويرجع و احجز انا المكان وكل التدابير، و فعلا يروح يدي الشبكة لمراته اللي بتطير من الفرحة و يقول لها على السفرية و انها تبع الشغل و يسافر قبلي بيوم، قذر و يستاهل.
و اروح انا البيت للمدام المخدوعة و اديها الشبكة التانية و المليون جنيه و ما يثبت إنّه قذر و كل هداياه الرخيصة زيه المكياج و البرفانات و ابعت مراته ليه المكان اللي حجزت فيه و انا كلي سعادة لان كل راجل بي**ن تحت اَي مسمي يستاهل.
و جاله جلطة و لله الحمد.
و نفس السيناريو اتعمل مع الطيار بتاع مصر الجديدة، و المحامي المشهور بتاع الدقي، و مدير شركة الألبان المشهورة، و مهندس الد*كور بتاع المهندسين طويل القامة، وصاحب مصنع الاخشاب بتاع مدينة نصر...
و كلهم استخدمت معاهم نفس الطريقة و كلهم من معلوماتي و شهادتهم هما على نفسهم ان مراته بتبقى زي الفل و من تفتيشي للواتس اللي بينهم و بين مراتتهم.
طيب حد يجاوبنى انتو بتخونوهم ليه يا كفرة!!!
نيجي بقي للجزء التاني.
وهو الراجل اللى مراته تستاهل الخيانة زي اللي اصلا مراته بتخونه و اللي مراته مخلياه يقاطع امه و أخواته و عايمة علي فلوسه.
من معلوماتي اللي بجمعها بفريقي، دا بقي كان كل فلوسة ليا انا و مكنتش بقول لنفسي حرام، لان مراته خاينة يبقي هو ضعيف الشخصية و يستاهل اللى هى بتعمله فيه واللى انا بعمله فيه كمان.
و اللي مراته مقوياه علي اهله و ماشي وراها يستاهل اني اذله و أخد فلوسه زي صاحب براند المكياج بتاع اسكندرية.
وصاحب محلات الملابس بتاع المهندسين و صاحب مطاعم السمك فى العجوزة و صاحب محلات الحلويات فى رمسيس.
و زيهم كتير و كل واحد بيكون اصلا في شغله تجاوزات و شمال ف أسهل جدا إنّه ينجذب ليا و بعدها انا بختفي تماما ميعرفش يوصل ليا، بعد ما بكون دمرته و حرقت دمه و علمته الادب.
و استمرت حياتي علي كدا و ربنا كان ساترني جدا و كمان انا كنت بأمن نفسي كويس من غدرهم نسيت احكي عن الرجالة اللي ما وقعتش في شبكتي و كانوا فعلا مخلصين و محترمين و عارفين ربنا و بيتقوا ربنا في بيتهم.
و مشيت حياتي علي كدا ما عنديش اَي ذرة من تأنيب ضمير، و فضلت ماشية بغلي و حقدي تجاه الرجالة الرخيصة اللي بتسيب بيتها و حلالها و يروحو للشهوات و العلاقات الطائرة.
و آخر خطة ليا كانت في اكتوبر، مهندس شاب في أواخر التلاتينيات، رسمت خطتي كويس و عرفت إنّه بيبني مخالف الأدوار المخالفة عرفت علطول إنّه ليه في الشمال والخيانة و طبعآ ماشي مقضيها رشاوي و عينه زايغة علي كل ست تعدى من ادامه على الرغم إنّه بكرش و مش حلو.
عرفت مكان سكنه في الحي الاول و عملت تحرياتى عنه و عرفت إنّه متجوز و عنده ٣ اولاد و مراتة لسة والدة جديد و كان ناقصني بس احدد نوع العملية علي حسب نوع مراته زي ما ذكرت فوق وجمعت معلوماتي عنها و عرفت انها من احسن ما يكون و أخذت قراري و ظهرت ليه بالصدفة كالعادة و سحبته زيه زي كل مرة، شديته ليا جدا و خلصت ظبط نفسي و حددت هعمل اية و معاه كان سهل سهل لابعد الحدود باع بيته و مراتة في لحظة.
و فجاءة ظهرت كورونا و غيرت كل شئ من حوالينا و توقفت توقف بسيط عن نشاطي اشوف ايه اللي هيحصل.
و بدات الكورونا تاخد من حواليا اغلي الناس واحد ورا التانى صغير وكبير و دوقت الم الفراق و الوجع وتراجعت عن كل اللى كنت بعمله.
و كأن الكورونا دي جت مخصوص عشان تقول ليا ربنا موجود، والله وحده ليه حق عقاب عباده و ان الموت قريب و ان في لحظة واحدة بس ممكن حياتك تنقلب.
خوفت، لأول مرة في حياتي اخاف، خوفت اموت و انا على غفلة.
خوفت اهلي و علي بيتي و علي كل الناس اللي عندي حسّيت انها النهاية فقررت أني اتوب و ارجع الي الله و اكفر عن ذنبي اتبرعت و صليت و استغفرت و افتكرت ان ربك بالمرصاد.
افتكرت ابويا اللي قهر امي و سابها و بص برا و اتجوز عليها و قهرها.
افتكرت ان ربنا انتقم منه و من إنّه إتنمرد و إفتري بفلوسه علي امي و ان مراته أخدت منه كل حاجة و جابت ليه المرض و ذلته و فضحته إنّه ضعيف فى علاقتهم ببعض في العائلة كلها.
وان ربنا أخد لينا حقنا بس.
و امي ربنا عوضها بزوج و نعمة الزوج عوضها عن ظلم ابويا و كان حنين علينا بس انا اللي نسيت كل ده و افتكرت الكره بس و الغل لكل راجل.
نسيت احكي إني اتجوزت و اتطلقت و عندي اولاد.
انا أعلنت توبتي الي الله منكم الدعاء ان ربنا يغفر لي و يكفينا شر الوباء.
و نصيحة مني لكل راجل متجوز الست اللي بتلف عليك و انت متجوز مش هتكون بتحبك ابدا انت بالنسبة ليها فلوس بس.
اتقي الله في زوجتك و بيتك و اولادك، و لو مراتك تخينة ساعدها تخس بدل الخيانة و لو مراتك المسؤلية كبيرة عليها خفها عنها بمعاملتك الطيبة.
اتقي الله في زوجتك.
وأدعو ربنا يديني العمر إني اعمل حج وربنا يسامحني..
لما سكتت عن الكلام سألتها و انا مستغربة: طيب انتى كده فى قمة عقلك و اتزانك يعنى انتى مش محتاجة ليا خالص ولا لاى طبيب نفسي، حتى طريقتك فى بداية حوارك معايا متتفقش ابدآ مع كل العقل اللى لاحظته منك فى نهاية حكايتك.
قالت بهدوء مختلف عن طريقتها من اول ما شوفتها، و كإنها كانت شايلة جبل على قلبها و خلاص انزاح بمجرد انها حكت و فضفضت عن اللى جواها: مانا من البداية قولتلك انى مجيتش عشان محتاجة استشارة طبية او مساعدة، انا جيت عشان اوصل كل اللى حصل معايا من خلالك لكل الناس، و ياريت بجد لو متطنشيش رغبتى دى و تعملى اللى تقدري عليه ان حكايتى توصل و تتعرف، يمكن تبقى سبب ان رجالة كتير تفوق لنفسها...
ابتسمتلها و انا بدعيلها بصلاح حالها و بوعدها انى اشوف هقدر ازاى انشر قصتها و اكيد لو فى اى طريقة لكده مش هتأخر ابدآ عنها...
- Writer
