رواية إحكيلي

الفصل ٥

بمجرد ما قعدت ادامى على الكرسي قالتلى بصوت عميق شوية: شوفى، يمكن احداث حكايتى تكون عدت عليكى كتير قبل كده او موجودة عموما فى الدنيا، لكن بالتفاصيل اللى انا عيشتها دى مستحيل تلاقي حد شاف كل ده، انا هحكيلك حكايتى عشان ما لقيتش اللى احكيله بالشكل اللى انا محتاجاه معاكى هنا، هحكيلك و مش طالبه منك تعالجينى مثلا، انا كل اللى طلباه منك تسمعينى و تفهمينى كويس و بعد كده تدعيلي ان ربنا يقوينى و اقدر اكمل و اقدر اربي ولادى. حكايتى بتدأ من ٧ سنين، عشان انا متجوزة من 7 سنين و عندي بنتين اكبرهم 6 سنين، جوزي من قبل ما نتجوز و هو مش بيقولي غير اني راجل بحب التعدد و لازم في يوم من الايام اتجوز عليكي علشان انا عندي فرط في الرغبة و مافيش واحدة بس تتحملني و انتي قاعدة على طول بالبنات مش على طول فاضية ليا و انا عايز واحدة متفرغة ليا و بس و في نفس الوقت عايز زوجة حلوة و اطفال و بيت محترم طبعا الموضوع ده أثر فيا جدا و دايما حاسة انه هي**ني و هيتجوز عليا و اني ماليش قيمة عنده و فعلا عملها و لقيته اتجوز عليا.

و حسيت من كتر ما كان بيسيبني و يبات عندها و يقولي باتي عند اهلك ساعتها بس عرفت و اتاكدت انه حقق رغبته و اتجوز عليا و من ورايا كمان.

ذلني كتير و كرهني كتير و كرهني في العيشة معاه لدرجة اني حسيت ان كل الرجالة كده

عايزين زوجة للعلاقة و بس بجد كان على طول عايزني و كنت بوفرله نفسي كتير طبعا مع ضغط المدرسة و الشغل و اي ست فى الدنيا هتفهمني.

من كتر ما بقيت فى وحدة و فراغ غلطت و كلمت راجل والله كان كل اللي بيني و بينه أسئلة عن أن ليه جوزي كده و ان ليه هو جنسي اوي و كده و ليه حاسة انه متجوز عليا و علاقة مالهاش اي لزوم اصلا.

جوزي عرف انى بكلم الراجل ده و اتخانقنا و طردني من الشقة انا و البنات و جاب مراته التانية اللى اتجوزها عليا تعيش في بيتي و اهاني و رماني و **رني كل ده عشان كلمت واحد تانى و كان مجرد كلام عنه.

طيب ما انت السبب اللي خلتني اكلم واحد عليك علشان انت اهملتني و خونتني و رمتني و كتير كنت بتقولي ببات بره و انا انام معيطة حتي التليفون ماكنتش بترد عليا ليه دلوقتي الآية اتقلبت ليه بقيت انا اللي وحشة و استاهل اترمي و اتهان حتي بناته مش فارقين معاه و طلقني و مش عايز يصرف علينا و قلب كل الناس عليا حتي اهلي مش واقفين جنبي و رمونى في الشارع انا و عيالي و مش بيعبرني بجد حسبي الله ونعم الوكيل في كل راجل بيفكر في نفسه و بس و بي**ن و مش عايز يشرب من نفس الكأس انا فرحانة انه شك فيا و انه افتكرتني خاينة زيه، فرحانة انه شرب من نفس الكأس اللي سقهولي سنين

ربنا ينتقم من كل راجل خاين و اعرف ان الدنيا دوارة و كما تدين تدان و هيحصل فيك زي ما عملت و اكتر مجتمع ظالم و ناس ظالمة اوى

نسيت اقولك يا دكتورة انه كان بيزني كتييير قبل ما يتجوز عليا و باعترافات منه بعد الطلاق و انه كان بيعمل حرام كتير و قال خلاص اعمل حلال.. ماقولتش كمان اني قعدت سنة بتحايل عليه يقولي هو متجوز ولا لا و ماكنش بيقول ابدا و لا عمره صارحني و علي فكرة كنت هقبل لكن اهماله حتي لاحساسي لحد ما عرفت بالصدفة و اتاكدت من السجل المدني انه متجوز رسمي و خلال الفترة دي و قبل ما اكلم حد و لا اعمل اي حاجة كنت بطلب منه الانفصال و الطلاق كتير و كان بيرفض تماما و هو علي فكرة ماشافش الكلام الي بيني و بين الشخص التاني ده هو شاف كلمة واحدة بس منه ليا و عليها عمل الفيلم ده كله علشان اطلع انا اللي غلطانة و يقلب الترابيزة.... لا هو اللي غلطان هو اللي خان كتير و اكيد مع ستات متجوزة علشان كده ربنا ردهاله بس انا محترمة اللي عملته مش اكتر من كلام و هبل و اللي كلمته ده علي فكرة قريبي يعني اعرفه مش واحد غريب و اتعرفت عليه كنت بكلمه كاخ علشان يوعيني لانه اصلا دكتور و كنت بستشيره.

حاجة كمان انا أصغر من ٣٠ سنة و لما اتجوزته كنت صغيرة و ماكنتش عمري اتخيل انه ممكن يتجوز عليا ما استوعبتهاش و كمان انا ماعرفتش منه لو كان قالي والله والله والله كنت هقبل اعيش و هو عنده زوجة تانية اللي خلاني اتكلم مع غيره لانه ماكنش معايا اصلا ولا كان بيعرف عني اي حاجة ولا عن بناته و كمان كان كل ما بيجي البيت بيبقى عايزنى لغرض معين و بس و اكيد فهمتينى يا دكتورة.

و ده اللي مرضني نفسيا اصلا و خلاني اتصرف التصرف ده و عارفة انه غلط بس انا كتير كتيييير طلبت منه الانفصال و كان بيرفض

اللى حصل بعد كده بقى كان مفاجئة، كان ع** توقعي و توقع اى حد حضر مشكلتنا من بدايتها و شاف قد ايه هو ما صدق يرمينى بالخيانة و يطلعنى فى اسوأ صورة.

اصل حضرته بعد كده رجعني و ده حصل بعد محايلات كتير منه.

فجأة رجع يعيط و يقول توبت و عمري ما هعمل حاجة تزعلك تاني و لا هيحصل اي مشاكل ابدا و هجيبلك و هعملك و كل طلباتك مجابة.

اولا الشخصية اللي بتكلم عليها ده عنده اضطرابات في الشخصية النرجسية بني ادم اناني لاقصي اقصي درجة لدرجة انه حولنى انا كمان لمريضة نفسيآ و ان اختلف نوع المرض النفسي عنه.

و كان زى اى شخصية نرجسية ليه تلت مراحل في علاقته معايا اول مرحلة و دي مرحلة الحب اللي بصورة مش طبيعية يحسسك انك في الجنة، و ان مفيش حياة ممكن تكون اسعد من كده.

تاني مرحلة الاهمال الفظيع و الترك و بشكل مفاجئ يخليكى متصدقيش اصلا انه اتحول للشخص ده.

تالت مرحلة انه يحاول يرجعك باي طريقة ايا كانت حتي لو هيبوس علي رجلك

يعنى بمعنى اصح بيرجع تانى لصورته و نسخته قبل الجواز لما كان بيقول انه عايز يتجوز عليا اولا كن كتبنا الكتاب و كنت مخدوعة في حبه ف خلاص بحب واحد و مكتوب كتابي عليه و مجهزين كل حاجة مش بالسهولة اني اسيبه و كنت برد عليه اقوله هطلق منك لما تتجوز عليا

المهم علشان بس احنا في مجتمع ظالم جدا فوق الوصف احب اقولك ان من ضغط المجتمع ليا اني مطلقة و الظروف اللي بتتوجه لاي واحدة مطلقة يا تبقي زوجة تانية يا نظرة المجتمع ليها انها مش كويسة و خلاص اول ما جاتلي فرصة اني ارجعله رجعتله و اتنازلت عن كل حقوقي قصاد دموعه الغزيرة و بوس ايدي و رجلي قدام اهلي و قد ايه مش عارف يعيش من غيري و اد ايه بيغير عليا و اد ايه صعبان عليه انه يسيبني مطلقة في السن ده بالبنات و اسرتي و مقدرش اتخلي عنها تعالي نرجع و انا ساعتها كنت رافعة عليه قضايا فقالى اتنازلي عن القضايا و هجيبلك احلي شقة و احلي عربية و و من وعود زائفة قصاد ضغط اهلي اللي كنت ارفع معاهم القضايا و يورحوا من ورايا يقولوله رجعهم مش عارفين يعيشوا من غيرك رجعهم منين بترفعوا معايا القضايا و منين بتقولوله رجعهم مكانوش واقفين معايا للاخخر و مكانوش عايزين ابقي مطلقة و اهو نرتاح منها و تعيش معاه حلو حلو وحش هي اللي تشيل و خلاص

رجعني طيب رجعتني ليه و لما رجعت في وجود التانية اللي اتجوزها من ورايا و اصلا واحدة مش بتخلف هو متجوزها عشان الغرض اللى لمحت عليه قبل كده و بس و كان بيجي يحكيلي انتي اصل على طول مشغولة و هى لا هي علطول متاحة.

انتي العيال بيتعبوكي بتصعبي عليا اطلبك في اخر اليوم علشان العيال بيتعبوكي طول اليوم هي معندهاش عيال فعايش معاها براحتي و هناك مفيش لا مسئولية و لا عيال و لا وجع دماغ.

تخيلي بقي انا احس بايه لما يتقالي كلام زي ده!!

و بيقولى ببجاحه انا كنت بظلم بينكم في عدد الايام اللى بقعدها عندها و عندك..

بس انا بقى قصاد ده كله دعيت ربنا ينورلي بصيرتي كنت الاقيه قاعد جنبي و بيكلم بنات بالهبل و بيوعدهم بالجواز و يجي يقولي و يكلم ستات متجوزة و يصاحبهم و عملت حاجة كده بقيت اعرف الارقام اللي بيكلمها يعني مش مكفيه اتنين في حياته و لا هو اصلا مكفيهم و لا مكفي البيت اللي فيه عيال لا كمان كان بيلاقي وقت يخرج مع ستات و يشرب بيرة و اتفاجئ من الصور الاقي خمرة في تلاجة بيته مع التانية و يقولها يا احلي ست بتسكر في الدنيا و هي تقوله ده انا ما صدقت افوق علشان اصلي!!

ايه بقي كم الفجور ده كله و متقوليش رجعتيله ليه تانى، عشان انا رجعتله مش حبآ فيه و لا عشان مبسوطة معاه انا رجعت من كتر الارف اللي شوفته لما كنت متطلقة من اهل ل ناس لاي حد حلو كده لما ارجع لواحد اقل ما يقال عليه انه غير سوي و لا يفقه في دينه شئ و احلي حاجة يقولي انا بقيت ماشي اقول لصحابي انا حاسس ان انا صغير و نفسي في واحدة تالتة علشان محسش بالخنقة كم ظلم و قهر شفتهم و اصحي الفجر الاقيه بيكلم ستات في كلام زفت و لما رجعت بقي و مكنتش اعرف حاجة عنه حكالي انه بطل زنا من ساعة ما اتجوزها بس و انه من يوم ما اتجوزني و هو كان بيزني و ساعات كتير مع اكتر من ست في وقت واحد حاجات كتير مكنتش اعرفها عنه ابدا ابدا كنت يا دوب بخلف و برضع و بس

المهم فضلت احوش في سكرينات و في قفشات كتير قفشته بيعملها و كنت ارد اقوله هات واحدة من اللي بتصاحبهم دول و عيشها مكاني يومين بس و شوف هتستحمل ولا لا و كمان كان بيصاحب صحبات مراته التانية دي و انا بتف*ج و اقوله لما هي تعرف انك مصاحب عليها البنات اللي تحتها في الشغل هتعمل ايه يقولي عادي دي بتقولي اجيبلك يا حبيبي اى بنت تختارها تحت امرك اقول يا نهار اسود دول مجانين طيب انا ايه اللي مخليني وسطهم كل ده علشان اربي بناتي و معرفش اصرف منين

مريض و كان يقعد يعيطلي و يقولي انتي زي اختي و امي و مقدرش استغني عنك اوعي تسيبيني و انا عارفة ان كل ده تمثيل و هبل و اعدي و اصبر و استني بس هل ربنا قالنا نصبر علي التهلكة جيت في مرة كان بيكلم واحدة متجوزة علي واتساب قفشته و وقفت الوقفة بقي اللي قلت هتجيب من الاخر قولتله مفيش بيات عندي تاني و تطلقني بالمعروف و تديني حقوقي اللي ربنا قال عليها و ابعد عني تماما عيالك هتشوفهم و تصرف عليهم و انا ملكش دعوة بيا طبعا عياط و مقدرش اسيبك و كلام اهبل و بقالي علي الحال ده تسع شهور معلقة لا اهل عايزني ابقي مطلقة و لا بخلعه علشان محتاجة الفلوس اللى بيصرفها علينا و اللى لو اتطلقت هيمنعها عننا و لا عارفة اعمل اي حاجة

بقيت زى المجنونه بكلم نفسي، بصرخ و بقول عاجبكم كده يا اهلي اللي مش عايزين تشوفوا بنتكم متطلقة حلو يا مجتمع ياللي بتدوس علي كل ست مطلقة و تجبرها تعيش اوحش عيشة، حلو لما كنت بطلب منه الطلاق زمان و مكنش بيرضي و اقوله حاسة انك متجوز عليا ميقولش اروح اكلم كل الناس و امشي اكلم نفسي و في الاخر اطلع انا اللي غلطانة و خاينة

جميل كده عيشتي دي مرمية و لا ليا راجل يصوني و لا يحافظ عليا و في نفس الوقت هو عايش حياته و زمانه بيدور علي التالتة يتجوزها ان مكنش اتجوز اصلا و انا معرفش لا عارفة اتطلق لانه مش راضي و لا عاوزة اخلع لاني هخسر كل فلوسي و مشوفتش من حد وقوف جنبي لما اتطلقت و ده اللي خلاني ارجعله كارهة عيشتي و كارهة حياتي مبقتش بهتم بالبنات ابدا ماليش نفس من الحياة كلها و بتعذب باهمالى ليهم عشان عارفه انهم مالهمش اى ذنب فى كل اللى بيحصل من ابوهم ده اللى ميستحقش يكون ابوهم.

ضحك عليا و قولت هبدأ حياة جديدة و مش مشكلة متجوز اهو يعف نفسه مادام دي الحاجة اللي هتريحه اقبل بيها و اهو علشان بناتي قبلت راح الاقيه بيدور علي الجوازة التالتة و علي الخيانة و علي الخروجات و البيرة و الخمرة!!

ده طبيعي!

طيب اني ادفن نفسي بالحيا علشان بس مبقاش مطلقة علشان لو اتطلقت و جيت اتجوز تاني ياخد مني البنات خلاص مش حيلتي غيرهم. اصلا.

مضطرة افضل مربوطة ب بني ادم مريض علشان يصرف علي بناتي لاني هضطر ارفع قضايا و ارف و تعب و محدش واقف جنبي و خلع مش نافع مؤخري كبير هينفعني علشان لو مصرفش اصرف منه ربنا ميرضاش بكده و انا تعبت والله و مافيش اي حد عايز يتدخل هو طبعا مانع اهله تماما من التدخل و للاسف مالوش كبير و اهلي اقل كلمة اقدر اقولها راميني في التهلكة و اللي تعرفي تعمليه اعمليه لوحدك متعرفيش عيشي كده و خلاص تعبت و بتمني الموت كل يوم و مفيش حل جربت الطلاق اتبهدلت رجعتله اذاني اكتر بكتير من الاول و اديني عايشة في وجع كل يوم و قهر

**و متفكريش تقوليلي يا دكتورة انه بيحاول يردلي اللي حصل مني لانه هو اللي جالي و باس علي ايدي و رجلي يرجعني قدام اهلي و قال هيتغير لكن هو طبعه كده بتاع ستات و مفيش حد بيكفيه و لو هتقولي شوفي فيكي ايه هقولك و التانية برضو مش مكفياه ما خاني انا و هي يبقي العيب فيه مش في حد تانى

انا لا عارفه ارتاح و لا عارفه اخد قرار و لا عارفة اتأقلم على انى اعيش مع راجل خاين و مش بيفكر فى اخرته ولا فى ربنا و لا خايف على بناته ان يترد فيهم اى حاجة من اللى بيعمله ده..

و لا حتى خايف يجيله مرض فى ثانية يدمره و يدمرنى معاه و عيالى ميلاقوش حد يربيهم لا اب و لا ام، انا الألم و الوجع بينهش فيا نهش، بفكر كتير و كل الافكار بتوجعنى و بتموتنى يوم عن يوم....

مش مستنية منك حل عشان عارفه ان مفيش حل، بس ممكن تدعيلي؟

رديت عليها و قولتلها: و ليه شايفه ان مفيش حل؟!، ليه مستسلمه اوى كده!!

ليه مش بتفكرى بشكل ايجابي لو مرة واحدة، بقالك ٧ سنين بتعانى و مش شايفه نفسك غير بعين الضعف و العجز و قلة الحيلة، ليه مستسلمه لـ اللقمة اللى بيرميهالك انتى و ولادك، لدرجة انك عشان اللقمة دى مستغنية عن نفسك وعن سلامك النفسي وعن تربية بناتك فى جو نضيف و هادى!!

انتى قولتى وانتى بتحكيلي لما لاقيتيهم عايشين على شرب الخمرة و الكلام السافل الغريب عليكى و على تربيتك و اخلاقك، ساعتها قولتى انا بعمل ايه فى وسط الناس دى..

انتى فعلا بتعملى ايه فى وسط الناس دى؟!!!

كل ده مهانه ومذلة عشان بيصرف عليكم!، بس!، يعنى و لا اى ميزة تانية او سبب تانى!!..

اسمحيلي اقولك ان انتى اللى غلطانة و انتى اللى ضيعتى نفسك بنفسك..

مهما كان اللى شوفتيه بعد الطلاق منه كان وضع وعيشتيه و خلاص و بدأتى فيه، يبقى اكبر غلط انك ترجعى تانى و النتيجة هتبقى طلاق برضو فى الاخر، يبقى ليه تعيشي فترة الوجع مرتين!، ليه تعيشي شعور التأقلم على الطلاق مرتين!

حاجة كمان مستغرباكى فيها اوى، انتى ليه مبتيأسيش و تثوري و تفكرى فى حل ينقذك غير لما بتعرفي انه اتجوز او ناوى يتجوز!!

يعنى انتى بالنسبة ليكى عادى يزنى ويغضب ربه و يعمل كل حاجة غلط، بس لما يتجوز هنا بقى تعملى وقفة!!

ردت وقالت: مش بفكر كده ولا قصدى كده اكيد، الموضوع كله انى طول الوقت بيبقى عندى امل يبطل تصرفاته و جنونه ده، بس كل فترة بيثبتلى ان اللى فى داء عمره ما بيقدر يتخلص منه، و بيفضل اللى عايش معاه بيعانى و بس، و انا دلوقتى معملتش اكتر من انى طلبت الطلاق، و مرتاحه انه مبيطلقش و باعد عنى و بيبعت مصاريفنا وبس، بس انا عارفه ان الوضع ده مش هيستمر كتير...

انا عايزة منك بس تدعيلي من قلبك، و تكتبيلي على برشام بيوقف التفكير، انا نفسي ابطل تفكير...

ابتسمت بحزن و انا بقولها: يا ريت المشاكل بتتحل كده، كنا كلنا خدنا برشام يوقف التفكير و خلاص كده، انتى محتاجة مش انك توقفى تفكير، لا بالع**، انتى محتاجة انط لما تيجي تفكري، تفكري صح، هو ده الحل الوحيد ليكى و لمشكلتك..

سألتى وهى مش فاهمه: ازاى!

قولتلها: يعنى لازم تبطلى تفكري فى اللى هو بيقدمهولك، و تبطلي تفكري فى يا ترى مين يقدر يساعدنى لو خدت خطوة الطلاق، و انى لا مش هتطلق عشان اهلى ضد طلاقي و لو اتطلقت مش هيساعدونى انا وعيالي، كل ده طريقة تفكير غلط مليون فى المية، انتى محتاجة تحطى نفسك فى الصورة شوية و تبطلى تفكرى فى مساعدات اللى حواليكى، ما تدوري على شغل و حطى رجلك فى اى شغل بأى مرتب يخليكى تبدئي تشوفى الدنيا بشكل مختلف لما تكتشفي فى نفسك انك تقدري تعتمدى على نفسك و بس و مش محتاجة لاى حد فى الدنيا.

و دى نصيحتى لكل ست تتشابه قصتها بالقصة دى او حتى تختلف عنها، بس طالما اللى رابطك بالراجل اللى عامل فيكى كل ده هو المصاريف فقط، يبقى ساعتها متروحيش تدوري على اللى حواليكى و على حاجتك ليه و انك مش هتعرفي تسيبيه عشان هو اللى بيصرف، لازم وقتها تفكري فى نفسك و بس، لازم تبدئي تدورى جواكى و تشوفى انتى تقدري تساعدى نفسك ازاى، و اول ما تلاقي الطريق، متتأخريش لحظة واحدة انك تمشي فى خطتك فورآ، و تتخلصي من قيود راجل لا يحتمل لمجرد انه بيصرف و بس!!