رواية إحكيلي

الفصل ١٩

دى حالات بقى قابلتها بشكل شخصي و بعيد عن العيادة و حابة احكيلكم عنهم.

و حابة اللى يشوفهم يكونوا خاصة الرجاله.

دي عينه من سيدات بقا**هم كل يوم بحكم شغلي و صداقاتي كدكتورة امراض نفسية و عصبية.

ام دايخه بابنها و بنتها على دكاترة امراض نفسيه و عصبيه، الابن كبير بيعمل براز لا ارادي مش تبول لا براز و لما سالتها فى مشاكل مع باباه عرفت انه عنيف جدا بيض*بها امام ولاده بتوصل للنزف، معندوش رحمه و الاولاد متدمرين نفسيا مبقوش يصلحوا للحياه خالص و الام لا عائل لها و مش معاها شهاده تشتغل بيها،

حالة تانية تبقى ام لتلت بنات بتعمل تحاليل عشان داخله تجهض لانها عرفت انها حامل فى بنت و جوزها هددها لو حملت في بنت هيطلقها و هى لما عرفت انها بنت بقت خايفة منه و رميها فى الشارع هي و بناتها و رايحه تقتل روح حرم الله قتلها عشان كائن مكتوب فى بطاقته ذكر و فى النهايه الحمدلله وقفت جمبها عشان ماتجهضش نفسها بس طلقها برضو و فعلا رماها هى و بناتها اللى هما بناته برضو

و اتجوز عشان يجيب الولد و الحمدلله هى لقت شغل و بتربي بناتها فى رضا الله.

برضو حاله لام عايزة تعرف عمر البيبي عشان تجهضه قبل الاربعين يوم لان حالتهم الماديه متسمحش و هي شايله البيت و الزوج مدمن و مش مهم ممكن تموت فى العمليه و لا لا، بس الزوج مش راضي بالبيبي و مش عاوزه و مش عايز يشتغل و يصرف عليه و هي لا حول لها و لا قوه.

و حاله لست هاريه نفسها تحاليل عشان اهل جوزها نازلين عليها زن عشان عايزينها تحمل و البيه جوزها مش مكلف نفسه يعمل تحليل بسيط عشان نتاكد من قدرته الانجابيه و لا لا، مسكتبر يعمل تحليل و سايبها تتحمل اللوم و اللف على الدكاتره و هي مش قادره تقنعه انه يحلل لان دا فيه شك فى رجولته طبعاااا.

و حالة لست اتاكدت من عدم قدره زوجها على الانجاب اتحايلت على طبيب معمل التحاليل انه يقول لجوزها غير كدا، و يقوله ان العيب فيها هى، و قبلت على نفسها كل الذل من اهله لمجرد انها بتحبه و مش عايزه ت**ره و تزعله.

و زوجه رايحة معمل التحاليل وارمه و متخرشمه بتعمل تحليل سكر برضو بتقول لطبيب المعمل طلعهولي عندي سكر لان جوزي مش هيبطل ض*ب فيا غير لما يعرف اني مريضه لانه بيشرب خمره و انا برضو مقدرش اتطلق عشان الولاد ، ناهيك بقي على كميه البنات الحوامل 15,16,17 سنه فجأه بنت طفله بقي عندها اطفال متعرفش تربي متعرفش يعني ايه مسئوليه و بيت اهم حاجه تاخدها صغيره و فى الاخر بعد كام سنه يبقي عندها 25 عندها دسته عيال مش حاسه بشبابها و هو 45 مش قادر يحسسها بحب و لا عواطف لانه خلاص وصل لحاله سكون و نضج و كل متطلباتها بالنسباله تفاهات، بنات متعلمات تتجوز يتقفل عليها الف باب و باب مفيش شغل مفيش صحاب مفيش حد تعرفيه غيري انا محور حياتك و غير كدا مفيش و كبت نفسي و اكتئاب و فى الاخر تطلع الست كل دا على عيالها و برضو من كتر مشاكلهم العيال بتتربي تربيه غير سليمه، برضو واحده كانت بتعمل تحليل انيميا هزيله جدا وشها اصفر بيقولها الطبيب على حاجات تاكلها ... قالت اصل جوزي بخيل و مش بياكلني و انا بوفر عشان العيال طب دا انتي هتموتي و العيال اللي بتوفري عشانهم مش هيلاقوكي تاني اصلا.

كائن تاني مجرد ما مراته تفطم البيبي الاول يجبرها على الحمل و ميديش جسمها فرصه ياخد نفسه من حمل و ولاده و رضاعه و فى الاخر تلاقيها على الاربعين يجيلها كل الامراض و جسمها ضعف و جهازها المناعي استهلك و جابت اخرها و تموت.

راجل تاني رامي مراته فى مصر متجوز واحدة تانية عليها بره و عاايش حياته بيرملها مليمين كل اول شهر و لا بيشوف عياله و لا بيسآل على زوجته و احتياجاتها، ليه اتجوزت و ترمي ليه مش دي انسانه برضو ليها قلب و كيان!

اللي عايزه اقوله اتقوا الله فى زوجاتكم و اختاروا صح لو لسه مش متزوجين و حبوا قبل الجواز متتجوزوش اي انثي و خلاص عشان متظلموهاش و افتكروا ان الظلم ظلمات يوم القيامه و ان الزوجه دي امانه زي الصحه و العمر هتتسأل على حسن معاملتها و عشرتها، و الستات مش قويه و لا غداره زي مانتوا فاكرين الستات ضعاااف جدا قصاد الحنيه و الاحتواء و الحب و بلااااش الخيانه بلاااش مبتتنسيش و اصعب حاجه على الست انها تحس انها مش ماليه عينك حاول تبص على النعم اللي عندك و متبصش بره و تقبل عيوبها زي ماهي متحمله كل العذاب معاك و عشانك ارحموهم ارحموهم ...طبعا الحالات دي شفتها على مر سنيين من شغلي و انا الحمدلله مش متعقده من الرجاله متزوجه و زوجه اشهد الله انه لم يعاملني بسوء ابدا احسبه عند الله من عباده الصالحين جزاه الله عنا خير جزاء لكن كل اما بشوف راجل بقعد افكر ياتري ايه حكاية القهر اللي بيمارسها ...

كفايه قهر و ذل لمجرد انكم ذكووور كفايه ارحموا انتوا اللي فى ايدكم الدفه فى الزواج انت اللي تقدر تخلي العلاقه ناجحه و تقدر تتعس نفسك و تتعسها صلح اللي ات**ر و ابذل جهد فى اللي انا شايفه انتهي و رجع مراتك لحبك و حياتك هي الاولي من انك لسه هتحاول تبني علاقه جديده و اكيد ربنا هيردلك الظلم اللي انت مارسته عليها فى الدنيا قبل الاخره

و ياريت ترجعوا لسنة النبي عليه افضل الصلاوة و السلام و تفتكروا حديثه النبوي الشريف " استوصوا بالنساء خيراااا "

متبقاش كل همك نفسك و فرض سيطرتك و سطوتك عليها و بس، قدرها هتشوف منها كل خير و كل تقدير.

و بمناسبة الراجل اللى كان عايز يا اما يطلقها يا اما تجهض البنت رقم اربعه اللى هى حامل فيها و هى الحمدلله ما اجهضتش و كملت حملها و طبعآ طلقها و راح يتجوز تانى عشان يجيب الولد، احب اقول لكل الذكور ان تحديد جنس الجنين من سعادتك، اه والله انا عارفه انها مفاجئة تقيلة على امكانيات مخك المحدود، بس الاربع بنات دول نوعهم اتحدد من حضرتك و مراتك مالهاش اى دخل، يا دوب هى بتحمل فى الطفل بتاعك ده و تولدهولك بالسلامة، فانت بصراحه بجح عشان تشترط يا اما الطلاق يا اما الاجهاض و لما ترفض تجهض تروح مطلقها و متجوز، ثقة بالنفس متناهية الصراحة.

و بالنسبة للست الطيبة المحترمة اللى **مت ان جوزها اللى مبيخلفش يعرف ان هى اللى مبتخلفش و ان محدش يواجهه بمشكلته، بنصحها و من قلبي متستقتلش اوى كده و تضحي بنفسها عشان خاطره، لان قريب جدآ هيصدمها بإنه كفايه لحد كده صبر عليها و انه قرر يتجوز و يمكن يبلغها انه هيطلقها كمان لانه مش هيقدر يفتح بيتين و ان الماديات عنده هتبقى على قد بيته الجديد و ولاده اللى هيخلفهم فيه.

فبجد بلاش حد يعمل زيها كده عشان الصدمة هتكون اقوى حاجة فى الدنيا، بس هى من جهة اختبار لاخلاص الزوج ده فهى اختبار كويس، ان نجخ فيه نكمل فى الكدبه و ان منجحش فادينا عرفنا يستحق نضحي بنعمة الخلفة عشانه و لا لا، لكن لو بجد و من جوة القلب و تضحية بقى و استقتال فالصدمة فعلا هتبقى كبيرة لما يبيع مع اول ملف..

اما بقى اللى عماله تخلف عمال على بطال عشان جوزها عايز كده و مش بيوافق يديها فرصة تدى نفسها فترة راحة و تسيب جسمها يرتاح و يتنفس شوية، فاحب اقولها برضو متعمليش كده و متسمحيش ليه يدمرك و يقتل فيكى صحتك فى كل لحظة و لو معاكى عيل و لا اتنين فهما اولى بالصحة والجهد اللى بتضيعيهم فى الحمل و الولادة و لا انتى و لا هو اصلا فى الاخر مركزين مع عيال و مسئولية العيال، و هفاجئك كمان انك لما تتبهدلى خالص و شبابك يضيع و شكلك الحلو و جسمك المتناسق يبوظوا و صحتك تبقى فى النازل، هيروح البيه بقى يدور على واحدة تانية فيها كل الحاجات اللى فقدتيها و يدلع نفسه و يعيش بقى، و لو فتحتى بوقك هيقولك ما تبصي لنفسك بقيتى عاملة ازاى، ذنبي ايه انا انى استحمل وضع زى ده و عمرى يضيع من غير ما اعيش حياتى و احس برجولتى مع واحدة ست حلوة و بصحتها و مهتمه بنفسها!، اه والله هيقولك كده عايزة تجربي اسمعى كلامه و اقعدى خلفى زى الارانب كده، بس احنا هنا بنتكلم عن انك هتخسري نفسك و ده اهم من انك هتخسريه هو و لا لا عشان اللى زيه اصلا ميتبكيش عليه..

و زى ما عرفنا الراجل اليت بتعمل عشانه ايه و بتتبهدل بسببه ازاى، و وريناه حقيقته برضو.

زى برضو ما هننصح الست و نقولها فوووووقى لنفسك، فوقى لمصلحتك و حياتك، متسمعيش كلامه فى الحاجات اللى ممكن تإذيكى و تدمرك و تبقى اقصى طموحاتك هى انك تشوفيه مبسوط و سعيد، عشان الراجل اللى يستحق منك تسعديه و تفرحيه و تخافى انه يضيع منك هو الراجل اللى عمره ما هيعرضك للخطر، و هيبقى خايف عليكى اكتر من اى خاجة فى الدنيا، و لو اتعارضت رغباته مع مصلحتك، هيختار مصلحتك و هيقول طظ لرغباته.

و برضو الحياة مش حرب و نوقف لبعض على الواحدة و نشغل سوء الظن طول الوقت، لا طبعآ، و دايما نفترض حسن النية فى الطرف الاخر، بس فى حاجات كده بتبقى واضحة وضوح الشمس و ميختلفش عليها اتنين، بس احنا اللى بنحب نتغافل و نكمل و نضحي و نعيش دور الابطال و بعد كده نرجع نعيط و نندم فى وقت مينفعش فيه الندم ...