رواية إحكيلي

الفصل ٩

ممكن متعتبريش اى كلام هقوله على انى مريضة نفسية؟، يعنى اعتبريهم كلمتين فضفصفه ما لقيتش حد يسمعهم، فجيت هنا عشان الاقي اللى يسمعنى من غير ما يظن فيا او يتهمنى انا و يقلب الترابيزة عليا و بدل ما الاقى طبطبة و مساعدة الاقى اللى بيزود عليا الهم، و كمان بس نفسى اسمع رأيك بحيادية أو حتى اسمع منك حاجه تبرد نارى.

قوليلي يا دكتورة، هو الراجل اللى يقاطع مراته بشكل كامل سنتين و هو فى بلد و هى فى بلد بسبب مشاكل ماديه بس قبل المشاكل الماديه هو اصلا كان هاجرنى من اكتر من ست سنين من غير أسباب واضحه غير أنه كل شويه يعرف ست و مشاكلي معاها مبتخلصش ابدآ.

المهم انا كنت واخده منه مبلغ مالى و حاولت اعمل مشروع و اتنصب عليا فى المبلغ ده و هو من ساعتها مقاطعنى تمامآ لغاية ما اردله الفلوس ما يعرفش اى حاجه عنى لا بيكلمنى و لا يعرف أخبارى و لا يعرف بعمل ايه و لا عايشه ازاى و كل فتره يبعت للولاد فلوس لطلباتهم و كتر الف خيره انه بيعمل كده و بقولها بجد بس اقسم بالله هو من قبل الخلاف المادى و هو هاجرنى من غير سبب واضح غير أنه زاهد فى علاقته الزوجيه بيا، يعتبر احنا منفصلين من ٧ سنين و فى خلال السبع سنين كل شويه اعرف انه عارف واحده و مجال شغله كطبيب مسهله انه يعرف ستات.

كان متجوزنى بيض*ب بيا المثل فى الأخلاق و الجمال و التربيه انا بقيت شبح بقيت وحشه فى كل حاجه ما عدتش فيا حاجه حلوه لا شكل و لا نفسيه و لا اى حاجه انا بقيت فعلا اتكره و ماستاهلش اصلا ان راجل يبصلى هو خلاص عنده حق ينفر منى كفايه انى ضيعت منه مبلغ كبير بسبب تهورى انا معترفه انى غلطانه بس انا لما خدت الفلوس دى كان نفسى يبقى ليا كيان و اشتغل و انجح و استغنى عنه و كمان يشوفنى ناجحه مش م**وره و فاشله لكن حسبى الله ونعم الوكيل فى اللى نصبوا عليا فى الفلوس و زودوا البلة طين معاه.

انا مش عارفه بقول كده ليه بس هو الراجل اللى يعيش فى بلد و مراته فى بلد و ما يعرفش عنها اى حااااااجه و هى لسه على ذمته ايا كان السبب ده حلال!!

انا خلاص اتدمرت و كرهت نفسى بحاول طول الوقت اشغل نفسى بولادى و بحاول اعمل اى حاجه ترفعنى تانى بس مش عارفة.

و اقسم بالله بقاله اكتر من سنه ما سمعش صوتى حتى الحواله بتاع الفلوس بيبعتها الصوره من الولاد و اروح استلمها.

مع انى وعدته ان فلوسه فى ذمتى انا ليا ورث بس الدنيا واقفه من ساعة الكورونا و ان شاء الله اخد ورثى قريب و اعرف اسددله فلوسه كلها.

انا اترجيته ما يتخلاش عنى على ما الازمه اللى انا فيها تعدى و اترجيته يسامحنى لدرجة قولتله اعتبرنى جالى كانسر و صرفتهم عليا بس انا هرجعهمله والله هرجعهمله بس احنا عندنا بيت قديم لما يتباع هيجيب سعر كويس و هردله فلوسه بس انا كرهته كرهت اللى هو وصلنى ليه انا فى قهر و ظلم و هجر و خيانة من ٧ سنين و اذا حصل طلاق هيبقى السبب انى ضيعت من فلوسه ١٠٠ الف جنيه مع انه معاه والله فلوس بس هو ما صدق مسك عليا غلطه علشان اطلع انا اللى وحشه بعد كل الى استحملته معاه.

انا مرعوبه من اليوم الى هاينزل فيه و يفضحنى بالفلوس دى قدام كل الناس و تبقى هى السبب فى الطلاق، اهلى عرفوا كل حاجه بس مافيش فى ايديهم يساعدونى و طبعا هما كمان مغلطنى انا سمعت كلام لوم و تهزيق ما يستحملوش بشر بس مضطره استحمل علشان انا اللى غلطانه..

للاسف ماليش عين حتى ادافع عن نفسى بس اى حد مهما كان شاطر ممكن يتنصب عليه محدش معصوم من الغلط ربنا هو اللى بيسترها مع الكل.

انا فعلا مش عارفه انا جيت ليه و بحكي الكلام ده ليه بس انا حرفيا بموت كل وتعبت تعبت.

نفسى ارجع تانى كويسه نفسى اخد ورثى و اردله فلوسه و انا اللى اطلب الطلاق و ارد كرامتى المتهانة.

انا الحمد لله شخصيه محبوبه من كل الناس و الكل دلوقتى ملاحظ انى انطفيت و بقيت واحده تانيه و دايما القريبين ليا يقولولى خليكى قويه اجمدى هو ده سهل طيب انا مش عارفه انا عايزه ابقى كويسه ده كل اللى بتمناه من ربنا نفسى انام مش معيطه نفسى انام و انا مش خايفه من نزول جوزى انا ساعات بتمنى الموت و بستحرم علشان ولادولاد

انا عايزة اصارحك يا دكتورة بالطريقة اللى خدت بيها الفلوس، لان هى دى سبب خوفى من نزوله و فضيحته ليا و طلاقي كمان.

هو كان عامل جمعيه و انا اللى قبضتها و بجلد نفسى بالشكل ده لانى خدت الفلوس من وراه على أمل كان المشروع هي**ب و ارجعهم من غير ما يحس لا كان قصدى اسرقه و لا اضيعهم بس ربنا أراد ان يتنصب عليا فيهم و هقولك اتنصب عليا ازاى علشان لو قدرتي تنقذي حد من انه يقع فى الفخ اللى انا وقعت فيه و تخلى حد تانى على وشك المصيبة يخلي باله.

دول عصابه وهميه بتقودها ست عامله زى الشيطان اقنعتتنى انها بتشغل الفلوس و طبعا اتعرفت عليها من على الزفت النت و خدوا منى ال ١٠٠ الف جنيه على اساس هيرجعوهم ١٣٠ الف بعد تلات شهور و معاهم بطاقات مزوره و كنت واخده كل الضمانات و جم فى يوم هددونى بسكينه و خدوا الوصولات و صور البطايق المزوره و اختفوا كأنهم فص ملح و داب و اقسم بالله ده اللى حصل و لما امى و اخواتى عرفوا حاولنا ندور عليهم ما وصلناش لحاجه و حاولت أبلغ قالولى هاتى خيط واحد يوصلنا ليهم مافيش كل حاجه اختفت كل حاجه اتمسحت من الوجود لدرجة انى شكيت انهم كانوا مش موجودين اصلا.

يوم ما جولى هددونى انا تبولت على روحى من الخوف مش بقول تعبير مجازى ده بجد كانت جايه و معاها راجل و هددونى يدبحونى انا و ولادى لا من شاف و لا من درى و مسكت موبايلى مسحت كل حاجه عليه فى ثانيه و الاكونت اتقفل و اختفى هى قصه زى الافلام بس ده اللى حصل.

انا بكلم ربنا و بقوله انا عارفه انى غلطت و استاهل العقاب بس انا فعلا ماكنش قصدى اخدهم هو قالى خليهم معاكى على ما ارجع و كان المفروض يرجع بعد ٤ شهور لان مالوش حساب فى البنك هنا فاتح حساب هناك فى البلد اللى مقيم فيها.

و برضو اقسم بالله هاجرنى من قبل المشكله دى بخمس سنين هو اللى خلانى مشوشه و مش عارفه افكر و حاولت اتطلق كتير كان كلام اهلى ولادك و عيشى علشانهم.

الكل نسى انى انسانه و ان الضغط النفسى و الوحده بيدمروها انا بنت ناس مش واحده اى كلام علشان اسرقه و طالعه من بيت محترم جدا بس هو القدر اللى عمل فيا كده..

و هجره ليا كان حجته فيها انه زهد العلاقه الزوجيه مع انى فى الوقت ده كنت بشوف رسايل حب على موبايله و اخر اجازه من سنتين قبل موقف الفلوس قالى انا فعلا ما عدتش بحب العلاقه و كل ما ابصلك ازهدها اكتر انتى ماشوفتيش انتى بقيتى عامله ازاى لانى فعلا تخنت بقيت ١١٠ كيلو بس من نفسيتى التعبانة و اللى بقت زى الزفت و قالى انا لما ببصلك بتأذى نفسيا من شكلك.

و انا والله كنت متجوزه بنت جميله بجد مش بقول كده على نفسى بس دى حقيقه و هو اللى اختارنى و حبنى قبل الجواز انا معترفه انى أهملت فى نفسى بس من أهماله ليا.

ممكن يكون ده ضعف منى بس انا الوحده و الاحتياج لحب جوزى اللى مش لاقياه دمرونى انا لو واحده وحشه كنت غلطت لكن خوفى من ربنا و تربية اهلى حمونى و بقيت احط همى فى الاكل.

انا برضو مش وحشه اوى هو لو بيحبنى كان شاف الحلو فيا انا ست بيت ممتازه و متربيه كويس و محترمه و يمكن لو لاقيت دعم نفسى من جوزى ماكنتش وصلت لده كله..

انا عايزه استغنى عنه انا عايزه ابقى كويسه نفسى اسدد فلوسه و ارتاح...

نفسى كل راجل بيهجر مراته و بيعاملها وحش يعرف انه بيدمرها

نفسي اقول لكل راجل مراتك ورده اسقيها هاتلاقيها فتحت و زهزهت، طيب جرب انك تهملها هتموت.

و على فكره فى ستات غيرى فى نفس ظروفى بيستسهلوا الخيانه و بيخلوا اللى حصلهم مبرر..

انا طولت عليكم مش طالبه منكم غير تدعولى بالله عليكم محدش يغلط فيا أو يهزقنى و على فكره انا بدأت فى شغل جديد ادعولى ربنا يوفقنى فيه يمكن اعرف ارجع كويسه زى الاول و على فكره برضو، اعتقد انه مايعرفش انى بشتغل اصلا بس بجد هو كده راجل؟؟؟؟؟؟؟

و لا انا اللى مش ست و شخصية منفرة و بأذي اللى يشوفنى و يبصلى زى ما هو قالي!!

انا عايزة ارتاح، عايزة اعرف انا ايه، انا كويسة و لا وحشة، انا استاهل كل ده طيب؟!

و لو انا ماستاهلش ليه بيحصل فيا كده؟

اقولك على حاجة، انا مش عايزاكى تجاوبينى على اى حاجة، انا مش عايزاكى تعتبرينى جيت هنا خالص، انسي انى جيت او شوفتينى او حصل بينا اى كلام...

"""""""""""

و فجأة قامت و مشيت و حاولت معاها كتير انها تستنى و نتكلم مع بعض يمكن نوصل لحل، بس رفضت اى محاولة للكلام او المناقشة، كل اللى قالتهولى و انا بحاول معاها تستنى، انها قالتلى ادعيلي ربنا يصلح حالى و يسهل امورى و يمكن ساعتها اجيلك افرحك انى حياتى اتحسنت و انى سديت فلوسه قبل ما يفضحنى و يطلقنى و يطلع عليا انى حرامية، ادعيلي الحق احل مشكلتى قبل ما تدمرنى اكتر مانا متدمرة و تقضي عليا خالص...

فتحت الباب و خرجت بهدوء بعد ما رفضت اى محاولات منى انها تستنى و تسمع رأيي حتى!!